Ebre 11 - A SƐB-SÕW

A naaŋmɩn-sàw-deb yele

¹ A naaŋmɩn-sàw-deb n'ɩ fʋ na bɛ bʋ́nɛ kɛ́ fʋ na páw nɩ a bom ʋl fʋ na tɩɛrɛ a, ʋ mɩ́ wul'a kɛ́ a yele fʋ na bɛ mɩ́ nyɛ̃ a be na.

² A bɛ sàw-deb zũú n'a Naaŋmɩn dɩ a nɩ-kore dãsɩɛ.

³ A sàw-deb zũú n'a tɩ bãw k'aa ʋ ƴɛ̀rʋ n'a Naaŋmɩn cɔbrɩ nɩ a zie. A ɩ a lɛ a bom fʋ na mɩ́ nyɛ̃ a yi bom fʋ na bɛ mɩ́ nyɛ̃ a pʋɔ.

⁴ A sàw-deb zũú n'a Abɛl tɩ maalɩ bàwr na vɩɛl zuo Kayɛ̃ dem a kʋ̀ a Naaŋmɩn. A sàw-deb ƴãw n'a a Naaŋmɩn tɩ yel k'ʋʋ ɩ n nɩ-mɩŋa, a Naaŋmɩn mɩŋa na tɩ sàw de a bome a Abɛl na kʋ̀ ʋ a ƴãw. A ʋ sàw-deb zũú, a Abɛl na saa kpi a cãà na ƴɛ̀rɛ.

⁵ A sàw-deb zũú n'a bɛ tɩ ír a Enɔkɩ cen nɩ a Naaŋmɩn zie k'ʋʋ ta kpi ɛ. Bɛ bɛ lɛb tɩ nyɛ̃ ʋ ɛ, a Naaŋmɩn na tɩ ír ʋ cen nɩ a ʋ zie a ƴãw. Bʋ̃ʋ n'ʋ vɛ̃, bɛ na bɛ tɩ ír ʋ sɛr a, a Sɛb-sõw tɩ dɩ n a ʋ dãsɩɛ yel k'ʋʋ pɛlɩ nɩ a Naaŋmɩn pʋɔ.

⁶ Ɛcɛ a sàw-deb bɛ wa ka be a, nɩr kʋ̃ tʋ̃ɔ́ pɛlɩ a Naaŋmɩn pʋɔ ɩ. Bʋ̃ʋ n'ʋ vɛ̃, sob nɛ na tawr pɩɛlɛ a Naaŋmɩn a, a fɛr'a k'ʋʋ sàw de k'aa Naaŋmɩn be na ɛ́ mɩ́ maalɩ a bɛlɩ dem na bɔbr ʋ a.

⁷ A sàw-deb zũú n'a Nowe tɩ bɛr wõ a lɛ Naaŋmɩn na tɩ yel kʋ̀ ʋ, yele bɛ na bɛ tɩ nyɛ̃ sɛr a ƴãw. Ʋ bɛ tɩ de dɩ̃ɛnʋ ƴãw a lɛ a Naaŋmɩn na tɩ yel a ƴãw ɛ, ɛ́ tɩ maalɩ gbor-kpɛ̃ɛ ʋlɛ nɩ a ʋ yir dem faafʋ ƴãw. À ŋá n'a ʋ tɩ wul a tẽ-daa sãwna, ɛ́ a Naaŋmɩn nyɛ̃ ʋ ɩ nɩ-mɩŋa, a ʋ sàw-deb zũú.

⁸ A sàw-deb zũú, a Naaŋmɩn na tɩ bʋɔlɩ a Abraham a, ʋ sàw na ɛ́ yi cen tẽw a Naaŋmɩn na na kʋ̀ ʋ k'ʋ so ʋ a. Ʋ tɩ yi na cere, ɛ́ bɛ bãw be ʋ na cere a ɩ.

