Amɔsɩ 9 - A SƐB-SÕW

A bʋ̃-nyɛrɩ anũu sob: a zi-sõw loba

¹ Ɩ̃ tɩ nyɛ̃ nɩ a ɩ̃ Sore ʋ àr saaƴẽwn a bàwr-maal-kuur zu, ɛ́ yere: «Ŋmɛ a kpule zuru lɔb, ɛ́ a pɛ́ɛ dam! Ŋmɛ a ŋmɛr a lo a bɛ za zurú, ɛ́ a bɛ ŋmaarɛ na na cɛ a, zɛbr-sɔ-kpɛ̃ɛ n'ʋ ɩ̃ na kʋ n bɛ. Nɩr za kʋ̃ tʋ̃ɔ́ zɔ ɩ, been kʋ̃ be a bɛ pʋɔ cɩ̃ɛ ɩ.

² Bɛlɛ wa tʋ̃ɔ́ ta a kpɩmɛ tẽw a, ɩ̃ na cen nɩ a be tɩ ír bɛ, bɛlɛ wa do a salom zu a, ɩ̃ na ɩ na bɛ wa siw.

³ Bɛlɛ wa do a Karmɛl tãw nyʋɔrɩ́ tɩ sɔwlɩ a, ɩ̃ na bɔ bɛ na nyɔw a be. Bɛlɛ wa siw a kʋ̃ɔ-kpɛ̃ɛ pʋɔ tɩ sɔwlɩ a ɩ̃ niŋé a, ɩ̃ na ƴãw na a wa-bɩɛ cɛ bɛ.

⁴ Bɛlɛ wa cen a bɛ dɔ̃ dem zie tɩ lɩɛbɩ nɩ-pàwrɩ a, ɩ̃ na ƴãw na bɛ kʋ bɛ a be. Ɩ̃ na ír'ɩ mimir ƴãw bɛ a bɛ faa ƴãw, a kʋ̃ ɩ a bɛ vla ƴãw ɛ.»

⁵ A Sore Naaŋmɩn, a Naaŋmɩn kpɛnʋ-za-sob mɩ́ tɔ n a tẽw ʋ damnɛ, ɛ́ a tẽw za nɩbɛ be wahala pʋɔ. A tẽw mɩ́ vʋ̃ n ʋ za mɛ̃ a man a, ɛ́ lɛb siw lo mɛ̃ a Eziptɩ tẽw man a.

⁶ A sob nɛ na mɛ a ʋ bɔwpɩɛ a salom zu a, a ʋl na ŋmãa a ʋ nãà yir a tẽw saa-zu a, a ʋl na mɩ́ bʋɔlɩ a kʋ̃ɔnɩ ɓãá taa ɛ́ cir a waarɩ a tẽw a, a ʋ yúor'ɩ a Sore.

A sãwna dem na nyɛ̃ nɩ dɔwrʋ

⁷ À ŋá n'a a Sore yere: «Ɩsɩrayɛl nɩbɛ ɛ, nyɩ tɩɛr kɛ́ nyɩ zuo nɩ a Etiopi tẽw nɩbɛ a ɩ̃ niŋé e? Sɩza n'a, mãa bɛ n'ʋ tɛr nyɩ yi n a Eziptɩ tẽw, ɛ́ mɩ̀ tɛr a Filisɩtɛ̃ mɩnɛ yi n a Kafɩtɔɔr tẽw e? Mãa mɩ̀ bɛ n'ʋ lɛb tɛr a Aram tẽw dem yi n a Kɩ́ɩ̀r tẽw e?»

⁸ A Sore ɩ̃ Naaŋmɩn mimir be n a naalʋ-tẽw ʋl na sãw a ƴãw. Ɛ́ à ŋá n'a a Sore yere: «Ɩ̃ na kʋ n a naalʋ-tẽw ʋl nɩbɛ pàw pɛr a tẽw zu. Ɛcɛ ɩ̃ kʋ̃ kʋ a Zakɔb yir nɩbɛ za pàw pɛr ɛ.

⁹ Bʋ̃ʋ n'ʋ vɛ̃, ɩ̃ ƴãwnɛ nɩ nʋɔr k'aa nɩ-bʋʋr-yoru ten za pʋɔ, bɛ dam a Ɩsɩrayɛl yir, bɛ dam ʋ mɛ̃ zɛla bɛ na tɛtɛwr ɛ́ kʋsɛ-bir kʋ̃ lo tẽw a.

¹⁰ Zɛbr-sɔ-kpɛ̃ɛ n'ʋ na kʋ a ɩ̃ nɩ-bʋʋrɛ pʋɔ sãwna dem za, bɛl na mɩ́ yere kɛ́: “A kpɩɛrʋ bɛ pɩɛlɛ tɩ ɛ, ʋ bɛ páwr tɩ ɛ!”»

A Sore na lɛb'a mɛ a Ɩsɩrayɛl yir

¹¹ «A ʋlɩ bibir nɛ a, ɩ̃ na lɛb'a mɛ a Daviir gùr na lo a, ɩ̃ na fɔb'ɩ a vɛɛ, ɩ̃ na lɛb'a libri a ʋ deboru, ɩ̃ na ɩ na ʋ ìr àr mɛ̃ a dãwdãw a.

¹² Lɛ n'a a Ɩsɩrayɛl nɩbɛ na so a Edɔm tẽw na cɛ a, nɩ a nɩ-bʋʋr-yoru ten al za ɩ̃ na so a. A Sore n'ʋ yere à à ŋá, ʋl na na tu à à ŋá ʋ na yel a.»

¹³ À ŋá n'a a Sore yere: «Bibie n'ɩ a ŋan waar na vɩɛ, bɛ na mɩ́ cɩɛr wa báarɛ ɛ́ lɛb kʋɔr, bʋ̀rɛ wa báarɛ ɛ́ nɛbr a divɛ̃ tɩɛ wɔmɛ íre a divɛ̃. Lɛ n'a a divɛ̃ na bùle yire a tan zu, ɛ́ a tãli paalɩ a divɛ̃.

¹⁴ Ɩ̃ lɛb'a maalɛ a ɩ̃ nɩ-bʋʋrɛ ƴãwn: bɛ na lɛb'a mɩɛr a ten al na tɩ sãw a, kɛ́ bɛ kpɩɛr a pʋɔ. Bɛ na sɛl'ɩ divɛ̃ tɩɩr nyúur a divɛ̃. Bɛ na kɔ n zaadɛnɩ dɩrɛ a zaadɛnɩ pʋɔ bome.

¹⁵ Ɩ̃ na lɛb'a ƴãw a ɩ̃ nɩ-bʋʋrɛ a bɛ tẽw pʋɔ, ɛ́ nɩr kʋ̃ lɛb ír bɛ bɛr a bɛ tẽw zu ɛ, a tẽw ʋl ɩ̃ na na kʋ̀ bɛ a. A mãa Sore fʋ Naaŋmɩn n'ʋ yere.»