2 Samɩɛl 3 - A SƐB-SÕW

¹ A zɛbr tɩ kɔwr'ɩ a Sawul nɩbɛ nɩ a Daviir nɩbɛ cara pʋɔ. A Daviir tɩ tɛrɛ nɩ fãw dɔwlɛ, ɛ́ a Sawul nɩ a ʋ nɩbɛ fãw tɩ siwre.

A Daviir bidɛbr bɛl na dɔw a Ebrɔ̃ a

² A Daviir tɩ dɔw nɩ bidɛbr a Ebrɔ̃. A bidɛb-dãw n'ɩ Amɩnɔ̃, Izireyɛl tẽw Ahinowam n'ʋ ʋ tɩ dɔw nɩ ʋ.

³ A bidɛbr ayi sob'ɩ Kileyavʋ, Karmɛl tẽw Naval pɔw-kʋɔr, Avigayil, n'ʋ ʋ tɩ dɔw nɩ ʋ. A ata sob'ɩ Abɩsalɔm, Gesuur tẽw nãà Talmaɩ pɔwyaa, Maaka, n'ʋ ʋ tɩ dɔw nɩ ʋ.

⁴ Adonɩasɩ n'ɩ a anaar sob, Agitɩ n'ʋ ʋ tɩ dɔw nɩ ʋ. Sefatɩa n'ɩ a anũu sob, Avital n'ʋ ʋ tɩ dɔw nɩ ʋ.

⁵ A ayʋɔb sob'ɩ Yitireyam, a ʋ pɔw Egila n'ʋ ʋ tɩ dɔw nɩ ʋ. A Daviir bidɛbr'ɩ a bɛ ŋa na tɩ dɔw a Ebrɔ̃ a.

A Avɩnɛɛr nɩ a Ɩsɩbaal sãw nɩ taa

⁶ A zɛbr na tɩ be a Sawul nɩbɛ nɩ a Daviir nɩbɛ cara pʋɔ a lɛn daar a, a Avɩnɛɛr ʋl a, a fãw ʋ na tɩ tɛr a Sawul nɩbɛ zie a tɩ dɔwlɛ na cere.

⁷ A Sawul tɩ tɛr'ɩ pɔw-bile kãw ʋ dɩ kɛ́ Irisipa na ɩ Aya pɔwyaa a. A Ɩsɩbosɛtɩ tɩ yel'ɩ a Avɩnɛɛr: «Bʋ̃ʋ n'ʋ so fʋ gã nɩ a ɩ̃ sãà pɔw-bile?»

⁸ A Avɩnɛɛr na tɩ wõ a ƴɛ̀r-bie á ŋá a, ʋ tɩ nyɛ̃ nɩ suur bɛ dɩ vuo ɩ, ɛ́ yel à ŋá: «A mãa a, baa na zɔrɛ tuur a Zuda nɩbɛ a nɛ m bɩɩ? Wa tɔ dɩ̃a a, ɩ̃ tu n a fʋ sãà Sawul yir, ɩ̃ tu n a ʋ yɛbr nɩ a ʋ bárɩ, a fʋ̃ʋ tɔr za a, ɩ̃ bãw nɩ lɛ za ɩ̃ na ɩ k'aa Daviir ta páw fʋ a, ɛ́ fʋ̃ʋ n'ʋ wa yere mɛ̃ dɩ̃a yel-faa ɩ̃ na maal'ɩ a pɔw ŋa a?

⁹ A Naaŋmɩn, ʋ dɔwrɩ mɛ̃, ɛ́ lɛb dɔwrɩ ƴãw pʋɔ, mãa bɛ wa ɩ a Daviir ƴãw, a bom nɛ a Sore na pɔ yel k'ʋʋ na ɩ na kʋ̀ ʋ a.

¹⁰ A bom ʋl'ɩ ŋa: de a naalʋ a Sawul yir zie, ɛ́ zɩɩlɩ a Daviir naalʋ-dà-kɔw a Ɩsɩrayɛl nɩ a Zuda ƴãw, a Dan tɩ tɔ a Bɛɛr-Seva.»

