2 Samɩɛl 23 - A SƐB-SÕW

A Daviir ƴɛ̀r-pɛ-baara

¹ Nyɛ̃ a Daviir ƴɛ̀r-pɛ-baara: Nyɩ bɛrɛ wone a Zese bidɛb Daviir ƴɛ̀rʋ, a nɩr nɛ bɛ na zɛw ʋ do saa bɛ dɩ vuo a ƴɛ̀rʋ, a Zakɔb Naaŋmɩn nɩ-kabra, nɩ a sob ʋl a Ɩsɩrayɛl nɩbɛ na nɔnɛ a bɛ yielu pʋɔ a:

² Mãa zie n'a a Sore Vʋʋrʋ mɩ́ tu ƴɛ̀rɛ, a ʋ ƴɛ̀rʋ be n a ɩ̃ nʋɔrɩ́.

³ A Ɩsɩrayɛl Naaŋmɩn ƴɛ̀r'a, a Sob nɛ na piw a Ɩsɩrayɛl tɛr a yel mɛ̃ na: «A nãà ʋl na kaarɛ a nɩbɛ nɩ mɩnʋ, ɛ́ sàwr a Naaŋmɩn nʋɔr a ʋ nɩbɛ kaafʋ pʋɔ a,

⁴ ŋmɛ̃ na mɛ̃ mʋ̃tɔ̃w na pur caalɩ biɓaara salom na bɛ tɛr zũzuge a. A saa wa wa yʋɔ a, a mʋ̃tɔ̃w tʋlʋ mɩ́ ɩ na a mɔ̃-ɓaar bul yi pàw a tẽw.»

⁵ Nyɛ̃ a lɛ a Naaŋmɩn na ɩ a ɩ̃ yir ƴãw a: ʋ bin nɩ wõ-taa na bɛ tɛr baarʋ a, mãa nɩ a ʋl cará, ʋ bin ʋ na nɩ tub na gù ʋ a. A yele za pʋɔ a, ʋ mɩ́ ɩ na ɩ̃ zɛb tʋ̃ɔ́, ʋ mɩ́ maal'ɩ a ɩ̃ pʋ-tɩɛrʋ.

⁶ Ɛcɛ a nɩ-bɛ-tɛr-bir mɩnɛ za, ɩ na mɛ̃ wuli na tɛr gʋʋr bɛ na mɩ́ lɔb bɛr a. Nɩr bɛ nyɔwr a nɩ nũ-zawla ɩ.

⁷ Nɩr wa tʋɔr a a, kure bom bɩɩ kafin dàa n'ʋ ʋ mɩ́ tɛr, ʋʋ mɩ́ nyɩw nɩ a za bɛr a be, daadaalɛ.

A Daviir zɛbr-nɩbɛ

⁸ A Daviir soja-gãdaar yée n'ɩ à á ŋá: A Takemonitɩ dɔɔ, Ɩsɩbaal, tɩ pʋɔ nɩ a sojarɩ bɛl na gùre a Daviir ɛ́ bɛ tɛr bɛ tɔ a pʋɔ. Bɛ mɩ̀ tɩ bʋɔlɛ ʋ na kɛ́ Ɛsɩnitɩ dɔɔ, Adino, ʋlɛ n'ʋ tɩ kʋ nɩbɛ kɔbr ani (800) zɛbr been pʋɔ.

⁹ Dodo bidɛb, Eleazaar, na ɩ Ahowa tẽw nɩr kãw yãw a n'ʋ tɩ tu a Ɩsɩbaal zu. A lɛn daar bɛ na tɩ pɔrɛ ciere nɩ a Filisɩtɛ̃ mɩnɛ na tɩ ɓã taa a zɛbr ƴãw a, ʋ tɩ pʋɔ nɩ a gãdaar ata bɛl na tɩ bɩɛlɛ a Daviir a pʋɔ. A Ɩsɩrayɛl zɛbr-nɩbɛ tɩ lɩɛb'a zɔ,

¹⁰ ɛcɛ a Eleazaar tɩ ba n gbɛ́r, ɛ́ kʋ Filisɩtɛ̃ mɩnɛ lɛɛɛ a nũu tɩ bàl kpi mɛr a zɛbr-sɔ-kpɛ̃ɛ nyɔwfʋ zie. A Sore tɩ ɩ na a Ɩsɩrayɛl nɩbɛ zɛb tʋ̃ɔ́ pẽlẽpẽlẽ a ʋlɩ bibir nɛ. A sojarɩ tɩ lɩɛb'a wa a Eleazaar zie a pùorí, ɛ́ a ɩ a nɩbɛ na kpi a bome deb tɛwr ƴãw.

¹¹ Haraar tẽw Age bidɛb, Sama, n'ʋ tu a Eleazaar zu. A Filisɩtɛ̃ mɩnɛ tɩ ɓã n taa Lehi. Puo kãw tɩ be n a be, ɩ bɛ̃w-bʋʋrɛ kãw bɛ na bʋɔlɛ lãtɩɩ a tɛwr. A Ɩsɩrayɛl zɛbr-nɩbɛ tɩ lɩɛb'a zɔ a Filisɩtɛ̃ mɩnɛ niŋé.

