Amɔsɩ 5 - A SƐB-SÕW

Lãw-mʋɔlɛ na ŋmãa a Ɩsɩrayɛl ƴãw a

¹ Ɩsɩrayɛl yir nɩbɛ ɛ, nyɩ bɛrɛ wone a ƴɛ̀r-bir ŋa, a lãw-mʋɔlɛ ŋa ɩ̃ na kone a nyɩ ƴãw a.

² Ʋ lo na, a Ɩsɩrayɛl na ɩ mɛ̃ pɔwsɩrale a lo na ɛ́ kʋ̃ lɛb ìr ɛ. Ʋlɛ n'ɩ ŋan gã a ʋl mɩŋa tẽsɔw zu ɛ́ nɩr bɛ ka be na nyɔw ʋ ʋ ìr ɛ.

³ Bʋ̃ʋ n'ʋ vɛ̃, à ŋá n'a a Sore Naaŋmɩn yere a Ɩsɩrayɛl ƴãw: «Tẽw nɛ pʋɔ bɛ na ír sojarɩ túr (1 000) bɛ cen a zɛbr a, nɩbɛ kʋba (100) tɛwr'a na cɛ lɛb wa. Ɛ́ tẽw nɛ pʋɔ bɛ na ír sojarɩ kʋba (100) a, pie tɛwr'a na cɛ lɛb wa.»

A nyɔ-vʋʋrʋ bɩɩ a kũu

⁴ À ŋá n'a a Sore ƴɛ̀rɛ a Ɩsɩrayɛl yir nɩbɛ zie: «Nyɩ bɔbr mɛ̃ ɛ́ nyɩ na vʋʋrɛ na.

⁵ Ɛcɛ nyɩ ta bɔbr mɛ̃ a Betɛl tẽw puoru yir pʋɔ ɩ, nyɩ taa kpɩɛr Gilgal tẽw puoru yir bɔbr mɛ̃ ɩ, nyɩ taa cere Bɛɛr-Seva a ɩ̃ ƴãw ɛ. Bʋ̃ʋ n'ʋ vɛ̃, bɛ na diw nɩ a Gilgal nɩbɛ cen nɩ tẽ-yũo, ɛ́ a Betɛl na ɩ a Naaŋmɩn yir a lɩɛbɩ faalʋ yir.»

⁶ Nyɩ bɔbr a Sore ɛ́ nyɩ na vʋʋrɛ na. Zuzɛb yir nɩbɛ ɛ, nyɩ gù vla ʋ taa wule a ʋ fãw ɛ, alɛ bɛ ɩ lɛ, a na ɩ na mɛ̃ vũu na dɩrɛ a Betɛl tẽw pʋɔ bome ɛ́ nɩr za kʋ̃ tʋ̃ɔ́ a kpiiri bɛr a.

⁷ Bɛ mɩ́ ɩ n a yel-na-tu-sɔr-a lɩɛbɩ lɔw tuo, ɛ́ mɩ́ dɔwrɛ a bɛlɩ dem na ɩ mɩnʋ nɩbɛ a.

⁸ A sob nɛ na ír a kɔ̃wmɛ nɩ a baa-nɩ-ŋmãam-nɩ-pɔw-nyãw a, a ʋl na mɩ́ ɩ a lige lɩɛbɩ biɓaara cãà a, a ʋl na mɩ́ ɩ a mʋ̃tɔ̃w lɩɛbɩ tɩ̃ɩsɔw lige a, a ʋl na mɩ́ bʋɔlɩ a man kʋ̃ɔnɩ wa cir waarɩ a tẽw a, a ʋ yúor'ɩ a Sore.

⁹ Ʋlɛ n'ʋ mɩ́ ƴãw bɛ fa a gãdaa bʋ̃-tɛrɩ, ɛ́ ƴãw bɛ fa a tẽw ʋl na kpɛmɛ a bome.

¹⁰ A sob nɛ na mɩ́ yere kʋ̀rɛ nyɩ a ƴɛ̀rʋ-dɩb zie kɛ́ nyɩ tu a lɛ-na-tu-sɔr-a, nyɩ mɩ́ hɩ̃ɛn nɩ a ʋ sob. Ɛ́ a sob ʋl na mɩ́ dɩ a yel-mɩŋa dãsɩɛ a, nyɩ bɛ mɩ́ nɔ̃w ʋ paalɩ nũsalɛ̃pʋɔ ɩ.

¹¹ «Nyɩ na nɛbr a nɩbaal mɩ́ de a ʋ ble a, a kʋsɛbɛ yir-bɛrɛ á ŋá nyɩ na ŋma a, nyɩ kʋ̃ kpɛ a pʋɔ ɩ. A divɛ̃ tɩ-nʋʋr á ŋá nyɩ na sɛl a, nyɩ kʋ̃ nyũ a divɛ̃ ɩ.

¹² Bʋ̃ʋ n'ʋ vɛ̃, ɩ̃ bãw nɩ a lɛ a nyɩ ɩ-fa-yaga yaga nɩ a lɛ a nyɩ yel-bebe na kpɛ faa sɛw a. Nyɩ dɔwrɛ nɩ a nɩ-mɩn, ɛ́ mɩ́ bɛr bɛ bɛlɩ nyɔw nyɩ nɩ libie. Nyɩ bɛ mɩ́ sàw bɛ na dɩ a ƴɛ̀rʋ kʋ̀ a nã́w sob a ƴɛ̀rʋ-dɩb zie ɩ.»