¹¹ A Ɩsɩbosɛtɩ bɛ tɩ tʋ̃ɔ́ cɩr cɩrʋ za sɔw ʋ ɛ, ʋ na tɩ zɔrɛ a ʋ dɛ̃bɩ̃ɛ a ƴãw.

A Avɩnɛɛr lɩɛb'a tu a Daviir

¹² Al pùorí, a Avɩnɛɛr tɩ tõ n nɩbɛ a Daviir zie kɛ́ bɛ tɩ yel ʋ à ŋá: «Ãa so a tẽw? Maal'ɩ mɛ̃ wõ-taa, ɩ̃ɩ na sõw fʋ na fʋ ɓã a Ɩsɩrayɛl nɩbɛ za taa a fʋ zie.»

¹³ A Daviir tɩ sɔw ʋ na: «A vɩɛl'a, ɩ̃ na maal'ɩ fʋ nɩ a wõ-taa, ɛcɛ bʋ̃-been n'ʋ ɩ̃ bɔbr a fʋ zie: taa waar a ɩ̃ zie, ɛ́ bɛ de niwn bɛr a ɩ̃ pɔw Mɩkal, a Sawul pɔwyaa, ʋ wa ɩ. Lɛn daar tɛwr'a fʋ na tʋ̃ɔ́ wa a ɩ̃ zie.»

¹⁴ Al pùorí, a Daviir tɩ tõ n nɩbɛ a Sawul bidɛb Ɩsɩbosɛtɩ zie, kɛ́ bɛ tɩ yel ʋ à ŋá: «Kʋ̀ m a ɩ̃ pɔw Mɩkal, ɩ̃ na kul'ɩ Filisɩtɛ̃ mɩnɛ yɔnɔgamɛ kʋba (100) a.»

¹⁵ Lɛ n'a a Ɩsɩbosɛtɩ tɩ ƴãw bɛ bʋɔlɩ a Mɩkal, ʋ yi a ʋ sɩr Laisɩ bidɛb, Paltiyɛl, zie wa.

¹⁶ A ʋ sɩr tɩ bɩɛl'ʋ na tɩ ta n Bahurim. Ʋ tɩ kone na tuur'ɩ ʋ. Ɛcɛ a Avɩnɛɛr tɩ yel ʋ na: «Cen tɔl cen, lɛb kul!» Ʋ tɩ lɛb'a kul.

¹⁷ A Avɩnɛɛr tɩ páw nɩ a Ɩsɩrayɛl nɩbɛ nɩ-kore, bɛ ƴɛ̀r sɔw taa. Ʋ tɩ yel bɛ na: «Koro za n'a nyɩ bɔbr k'aa Daviir ɩ a nyɩ nãà.

¹⁸ A daar'ɩ à ŋà, nyɩ ɩ ɩb kãw. Bʋ̃ʋ n'ʋ vɛ̃, à ŋá n'a a Sore yel a Daviir ƴãw: “A ɩ̃ tõ-tõ-bie Daviir zie n'a ɩ̃ na tu faa a ɩ̃ nɩ-bʋʋrɛ Ɩsɩrayɛl a Filisɩtɛ̃ mɩnɛ nuru pʋɔ, nɩ a bɛ dɔ̃ dem za nuru pʋɔ.”»

¹⁹ A Avɩnɛɛr mɩ̀ tɩ ƴɛ̀r'ɩ a Bɛ̃zamɛ dɔwlʋ nɩbɛ zie. Al pùorí, ʋ tɩ cen nɩ a Ebrɔ̃, k'ʋʋ tɩ manɩ a yele a Bɛ̃zamɛ dɔwlʋ nɩbɛ za nɩ a Ɩsɩrayɛl dɔwlʋ nɩbɛ na tɩ sàw a kʋ̀ a Daviir.

