Kɔlɔsɩ 3 - A SƐB-SÕW

¹ Nyɩ na lãw nɩ a Kɩrɩta lɛb yi a kũu pʋɔ a, nyɩ bɔbr a saa-zu bome, be a Kɩrɩta na be zɩ̃ a Naaŋmɩn dʋrʋ lowr a.

² Nyɩ bɔbr a saa-zu bome, nyɩ ta bɔbr tẽw zu ka dem ɛ.

³ Nyɩ sɩrɩ na lãw nɩ a Kɩrɩta kpi, ɛ́ a nyɩ nyɔ-vʋʋrʋ lãw nɩ ʋ sɔwlɩ be a Naaŋmɩn zie.

⁴ A Kɩrɩta na ɩ a nyɩ nyɔ-vʋʋrʋ a, ʋlɛ wa sãá a lɛn daar a, nyɩ mɩ̀ na lãw nɩ ʋ na sãá a yúor-vɩɛlʋ-danʋ pʋɔ.

A nyɔ-vʋʋr-kʋra nɩ a nyɔ-vʋʋr-paala

⁵ A na ɩ à ŋá a, nyɩ kʋ bom nɛ za na ɩ tẽw zu yele a, a nyɩ pʋ̃ɔmɩ: a pɩ̃ɔ-yele, a faalʋ, a ƴã-gan nʋ̃ɔ̀-faar, a yel-faar vʋla, nɩ a mimir na ɩ tɩbɛ ƴãwfʋ a.

⁶ A yel-faar á ŋá taabɛ n'a mɩ́ ɩ a Naaŋmɩn suur ìr.

⁷ À ŋá n'a nyɩ tɩ dãw ɩrɛ, à ŋá n'a nyɩ tɩ dãw vʋʋrɛ.

⁸ A na ɩ à ŋá a, a ƴɛrɛŋa a, nyɩ ír à á ŋá za bɛr a nyɩ nyɔ-vʋʋrʋ pʋɔ: a suur, a jɛb, a po-tuolu, a zʋmɛ, nɩ ƴɛ̀r-faa za na yire a nyɩ nʋɔrɩ́ a.

⁹ Nyɩ ta cãà ŋmarɛ ziri ƴãwnɛ taa ɩ, bʋ̃ʋ n'ʋ vɛ̃, nyɩ yaa nɩ a nɩsaal-kʋra nɩ a ʋ ɩ-ɩrɩ za bɛr,

¹⁰ ɛ́ su a nɩ-paala ʋl a ʋ Íre na maalɛ kʋralɛ ʋ ɩrɛ paala, ɛ́ ŋmɛ̃ taa nɩ ʋ k'ʋʋ tʋ̃ɔ́ bãw ʋ vla za a.

¹¹ A lɛ pʋɔ a, Zifʋ nɩ nɩr na bɛ ɩ Zifʋ a bɛ cãà be ɩ, nɩr na ŋmãa yʋ̀ɔr nɩ nɩr na bɛ ŋmãa a bɛ cãà be ɩ, nʋʋra nɩ nasa-zɔ̃w daar nɩr bɛ ka be ɩ, gbãgbaa nɩ nɩr na so ʋ tʋɔra a bɛ cãà be ɩ. Kɩrɩta yõ n'ʋ be be ɩ bom za a bɛ za pʋɔ.

¹² Nyɩ na ɩ a Naaŋmɩn nɩ-kaa-íri, ʋʋ ɩ nyɩ ɩ son, ʋʋ nɔ̃w nyɩ a zũú, nyɩ ɩ su-ɓaarʋ nɩbɛ, nɩsaal-pɔwlbɛ, nyɩ siwre nyɩ tʋɔra, nyɩ ɩ su-nʋ̃ɔ̀ nɩ su-zãánɩ nɩbɛ.

¹³ Nyɩ sàw dier taa ɩ-ɩrɩ ɛ́ dɩrɛ suur kʋ̀rɛ taa kãw wa sãw a ʋ tɔ a: mɛ̃ a lɛ a Sore na dɩ suur kʋ̀ nyɩ a, nyɩ mɩ̀ dɩrɛ suur kʋ̀rɛ taa.