¹³ Alɛ so a zie ŋa tɔ daar a, nɩr na bãw yã a, mɩ́ zɩ̃ n gbili, zi-faa na n'ʋ a ƴãw.

¹⁴ Nyɩ bɔbr a vla, nyɩ ta bɔbr a faa ɩ, lɛ n'a nyɩ na vʋʋrɛ, ɛ́ lɛ n'a a Sore, a Naaŋmɩn kpɛnʋ-za-sob na be a nyɩ zie, mɛ̃ a lɛ nyɩ na tɩɛrɛ a.

¹⁵ Nyɩ hɩ̃ɛn a faa, nyɩ nɔnɛ a vla, nyɩ ɩ a yel-na-tu-sɔr-a lɛb be a ƴɛ̀rʋ-dɩb zie, a mɩnɛ kãw, a Sore, a Naaŋmɩn kpɛnʋ-za-sob, nãà zɔ n a Zuzɛb bʋʋrɛ bɛl na cɛ a nɩbaalʋ.

¹⁶ À ŋá n'a a Sore, a Naaŋmɩn kpɛnʋ-za-sob, a ɩ̃ Sore, à ŋá n'a ʋ yere: «A nɩbɛ tuor-taa ziir za a, koe na be n be, a soli za pʋɔ bɛ na kone na: 'Woi! 'Woi! Bɛ na yel'ɩ a kuor kʋ̀ ka-kʋ́ɔrbɛ, bɛ na tõ na bʋɔlɩ a lãw-konbɛ kɛ́ bɛ wa a kuor.

¹⁷ A divɛ̃ tɩɩr póru za pʋɔ a, koe na be n be, a lɛn daar ɩ̃ nãà wa tɔlɛ a nyɩ sɔgɔ a.» A Sore n'ʋ yel.

A Sore bibir

¹⁸ Zu-bio dem'ɩ a bɛlɩ dem na ƴãw a bɛ tɩɛrʋ za a Sore waa bibir ƴãw a! A Sore bibir ŋa wa vɩɛ a, bʋ̃ʋ n'ʋ nyɩ na páw? A bibir ŋa na ɩ n lige bibir, ʋ kʋ̃ ɩ cãà bibir ɛ.

¹⁹ A na ɩ na mɛ̃ nɩr gbẽw na diwr ʋ tɩ ùr dʋ̃-faa kãw bɛ na bʋɔlɛ ursɩ a. Ʋ kpɛ n a ʋ yir ír nũu tʋɔr'ɩ a dacin wa báarɛ waab cɛ ʋ.

²⁰ A Sore bibir na ɩ n lige, ʋ kʋ̃ ɩ cãà ɩ. Liw-varkpara na bɛ tɛr cãà kãw za a.

A Sore bɛ nɔnɛ a Ɩsɩrayɛl nɩbɛ puoru ɛ

²¹ Ɩ̃ bɛ nɔnɛ a nyɩ zi-sõw cenu ɛ, ɩ̃ jewre nɩ a cenu á ŋá. A nyɩ ɓã-taar bɛ ɩrɛ mɛ̃ nʋ̃ɔ̀ kãw za ɩ.

²² Ɩ̃ bɛ bɔbr a nyɩw-a-za-bagɛ nyɩ na maalɛ kʋ̀rɛ mɛ̃ a ɩ, a nyɩ de-kʋ̀b bome been kãw za bɛ pɛlɩ a ɩ̃ pʋɔ ɩ. Ɩ̃ ŋmɛlɩ nɩ kpaar cɔw a nyɩ dʋ̃-'wɔɛ bàwr.

²³ Nyɩ ɩ a nyɩ yielu gɔmɛ zãá nɩ mɛ̃, ɩ̃ bɛ bɔbr k'ɩ̃ɩ wõ a nyɩ korijom ŋmɩɛrʋ ɛ.

²⁴ Ɛcɛ nyɩ ɩ a yel-na-tu-sɔr-a gbɔlɛ mɛ̃ kʋ̃ɔ a, ɛ́ a mɩnʋ gbɔlɛ mɛ̃ bàa na bɛ sɩrɛ a.

²⁵ «A yome lɩz'a ayi nyɩ na kpɛ a wɛja-kpalɛ pʋɔ a, nyɩ maal'ɩ bàwr kʋ̀ m ɩ? Nyɩ kʋ̀ m'ɩ de-kʋ̀b bome e, Ɩsɩrayɛl yir nɩbɛ ɛ?

²⁶ Ɛcɛ nyɩ tɩ tuo nɩ a nyɩ nãà nɩ a nyɩ ŋmɩn Sikutɩ dasuli, nɩ a Kiyun na ɩ a nyɩ ŋmar-bir nɩ a nyɩ ŋmɩn a dasule mɩ̀.

²⁷ Alɛ so ɩ̃ na ír nyɩ a nyɩ tẽw pʋɔ tɩ zuo nɩ a Damasɩ bɛr.» A Sore n'ʋ yel, a Naaŋmɩn kpɛnʋ-za-sob, a ʋ yúor'ɩ a lɛ.