2 Tesalonikɩ 3 - A SƐB-SÕW

Nyɩ puore kʋ̀rɛ tɩ

¹ Lɛb waar mɩ̀, yɛbr i, nyɩ puore kʋ̀rɛ tɩ, k'aa Sore ƴɛ̀rʋ yɛ̀rɛ fɔ̃w fɔ̃w ɛ́ nyɛrɛ ƴãwfʋ, mɛ̃ a lɛ ʋ na nyɛ̃ ƴãwfʋ a nyɩ zie a.

² Nyɩ mɩ̀ puore k'aa Naaŋmɩn faa tɩ a nɩ-faar nɩ a po-to-dem nuru pʋɔ, bʋ̃ʋ n'ʋ vɛ̃, a nɩbɛ za bɛ nɛbɛ tɛr a naaŋmɩn-sàw-deb ɛ.

³ Ɛcɛ a Sore ŋmɛ̃ n ʋ ŋmɛ̃a: ʋ na kʋ̀ nyɩ nɩ fãw ɛ́ piw nyɩ tɛr a Faalʋ sob ƴãw.

⁴ A nyɩɩm ƴãw a, tɩ ɓãá nɩ ƴãw bɛr tɩɛrʋ a Sore zie: bom nɛ za tɩ na mɩ́ yel kɛ́ nyɩ maalɩ a, nyɩ mɩ́ maal'a, ɛ́ na cãà maalɛ.

⁵ A Sore, ʋ ɩ a nyɩ socie a tɛr a Naaŋmɩn nɔ̃wfʋ nɩ a Kɩrɩta kanyir.

Nɩr bɛ wa tone a, ʋ mɩ̀ ta dɩrɛ ɩ

⁶ Yɛbr i, a Sore Yeezu Kɩrɩta yúor ƴãw, tɩ yere na kʋ̀rɛ nyɩ: nyɩ ta pɩɛlɛ yɛb na kpɛ ƴã-tuo, ɛ́ bɛ tuur a wulu tɩ na lʋɔrɩ kʋ̀ nyɩ a ɩ.

⁷ A nyɩɩm a, nyɩ bãw nɩ a lɛ a na fɛr kɛ́ nyɩ cɔwrɛ tɩ a: bʋ̃ʋ n'ʋ vɛ̃, tɩ bɛ ɩ ƴã-to-ɩb a nyɩ sɔgɔ ɩ.

⁸ Tɩ bɛ ƴãw nɩr kãw za kʋ̀ tɩ bʋ̃-dɩrɩ mɔlɛ ɩ, tɩ nɩ̃ɛ na tɩ sàw a hanʋ nɩ a bàlʋ ɛ́ tõ mʋ̃tɔ̃w nɩ tɩ̃ɩsɔw, k'aa nyɩ been kãw za taa wa bàlɛ ʋ tʋɔra a tɩ ƴãw ɛ.

⁹ A bɛ kaar mɛ̃ tɩ bɛ tɛr sɔ́r a nyɩ sõwfʋ bom ƴãw ɛ, ɛcɛ tɩ tɩ bɔbr'a kɛ́ tɩ ɩ a lɛ wul nyɩ kɛ̀ nyɩ cɔwrɛ tɩ.

¹⁰ Bʋ̃ʋ n'ʋ vɛ̃, a lɛn daar tɩ na tɩ be a nyɩ zie a, tɩ yel'ɩ à ŋá kʋ̀ nyɩ: nɩr bɛ wa bɔbr k'ʋʋ tone a, ʋ mɩ̀ ta dɩrɛ ɩ.

¹¹ Ɛcɛ tɩ wone na bɛ yere kɛ́ nɩbɛ be n a nyɩ pʋɔ ɩrɛ ƴã-to-ɩb, bɛ ɩrɛ bom za ɩ, ɛ́ bãwnɛ a bɛ taabɛ yele.

¹² Tɩ yere na kʋ̀rɛ a nɩbɛ bɛ ŋa, ɛ́ kpaalɛ bɛ a Sore Yeezu Kɩrɩta yúor ƴãw, kɛ́ bɛ tone zoomlɛ, ɛ́ dɩrɛ a bɛ nuru bome.

¹³ Ɛ́ a nyɩɩm, yɛbr i, nyɩ taa wa bàlɛ a vla maalʋ ƴãw ɛ.

¹⁴ Nɩr bɛ wa tuur a wulu tɩ na kʋ̀rɛ nyɩ a sɛbɛ ŋa pʋɔ a, nyɩ bãw ʋ bɛr, ɛ́ ta cãà lãwnɛ nɩ ʋ ɛ, kɛ̀ vĩ kpɛ ʋ.

¹⁵ Ɛcɛ nyɩ ta ɩrɛ a ʋ zie mɛ̃ nyɩ dɔ̃ sob'ʋ a ɩ, nyɩ kpãanɛ ʋ mɛ̃ yɛb a.

Maalʋ nɩ yãan-pɛ-baara

¹⁶ A Sore na ɩ a ƴã-ɓaarʋ yib zie a, ʋl mɩŋa, ʋ kʋ̀rɛ nyɩ a ƴã-ɓaarʋ kʋralɛ, alɛ saa ŋmɛ̃ ŋmɩŋmɩn a.

¹⁷ A mãa Pol, mãa mɩŋa nũu n'ʋ sɛb a puoru ŋa. À ŋá n'a ɩ̃ mɩ́ ƴãw a ɩ̃ bãwfʋ a sɛbɛ za zu: a ɩ̃ sɛbrʋ n'a.

¹⁸ A tɩ Sore Yeezu Kɩrɩta maalʋ, ʋ be a nyɩ za zie.