2 Samɩɛl 8 - A SƐB-SÕW

A Daviir zɛb'a tʋ̃ɔ́ a Ɩsɩrayɛl tẽ-kpɔwlɩ

¹ A yele á ŋá pùorí, a Daviir tɩ zɛb'a tʋ̃ɔ́ a Filisɩtɛ̃ mɩnɛ, ɛ́ ɩ a bɛ fãw baarɩ. Ʋ tɩ ɩ na bɛ bɛ cãà so a vuo nɛ ɩ.

² Ʋ mɩ̀ tɩ zɛb'a tʋ̃ɔ́ a Mowab tẽw dem. Ʋ tɩ fɛr bɛ na ƴãw bɛ gã pɩɛrɩ tẽw, ʋʋ bʋ́r bʋ́r bɛ nɩ miw-máná. Ʋ tɩ kʋ n ziir ayi nɩbɛ, ɛ́ bɛr a ziir ata sob dem. Lɛ n'a a Mowab tẽw dem tɩ lɩɛbɩ a Daviir tõ-tõ-biir, a fɛr kɛ́ bɛ mɩ́ ya zu-yar.

³ A Daviir tɩ cãà na lɛb zɛb tʋ̃ɔ́ Erehovʋ bidɛb, Hadadezɛɛr, na ɩ Sova tẽw nãà a, a lɛn daar a Hadadezɛɛr na tɩ bɔbr k'ʋʋ lɛb de a Efaratɩ man lowr vuo a.

⁴ A Daviir tɩ nyɔw nɩ a soja-wi-zɔmnbɛ túr dɔwlɩ kɔbr ayopõi (1 700), nɩ soja-gbɛ́ɛ dem tùr-lɩzɛr (20 000). Ʋ tɩ tɛr'ɩ a bɛ wie ta kʋba (100) a zɛbr-torkori tawfʋ ƴãw, ɛ́ ƴãw bɛ ŋma a wie al na cɛ a pɛrɩ́ gbɛlõkori jiile.

⁵ A Siiri tẽw dem na tɩ kpɩɛr a Damasɩ a tɩ wa na kɛ́ bɛ wa sõw a Sova tẽw nãà Hadadezɛɛr. A Daviir mɩ̀ tɩ zɛb'a tʋ̃ɔ́ bɛ, ɛ́ kʋ a bɛ nɩbɛ tùr-lɩzɛr'ɩ ayi (22 000).

⁶ A Daviir tɩ zɩɩl'ɩ na-kpɛ̃ɛ-lɩɛrbɛ a Siiri tẽw dem ƴãw, bɛ lɩɛbɩ a Daviir tõ-tõ-biir, a fɛr kɛ́ bɛ yarɛ zu-yar. Zie nɛ za a Daviir na mɩ́ tɩ cen a zɛbr a, a Sore mɩ́ tɩ ɩ na ʋ zɛb tʋ̃ɔ́.

⁷ A Daviir tɩ de nɩ a salm-zɩɛ zɛbr-kur-pãgalɩ a Hadadezɛɛr sojarɩ na tɩ tɛr a cen nɩ a Zerizalɛm.

⁸ A Daviir mɩ̀ tɩ de nɩ kur-zɩɩr-yaga yaga na tɩ be Bɛta nɩ Berotaɩ a. A Bɛta nɩ a Berotaɩ tɩ ɩ n a Hadadezɛɛr naalʋ-tẽw tẽ-bɛrɛ ayi kãw.

⁹ Hamatɩ tẽw nãà, Tɔɩ, tɩ wõ na k'aa Daviir zɛb'a tʋ̃ɔ́ a Hadadezɛɛr zɛbr-nɩbɛ za.

¹⁰ Lɛ n'a ʋ tɩ tõ a ʋ bidɛb Yoram a Daviir zie, k'ʋʋ tɩ puor'ʋ, ɛ́ mʋʋr'ʋ, ʋ na zɛb tʋ̃ɔ́ a Hadadezɛɛr a, bʋ̃ʋ n'ʋ vɛ̃, a Hadadezɛɛr tɩ ɩ n a Tɔɩ dɔ̃ sob. A Yoram tɩ tɛr'ɩ salm-pla, salm-zɩɛ nɩ kur-zɩɛ bome cen nɩ tɩ kʋ̀ a Daviir.

¹¹ A Daviir mɩ̀ tɩ de a na kʋ̀ a Sore a ɩ a ʋ bʋ̃-sora, mɛ̃ a lɛ ʋ na tɩ dãw de a salm-pla nɩ a salm-zɩɛ kʋ̀ ʋ a, a al ʋ na tɩ fa a nɩ-bʋʋrɛ bɛ ŋa ʋ na tɩ zɛb tʋ̃ɔ́ a zie a:

¹² Siiri tẽw dem, Mowab tẽw dem, Amɔ̃ tẽw dem, Filisɩtɛ̃ mɩnɛ nɩ Amalesitɩ mɩnɛ, lãwnɩ a bome al ʋ na tɩ zɛb de a Hadadezɛɛr zie a.

¹³ A Daviir tɩ ɩ na a ʋ yúor yi a lɛn daar ʋ na tɩ zɛb tʋ̃ɔ́ a Siiri tẽw dem, a Nyaarʋ-fʋɔla pʋɔ, kʋ a bɛ nɩbɛ tùr-pie nɩ ani (18 000), ɛ́ lɛb wa a.

¹⁴ Ʋ tɩ zɩɩl'ɩ na-kpɛ̃ɛ-lɩɛrbɛ a Edɔm tẽw. A Edɔm tẽw za pʋɔ n'a ʋ tɩ zɩɩl'ɩ na-kpɛ̃ɛ-lɩɛrbɛ, ɛ́ a Edɔm tẽw dem za lɩɛbɩ a Daviir tõ-tõ-biir. À ŋá n'a a Sore mɩ́ tɩ ɩ a Daviir zɛb tʋ̃ɔ́, zie nɛ za ʋ na mɩ́ cen a zɛbr a.

A Daviir tõ-tõ-nɩ-bɛrɛ

¹⁵ A Daviir tɩ dɩ n a naalʋ a Ɩsɩrayɛl nɩbɛ za zu. Ʋ tɩ kaarɛ nɩ ʋ a nɩ-bʋʋrɛ za zie mɛ̃ a lɛ a na tu sɔ́r nɩ mɩnʋ a.

¹⁶ Zowab, a mã na tɩ dɩ kɛ́ Seruya a, n'ʋ tɩ ɩ a sojarɩ nɩ-kpɛ̃ɛ. Ahiludɩ bidɛb Yehosafatɩ n'ʋ tɩ ɩ a nãà ƴɛ̀r-manɛ.

¹⁷ Ahituvʋ bidɛb, Sadɔkɩ, nɩ Abɩataar bidɛb, Ahimelɛkɩ, tɩ ɩ n bàwr-maalbɛ. Seraya tɩ ɩ n sɛ-sɛbrɛ.

¹⁸ Yehoyada bidɛb, Benaya, n'ʋ tɩ ɩ a Keretɩ̃ɛ nɩ a Peletɩ̃ɛ mɩnɛ nɩ-kpɛ̃ɛ, bɛl na ɩ a nãà sojarɩ a. A Daviir bidɛbr mɩ̀ tɩ ɩ n bàwr-maalbɛ.