2 Samɩɛl 4 - A SƐB-SÕW

Baana nɩ Erekaavʋ kʋ n a Ɩsɩbosɛtɩ

¹ A Sawul bidɛb, Ɩsɩbosɛtɩ, tɩ wõ na k'aa Avɩnɛɛr kpi n a Ebrɔ̃. Ʋ bɛ tɩ bãw lɛ za ʋ na na ɩ a ɩ, ɛ́ dɛ̃bɩ̃ɛ tɩ nyɔw a Ɩsɩrayɛl nɩbɛ yaga za.

² Sojarɩ nɩ-bɛrɛ ayi kãw tɩ be n a Sawul bidɛb, Ɩsɩbosɛtɩ zie, a kãw dɩ kɛ́ Baana, ɛ́ a kãw dɩ kɛ́ Erekaavʋ. Bɛ̃zamɛ dɔwlʋ pʋɔ Irimon na yi Beerɔtɩ a bidɛbr tɩ nɛbɛ. Bʋ̃ʋ n'ʋ vɛ̃, a Beerɔtɩ pʋɔ nɩ a Bɛ̃zamɛ tẽw pʋɔ.

³ A Beerɔtɩ tẽw nɩbɛ tɩ zɔ na cen Gitayim, ɛ́ be n'a a bɛ bʋʋrɛ cãà kpɩɛr a dɩ̃a.

⁴ A Sawul bidɛb, Zonatã, tɩ tɛr'ɩ bidɛb, ʋ gbɛ́r. A ʋ yúor tɩ dɩ na kɛ́ Mefibosɛtɩ. Yome anũu n'a ʋ tɩ tɛr a lɛn daar bɛ na tɩ yi a Izireyɛl wa yel k'aa Sawul nɩ a Zonatã kpi na a. A ʋ bɩyaal tɩ ɓáw ʋ na k'ʋʋ zɔ nɩ, ɛcɛ a ʋ páwfʋ pʋɔ a, ʋ tɩ bɛr'ɩ a bie ʋ lo, gbɛ̀r.

⁵ A Beerɔtɩ tẽw Irimon bidɛbr, Erekaavʋ nɩ Baana, tɩ cen nɩ a Ɩsɩbosɛtɩ yir. A mʋ̃tɔ̃w-hɛ̃hɛ̃ daar'a bɛ tɩ ta a be. A Ɩsɩbosɛtɩ tɩ gúre nɩ a mʋ̃tɔ̃-tuo daar gʋ̃ɔ.

^6-7 Bɛ tɩ kpɛ n a yir pʋɔ mɛ̃ ble n'a bɛ tuo waar'ɩ a. Bɛ tɩ nyɛ̃ nɩ a Ɩsɩbosɛtɩ ʋ gã a ʋ gado zu, a ʋ di-gana pʋɔ, bɛ ŋmɛ ʋ a púorí kʋ. Bɛ na wa kʋ ʋ baar'a, a yɛbr ayi bɛ ŋa tɩ ŋmãa nɩ a ʋ zu tɛr zɔ n. Al pùorí, bɛ tɩ tu n a Zurdɛ̃ fʋɔla cen a tɩ̃ɩsɔw-ɓil za.

⁸ Bɛ tɩ wa n nɩ a Ɩsɩbosɛtɩ zu wa kʋ̀ a nãà Daviir a Ebrɔ̃ ɛ́ yel ʋ à ŋá: «Nyɛ̃ a fʋ dɔ̃ sob, Sawul, na tɩ bɔbr a fʋ kʋb a, bidɛb, Ɩsɩbosɛtɩ, zu. A dɩ̃a bibir a, a Sore yáa nɩ a fʋ san a Sawul nɩ a ʋ bʋʋrɛ zu.»

⁹ A Daviir tɩ sɔw nɩ a Beerɔtɩ tẽw, Irimon bidɛbr, Erekaavʋ nɩ Baana à ŋá: «A Sore na vʋʋrɛ a zũú, ʋl na faa mɛ̃ yel-faa za pʋɔ a!

¹⁰ A sob nɛ na tɩ yel a Sawul kũu kʋ̀ m a tɩ tɩɛrɛ na kɛ́ yel-vla n'ʋ ʋ yere kʋ̀rɛ mɛ̃, ɛcɛ ɩ̃ tɩ ƴãw na bɛ nyɔw ʋ kʋ a Sɩkɩlagɩ. À ŋá n'a ɩ̃ tɩ maal'ʋ a ʋ yel-vla ƴãw.

¹¹ Ɛ́ bɛ nãà yere nɩ-kʋrbɛ na kʋ nɩ-mɩŋa a ʋ yir pʋɔ, a ʋ gado zu a! A bɛ fɛr k'ɩ̃ɩ sowri nyɩ a kũu ŋa nyɩ na kʋ a san, ɛ́ ír nyɩ bɛr a tẽw zu ka ɩ»?

¹² A Daviir tɩ ƴãw nɩ a ʋ soja-pɔlɛ kʋ a Erekaavʋ nɩ a Baana. Al pùorí, bɛ ŋma bɛ a nuru nɩ a gbɛ́ɛ 'lẽ yawlɩ pɩɛlɩ a Ebrɔ̃ kʋ̃ɔ zie. Bɛ tɩ ɓáw nɩ a Ɩsɩbosɛtɩ zu ũù a Avɩnɛɛr yaa pʋɔ a Ebrɔ̃.