2 Samɩɛl 24 - A SƐB-SÕW

A Daviir ƴãw na kɛ́ bɛ sɔ́r a nɩbɛ

¹ Bibir kãw, a Sore suur tɩ lɛb'a ìr a Ɩsɩrayɛl nɩbɛ ƴãw. Ʋ tɩ ɩ na a Daviir ìr a bɛ ƴãw, ʋʋ yel ʋ à ŋá: «Cen tɩ sɔ́r a Ɩsɩrayɛl nɩ a Zuda tẽw nɩbɛ.»

² A nãà tɩ yel'ɩ a Zowab na tɩ ɩ a zɛbr-nɩbɛ nɩ-kpɛ̃ɛ, ɛ́ tɩ be a ʋ zie a: «Cɔlɩ a Ɩsɩrayɛl dɔwlʋ za, a Dan tɩ ta n a Bɛɛr-Seva, ƴãw bɛ sɔ́r a nɩbɛ ɩ̃ bãw bɛ nʋɔr.»

³ A Zowab tɩ sɔw nɩ a nãà: «A Sore fʋ Naaŋmɩn, ʋ ɩ a nɩbɛ yãwmɛ dɔwlɩ gb'a kʋba (100), ɛ́ a nãà, ɩ̃ sore, nyɛ̃ bɛ nɩ mimir! Ɛcɛ bʋnʋ ƴãw n'a a nãà, ɩ̃ sore, bɔbr a nɩbɛ sɔ́rʋ»

⁴ Ɛcɛ a lɛ a nãà na tɩ yel'a tɩ fɛrɛ na zuo a Zowab nɩ a zɛbr-nɩbɛ nɩ-bɛrɛ tɩɛrʋ. A Zowab tɩ ìr'a lo a sɔ́r, ʋlɛ nɩ a nãà zɛbr-nɩbɛ nɩ-bɛrɛ kɛ́ bɛ tɩ sɔ́r a nɩbɛ.

⁵ Bɛ tɩ gãw nɩ a Zurdɛ̃, ɛ́ tĩ a nɩbɛ sɔ́rʋ a Arowɛɛr tẽw, nɩ a tẽw ʋl na be a fʋɔla pʋ̃ɔmɩ za a. Bɛ tɩ tu na tɔl a Gadɩ dɔwlʋ pʋɔ, tu Yazɛɛr lowr,

⁶ tɩ kpɛ a Galaadɩ tẽw pʋɔ, cen a Hititɩ mɩnɛ tẽw, a Kadɛsɩ, a Dan-Yaan nɩ a ziir na viir koli a, al pùorí, bɛ ta Sɩdɔ̃.

⁷ Bɛ tɩ kpɛ n a Tɩ́ɩ̀r tẽ-kpɛ̃w pʋɔ, nɩ a Hivitɩ mɩnɛ nɩ a Kanãa tẽw nɩbɛ ten za pʋɔ. Al pùorí bɛ tɔl siw a Bɛɛr-Seva, a Zuda tẽw saa-pɛrɩ́-dʋrʋ-lowr.

⁸ Bɛ na tɩ cɔlɩ a tẽw za baar'a, bɛ tɩ lɛb'a wa a Zerizalɛm, cuwr piwaɩ nɩ bibie lɩzɛr pùorí.

⁹ A Zowab tɩ yel'ɩ a nɩbɛ nʋɔr ʋ na sɔ́r a kʋ̀ a nãà: a Ɩsɩrayɛl tẽw pʋɔ a, sojarɩ tùr-kɔbr-ani (800 000) na na tʋ̃ɔ́ zɛb'a nɛbɛ tɩ be be, ɛ́ a Zuda tẽw pʋɔ bɛ ɩ tùr-kɔbr-anũu (500 000).

A Naaŋmɩn ƴãw nɩ jɛ̀lmɛ̃ bàalʋ a Ɩsɩrayɛl tẽw pʋɔ

¹⁰ A Daviir na tɩ sɔ́r a nɩbɛ à ŋá baar'a, pʋ̀lá tɩ vʋ̃ɔ ʋ na. Ʋ tɩ yel'ɩ a Sore: «Yel-bier-kpɛ̃ɛ n'ʋ ɩ̃ maalɩ. Ɛcɛ ƴɛrɛŋa a, Sore e, dɩ a ɩ̃ sãwna suur kʋ̀ m, bʋ̃ʋ n'ʋ vɛ̃, ɩ̃ sɩrɩ na tõ dãbol-tome.»

¹¹ A Daviir na tɩ ìr a bio daarɩ́ biɓaara a, a Sore tɩ ƴɛ̀r'ɩ a naaŋmɩn-ƴɛ̀r-manɛ Gadɩ na tɩ ɩ a Daviir yã-wule a zie à ŋá:

¹² «Cen tɩ yel a Daviir: À ŋá n'a a Sore ƴɛ̀rɛ: Bʋ̃-faar ata n'a ɩ̃ na ɩ a lo a fʋ zu, kaa ír a kãw ɩ̃ ƴãw fʋ.»

¹³ Lɛ n'a a Gadɩ tɩ cen tɩ páw a Daviir manɩ kʋ̀ ʋ. Ʋ tɩ yel ʋ na: «Kɔ̃ na na lo a fʋ tẽw yome ayopõi a, bɩɩ a fʋ dɔ̃ sob na na diwr fʋ cuwr ata a, bɩɩ jɛ̀lmɛ̃ bàalʋ na na lo a fʋ tẽw bibie ata a n'a fʋ bɔbr ɩ? Tɩɛrɩ vla, ɛ́ yel kʋ̀ m, a lɛ ɩ̃ na na tɩ sɔw kʋ̀ a sob nɛ na tõ m a.»

