Abɩdɩasɩ 1 - A SƐB-SÕW

¹ Nyɩ nyɛ̃ a bom ʋl a Sore Naaŋmɩn na wul a Abɩdɩasɩ yel-nyɛra pʋɔ a, a ƴɛ̀rʋ ʋ na ƴãw ʋ ƴɛ̀r càar'ɩ a Edɔm tẽw nɩbɛ a. Bɛ tõ n nɩr a nɩ-bʋʋr-yoru sɔgɔ. Tɩ wõ n a lɛ a Sore na tõ ʋ, ʋ tɩ yere a: «Nyɩ ìr! Nyɩ ɩ tɩ cen tɩ zɛb'ɩ a Edɔm tẽw dem.»

A Sore yere na k'aa Edɔm tẽw na lo na

² A Sore yere na: «Edɔm ɩ, ɩ̃ na ɩ na fʋ ɩ pʋrɩ a nɩ-bʋʋr-yoru za pʋɔ. A nɩbɛ za na ɩrɛ fʋ na laar.

³ A fʋ pɔ̀l-ɩb na bɛ dɩ vuo a, bɔrɛ nɩ fʋ na. Fʋ kpɩɛr'ɩ pìe pʋɔ nɩ ziir bɛ na kʋ̃ tʋ̃ɔ́ páw fʋ nyɔw a, ɛ́ tɩɛrɛ nɩ fʋ pʋɔ: “Ãa n'ʋ na tʋ̃ɔ́ ír mɛ̃ a ka?”

⁴ Fʋ̃ʋ saa na ìr do do mɛ̃ a sidum a, fʋ̃ʋ saa na wob a fʋ cow a ŋmar-bie sɔgɔ a, ɩ̃ na caabɩ fʋ na bɛr fʋ siw tɩ lo. A mãa Sore n'ʋ yere.

⁵ Nyãnyuwr bɩɩ nɩ-farbɛ wa wa ùr fʋ tɩ̃ɩsɔw a, bɛ na za n a bome al za bɛ na na tʋ̃ɔ́ za a, ɛ́ fʋ kʋ̃ cãà tɛr bom za ɩ. Divɛ̃ tɩɩr wɔ̃-pɔrbɛ wa kpɛ a fʋ divɛ̃ tɩɩr pu-pʋɔ a, wɔ̃-beƴeni lɛ tɛwr'a bɛ na bɛr fʋ.

⁶ A na ɩ à ŋá a, Ezawu bʋʋrɛ ɛ, bɛ za n a nyɩ bome za, a nyɩ na-bʋ̃-sɔwlɩ tɛɛ za a, bɛ nyɛ̃ a na.

⁷ Bɛ diw nyɩ na bɛr a nyɩ tẽw pʋɔ, a bɛlɩ dem za nɩ nyɩɩm na maalɩ a wõ-taa a, bɛ mɩlɛ nyɩ na. A nyɩ bárɩ so nyɩ na, a bɛl nɩ nyɩɩm na tɩ lãw dɩrɛ a ƴãwnɛ nɩ bɛrɩ a nyɩ tɔlʋ zie. A nɩbɛ yere nɩ a nyɩ ƴãw: “Bɛ bɛ cãà bãw yã ɩ!”

⁸ Sɩza n'a, a mãa Sore n'ʋ yere, a ɩ̃ suur bibir wa vɩɛ a, ɩ̃ na kʋ n a Edɔm tẽw yã-bãwnbɛ za pàw pɛr, ɩ̃ bɛ bɛrɛ nɩr kãw za na tɛr yã a, ʋ cãà bere a Ezawu tãw zu ɛ.

⁹ Teman tẽw i, pʋl-vʋ̃ɔ na tɛr'ɩ a fʋ zɛbr-nɩbɛ, ɛ́ bɛ na kʋ n a tẽw dem za.»

A Edɔm tẽw sãw na

¹⁰ «A Zakɔb bʋʋrɛ na ɩ a nyɩ yɛbr a, nyɩ fa n a bɛ bome ɛ́ kʋ bɛ. A na ɩ à ŋá a, vĩ nyɔw nyɩ na, ɛ́ bɛ na kʋ nyɩ na pàw pɛr a nʋɔr kʋ.

¹¹ Nyɩ tɩ taw na yi pùor, a ʋlɩ bibir a dɔ̃ dem na tɩ zɛb tʋ̃ɔ́ a bɛ zɛbr-nɩbɛ, ɛ́ tɩ kpɩɛr a bɛ tẽ-kpɛ̃ɛ pʋɔ a. A lɛn daar a nɩ-bʋlmɛ bɛ ŋa na tɩ ŋmɩɛr gbãw pone a Zerizalɛm na-bome a, a nyɩɩm mɩ̀, nyɩ mɩ̀ tɩ ɩ na mɛ̃ a bɛl a.