⁹ A sàw-deb zũú n'a ʋ tɩ kpɛ a tẽw ʋl mɛ̃ nʋʋra a, a tẽw ʋl a Naaŋmɩn na yel k'ʋʋ na kʋ̀ ʋ na a. Pɛn-sɛw pʋɔ n'a ʋ tɩ kpɩɛr, ʋlɛ nɩ a Ɩzaakɩ nɩ a Zakɔb, a bɛl a Naaŋmɩn mɩ̀ na tɩ ƴãw a ʋlɩ nɔ-been nɛ kʋ̀ a.

¹⁰ Bʋ̃ʋ n'ʋ vɛ̃, a Abraham tɩ gùre nɩ tẽ-kpɛ̃ɛ bɛ na sʋ̃ɔ́ a pɛr ʋ kpɛmɛ a, ɛ́ a Naaŋmɩn ɩ a sob nɛ na tɩɛrɩ a mɩɛrʋ, ɛ́ lɛb ɩ a mɩɛrɛ a.

¹¹ A sàw-deb zũú n'a Saara mɩ̀ tɩ páw a bie dɔwfʋ fãw, ʋ na saa tɩ kor baar'a. Ʋ na tɩ sàw k'aa Naaŋmɩn na ƴãw a nʋɔr a ŋmɛ̃ n ʋ ŋmɛ̃a a.

¹² À à ŋá n'a nɩ-been yõ na tɩ kpi ʋ za baar'a, tɩ dɔw nɩbɛ bɛ yãwmɛ mɛ̃ a salom zu ŋmar-bie a, bɛ bɛ tɛr nʋɔr ɛ, mɛ̃ a kʋ̃ɔ-kpɛ̃ɛ nʋɔr biire a.

¹³ A sàw-deb'ʋ a nɩbɛ bɛ ŋa za tɩ tɛr kpi n, ɛ́ bɛ páw a bome a Naaŋmɩn na yel k'ʋʋ na kʋ̀ bɛ na ɩ, ɛcɛ bɛ tɩ cãà na zãá ɛ́ nyɛ̃ a, ɛ́ puor'a, ɛ́ sàw kɛ́ bɛ ɩ n nʋʋrɩ nɩ sɔr-tɔlbɛ a tẽw zu.

¹⁴ A bɛlɩ dem na ƴɛ̀rɛ à à ŋá a, bɛ wul'ɩ cãàmɩlɛ kɛ́ sãà-tẽw n'ʋ bɛ bɔbr gʋɔr'ɩ.

¹⁵ A tẽw ʋl bɛ na yi kɛ́ bɛr a tɩ n'ʋ bɛ tɩɛrɛ a, bɛ nãá nyɛ̃ nɩ vuo lɛb cen a ʋ pʋɔ.

¹⁶ Ɛcɛ alɛ ɩrɛ mɛ̃ bom'ʋ a, sãà-tẽw na vɩɛl zuo a n'ʋ bɛ tɩ bɔbr, a pɛr lɛ k'aa tẽ-vla pʋɔ dem. Lɛ so a bɛ ɩrɛ a Naaŋmɩn vĩ bɛ na bʋɔlɛ ʋ a bɛ Naaŋmɩn a ɩ, bʋ̃ʋ n'ʋ vɛ̃, ʋ cɔbr'ɩ tẽ-kpɛ̃ɛ a bɛ ƴãw.

¹⁷ A sàw-deb zũú n'a a Abraham tɩ maal'ɩ a Ɩzaakɩ bàwr, a lɛ a Naaŋmɩn na tɩ bãw kɛ́ ɩ ʋ kaa a. A ʋ bi-been n'ʋ ʋ tɩ maalɛ nɩ a bàwr, ʋl Naaŋmɩn na tɩ ƴãw a nʋɔr kʋ̀,

¹⁸ ɛ́ yel à ŋá kʋ̀ ʋ a: «A Ɩzaakɩ n'ʋ na so fʋ páw a bʋʋrɛ ɩ̃ na yel k'ɩ̃ɩ na kʋ̀ b a a.»

¹⁹ Ɛcɛ a Abraham tɩ tɩɛrɛ na kɛ́ Naaŋmɩn na tʋ̃ɔ́ na ɩ a Ɩzaakɩ ʋ lɛb yi a kũuni pʋɔ, lɛb so a Naaŋmɩn tɩ lɛb kʋ̀ ʋ a ʋ bie, ʋ ɩ nɩdaar yel bãwfʋ.