¹⁴ Ɛcɛ baa zuo a za, nyɩ de a nɔ̃w-taa bin a nyɩ sɔgɔ, ʋlɛ n'ʋ mɩ́ kʋ a yele za nʋɔr a vɩɛl bɛ cɛ ɩ.

¹⁵ A Kɩrɩta ƴã-ɓaarʋ, ʋ dɩ naalʋ a nyɩ socie pʋɔ, a ƴã-ɓaarʋ ŋa pʋɔ n'a ʋ bʋɔlɩ nyɩ kɛ́ nyɩ wa lãw taa mɛ̃ ƴãw-been a. Nyɩ tɛr barka puoru tɩɛrʋ a nyɩ nyɔ-vʋʋrʋ pʋɔ.

¹⁶ A Kɩrɩta ƴɛ̀rʋ, ʋ be a nyɩ pʋɔ yaga za. Nyɩ wule taa ɛ́ kpaalɛ taa nɩ yã-bãwfʋ. Nyɩ yiele puore nɩ a Naaŋmɩn yãanɩ nɩ nyɩ pʋɔ za, nɩ Sɛb-sõw yielu, nɩ danʋ, nɩ yielu Vʋʋrʋ Sõw na waalɩ kʋ̀ nyɩ a.

¹⁷ Bom nɛ za nyɩ na ɩrɛ a, a nyɩ nʋɔr ƴɛ̀rʋ pʋɔ n'a bɩɩ a nyɩ ɩ-ɩrɩ pʋɔ n'a a, a mɩ́ ɩ a Sore Yeezu yúor ƴãw n'a nyɩ ɩrɛ a lɛ, puore nɩ a Naaŋmɩn Sãà barka a Sore Yeezu zũú.

A nyɔ-vʋʋr-paala ɩ-ɩrɩ a nyɩ cara pʋɔ

¹⁸ Pɔwbɛ ɛ, nyɩ sàwr a nyɩ sɩrbɛ nʋɔr mɛ̃ a lɛ a na sɛw a Sore zie a.

¹⁹ Sɩrbɛ ɛ, nyɩ nɔnɛ a nyɩ pɔwbɛ, nyɩ ta mɩ́ sãwnɛ niwn ƴãwnɛ bɛ ɩ.

²⁰ Bibiir i, nyɩ sàwr a nyɩ dɔwrbɛ nʋɔr a yele za pʋɔ, lɛ n'a vɩɛl a Sore zie.

²¹ Dɔwrbɛ ɛ, nyɩ ta ɩrɛ a nyɩ bibiir nyɛrɛ suur ɛ, nyɩ nãà mab'a ɩ bɛ bàl.

²² Gbãgbaar i, nyɩ sàwr a nyɩ tẽw zu ka nɩ-bɛrɛ nʋɔr a yele za pʋɔ. Nyɩ ta tone bɛ bɛ na piwre nyɩ a ƴãw, a ɩ mɛ̃ nyɩ bɔbr'a kɛ́ nyɩ ɩrɛ a pɛlɩ nɩsaalbɛ pʋɔ a ɩ. Nyɩ tone nɩ a nyɩ pʋɔ za, mɛ̃ a lɛ a bɛlɩ dem na zɔrɛ a Sore a na mɩ́ ɩrɛ a.

²³ Ton za nyɩ na tone a, nyɩ tone nɩ nyɩ pʋɔ za mɛ̃ a Sore ƴãw n'a a, a ta ɩ a nɩsaalbɛ ƴãw ɛ,

²⁴ ɛ́ nyɩ bãwnɩ a kɛ́ nyɩ na páw nɩ a sã-ya na ɩ a gbã-dɩ-bom a, a Sore zie. A Nɩ-kpɛ̃ɛ za n'ɩ a Kɩrɩta, nyɩɩm be n a ʋ tome ƴãw.

²⁵ Nɩr za na maalɛ faa a na páw nɩ a faa sã-ya, owru bɛ ka be ɩ.