Amɔsɩ 6 - A SƐB-SÕW

Baw-bio dem'ɩ a tɛra dem

¹ Baw-bio dem'ɩ nyɩ, nyɩɩm na be a Sɩyɔ̃ bom za bɛ damnɛ nyɩ a. Nyɩɩm na ɓãá ƴãw kpɩɛr a Samaari tãw zu a. Nyɩɩm na ɩ a ten za pʋɔ tẽ-dãw-niwn sob niw-dierbɛ a, nyɩɩm zie n'a a Ɩsɩrayɛl yir nɩbɛ cere.

² Nyɩ cen a Kalne tẽw tɩ nyɛ̃. Nyɩ yi a be cen a Hamatɩ na ɩ tẽ-kpɛ̃ɛ a, nyɩ tɩ yi a be siw a Gatɩ na ɩ a Filisɩtɛ̃ mɩnɛ tẽw a: a ten á ŋá sa n a nyɩ naalʋ-ten bɩɩ? A bɛ ten yɛlmɛ na zuo a nyɩ dem bɩɩ?

³ Nyɩ bɔbr'a kɛ́ nyɩ ɩ a kpɩɛrʋ bibir taw zãá, ɛcɛ po-to-fãw naalʋ dɩb'a nyɩ ɩrɛ ʋ tawr pɩɛlɛ.

⁴ Nyɩ gã gã nɩ wɔ́br nyɩmɛ gadori zu, nyɩ duo duo na gã a nyɩ gado nʋmnʋm zu, ɛ́ 'wɔbr a péli nɩ a náli-'wɔɛ!

⁵ Nyɩ ŋmɩɛr'ɩ korijom yiele pawr'ɩ gɔmɛ, ɛ́ zanɛ bʋ̃-ŋmɩɛrɩ maalʋ mɛ̃ Daviir a.

⁶ Dãa koli-nyúuri bɛrɛ n'a nyɩ tɛr nyúur'ɩ a divɛ̃, ɛ́ zɩɛr kãá-nyũu vla vla, ɛcɛ a Zuzɛb yir na lore a, al bɛ ɩrɛ nyɩ bom ɛ.

⁷ Lɛ so a ƴɛrɛŋa bɛ na ír nyɩ a nyɩ tẽw pʋɔ cen nɩ tẽ-yũo, nyɩmɛ nɛbɛ na de a nɩbɛ bɛ na na ír cere nɩ a niwn, lɛn daar'a a nɩbɛ na mɩ́ ìr gã gã a bʋʋrɛ na baarɩ.

A Samaari tẽw loba

⁸ A Sore, a Naaŋmɩn kpɛnʋ-za-sob pɔ na yel à ŋá: «Mãa wa sɩrɩ n'ɩ a Naaŋmɩn a, ɩ̃ bɛ nɔnɛ a Zakɔb yir pɔ̀lʋ towtow ɛ, ɩ̃ bɛ nɔnɛ a ʋ yir-vɩɛlɩ vɩɛlɩ ɛ. Ɩ̃ na ƴãw na a Samaari tẽw dɔ̃ dem so a Samaari tẽw.»

⁹ Nɩbɛ pie wa cɛ yir-been pʋɔ a, bɛ na kpi na.

¹⁰ A yir nɩr ʋl na na wobr a kũuni yire nɩ k'ʋʋ tɩ nyɩw bɛr a, na sowri a sob nɛ nãà be a dĩó a: «Nɩr za bɛ cãà be ɩ?» Ʋ na sɔw na: «Nɩr bɛ cãà be ɩ!» Ɛ́ yel ƴãw pʋɔ: «Ɩ gbili! A Sore yúor bʋɔlʋ daar bɛ n'a ɩ.»

¹¹ Bʋ̃ʋ n'ʋ vɛ̃, a Sore, ʋ tɩr nʋɔr tɛwr, ɛ́ a yir-kpɛ̃ɛ na lo na, ɛ́ a yir-cãpile dacine pur pur.

Zɛb-tʋ̃ɔ́fʋ a mɩnɛ bɛ tɛr pɛr ɛ

¹² Wie mɩ́ gár'ɩ pìe zu u? Nĩi mɩ́ kɔ n pìir zu u? Ɛ́ bʋ̃ʋ so nyɩ ɩ a yel-na-tu-sɔr-a lɩɛbɩ tɩ̃ɩ na kʋrɛ a, ɛ́ a mɩnʋ lɩɛbɩ lɔw-tuo tuo?

¹³ Nyɩ cɩlɛ na a Lodevaar tẽw nyɩ na zɛb de a ƴãw, a Lodevaar pɛr'ɩ “zawlalɛ”. Nyɩ yere nɩ à ŋá: «A tɩ fãw bɛ tʋ̃ɔ́ n'a tɩ zɛb de nɩ a Karnayim tẽw e? A Karnayim pɛr'ɩ “ɩ́lɛ́ ayi, ɛ́ a ɩ́lɛ́ ɩ n a fãw bãwfʋ”.»

¹⁴ Ɛcɛ ƴɛrɛŋa a, a Sore, a Naaŋmɩn kpɛnʋ-za-sob, yere na: ɩ̃ na ɩ na tẽw ìr a nyɩ ƴãw, Ɩsɩrayɛl yir i, ʋ na dɔwrɩ fʋ na a Lebo-Hamatɩ tẽw tɩ tɔ n a Araba bàa.