3 Zã 1 - A SƐB-SÕW

A yãanɩ puoru

¹ A mãa Nɩ-kʋra, mãa n'ʋ sɛbr fʋ, fʋ̃ʋ ɩ̃ nɩ-nɔna Gayisɩ, ɩ̃ na nɔnɛ yel-mɩŋa za a.

² Ɩ̃ bá-nɔna a, ɩ̃ zɛlɛ na k'aa yele za cere vla a fʋ zie, ɛ́ fʋ mɩ̀ tɛr a ƴã-gan ƴã-ɓaarʋ mɛ̃ a lɛ fʋ na tɛr a sɩ́ɛ ƴã-ɓaarʋ a.

³ Nʋ̃ɔ̀ kpɛ m'ɩ yaga za, bʋ̃ʋ n'ʋ vɛ̃, yɛbr ta n a ka dɩ a yel-mɩŋa na sãá a fʋ nyɔ-vʋʋrʋ pʋɔ a dãsɩɛ: a fʋ̃ʋ a, fʋ vʋʋrɛ nɩ a yel-mɩŋa cãà pʋɔ.

⁴ Nʋ̃ɔ̀ bɛ mɩ́ kpɛ m bom za ƴãw sɛw ɩ̃ na mɩ́ wa wõ k'aa ɩ̃ bibiir cere nɩ a yel-mɩŋa sɔ́r pʋɔ a ɩ.

A Gayisɩ naaŋmɩn-sàw-deb yele

⁵ Ɩ̃ bá-nɔna a, fʋ kaarɛ nɩ a yɛbr zie vla tu n a fʋ naaŋmɩn-sàwfʋ, bɛlɛ saa ɩ nɩ-sãanbɛ a.

⁶ Bɛ dɩ n a fʋ nɔ̃wfʋ dãsɩɛ a Lãw-yir niŋé. Fʋ na maal'ɩ vla, fʋ̃ʋ wa sõw bɛ mɛ̃ a lɛ a na sɛw a Naaŋmɩn zie, bɛ cãà lo a bɛ sɔ́r cere a.

⁷ Bʋ̃ʋ n'ʋ vɛ̃, a Kɩrɩta yúor ƴãw n'a bɛ lo a sɔ́r, ɛ́ bɛ sàw de tɩbɛ dem sõwfʋ kãw za ɩ.

⁸ A na ɩ à ŋá a, a tɩɩm a, a fɛr'a kɛ́ tɩ mɩ́ tɩɛ a nɩbɛ bɛ ŋa taabɛ tɛr, tʋ̃ɔ́ mɩ̀ mɩ́ pʋɔ a yel-mɩŋa manʋ tome pʋɔ.

A Diotɩrɛfʋ nɩ Demetiriyisi yele

⁹ Ɩ̃ sɛb'ɩ sɛble kʋ̀ a nyɩ Lãw-yir, ɛcɛ a Diotɩrɛfʋ na nɔnɛ a bɛ niwn deb a yele za pʋɔ a, ʋ bɛ dier a tɩ ƴɛ̀rʋ ɛ.

¹⁰ Lɛ so mãa wa tɩ wa a lɛn daar a, ɩ̃ na wo n a ʋ ɩ-faar za, ʋl na mɩ́ bul ƴɛ̀r-faar tɛwr ƴɛ̀rɛ cáarɛ nɩ tɩ a. Ɛcɛ a za cãà bɛ n'a ɩ, a ʋl tɔr za bɛ mɩ́ sàw de a yɛbr a sãanʋ ɛ, ɛ́ a bɛlɩ dem na mɩ́ bɔbr kɛ́ bɛ nãá de bɛ a sãanʋ a, ʋ bɛ mɩ́ sàwr ɛ, ɛ́ diwr bɛ bɛrɛ a Lãw-yir pʋɔ.

¹¹ Ɩ̃ bá-nɔna a, ta cɔwrɛ a yel-faa ɩ, cɔwrɛ a yel-vla. Sob nɛ na ɩrɛ vla a ɩ n Naaŋmɩn nɩ-sora, ɛ́ sob nɛ na maalɛ faa a bɛ bãw a Naaŋmɩn ɛ.

¹² A Demetiriyisi ʋl ƴãw a, nɩbɛ za dɩrɛ nɩ a ʋ dãsɩɛ vla. Ɛ́ a yel-mɩŋa tɔr za dɩrɛ nɩ a ʋ dãsɩɛ. A tɩɩm mɩ̀, tɩ dɩrɛ nɩ a ʋ dãsɩɛ, ɛ́ fʋ bãwnɩ a n'a a tɩ dãsɩɛ na ɩ sɩza a.

A yãan-pɛ-baara

¹³ Yel-yaga cãà nɩ be ɩ̃ nãá yel kʋ̀ b, ɛcɛ, ɩ̃ bɛ bɔbr k'ɩ̃ɩ sɛb'ɩ sɛb-dale nɩ sɛb kʋ̃ɔ ɩ.

¹⁴ Ɩ̃ tɩɛrɛ na k'ɩ̃ɩ kʋ̃ yaa kɛ́ nyɛ b tɩ ƴɛ̀r sɔw taa ɩ.

¹⁵ A ƴã-ɓaarʋ, ʋ be a fʋ zie. A fʋ bá mɩnɛ puore fʋ na. Mɩ̀ puori a tɩ bá mɩnɛ, bɛ za been been.