2 Samɩɛl 7 - A SƐB-SÕW

Naaŋmɩn yel'a k'ʋʋ na maal'ɩ a Daviir nɩ a ʋ bʋʋrɛ

¹ A nãà Daviir tɩ kpɛ n a ʋ yir baarɩ, ɛ́ a Sore faa ʋ a dɔ̃ dem na viiri koli a ʋ naalʋ-tẽw a nuru pʋɔ, ʋʋ tɛr ƴã-ɓaarʋ.

² Bibir kãw, a nãà tɩ yel'ɩ a naaŋmɩn-ƴɛ̀r-manɛ Natan: «Nyɛ̃, ɩ̃ kpɩɛr'ɩ yir bɛ na ŋmãa nɩ sɛɛdɩr dàar a, ɛcɛ a Naaŋmɩn wõ-taa daga nɩ̃ɛ be pɛn-sɛw pʋɔ.»

³ A Natan tɩ yel'ɩ a nãà: «Bom nɛ za fʋ na tɩɛr kɛ́ fʋ ɩ a, ɩ, bʋ̃ʋ n'ʋ vɛ̃, a Sore be n a fʋ zie.»

⁴ Ɛcɛ a ʋlɩ tɩ̃ɩsɔw nɛ, a Sore tɩ ƴɛ̀r'ɩ a Natan zie à ŋá:

⁵ «Cen tɩ yel a ɩ̃ tõ-tõ-bie Daviir: À ŋá n'a a Sore yere: “Fʋ̃ʋ n'ʋ na ŋmãa yir kʋ̀ m ɩ̃ kpɩɛr ɩ?

⁶ Bʋ̃ʋ n'ʋ vɛ̃, a ʋlɩ bibir ɩ̃ na ɩ a Ɩsɩrayɛl nɩbɛ yi a Eziptɩ wa tɔ a dɩ̃a a, ɩ̃ bɛ dãw kpɛ yir pʋɔ ɩ: pɛn-sɛw pʋɔ n'a ɩ̃ tɩ kpɩɛr, ɛ́ mɩ́ yi ka tɩ sãá ka.

⁷ Lɛb waar, a yome á ŋá za ɩ̃ na bɩɛlɩ a Ɩsɩrayɛl nɩbɛ a, ɩ̃ kaa na ír nɩ-bɛrɛ yaga. Bɛlɛ nɛbɛ kaa a ɩ̃ nɩ-bʋʋrɛ Ɩsɩrayɛl zie. Ɩ̃ bɛ dãw yel nɩr kãw za: “Bʋ̃ʋ n'ʋ so nyɩ bɛ ŋmãa sɛɛdɩr dàar yir kʋ̀ m?”

⁸ Lɛ so, tɩ yel à ŋá ƴãw pʋɔ kʋ̀ a ɩ̃ tõ-tõ-bie Daviir: à ŋá n'a a Sore, a Kpɛnʋ-za-sob, yere: “Mãa n'ʋ nyɔw fʋ a dʋn àrʋ zie, a dʋn pùorí, kɛ́ fʋ wa ɩ a ɩ̃ nɩ-bʋʋrɛ Ɩsɩrayɛl nɩ-kpɛ̃ɛ.

⁹ Mãa nɩ fʋ̃ʋ tɩ nɛbɛ, zie nɛ za fʋ na tɩ cere a, ɩ̃ kʋ n a fʋ dɔ̃ dem za, a fʋ niŋé. Ɩ̃ na ɩ na a fʋ yúor yi, man a tẽw ŋa zu nɩ-yée yée.

¹⁰ Ɩ̃ na kʋ̀ n zie a ɩ̃ nɩ-bʋʋrɛ Ɩsɩrayɛl, ɩ̃ na zɩɩlɩ ʋ nɩ a be, ʋʋ na kpɩɛr'ɩ a be, ɛ́ bɛr dɛ̃bɩ̃ɛ. Nɩ-faar kʋ̃ lɛb dɔwrɩ ʋ mɛ̃ a dãwdãw a ɩ,

¹¹ mɛ̃ a lɛn daar ɩ̃ na tɩ ƴãw a ƴɛ̀r-dɩrbɛ kaarɛ a ɩ̃ nɩ-bʋʋrɛ Ɩsɩrayɛl zie a ɩ. Ɩ̃ na faa fʋ nɩ a fʋ dɔ̃ dem za nuru pʋɔ, ɛ́ fʋ vʋʋrɛ nɩ ƴã-ɓaarʋ. Ɩ̃ pãa yere na kʋ̀rɛ fʋ, a mãa Sore, mãa n'ʋ na ŋmãa yir kʋ̀ b.

¹² A fʋ daar wa ta fʋ lɛb cen tɩ páw a fʋ sãà mɩnɛ a, a fʋ bidɛb kãw n'ʋ ɩ̃ na kaa ír, ʋ lɩɛrɩ fʋ ɩ a nãà, ɩ̃ɩ na zɩɩl'ɩ a ʋ naalʋ, ɛ́ ʋ kʋ̃ bãw damnʋ ɛ.

¹³ Ʋlɛ n'ʋ na ŋmãa yir kʋ̀ m, ɩ̃ɩ na zɩɩl'ɩ a ʋ naalʋ ʋ be kʋralɛ.

¹⁴ Ɩ̃ na ɩ n sãà a ʋ zie, ʋʋ ɩ a ɩ̃ bidɛb. Ʋlɛ wa sãw a, ɩ̃ na kpãa ʋ na mɛ̃ a lɛ a nɩsaalbɛ na mɩ́ kpãa a, mɛ̃ sãà na mɩ́ kpãa bie a.

