Amɔsɩ 3 - A SƐB-SÕW

A Naaŋmɩn nɩ-bʋʋrɛ na manɩ nɩ a bɛ ɩ-ɩrɩ pɛr kʋ̀ a Naaŋmɩn

¹ Ɩsɩrayɛl nɩbɛ ɛ, nyɩ bɛr wõ a ƴɛ̀rʋ ŋa a Sore na ƴɛ̀rɛ cáarɛ nɩ nyɩ a, nyɩɩm na ɩ a yir ʋl ʋ na tɛr yi n a Eziptɩ tẽw pʋɔ a:

² «A tẽ-daa zu yie za pʋɔ a, nyɩɩm tɛwr zie n'a ɩ̃ kaa. Alɛ so ɩ̃ na ƴãw nyɩ manɩ a nyɩ ɩ-faar za pɛr.»

A Naaŋmɩn ƴɛ̀rɛ na, a ʋ ƴɛ̀r-manɛ na ɩ n ŋmɩn ɩ gbili?

³ Nɩbɛ ayi dãw na lãw lo sɔ́r ɛ́ bɛ de niwn wõ taa ɩ?

⁴ Gbẽw dãw na ùori tuw pʋɔ ɛ́ bɛ nyɛ̃ bom ɛ? Gbẽw-bile bɛ nyɔw bom a bɛ na wõ n a ʋ kɔkɔr kõ yi a ʋ sɔwlʋ zie e?

⁵ Bʋ̃-bɛ̀rá bɛ ka bɛra zu a, lile na sàw na siw tẽw bɛra nyɔw ʋ? Bɛra dãw na ƴaw ìr ɛ́ bɛ nyɔw bom ɛ?

⁶ Ɩɩl pɛblɛ nɩ tẽw pʋɔ ɛ́ nɩbɛ bɛ zɔ ŋmɛ taa ɩ? A yel-faa na mɩ́ wa ta a tẽw pʋɔ a, a Sore bɛ n'ʋ mɩ́ maalɩ ʋ ɛ?

⁷ Yel-mɩŋa, a Sore Naaŋmɩn bɛ ɩrɛ bom za ɛ́ bɛ yere a ʋ pʋ-tɩɛrʋ kʋ̀rɛ a ʋ ƴɛ̀r-manbɛ na ɩ a ʋ tõ-tõ-biir a ɩ.

⁸ Gbẽw ùor'a, ãa n'ʋ kʋ̃ zɔ dɛ̃bɩ̃ɛ? A Sore Naaŋmɩn ƴɛ̀r'a, ãa n'ʋ na vɛ̃ a ʋ ƴɛ̀rʋ manʋ?

A ƴɛ̀rʋ na ƴɛ̀r càar'ɩ a Samaari tẽw dem a

⁹ Nyɩ do a Asɩdɔdɩ tẽw yir-vɩɛlɩ garɛ zu, nɩ a Eziptɩ tẽw yir-vɩɛlɩ vɩɛlɩ garɛ zu lɔb cɛl yel: «Nyɩ ɓã taa a Samaari tan zu, ɛ́ nyɛ̃ yel-fa-bʋʋrɛ nɛ na be a ʋ pʋɔ a, ɛ́ nyɛ̃ lɛ nɩbɛ na dɔwrɛ taa a be a!»

¹⁰ A Sore yere na: «A Samaari tẽw dem bɛ bãw bʋ̃ʋ n'ɩ a yel na tori a ɩ. Bɛ gbone nɩ a bɛ yir-vɩɛlɩ pʋɔ a bome nɛ a bɛ po-to-fãw-ɩb nɩ a bɛ nyãnyuwlu na ɩrɛ bɛ páwr a.»

¹¹ Alɛ n'a so a Sore Naaŋmɩn yere kʋ̀rɛ a Samaari tẽw à ŋá: «A dɔ̃ sob na jil'a koli a tẽw, ʋ na tʋ̃ɔ́ nɩ a fʋ kpɛnʋ, kpɛ fa a fʋ yir-vɩɛlɩ vɩɛlɩ pʋɔ bome.»

Faafʋ na ŋmɛ̃ a

¹² À ŋá n'a a Sore yere: «Mɛ̃ a lɛ a dʋ̃-cɩ̃ɩnɛ na mɩ́ faa a dʋ̃w gbɛ́ɛ ayi bɩɩ a dʋ̃w to-ŋmãa a gbẽw nʋɔrɩ́ a, lɛ n'a bɛ mɩ́ na faa a Ɩsɩrayɛl bibiir na kpɩɛr a Samaari a, bɛl na gã dà-kɔw-vɩɛlɩ pʋɔ nɩ gado-nʋmnʋm zu a.»

Nyɩ gù vla

¹³ À ŋá n'a a Sore Naaŋmɩn, a Naaŋmɩn kpɛnʋ-za-sob yere: «Nyɩ bɛrɛ wone ɛ́ lʋɔrɛ kʋ̀rɛ a Zakɔb bʋʋrɛ kɛ́ bɛ gù vla.

¹⁴ A ʋlɩ bibir ɩ̃ nãà wa ìr a Ɩsɩrayɛl nɩbɛ ƴãw a bɛ ɩ-faar zũú a, ɩ̃ na ìr'ɩ a Betɛl tẽw bàwr-maal-kube ƴãw. bɛ na kár'ɩ a bàwr-maal-kube ɩ́lɛ́ bɛr a lo gã tẽw.

¹⁵ Ɩ̃ na ŋmɛr'ɩ a tʋlʋ daar yie nɩ a ƴawr daar yie bɛr. A yir-vɩɛlɩ vɩɛlɩ al bɛ na ƴãw wɔb nyɩmɛ pɩ̃ɛmɛ a kʋ̃ cãà ɩ. A yir-bɛrɛ bɛrɛ na lo na.» A Sore n'ʋ yel.