Amɔsɩ 7 - A SƐB-SÕW

A bʋ̃-nyɛrɩ anũu a Amɔsɩ na nyɛ̃ a A dãw-niwn sob: a sãsoge

¹ Bom ŋa n'ʋ a Sore Naaŋmɩn tɩ ɩ ɩ̃ nyɛ̃: ʋ tɩ ɩ na sãsoge yire a lɛn daar a mʋ̃ɔ na lɛb tɔmnɛ a, a mʋ̃ɔ bɛ na tɩ ŋma a nãà dʋn ƴãw, ɛ́ a lɛb tɔmnɛ a.

² A sãsoge na tɩ 'wɔb a mʋ̃ɔ za a tẽw pʋɔ a, ɩ̃ tɩ yel'a: «Sore ɩ̃ Naaŋmɩn i, ɩ̃ zɛlɛ fʋ na, dɩ suur! Alɛ bɛ ɩ lɛ, ŋmɩŋmɩn za n'a a fʋ nɩ-bʋʋrɛ na cãà? Bɛ ɩ n pʋrɩ zuo.»

³ A Sore tɩ lɩɛb'a bɛr ɛ́ yel: «A bɛ ɩrɛ ɩ.»

A ayi sob: a vũu

⁴ Bom ŋa n'ʋ a Sore ɩ̃ Naaŋmɩn tɩ ɩ ɩ̃ nyɛ̃: vũu n'a a Sore ɩ̃ Naaŋmɩn tɩ dɩrɛ nɩ a ƴɛ̀rʋ. A vũu tɩ ɩ n a tẽsɔw pile kʋ̃ɔnɩ sɩr, ɛ́ a vũu do dɩrɛ a tẽw.

⁵ Lɛ n'a ɩ̃ tɩ yel: «Sore ɩ̃ Naaŋmɩn i, ɩ̃ zɛlɛ fʋ na, bɛr lɛ! Alɛ bɛ ɩ lɛ, ŋmɩŋmɩn za n'a a fʋ nɩ-bʋʋrɛ na cãà? Bɛ ɩ n pʋrɩ zuo.»

⁶ A Sore ɩ̃ Naaŋmɩn tɩ lɩɛb'a bɛr ɛ́ yel: «A mɩ̀ bɛ ɩrɛ ɩ!»

A ata sob: a dacin miw-máná

⁷ Bom ŋa n'ʋ a ɩ̃ Sore mɩ̀ lɛb tɩ ɩ ɩ̃ nyɛ̃: a Sore tɩ àr'ɩ dacin zu, ɛ́ tɛr dacin miw-máná a nũú.

⁸ A Sore tɩ sowri mɛ̃ na: «Amɔsɩ ɩ, bʋ̃ʋ n'ʋ fʋ nyɛ̃?» Ɩ̃ sɔw: «Dacin miw-máná n'ʋ!» A Sore yel mɛ̃: «Mãa n'ɩ ŋan waar'ɩ dacin miw-máná k'ɩ̃ɩ wa man nɩ nyɛ̃ a ɩ̃ nɩ-bʋʋrɛ Ɩsɩrayɛl ɩ-ɩrɩ tori na a. Ɩ̃ bɛ lɛb bɛrɛ a tɔlɛ ɩ.

⁹ Ɩ̃ na sãw nɩ a Ɩzaakɩ bʋʋrɛ maalʋ-ziir bɛr, ɩ̃ na ŋmɛ n a Ɩsɩrayɛl zi-son lɔb, ɛ́ ìr'ɩ zɛbr a Zerobowam yir dem.»

Bɛ diw nɩ a Amɔsɩ a Betɛl tẽw

¹⁰ A Betɛl tẽw bàwr-maalɛ Amasɩa tɩ tõ na bɛ tɩ yel a Ɩsɩrayɛl nãà Zerobowam: «A Amɔsɩ bɔbr'a kɛ́ fʋ lo, ta cãà ɩ nãà a Ɩsɩrayɛl tẽw pʋɔ ɩ. A tẽw nɩbɛ kʋ̃ tʋ̃ɔ́ cãà bɛrɛ wone a ʋ ƴɛ̀rʋ ɛ.

¹¹ Bʋ̃ʋ n'ʋ vɛ̃, à ŋá n'a a Amɔsɩ ƴɛ̀rɛ: “A Zerobowam na kpi n zɛbr-sɔ-kpɛ̃ɛ kũu, ɛ́ bɛ na tɛr'ɩ a Ɩsɩrayɛl nɩbɛ za cen nɩ tẽ-yũo, zãá nɩ a bɛ tẽw.''»

¹² Lɛ n'a a Amasɩa tɩ yel a Amɔsɩ: «Yel-nyɛrɛ ɛ, cen taw zaa a ka. Zɔ cen Zuda tẽw, be n'a fʋ na tɩ tʋ̃ɔ́ tone a fʋ naaŋmɩn-ƴɛ̀r-manɛ tome guole nɩ fʋ tʋɔra.

¹³ Ɛcɛ, a Betɛl ka a, ta cãà tone a naaŋmɩn-ƴɛ̀r-manɛ tome ɩ, a nãà zi-sõw n'ɩ a ka, a ʋ Naaŋmɩn yir'ʋ!»

¹⁴ A Amɔsɩ tɩ sɔw na yel a Amasɩa: «Ɩ̃ bɛ tɩ ɩ naaŋmɩn-ƴɛ̀r-manɛ ɩ, mɩ̀ bɛ lɛb tɩ ɩ naaŋmɩn-ƴɛ̀r-manɛ bie ɩ. Ɩ̃ tɩ ɩ n na-cɩ̃ɩnɛ ɛ́ kaarɛ sɩkomɔɔr tɩɩr zie.

¹⁵ A Sore n'ʋ wa nyɔw mɛ̃ a na-cɩ̃ɩnʋ zu yel mɛ̃: “Cen tɩ ƴɛ̀r a ɩ̃ ƴɛ̀rʋ kʋ̀ a ɩ̃ nɩ-bʋʋrɛ Ɩsɩrayɛl.”

¹⁶ Ɛ́ fʋ̃ʋ Amasɩa, fʋ bɛ sàwr k'ɩ̃ɩ manɩ a lɛ a Naaŋmɩn na tɩɛrɛ a Ɩsɩrayɛl ƴãw a ɩ, fʋ bɛ sàwr k'ɩ̃ɩ yel a Ɩzaakɩ yir sãwna ɩ. A na ɩ à ŋá a, bɛr wõ a Sore ƴɛ̀rʋ ŋa:

¹⁷ À ŋá n'a ʋ yere: “A fʋ pɔw na lɩɛb'ɩ pɔw-yɛm a tẽw pʋɔ. Bɛ na kʋ n a fʋ bidɛbr nɩ a fʋ pɔwyaar. Bɛ na tʋ̃ɔ̀ tʋ̃ɔ̀ nɩ a fʋ tẽ-sora põ nɩ mie. A fʋ̃ʋ tɔr za a, nɩ-bʋʋr-yoru tẽw pʋɔ n'a fʋ na kpi, ɛ́ bɛ nyɔw a Ɩsɩrayɛl nɩbɛ za cen nɩ tẽ-yũo zãá nɩ a bɛ tẽw.''»