¹⁵ Ɛcɛ a ɩ̃ nɔ̃wfʋ bɛ be na baarɩ a ʋ zie, mɛ̃ a Sawul zie a ɩ, ʋl ɩ̃ na zawrɩ bɛr, ɛ́ de fʋ lɩɛr'ɩ a.

¹⁶ A fʋ bʋ̃-dɔwra kãw na dɩrɛ nɩ a naalʋ a fʋ pùorí, bʋ̃ʋ n'ʋ vɛ̃, a fʋ yir naalʋ-dɩb kʋ̃ tɛr baarʋ ɛ.”»

¹⁷ A Natan tɩ manɩ nɩ a lɛ za a Naaŋmɩn na tɩ yel kʋ̀ ʋ a bʋ̃-nyɛra ŋa pʋɔ a kʋ̀ a Daviir.

A Daviir puoru

¹⁸ Lɛ n'a a nãà Daviir tɩ cen tɩ zɩ̃ a Sore niŋé, ɛ́ yel ʋ à ŋá: «Sore Naaŋmɩn i, mãa mɩ̀ n'ɩ anʋ, ɛ́ a ɩ̃ yir'ɩ buor ɛ̀ fʋ sàw maalɩ tɩ à à ŋá?

¹⁹ Ɛcɛ, Sore Naaŋmɩn i, a fʋ̃ʋ zie a, a cãà bɛ ɩ bom ɛ, fʋ ƴãw nʋɔr kɛ́ fʋ na maal'ɩ a ɩ̃ yir a nɩdaar. A sɛw na kɛ́ fʋ ɩrɛ à ŋá nɩsaal zie bɩɩ?

²⁰ Sore Naaŋmɩn i, fʋ bãw mɛ̃ na, mãa fʋ tõ-tõ-bie, ɩ̃ pãa lɛb yel kɛ́ bʋnʋ a?

²¹ A nʋɔr fʋ na ƴãw a, nɩ fʋ na nɔnɛ mɛ̃ a zũú n'a fʋ maalɩ a nɔ-ɓãa-yele á ŋá za, ɛ́ ɩ ɩ̃ bãw a.

²² Fʋ sɩrɩ na ɩ kpɛ̃ɛ, Sore Naaŋmɩn i! Fʋ bɛ tɛr fʋ tɔ ɩ, ɛ́ Naaŋmɩn bɛ be be a bɛ ɩ a fʋ̃ʋ ɛ, mɛ̃ a lɛ tɩ na wõ bɛ yere a kʋralɛ a.

²³ Nɩ-bʋʋrɛ been kãw be n a tẽw zu ŋmɛ̃ taa nɩ a fʋ nɩ-bʋʋrɛ Ɩsɩrayɛl fʋ na cen tɩ ya de, bɛ ɩ a fʋ nɩ-bʋʋrɛ, ɛ́ fʋ ɩ a bɛ yúor yi, ɛ́ fʋ maalɩ nɔ-ɓãa-yele nɩ yele na vʋ̃ɔnɛ pʋ̀lá a, a fʋ tẽw pʋɔ ɔ? Nɩ-bʋʋrɛ be n be ŋmɛ̃ taa nɩ a fʋ nɩ-bʋʋrɛ fʋ na faa a Eziptɩ tẽw nɩbɛ zie nɩ a bɛ ŋmɩmɛ zie a?

²⁴ Fʋ ɩ na bɛ lɩɛbɩ a fʋ nɩ-bʋʋrɛ kʋralɛ, ɛ́ fʋ̃ʋ, Sore e, fʋ lɩɛb'ɩ a bɛ Naaŋmɩn.

²⁵ Ƴɛrɛŋa a, Sore Naaŋmɩn i, a ƴɛ̀rʋ fʋ na ƴɛ̀r a mãa nɩ a ɩ̃ yir ƴãw a, tɛr ʋ kʋralɛ, ɛ́ ɩ mɛ̃ a lɛ fʋ na ƴãw a nʋɔr a.

²⁶ Lɛ n'a a fʋ yúor na yi kʋralɛ, ɛ́ a nɩbɛ yere: “A Ɩsɩrayɛl Naaŋmɩn n'ɩ a Sore Kpɛnʋ-za-sob!” Ɩ a ɩ̃ yir dɩrɛ a naalʋ kʋralɛ.

²⁷ Sɩza, Sore Kpɛnʋ-za-sob, Ɩsɩrayɛl Naaŋmɩn i, fʋ̃ʋ mɩŋa n'ʋ ɩ ɩ̃ bãw a fʋ pʋ-tɩɛrʋ, fʋ na yel mɛ̃: “Mãa n'ʋ na ŋmãa yir kʋ̀ b.” Alɛ n'a so, ɩ̃ sʋ̃ɔmɩ sàw puori fʋ à à ŋá.

²⁸ Sore Naaŋmɩn i, fʋ̃ʋ n'ʋ ɩ a Naaŋmɩn, a lɛ za fʋ na mɩ́ yel a, a mɩ́ ɩ na! Ɛ́ ƴɛrɛŋa, fʋ yel a yel-vla ŋa kʋ̀ m!

²⁹ Ɩ̃ zɛlɛ fʋ na, sàw maalɩ a ɩ̃ yir, k'aa ɩ̃ bʋ̃-dɔwrɩ dɩrɛ a naalʋ kʋralɛ a fʋ niŋé. Sore Naaŋmɩn i, mɛ̃ a lɛ fʋ na yel a, a fʋ maalʋ, a be a ɩ̃ yir zu kʋralɛ.»