¹⁴ A Daviir tɩ sɔw nɩ a Gadɩ: «Pʋl-vʋ̃ɔ nyɔw mɛ̃ na bɛ dɩ vuo ɩ... Ɛcɛ mãa nɩ̃ɛ lo a Sore nuru pʋɔ a, alɛ sa ɩ̃ na na lo a nɩsaalbɛ nuru pʋɔ a, bʋ̃ʋ n'ʋ vɛ̃, a Sore bãw nɩ nɩbaalʋ zɔba.»

¹⁵ Lɛ n'a a Sore tɩ ƴãw a jɛ̀lmɛ̃ bàalʋ lo a Ɩsɩrayɛl tẽw pʋɔ, a ʋlɩ bibir nɛ biɓaara tɩ ta n a daar ʋl ʋ na ƴãw a. A Naaŋmɩn nɩ-bʋʋrɛ na tĩ a Dan tɩ tɔ a Bɛɛr-Seva a pʋɔ a, nɩbɛ tùr-lɩz'a ata nɩ pie (70 000) n'a tɩ kpi.

¹⁶ A Sore malkɩ nũu tɩ tur'a cɔw a Zerizalɛm k'ʋʋ sãw ʋ bɛr, ɛcɛ a Sore tɩ lɩɛb'ɩ a dɔwrʋ bɛr, ɛ́ yel a malkɩ na tɩ kʋrɛ a nɩbɛ pàwr pɛr a: «A sɛw n'ɩ lɛ! Ƴɛrɛŋa a, siwri a fʋ nũu.» Zɩ̃ k'aa Sore malkɩ tɩ pɩɛl'ɩ a Zebi tẽw nɩr Arona blevab gbãgbalá.

¹⁷ A Daviir na tɩ nyɛ̃ a malkɩ ʋ kʋrɛ a nɩbɛ a, ʋ tɩ yel'ɩ a Sore: «Mãa n'ʋ maalɩ a yel-bier, mãa n'ʋ sãw, ɛcɛ a ɩ̃ nɩ-bʋʋrɛ nɩbɛ bɛ ŋa a, bʋ̃ʋ n'ʋ bɛ ɩ? Mãa nɩ a ɩ̃ yir nɩbɛ nɛbɛ a sɛw kɛ́ fʋ dɔwrɩ.»

A Daviir mɛ n bàwr-maal-kuur a Sore ƴãw

¹⁸ A ʋlɩ bibir nɛ tɔr za a, a Gadɩ tɩ cen na tɩ páw a Daviir yel ʋ à ŋá: «Do a Zebi tẽw dɔɔ Arona ble vab gbãgbalá tɩ mɛ bàwr-maal-kuur a Sore ƴãw.»

¹⁹ A Daviir tɩ do na mɛ̃ a lɛ a Sore na tɩ ƴãw a Gadɩ yel kʋ̀ ʋ a.

²⁰ A Arona tɩ be n a be, ɛ́ nyɛ̃ a nãà nɩ a ʋ tõ-tõ-biir na waar a ʋ zie a. Lɛ n'a ʋ tɩ taw pɩɛlɩ, gũu tɩ tɔ tẽw a nãà niŋé,

²¹ ɛ́ sowri: «Nãà ɩ̃ sore e, bʋnʋ ƴãw n'a fʋ waar a mãa, a fʋ tõ-tõ-bie, zie?» A Daviir tɩ sɔw na: «K'ɩ̃ɩ wa dà a fʋ ble-vab gbãgbala, mɛ bàwr-maal-kuur a Sore ƴãw. Lɛ n'a a bʋ̃-faa na lo a nɩbɛ zu a, na baarɩ.»

²² A Arona tɩ sɔw nɩ a Daviir à ŋá: «A nãà ɩ̃ sore, ʋ de bom za ʋ na bɔbr a, maal'ɩ a nyɩw-a-za-bàwr. A ɩ̃ nĩi n'ɩ á ŋá a nyɩw-a-za-bàwr maalʋ ƴãw, a torko nɩ a nĩi nyuru dàar na gbɔw nɩ a vũu.»

²³ A Arona tɩ kʋ̀ n à á ŋá za a nãà, ɛ́ yel ʋ: «A Sore fʋ Naaŋmɩn, ʋ sàw de a fʋ de-kʋ̀b bom.»

²⁴ Ɛcɛ a nãà tɩ yel'ɩ a Arona: «Ʋ̃ʋ'hʋ̃! Ɩ̃ bɔbr'a k'ɩ̃ɩ dà ʋ a ʋ daarʋ nʋɔr, ɩ̃ bɛ bɔbr k'ɩ̃ɩ maalɩ nyɩw-a-za-bagɛ na bɛ kpɛ m'a kʋ̀ a Sore ɩ̃ Naaŋmɩn ɛ.» A Daviir tɩ dà n a ble vab gbãgbala lãwnɩ a nĩi, salm-pla libie lɩz'a ayi nɩ pie.

²⁵ A be n'a a Daviir tɩ mɛ a bàwr-maal-kuur a Sore ƴãw, maalɩ nyɩw-a-za-bagɛ nɩ ƴã-ɓaarʋ bagɛ kʋ̀ a Sore. A Sore tɩ wul'ɩ a ʋ nɔ̃wfʋ, ɛ́ a bʋ̃-faa na tɩ lo a Ɩsɩrayɛl zu a baarɩ.