2 Samɩɛl 5 - A SƐB-SÕW

A Ɩsɩrayɛl dɔwlʋ nɩbɛ cir'ɩ a kãá ƴãw a Daviir ʋ ɩ a nãà

¹ A Ɩsɩrayɛl dɔwlʋ nɩbɛ za tɩ wa na wa páw a Daviir a Ebrɔ̃ yel ʋ: «Tɩɩm nɩ fʋ̃ʋ a, zɩ̃ɩ-been nɩbɛ n'ɩ tɩ.

² A koro za a, a Sawul na tɩ ɩ a tɩ nãà a, fʋ̃ʋ n'ʋ mɩ́ tɩ tɛr a Ɩsɩrayɛl sojarɩ cen nɩ a zɛbr zie. Ɛ́ a Sore tɩ yel fʋ na: “Fʋ̃ʋ n'ʋ na cɩ̃ɩnɛ a ɩ̃ nɩ-bʋʋrɛ Ɩsɩrayɛl, fʋ̃ʋ n'ʋ na ɩ a Ɩsɩrayɛl nɩ-kpɛ̃ɛ.”»

³ A Ɩsɩrayɛl nɩbɛ nɩ-kore za tɩ cen na tɩ páw a nãà a Ebrɔ̃. A Daviir tɩ maal'ɩ bɛ nɩ wõ-taa a be, a Sore niŋé, ɛ́ bɛ cir a kãá ƴãw ʋ, ʋ ɩ a Ɩsɩrayɛl nãà.

⁴ A Daviir tɩ tɛr'ɩ yome lɩzɛr'ɩ pie, a lɛn daar ʋ na tɩ ɩ a nãà a, ɛ́ dɩ a naalʋ yome lɩz'a ayi.

⁵ Ʋ tɩ dɩ n a naalʋ a Ebrɔ̃, yome ayopõi nɩ cuwr ayʋɔb a Zuda dɔwlʋ zu, ɛ́ a Zerizalɛm, ʋ dɩ a naalʋ yome lɩzɛr'ɩ pie nɩ ata, a Ɩsɩrayɛl nɩ a Zuda dɔwlʋ za zu.

A Daviir zɛb'a de a Zerizalɛm

⁶ A nãà Daviir nɩ a ʋ nɩbɛ tɩ cen nɩ a Zerizalɛm ƴãw. A Zebizitɩ mɩnɛ na tɩ kpɩɛr a tẽw a, tɩ yel'ɩ a Daviir à ŋá: «Nyɩ kʋ̃ kpɛ a tɩ tẽ-kpɛ̃ɛ pʋɔ ɩ. Zɔn nɩ wʋbr tɛɛ za na kpɛmɛ na k'a sɛw bɛ diw nyɩ nyɩ lɛb.» Bɛ tɩ bɔbr'a kɛ́ bɛ yel k'aa Daviir bɛ be za na de a bɛ tẽ-kpɛ̃ɛ ɩ.

⁷ Ɛcɛ a Daviir tɩ zɛb'a de a Sɩyɔ̃ zɛbr-yir-kpɛ̃w bɛ na wa bʋɔlɛ a pùorí kɛ́ «Daviir Tẽ-kpɛ̃ɛ» a.

⁸ A ʋlɩ bibir nɛ, a Daviir tɩ yel'a: «Nɩr wa bɔbr k'ʋʋ zɛb tʋ̃ɔ́ a Zebizitɩ mɩnɛ a, ʋ tu a tẽsɔw pʋɔ bɔw-wɛra sɔ́r! Ɛ́ a wʋbr nɩ a zɔn bɛ ŋa a, bɛ ɩrɛ mɛ̃ nɩ kɔkɔrʋ.» Alɛ n'a so bɛ mɩ́ yel: «Zɔ̃w nɩ wʋba bɛ kpɩɛr a Sore yir-kpɛ̃ɛ pʋɔ ɛ.»

⁹ A Daviir tɩ zɩ̃ n a zɛbr-yir-kpɛ̃w pʋɔ, ɛ́ por ʋ kɛ́: “Daviir Tẽ-kpɛ̃ɛ”. Al pùorí, ʋ tɩ ƴãw na bɛ mɛ dacĩ-bɛrɛ a mɩnɛ, na mɩ́ piw a tẽw tɛr a, yi n a gar ʋl bɛ na bʋɔlɛ Milo a, tɩ sãá nɩ a ʋ kpɛb zie.

¹⁰ À ŋá n'a a Daviir tɩ tɛrɛ fãw dɔwlɛ, a Sore, a Kpɛnʋ-za-sob na tɩ be a ʋ zie a ƴãw.

