2 Timote 4 - A SƐB-SÕW

¹ Ɩ̃ zɛlɛ na kpaalɛ nɩ fʋ, a Naaŋmɩn niŋé nɩ a Kɩrɩta Yeezu niŋé, ʋl na na lɛb wa wa maal'ɩ a nɩ-vʋʋrɩ nɩ a nɩ-kũuni ƴɛ̀rʋ a, a ʋ lɛb-waa nɩ a ʋ naalʋ zũú,

² hiere yere a Naaŋmɩn ƴɛ̀rʋ, alɛ saa ŋmɛ̃ ŋmɩŋmɩn a, manɛ ʋ, mɩ́ man ʋ wul a bɛlɩ dem na yel kɛ́ ziri n'a a, ƴãwnɛ bɛ dɛ̃bɩ̃ɛ, mɩ́ nyɔw fʋ tʋɔra kpaalɛ bɛ tɛr'ɩ a wulu tɩɛrʋ kʋralɛ.

³ Daar kãw sɩrɩ na waar na ta, bɛ mɩnɛ kʋ̃ cãà sàwr a wul-vla ɩ, ɛcɛ mɛ̃ a lɛ bɛ na bɔbr a, bɛ na tɛr'ɩ wul-wulbɛ yaga yaga bɛ manɛ yele na nʋmɛ a bɛ tobe wob ƴãw a.

⁴ Bɛ na fur'ɩ a bɛ tobe a yel-mɩŋa ƴãw, ɛ́ tu suolu pùor.

⁵ Ɛcɛ a fʋ̃ʋ a, nyɔw fʋ tʋɔra a yele za pʋɔ, sàw de a tuo, tone a Yel-nʋ̃ɔ̀ hieru tome, tone a fʋ Naaŋmɩn tõ-tõ-bie tome za vla.

⁶ Mãa a, bɛ maal'ɩ mɛ̃ nɩ a bàwr baarɩ, a ɩ̃ kulu daar ta na.

⁷ Ɩ̃ zɛb'ɩ a zɛb-vla, ɩ̃ zɔ na ta a dãw-taa zɔ-tab zie, ɩ̃ maal'a tɛr a naaŋmɩn-sàw-deb.

⁸ Ƴɛrɛŋa a, a mɩnʋ sã-ya gùre mɛ̃ na. A ƴɛ̀rʋ-maalʋ bibir wa vɩɛ a, a Sore na ɩ ƴɛ̀r-maalɛ na tuur yel-mɩŋa a na de ʋ na kʋ̀ m. Ɛcɛ mãa yõ kʋ̃ n'ʋ ɛ, ʋ mɩ̀ na de ʋ na kʋ̀ a bɛlɩ dem za na gùre nɩ nɔ̃wfʋ a daar ʋl ʋ nãà wa sãá a.

Yele a mɩnɛ a Pol na manɛ kʋ̀rɛ a Timote a

⁹ Ƴãw fãw wa fɔ̃w wa páw mɛ̃.

¹⁰ Bʋ̃ʋ n'ʋ vɛ̃, a Demasɩ zawrɩ mɛ̃ na bɛr ɛ́ tɔl cen Tesalonikɩ, ʋ na nɔ̃w a tẽw ŋa zu yele a ƴãw. Kɩrɛsãsɩ cen nɩ Galasi, Títɩ̀ cen Dalmasɩ.

¹¹ Luka yõ n'ʋ be a ɩ̃ zie. Tɛr a Markɩ wa n, ʋ na sõw mɛ̃ nɩ a ɩ̃ tome pʋɔ bɛ dɩ vuo ɩ.

¹² Ɩ̃ tõ n Tɩsɩkɩ Efɛɛzɩ tẽw.

¹³ Fʋ̃ʋ wa waar a, fʋ̃ʋ tɛr a kpar-kpɛ̃ɛ ɩ̃ na bɛr a Karpɔsɩ zie a Tʋrʋwasɩ a waar'ɩ, lãwnɩ a sɛbr, baa zuo a za a gamɛ sɛbr.

¹⁴ A sãa-kpɩɛrɛ Alɛsãdɩr ɩ na a kpɛ m yaga. «A Sore na ya ʋ na man nɩ a ʋ ɩ-ɩrɩ.»

¹⁵ A fʋ̃ʋ mɩ̀, gù fʋ tʋɔra a ʋ ƴãw. Ʋ bɛ sàw de a tɩ ƴɛ̀rʋ towtow ɛ.

¹⁶ Ɩ̃ na tɩ cen a ƴɛ̀rʋ zie a dãw-niwn sob, k'ɩ̃ɩ tɩ ƴɛ̀r faa ɩ̃ tʋɔra a, nɩr za bɛ tɩ tu a ɩ̃ pùor ɛ, bɛ za tɩ zawrɩ mɛ̃ na bɛr. Naaŋmɩn taa wa sowre bɛ bom ɛ.

¹⁷ A Sore ʋl sõw mɛ̃ na. Ʋ kʋ̀ m'ɩ fãw yaga k'ɩ̃ɩ tʋ̃ɔ́ hieri yel a Yel-nʋ̃ɔ̀, ɛ́ ɩ a nɩ-bʋʋr-yoru za wõ ʋ. Ʋ faa mɛ̃ nɩ a gbẽw nʋɔrɩ́.

¹⁸ A Sore na cãà na lɛb faa mɛ̃ yel-faa za pʋɔ. Ʋ na faa mɛ̃ na ɛ́ ƴãw ɩ̃ kpɛ a ʋ tẽ-vla Naalʋ pʋɔ. Ʋlɛ so yúor-vɩɛlʋ-danʋ a yome yome za. Amɛn.

Yãan-pɛ-baara

¹⁹ Puori a Pɩrɩsɩl nɩ a Akɩlasɩ kʋ̀ m, lãwnɩ a Onezifɔɔr yir dem.

²⁰ Erasɩ cãà na be a Korɛ̃tɩ. Torofim ɩ n bàal, ɩ̃ bɛr ʋ a Mɩlɛ.

²¹ Ɩ fãw wa ɛ́ a ũo-yi-paala wa bãw ta. Ebul nɩ Pidãsɩ nɩ Lɛ̃ puore fʋ na, de nɩ Kulodɩa nɩ a yɛbr za.

²² A Sore ʋ be a fʋ zie. A Naaŋmɩn maalʋ, ʋ be a nyɩ zie.