Kɔlɔsɩ 2 - A SƐB-SÕW

¹ Sɩza n'a, ɩ̃ bɔbr'a kɛ́ nyɩ bãwnɩ a k'ɩ̃ɩ mʋɔr'ɩ mɔb na ɩ mɔb a, a nyɩ ƴãw, a Lawdise tẽw dem ƴãw, nɩ a ŋmaarɛ yaga bɛl za na bɛ dãw nyɛ̃ m towtow a ƴãw.

² Ɩ̃ bɔbr'a k'ɩ̃ɩ ɩ à ŋá bɛ kpɛ socir yaga za, bɛ lãw taa nɔnɛ taa tʋ̃ɔ́ páw a yã za naalʋ kpɛ, tʋ̃ɔ́ bãw a Naaŋmɩn yel-sɔwla na ɩ a Kɩrɩta a.

³ Ʋl zie n'a a yã-bãwfʋ na-bome nɩ a yele bãwfʋ na-bome sɔwlɩ gã.

⁴ Ɩ̃ yere nɩ à ŋá kɛ́ nɩr za ta tʋ̃ɔ́ bɛlɩ nyɩ nɩ nɔ-kãá ƴɛ̀rʋ ɛ.

⁵ Mãa saa bɛ be a nyɩ sɔgɔ a, a ɩ̃ tɩɛrʋ za be n a nyɩ zie, ɛ́ nʋ̃ɔ̀ kpɩɛr mɛ̃ na, ɩ̃ na nyɛ̃ nyɩ bɛ lɛb pùor ɛ́ cãà kpɛmɛ a nyɩ Kɩrɩta sàw-deb pʋɔ a.

Nyɩ páw nɩ nyɔ-vʋʋrʋ za nyɩ na lãwnɩ a Kɩrɩta a

⁶ A na ɩ à ŋá nyɩ sàw de kɛ́ a Yeezu Kɩrɩta n'ɩ a Sore a, nyɩ lãw nɩ ʋ vʋʋrɛ.

⁷ Nyɩ tɛ nyɩgɛ a ʋ pʋɔ, ɛ́ ƴãw a nyɩ nyɔ-vʋʋrʋ yele za tɩɛrʋ a ʋ ƴãw, lɛ n'a nyɩ na kpɛmɛ a naaŋmɩn-sàwfʋ pʋɔ mɛ̃ a lɛ bɛ na wul nyɩ a, ɛ́ puore a Naaŋmɩn yãanɩ bɛ dɩ vuo ɩ.

⁸ Nyɩ gù vla nɩr za taa bɛlɛ nyɩ nyɔwr nɩ a nɩsaalbɛ yã-bãwfʋ nɩ a bɛ bãw-voru na mɩ́ tu sãàkʋm-kore yele nɩ a tẽ-daa bʋ̃-balɛ, ɛ́ bɛ tu a Kɩrɩta a ɩ.

⁹ Bʋ̃ʋ n'ʋ vɛ̃, a Kɩrɩta ƴã-gan pʋɔ a, naaŋmɩnʋ za be n be,

¹⁰ ɛ́ a ʋ pʋɔ n'a nyɩ páw bom za, ʋl na ɩ naalʋ-dɩb za nɩ fãw bʋʋrɛ za yib zie a.

¹¹ Nyɩ na lãw nɩ ʋ a, bɛ ŋmãa nyɩ nɩ a yʋ̀ɔr ŋmãafʋ kãw bʋʋrɛ nɩsaal nũu na bɛ pʋɔ a, ɛ́ a ŋmãafʋ ŋa ɩ nyɩ bɛ cãà ɩ yel-bier nɩbɛ a. À ŋá n'a a ŋmãafʋ na yi a Kɩrɩta zie a ŋmɛ̃.

¹² Nyɩ na de a suob a, bɛ ũù nyɩ na lãwnɩ a Kɩrɩta a bɔw pʋɔ. Bɛ mɩ̀ ɩ na nyɩ lãw nɩ ʋ lɛb yi, a nyɩ na sàw kɛ́ a Naaŋmɩn tɛr'ɩ fãw a zũú, a fãw ŋa na ɩ a Kɩrɩta ʋ lɛb yi a kũuni pʋɔ a.

¹³ Ɛ́ a nyɩɩm na tɩ dãw ɩ kũuni a nyɩ yel-bebe zũú nɩ bɛ na bɛ tɩ ŋma a nyɩ yɛɛ a zũú, a Naaŋmɩn kʋ̀ nyɩ nɩ nyɔ-vʋʋrʋ lãwnɩ a Kɩrɩta: ʋ dɩ n a tɩ yel-bebe za suur kʋ̀ tɩ.