²⁰ A sàw-deb zũú mɩ̀ n'a a Ɩzaakɩ tɩ ƴɛ̀r nɔ-vla kʋ̀ a Zakɔb nɩ a Ezawu a nɩdaar ƴãw.

²¹ A sàw-deb zũú n'a a Zakɔb na tɩ waar na kpi a, tɩ ƴɛ̀r nɔ-vla kʋ̀ a Zuzɛb bibiir been been, ɛ́ nyɔw a ʋ dabɔl nyʋɔr ƴãw ɛ́ gũu puori Naaŋmɩn.

²² A sàw-deb zũú n'a a Zuzɛb na tɩ ta kũu a, tɩ ƴɛ̀r por a Ɩsɩrayɛl bibiir na na yi a Eziptɩ tẽw pʋɔ a yúor, ɛ́ yel a lɛ ʋ na bɔbr kɛ́ bɛ wa ɩ a ʋ kɔbɛ a.

²³ A sàw-deb zũú n'a a Moyiir na tɩ dɔw a, a sãà nɩ a mã tɩ sɔwl'ʋ cuwr ata. Bɛ tɩ nyɛ̃ ʋ na ʋ ɩ bie na vɩɛl a, ɛ́ bɛ bɛ zɔ dɛ̃bɩ̃ɛ a nãà nʋɔr zawrʋ ƴãw ɛ.

²⁴ A sàw-deb zũú n'a a Moyiir na wa ɩ kpɛ̃ɛ baar'a bɛ sàw bɛ bʋɔlɛ ʋ a Faarawɔ̃ pɔwyaa bidɛb ɛ.

²⁵ Ʋ tɩ nyɛ̃ na bɛ na na dɔwrɩ ʋ lãwnɩ a Naaŋmɩn nɩ-bʋʋrɛ a, a sa a yel-bier nʋ̃ɔ̀ ʋ na na wõ blã a.

²⁶ Ʋ mɩ̀ tɩ nyɛ̃ na bɛ na na ɩ ʋ la mɛ̃ a Kɩrɩta bɛ na ɩ la a, a vɩɛl zuo a Eziptɩ tẽw na-bome, bʋ̃ʋ n'ʋ vɛ̃, a maalʋ na waar a n'a ʋ tɩ tori niwn jɩ́rɛ.

²⁷ A sàw-deb zũú n'a a Moyiir tɩ yi kɛ́ bɛr a Eziptɩ tẽw, ɛ́ bɛ tɩ zɔ dɛ̃bɩ̃ɛ a nãà na na nyɛ̃ suur a ƴãw ɛ. Ʋ tɩ kpɛmɛ na be be, mɛ̃ ʋ nyɛrɛ nɩ a Naaŋmɩn nɩr na kʋ̃ tʋ̃ɔ́ nyɛ̃ a.

²⁸ A sàw-deb zũú n'a ʋ tɩ maalɩ a Tɔl-gãw cuw ɛ́ ƴãw bɛ ƴãw a zɩ̃ɩ a dɩ̃dɛɛ ƴãw, k'aa kũu malkɩ taa wa tʋɔr a Ɩsɩrayɛl nɩbɛ bidɛb-dãw-dɔwrɩ ɛ.

²⁹ A sàw-deb zũú n'a bɛ tɩ gãw a Kʋ̃ɔ-kpɛ̃ɛ-zɩɛ mɛ̃ tẽsɔw-kõw n'ʋ a, ɛ́ a Eziptɩ tẽw dem mɩ̀ na tɩ yel kɛ́ bɛ ɩ kaa a, tu kʋ̃ɔ.

³⁰ A sàw-deb zũú n'a a Ɩsɩrayɛl bibiir tɩ cen viiri koli a Zeriko tẽw dacĩ-kpɛ̃ɛ bibie ayopõi, ʋ lo.