²⁰ Nɩbɛ lɩzɛr'a tɩ bɩɛl'ʋ, ʋ tɩ ta a Daviir zie a Ebrɔ̃. A Daviir tɩ ƴãw na bɛ cɔbrɩ cuw dɩb a bɛ ƴãw.

²¹ A Avɩnɛɛr tɩ yel'ɩ a Daviir à ŋá: «Nãà, ɩ̃ sore e, ɩ̃ na tɩ ɓã n a Ɩsɩrayɛl nɩbɛ za taa a fʋ ƴãw. Bɛ na maal'ɩ fʋ nɩ wõ-taa, ɛ́ fʋ dɩrɛ naalʋ a bɛ zu, zie nɛ za fʋ na bɔbr a.» A Daviir tɩ bɛr'ɩ a Avɩnɛɛr sɔ́r k'ʋʋ kule, ʋʋ lɛb kul'ɩ ƴã-ɓaarʋ.

A Zowab kʋ n a Avɩnɛɛr

²² A Daviir sojarɩ nɩ a Zowab tɩ yi n a zɛbr zie tɛr bʋ̃-yaga bɛ na zɛb de a waar'ɩ. A Avɩnɛɛr bɛ tɩ cãà be a Daviir zie a Ebrɔ̃ ɛ. A Daviir tɩ bɛr ʋ na, ʋ lɛb kul'ɩ ƴã-ɓaarʋ.

²³ A Zowab nɩ a ʋ zɛbr-nɩbɛ za na tɩ ta a, nɩr kãw tɩ yel'ɩ a Zowab: «A Nɛɛr bidɛb, Avɩnɛɛr, wa n a nãà zie, ʋʋ bɛr ʋ, ʋ lɛb kul'ɩ ƴã-ɓaarʋ.»

²⁴ A Zowab tɩ cen na tɩ páw a nãà yel ʋ: «Bʋ̃ʋ n'ʋ fʋ ɩ à à ŋá? A Avɩnɛɛr wa n a fʋ zie, ɛ́ fʋ bɛr ʋ, ʋ lɛb kul à ŋá a?

²⁵ Fʋ bãw nɩ a Nɛɛr bidɛb Avɩnɛɛr! A fʋ bɛlʋ ƴãw n'a ʋ wa, k'ʋʋ wa piwri a fʋ gbɛ-ceni, ɛ́ bãw bom nɛ za fʋ na ɩrɛ a.»

²⁶ A Zowab tɩ yi n a nãà zie ɛ́ tɩ tõ nɩbɛ kɛ́ bɛ diw bɩɛrɩ a Avɩnɛɛr. Bɛ tɩ ɩ na ʋ yi a Sɩra sa-bie-kʋ̃ɔ-bɔw pɛr lɛb wa, ɛ́ a Daviir bɛ bãwnɩ a ɩ.

²⁷ A Avɩnɛɛr na tɩ lɛb wa ta a Ebrɔ̃ a, a Zowab tɩ bʋɔl'ʋ nɩ bɛ tɛwr zie, a tẽw dɩ̃dɔr pʋɔ, mɛ̃ ʋ bɔbr k'ʋʋ waalɩ ƴɛ̀r a ʋ zie a. A be a, ʋ tɩ cɔr'ɩ ʋ nɩ sʋɔ a púorí kʋ, k'ʋʋ yáa a ʋ yɛb Asayɛl kũu san.

²⁸ A Daviir na wa bãwnɩ a a pùorí a, ʋ yel'a: «A Sore mɩŋa za bãwnɩ a na, mãa nɩ a ɩ̃ naalʋ-tẽw bɛ tɛr sãwna kãw a Nɛɛr bidɛb, Avɩnɛɛr, kũu pʋɔ ɩ.

²⁹ A yele a kũu ŋa na na wa n a, a lo a Zowab nɩ a ʋ yir dem za zu! Bãbasʋ kʋ̃ɔ-saalʋ dɛwr bɩɩ kɔnʋ, a nyɔwr a dɛbr a Zowab yir pʋɔ kʋralɛ! A dɛbr, bɛ so pɔw-tome. Zɛbr-sɔ-kpɛ̃ɛ, ʋ kʋrɛ bɛ, ɛ́ bɛ mɩ́ bɔ dɩb gù!»