¹¹ Tɩ́ɩ̀r tẽw nãà, Hiram, tɩ tõ n nɩbɛ a Daviir zie, nɩ sɛɛdɩr dàar, nɩ dà-fɔwrbɛ nɩ kʋsɛ-pɛnbɛ, kɛ́ bɛ tɩ mɛ nãà yir kʋ̀ a Daviir.

¹² Lɛ n'a a Daviir tɩ bãw k'aa Sore zɩɩl'ʋ na, ʋ ɩ a Ɩsɩrayɛl nãà, nɩ k'ʋʋ zɛw nɩ a ʋ naalʋ, a ʋ nɩ-bʋʋrɛ Ɩsɩrayɛl zũú.

A Daviir bibiir na dɔw a Zerizalɛm a

¹³ A Daviir na tɩ yi a Ebrɔ̃ cen a Zerizalɛm a, ʋ tɩ kul'ɩ pɔw-yoru ƴãw pʋɔ, pɔw-bɛrɛ nɩ pɔw-bili, bɛ dɔw bidɛbr nɩ pɔwyaar kʋ̀ ʋ.

¹⁴ A ʋ bibiir bɛl na dɔw a Zerizalɛm a yée n'ɩ á ŋá: Samua, Sovavʋ, Natan, Salomɔ̃,

¹⁵ Yivaar, Elisuwa, Nefɛgɩ, Yafɩa,

¹⁶ Elisama, Eliyada nɩ Elifelɛtɩ.

A Daviir na zɛb tʋ̃ɔ́ a Filisɩtɛ̃ mɩnɛ a

¹⁷ A Filisɩtɛ̃ mɩnɛ tɩ wõ na kɛ́ bɛ cir'ɩ a kãá ƴãw a Daviir, ʋ ɩ a Ɩsɩrayɛl nãà. Lɛ n'a a bɛ za tɩ ìr ŋmãa wɩ̀ɛ a ʋ ƴãw. A Daviir tɩ wõ a na, ɛ́ cen tɩ be zie bɛ na gù vla a pʋɔ.

¹⁸ A Filisɩtɛ̃ mɩnɛ tɩ ta na yɛ́r pàw a Erefayitɩ mɩnɛ fʋɔla za.

¹⁹ A Daviir tɩ lɔb'ɩ a gbã-bie sowri a Sore à ŋá: «Ɩ̃ cen tɩ zɛb'ɩ a Filisɩtɛ̃ mɩnɛ ɛ? Fʋ na ƴãw bɛ nɩ a ɩ̃ nuru pʋɔ ɔ?» A Sore tɩ sɔw nɩ a Daviir à ŋá: «Cen tɩ zɛb'ɩ bɛ! Ɩ̃ na ƴãw bɛ nɩ a fʋ nuru pʋɔ.»

²⁰ Lɛ n'a a Daviir tɩ cen a Baal-Perasim, tɩ zɛb tʋ̃ɔ́ a Filisɩtɛ̃ mɩnɛ a be. Lɛ n'a ʋ tɩ yel: «A Sore puo nɩ vʋɔr a ɩ̃ dɔ̃ dem zie kʋ̀ m, mɛ̃ kʋ̃ɔ na mɩ́ puo vʋɔr a.» Lɛ so bɛ por a zie nɛ yúor kɛ́ Baal-Perasim, a pɛr lɛ kɛ́ “Vɛɛ Sob.”

²¹ A Filisɩtɛ̃ mɩnɛ tɩ zɔ na ɛ́ bɛr a bɛ tɩbɛ a be, a Daviir nɩ a ʋ nɩbɛ wob a cen nɩ.

²² A Filisɩtɛ̃ mɩnɛ tɩ lɛb'a wa a zɛbr ƴãw a gb'a ayi sob, wa yɛ́r pàw a Erefayitɩ mɩnɛ fʋɔla.

²³ A Daviir tɩ lɛb'a sowri a Sore, ʋ yel ʋ: «Ta tori bɛ ɛ́ zɛb'ɩ bɛ ɩ, jɩɩrɩ a bɛ zikurí, taw pɩɛlɩ bɛ a mikokuliye tɩɩr tuw ƴãw.

²⁴ Fʋ̃ʋ wa wone cenu na cere a mikokuliye tɩɩr nyʋɔrɩ́ a, fʋ̃ʋ paw fɔ̃w, bʋ̃ʋ n'ʋ vɛ̃, a lɛn daar'a ɩ̃ na de fʋ niwn, a Filisɩtɛ̃ mɩnɛ zɛbr-nɩbɛ zɛb-tʋ̃ɔ́fʋ ƴãw.»

²⁵ A Daviir tɩ ɩ n a lɛ tɔr za a Sore na tɩ yel kʋ̀ ʋ a, ɛ́ zɛb tʋ̃ɔ́ a Filisɩtɛ̃ mɩnɛ, yi n a Geva tɩ sãá nɩ a Gɛzɛɛr nʋɔr.