2 Zã 1 - A SƐB-SÕW

A yãanɩ puoru

¹ A mãa Nɩ-kʋra, mãa n'ʋ sɛbr a fʋ̃ʋ nɩ a fʋ bibiir, fʋ̃ʋ Pɔw-nɩ-kpɛ̃ɛ a Naaŋmɩn na kaa ír a. Ɩ̃ nɔnɛ nyɩ nɩ yel-mɩŋa za, ɛcɛ mãa yõ bɛ n'ʋ ɛ, a bɛlɩ dem za na bãw a yel-mɩŋa a mɩ̀ nɔnɛ nyɩ na.

² Bʋ̃ʋ n'ʋ vɛ̃, a yel-mɩŋa be n a tɩ zie, ɛ́ na cãà be a tɩ zie kʋralɛ.

³ A Naaŋmɩn Sãà nɩ a Yeezu Kɩrɩta na ɩ a Sãà Bie a, bɛ kʋ̀ tɩ maalʋ, su-ɓaarʋ nɩ ƴã-ɓaarʋ tɩ vʋʋrɛ nɩ a yel-mɩŋa nɩ a nɔ̃wfʋ pʋɔ.

A yel-mɩŋa nɩ a nɔ̃wfʋ yele

⁴ Nʋ̃ɔ̀ tɩ kpɛ m'ɩ yaga za, ɩ̃ na tɩ nyɛ̃ a fʋ bibiir bɛ mɩnɛ bɛ cere a yel-mɩŋa pʋɔ, mɛ̃ a lɛ a Naaŋmɩn Sãà na ƴãw a nʋɔr kʋ̀ tɩ a.

⁵ Pɔw-nɩ-kpɛ̃ɛ ɛ, ɩ̃ zɛlɛ fʋ nɩ a ƴɛrɛŋa kɛ́ tɩ nɔnɛ taa. Ʋ bɛ ɩ Naaŋmɩn nɔ-ƴãwna na ɩ paala a n'ʋ ɩ̃ sɛbr fʋ ɛ. A ʋl tɩ na tɛr a pɛr-tib daar za a n'ʋ.

⁶ À ŋá n'a a nɔ̃wfʋ ŋmɛ̃: kɛ́ tɩ sàwr a Naaŋmɩn nɛ-ƴãwnɩ. Ɛ́ a Naaŋmɩn nɔ-ƴãwna nyɩ na wõ a pɛr-tib daar za a n'ɩ kɛ́ tɩ vʋʋrɛ a nɔ̃wfʋ pʋɔ.

⁷ Nɩ-bɛlbɛ yaga yɛ́r'a pàw a tẽ-daa. Bɛ bɛ sàw de k'aa Yeezu Kɩrɩta wa na ɩ nɩsaal ɛ. À à ŋá n'a bɛ mɩ́ bãw a nɩ-bɛlɛ nɩ a Kɩrɩta dɔ̃ sob.

⁸ Nyɩ gùre nyɩ tʋɔra taa wa gúure a tɩ tome tɔnɛ ɩ, ɛ́ páw a sã-ya za.

⁹ Nɩsaal za na bɛ tɛr a Kɩrɩta wulu, ɛ́ mɩ́ wul col'ɩ a, ʋ bɛ lãw nɩ a Naaŋmɩn ɛ. Sob nɛ na mɩ́ tɛr a wulu ŋa a, ʋ lãwnɩ nɩ a Sãà nɩ a Bie.

¹⁰ Nɩr wa waar a nyɩ zie ɛ́ bɛ tɛr a wulu ŋa a, nyɩ taa dier ʋ sãanʋ a nyɩ yir ɛ, ɛ́ mɩ̀ taa puore ʋ a ʋ waa yãanɩ ɛ.

¹¹ Bʋ̃ʋ n'ʋ vɛ̃, sob nɛ na puore ʋ a ʋ waa yãanɩ a, ʋ pʋɔ nɩ a ʋ tõ-faar pʋɔ.

A sɛbɛ baarʋ ƴɛ̀r-bie

¹² Ɩ̃ cãà na tɛr yel-yaga nãá yel kʋ̀ nyɩ, ɛcɛ ɩ̃ bɛ tɩ bɔbr k'ɩ̃ɩ manɩ a sɛb-ɓɛl zu nɩ sɛb-dale-kʋ̃ɔ ɩ. Ɩ̃ tɩɛrɛ na k'ɩ̃ɩ ta a nyɩ zie tɩ ƴɛ̀r sɔw taa, a tɩ nʋ̃ɔ̀ tʋ̃ɔ́ vɩɛl ʋ za.

¹³ A fʋ yɛb a Naaŋmɩn mɩ̀ na kaa ír a bibiir puore fʋ na.