³⁰ A Avɩnɛɛr na tɩ kʋ a bɛ yɛb Asayɛl, a Gabaɔ̃ zɛbr zie a, alɛ n'a so a Zowab nɩ a ʋ yɛb Avɩsaɩ tɩ kʋ a Avɩnɛɛr.

³¹ A Daviir tɩ yel'ɩ a Zowab nɩ a nɩbɛ na tɩ bɩɛlɛ ʋ a: «Nyɩ taw a nyɩ kparɩ cɩɛrɩ, nyɩ su vʋɔrɩ kparɩ, maal'ɩ a Avɩnɛɛr kuor.» A nãà Daviir tɔr za tɩ tuur'ɩ a Avɩnɛɛr kũu.

³² Bɛ tɩ ũù nɩ a Avɩnɛɛr a Ebrɔ̃. A nãà tɩ kone nɩ minminmin a ʋ yaa zu, ɛ́ a nɩbɛ za mɩ̀ tɩ kone cire mʋta-kʋ̃ɔ.

³³ Al pùorí, a nãà tɩ kõ n lãw-mʋɔlɛ ŋa a Avɩnɛɛr ƴãw: «Avɩnɛɛr i, bʋ̃ʋ pãa so fʋ kpi a, fʋ kpi dãbol kũu a?

³⁴ A fʋ nuru bɛ tɩ 'lẽ ɩ, a fʋ gbɛ́ɛ bɛ tɩ ƴãw bamɛ ɩ. Ɛcɛ fʋ lo na kpi mɛ̃ nɩr nɩ-kʋrbɛ na ùr a.» A nɩbɛ tɩ lɛb'a bãw kone a Avɩnɛɛr.

³⁵ Al pùorí, a nɩbɛ tɩ wa na kɛ́ bɛ wa ƴãw a Daviir dɩ bom kãw, a zie na bɛ sɔb sɛr a. Ɛcɛ a nãà tɩ pɔ na yel: «A Naaŋmɩn, ʋ dɔwrɩ mɛ̃, ɛ́ lɛb dɔwrɩ ƴãw pʋɔ, mãa wa 'wɔb dipɛ̃-ŋmale kãw, bɩɩ dɩ bom kãw, ɛ́ a mʋ̃tɔ̃w bɛ kpɛ sɛr a!»

³⁶ A nɩbɛ za tɩ wõ a na, ɛ́ sàw kʋ̀ ʋ. Mɔ̃ mɩ̀, a nɩbɛ za mɩ́ tɩ sàw nɩ bom za, a nãà na ɩrɛ a.

³⁷ À ŋá n'a a Zuda tẽw nɩbɛ za, nɩ a Ɩsɩrayɛl nɩbɛ za tɩ bãwnɩ a, a ʋlɩ bibir, k'aa Nɛɛr bidɛb, Avɩnɛɛr, kũu bɛ yi a nãà zie ɩ.

³⁸ A Daviir tɩ yel'ɩ a ʋ tõ-tõ-nɩ-bɛrɛ à ŋá: «Nyɩ bãwnɩ a na kɛ́ nɩ-kpɛ̃ɛ, nɩ-kpɛ̃ɛ kpɛ̃ɛ kpi n a Ɩsɩrayɛl tẽw a dɩ̃a a?»

³⁹ Mãa a, ɩ̃ na saa ɩ nãà a, ɛcɛ ɩ̃ cãà na nyɛ̃ ɩ̃ bɛ tɛr fãw a nɩbɛ bɛ ŋa a bɛ mã na dɩ kɛ́ Seruya a, nɩ-fa-ɩb niŋé ɩ. Ɛcɛ a Sore tɔr za, ʋ dɔwrɩ a nɩ-faa sɛwnɩ a ʋ nɩ-fa-ɩb.