¹² Edɔm ɩ, a fʋ yɛbr na be a Zuda tẽw a, a bɛ tɩ sɛw kɛ́ fʋ nyɛ̃ a bɛ loba a ɩrɛ fʋ nʋ̃ɔ̀ ɩ, a bɛ tɩ sɛw kɛ́ fʋ cɩlɛ a bɛ wahala ƴãw ɛ, nɩ kɛ́ fʋ tʋʋr bɛ zʋmɛ a bɛ kpɩɛrʋ daar ɛ.

¹³ A bɛ tɩ sɛw kɛ́ fʋ kpɛ a ɩ̃ nɩ-bʋʋrɛ tẽ-kpɛ̃ɛ pʋɔ a ʋ loba daar ɛ. A bɛ tɩ sɛw kɛ́ fʋ àr jɩ́rɛ a ʋ wʋ̀ʋr, ɛ́ wobr a ʋ na-bome a lɛn daar bɛ na tɩ zarɛ a ʋ bome a ɩ.

¹⁴ A bɛ tɩ sɛw kɛ́ fʋ àr gù a sɔ-carɩ pʋɔ, kɛ́ fʋ kʋ a bɛlɩ dem na zɔrɛ cɩ̃ɛnɛ a, ɛ́ nyɔw a ŋmaarɛ bɛl na cɛ a ƴãw a dɔ̃ sob nuru pʋɔ, a kpɩɛrʋ nɛ daar ɛ.

¹⁵ Bʋ̃ʋ n'ʋ vɛ̃, a Sore bibir, ʋ na na dɩ n a nɩ-bʋʋrɛ a ƴɛ̀rʋ a pɩɛl'a. Lɛ n'a bɛ na ɩ b, mɛ̃ a lɛ fʋ na ɩ a fʋ taabɛ a. A faa fʋ na maalɩ a na lɛb'a lo a fʋ zu.»

A Ɩsɩrayɛl na yáa nɩ a san a Edɔm zu

¹⁶ «A nyɩɩm Ɩsɩrayɛl nɩbɛ, nyɩ nyũ n a ɩ̃ suur koli-nyúura a ɩ̃ tã-sõw zu. Lɛ n'a a nɩ-bʋʋr-yoru na nyuur ʋ kʋralɛ, bɛ na nyũ ʋ na tɩ kuoli, al pùorí, bɛ na ɩ na mɛ̃ bɛ bɛ tɩ dãw be a.

¹⁷ Lɛ n'a a nɩbɛ na cɩ̃ɛ a na nyɛ̃ sɔwlʋ zie a Sɩyɔ̃ tãw na na lɛb lɩɛbɩ tã-sõw a zu. A Zakɔb bʋʋrɛ na lɛb'a de a bɛ tẽw, a bɛlɩ dem na tɩ faa ʋ a zie.

¹⁸ A Zakɔb nɩbɛ na lɩɛb'ɩ vũu, ɛ́ a Zuzɛb nɩbɛ lɩɛbɩ vũu-zɛlɛ. Ɛcɛ Ezawu nɩbɛ na lɩɛb'ɩ mʋ̃ɔ, a vũu nɩ a vũu-zɛlɛ nyɔw dɩ. Nɩr bɛ cɩɛr a Ezawu bʋʋrɛ pʋɔ ɩ. A Sore n'ʋ yere.»

¹⁹ A Negɛɛvʋ tẽw dem na so nɩ a Ezawu tãw, ɛ́ a Ba-Peyi tẽw dem so a Filisɩtɛ̃ mɩnɛ tẽw. Bɛ na so nɩ a Efarayim bʋʋrɛ tẽw nɩ a Samaari tẽw. Ɛ́ Bɛ̃zamɛ bʋʋrɛ na so nɩ a Galaadɩ tẽw.

²⁰ A saa-pɛrɩ́-gʋba-lowr Ɩsɩrayɛl nɩbɛ bɛ na diw cen nɩ tẽ-yũo a na lɩɛb'ɩ zɛbr-nɩbɛ na ta zɛbr-nɩbɛ a. Bɛ na so nɩ a Kanãa tẽw tɩ tɔ a Sarɛpta tẽw. A Zerizalɛm nɩbɛ bɛ na ír a bɛ tẽw pʋɔ bɛ kpɩɛr a Sefaradɩ a, na so nɩ a Negɛɛvʋ tẽw tẽ-bɛrɛ.

²¹ Bɛ na zɛb'a tʋ̃ɔ́, ɛ́ do a Sɩyɔ̃ tãw zu, ɛ́ a be n'a bɛ na tɩ dɩrɛ naalʋ a Edɔm tẽw zu. A Sore na ɩ n nãà!