³¹ A sàw-deb zũú n'a a pɔw-yɛm Arahab bɛ tɩ kpi lãwnɩ a bɛlɩ dem na bɛ tɩ de a Naaŋmɩn a ɩ, ʋ na tɩ de a nɩbɛ na wa a tẽw piwru ƴãw a vla a.

³² Bʋ̃ʋ n'ʋ ɩ̃ na lɛb yel? Vuo bɛ ka be ɩ̃ na ƴɛ̀r a Zedeɔ̃, Barakɩ, Samsɔ̃, Zɛfɩte, Daviir, Samɩɛl nɩ a naaŋmɩn-ƴɛ̀r-manbɛ ƴɛ̀rʋ ɛ.

³³ A sàw-deb zũú, bɛ tɩ zɛb'a tʋ̃ɔ́ na-mɩnɛ ten, ɛ́ tɩ tu a mɩnʋ pùor, ɛ́ páw a alɩ bome nɛ a Naaŋmɩn na yel k'ʋʋ na tɩr a a. Bɛ tɩ pàw nɩ gben nɛ́ɛ,

³⁴ kpiiri vũu-bɛrɛ bɛrɛ bɛr, bɛ bɛ tɩ tʋ̃ɔ́ kpi a zɛbr-sɔ-kpɛ̃ɛ kũu ɛ. Bɛ tɩ lɛb'a nyɛ̃ fãw a bàalʋ pùorí, bɛ tɩ wul'ɩ a zɛbr zie kɛ́ bɛ ɩ n gãdaar, ɛ́ cã a dɔ̃ dem zɛbr-nɩbɛ bɛr bɛ lɛb.

³⁵ A sàw-deb zũú, pɔwbɛ tɩ lɛb'a nyɛ̃ a bɛ nɩbɛ na kpi a bɛ lɛb yi a kũu pʋɔ. Ɛcɛ bɛ tɩ dɔwr'ɩ bɛ mɩnɛ tɩ kʋ. Bɛ bɛ tɩ sàw bɛ na faa bɛ ɩ, kɛ́ bɛ tʋ̃ɔ́ wa lɛb yi a kũu pʋɔ páw a nyɔ-vʋʋrʋ na vɩɛl zuo a.

³⁶ Bɛ mɩ̀ tɩ ɩ n bɛ mɩnɛ la ɛ́ fɔb bɛ, ɛ́ ƴãw bɛ mɩnɛ bamɛ lɔb ƴãw gaso pʋɔ.

³⁷ Bɛ tɩ lɔb'ɩ bɛ mɩnɛ nɩ kʋsɛbɛ kʋ, fɔw bɛ mɩnɛ ŋma ziir ayiri nɩ sɔ-nyɩmɛ, kʋ bɛ mɩnɛ nɩ zɛbr-sɔ-kpɛ̃ɛ. Bɩɩ bɛ mɩ́ tɩ cɔlɛ na gʋɔr, su píir bɩɩ bʋʋr gamɛ kparɩ. Bɛ bɛ tɩ tɛr bom ɛ, ɛ́ bɛ ɩrɛ a kpɩɛr bɛ, dɔwrɛ nɩ bɛ.

³⁸ A tẽ-daa bɛ tɩ sɛw taa nɩ a nɩbɛ bɛ ŋa ɩ. Bɛ mɩ́ tɩ bɔrɛ na gʋɔr a wɛja-kpalɩ pʋɔ nɩ a tan pʋɔ, ɛ́ kpɩɛr a tãw bɔwrɩ pʋɔ nɩ a tẽw bɔwrɩ pʋɔ.

³⁹ A Naaŋmɩn tɩ dɩ n a bɛ za dãsɩɛ a bɛ sàw-deb zũú, ɛcɛ bɛ bɛ tɩ páw a ʋlɩ bom nɛ ʋ na ƴãw nʋɔr k'ʋʋ na tɩr a a ɩ.

⁴⁰ Bʋ̃ʋ n'ʋ vɛ̃, a Naaŋmɩn tɩ de nɩ niwn bãwnɩ tɩ bom na vɩɛl zuo a, kɛ́ bɛ ta ta a vɩɛlʋ zie ɛ́ bɛr tɩ ɛ.