¹⁴ A san-sɛbɛ ʋl na tɩ fɛrɛ tɩ a lɛ a nɛ-ƴãwnɩ na tɩ dĩ tɩ a, a Naaŋmɩn sãw nɩ a ʋlɩ san-sɛbɛ bɛr: ʋ ɩ na ʋ bɔr, ʋ kpa ʋ nɩ a da-gara zu.

¹⁵ Ʋ zɛb'a tʋ̃ɔ́ a naalʋ-dɩb bʋʋrɛ za nɩ a fãw za, ʋ ɩ na a lɩɛbɩ bʋ̃-ɩ-laarɩ a nɩbɛ niŋé, a ɩ a gbãgbaar a ʋ Bie na zɛb tʋ̃ɔ́ bɛ cɔrɩ tuur ʋ a.

¹⁶ A na ɩ à ŋá a, nyɩ ta sàw nɩr za tɛrɛ nɩ nyɩ ƴɛ̀rʋ bʋ̃-dɩra bɩɩ bʋ̃-nyúura kãw ƴãw ɛ, cuw kãw ƴãw, cuw-paala ƴãw bɩɩ pɩ̃ɛnʋ-bibir ƴãw ɛ.

¹⁷ À á ŋá za ɩ n a nɩdaar yele dasule, ɛcɛ a lɛ a yele na sɩrɩ ŋmɛ̃ a, Kɩrɩta zie n'a a yi.

¹⁸ Nyɩ ta sàw a bɛlɩ dem na nɔnɛ tʋɔra-siwru ɩ-ɩrɩ a nɩbɛ niŋé a, bɩɩ na tɛr a malkɩ mɩnɛ ƴãwfʋ a, ɛ́ mɩ́ nyɛ̃ a bɛ bʋ̃-nyɛrɩ a ɩ bʋ̃-sɩza zuo a, nyɩ ta sàw bɛ wa yel kɛ́ nyɩ sãw na ɩ. A nɩbɛ bɛ ŋa taabɛ mɩ́ ɩrɛ nɩ pɔ̀l-ɩb zawla, bɛ na mɩ́ tɩɛrɛ a yele mɛ̃ nɩsaal tɛwr a ƴãw.

¹⁹ Bɛ bɛ lãw nɩ a Kɩrɩta na ɩ a ƴã-gan zu a ɩ. Ɛcɛ a Kɩrɩta zũú n'a a ƴã-gan za páwr a dɩb, ɛ́ a kɔbɛ tuor-taa ziir nɩ a jiile ɩ ʋ nyɔw taa ɛ́ kɛrɛ mɛ̃ a lɛ a Naaŋmɩn na bɔbr a.

Nyɩ lãw nɩ nɩ a Kɩrɩta kpi ɛ́ lãw nɩ ʋ lɛb vʋʋrɛ

²⁰ A na ɩ lɛ nyɩ lãw nɩ a Kɩrɩta kpi yi zaa a tẽ-daa bʋ̃-balɛ pʋɔ a, bʋ̃ʋ ƴãw n'a nyɩ fɛrɛ nyɩ tʋɔra tuur a nɛ́ɛ á ŋá taabɛ, mɛ̃ a tẽ-daa n'ʋ cãà so a nyɩ nyɔ-vʋʋrʋ a:

²¹ ta de bom ŋa ɩ, ta lɛm bom ŋa ka a ɩ, ta tɔ bom ŋa ɩ?

²² Ɛ́ à á ŋá za càar'ɩ bome na kʋ̃ cãà be, bɛlɛ wa tone nɩ a a. Nɩsaalbɛ nɛ-ƴãwnɩ nɩ a bɛ wulu sɩrɩ n'ɩ à á ŋá.

²³ Sɩza n'a, a mɩ́ sãá na mɛ̃ yã-bãwfʋ be n a nɛ́ɛ á ŋá pʋɔ a, bʋ̃ʋ n'ʋ vɛ̃, a mɩ́ ƴɛ̀rɛ nɩ ŋa za nɩ ʋ puoru ƴɛ̀rʋ, tʋɔra-siwru ƴɛ̀rʋ, ƴã-gan dɔwrʋ ƴɛ̀rʋ, ɛcɛ a bɛ tɛr tɔnɛ kãw za ɩ, nɩsaal ƴã-gan yã-nɔn tɛwr'a a maalɛ.