¹² Ɛcɛ a Sama tɩ àr'ɩ a púo sɔwlɩsɔw, lɛb de a púo, ɛ́ zɛb tʋ̃ɔ́ a Filisɩtɛ̃ mɩnɛ. À ŋá n'a a Sore tɩ ɩ a Ɩsɩrayɛl zɛb tʋ̃ɔ́ pẽlẽpẽlẽ.

¹³ Bibir kãw, a ble deb daar, soja-gãdaar ata kãw tɩ cen na tɩ páw a Daviir a Adulam tãw bɔw pɛr. Filisɩtɛ̃ mɩnɛ tɩ be n a Erefayitɩ mɩnɛ fʋɔla pʋɔ.

¹⁴ A Daviir tɩ be n a ʋ sɔwlʋ zie, ɛ́ Filisɩtɛ̃ bɛ mɩnɛ tɩ be a Bɛtɩlɛm.

¹⁵ Bɛ wa bere na a Daviir háa nʋɔr yel a ʋ bʋ̃-bɔbra à ŋá: «Ãa n'ʋ pãa na wa n a Bɛtɩlɛm tẽw dɩ̃dɔr nʋɔr sa-bie-kʋ̃ɔ-bɔw kʋ̃ɔ wa kʋ̀ m ɩ̃ nyũ a?»

¹⁶ Lɛ n'a a gãdaar ata bɛl tɩ tʋ̃ɔ́ ŋmʋr kpɛ a Filisɩtɛ̃ mɩnɛ laɩ pʋɔ, 'wɔ̃w a kʋ̃ɔ a Bɛtɩlɛm dɩ̃dɔr nʋɔr sa-bie-kʋ̃ɔ-bɔw pʋɔ, wa n wa kʋ̀ a Daviir. Ɛcɛ ʋ bɛ tɩ sàw na nyũ a ɩ. Ʋ tɩ cir a na bɛr tẽw, de kʋ̀ a Sore,

¹⁷ ɛ́ yel à ŋá: «Sore e, ɩ̃ bɛ tɛr sɔ́r na nyũ a kʋ̃ɔ á ŋá ɩ! A ɩ na mɛ̃ a nɩbɛ bɛ ŋa na cen tɩ 'wɔ̃w a a zɩ̃ɩ tɔr za a, bɛl na tɩ cɛ kũu-pire a!» Ɛ́ tɩ zawrɩ a nyub. A soja-gãdaar ata bɛ ŋa gãda-ton n'ɩ à ŋà.

¹⁸ Avɩsaɩ na ɩ a Zowab yɛb, ɛ́ a bɛ mã dɩ kɛ́ Seruya a, tɩ pʋɔ nɩ a soja-yée bɛl na gùre a Daviir a pʋɔ. Ʋlɛ n'ʋ tɩ ìr bibir kãw ɓáw a ʋ kafin dɔ̃ dem kɔbr ata (300) ƴãw, kʋ bɛ. Lɛ n'a ʋ tɩ ɩ a ʋ yúor yi man a “Nɩbɛ ata bɛl na ɓã taa a” yúor.

¹⁹ A “Nɩbɛ lɩzɛr'ɩ pie na ɓã taa a” pʋɔ a, a ʋ yúor mɩ̀ tɩ yi n yaga, mɔ̃ mɩ̀, ʋ wa ɩ n a bɛ nɩ-kpɛ̃ɛ, ɛcɛ ʋ bɛ tɩ dãw pʋɔ a “Nɩbɛ ata bɛl na ɓã taa a” pʋɔ ɩ.

²⁰ Yehoyada bidɛb, Benaya, na yi Kaviseyɛl a, tɩ tõ n gãda-tome yaga. A ʋ sãàkʋm tɩ ɩ n soja-gãdaa. A Benaya n'ʋ tɩ kʋ a Mowab tẽw Arɩɛl mɩnɛ ayi. Ʋlɛ mɩ̀ cãà n'ʋ tɩ siw sa-bie-kʋ̃ɔ-bɔw pʋɔ kʋ gbẽw, bibir kãw sa-pupure na tɩ lore a.

²¹ Ʋlɛ mɩ̀ cãà n'ʋ tɩ kʋ Eziptɩ tẽw nɩr kãw na bɛ tɩ dɩ vuo, ɛ́ tɛr kafin a: dabɔl'ʋ ʋ tɩ tɛr zɛbr'ɩ a Eziptɩ tẽw nɩr, faa a ʋ kafin a ʋ nũú, kʋ n ʋ.

²² A Benaya gãda-tome n'ɩ à á ŋá ʋ na tõ nyɛ̃ yúor man a “Nɩbɛ ata bɛl na ɓã taa a” yúor.

²³ A “Nɩbɛ lɩzɛr'ɩ pie na ɓã taa a” pʋɔ a, a ʋ yúor mɩ̀ tɩ yi n yaga, ɛcɛ ʋ bɛ tɩ pʋɔ a «a nɩbɛ ata na ɓã taa a» pʋɔ ɩ. A Daviir tɩ ƴãw na ʋ ɩ a sojarɩ na gùre ʋ a nɩ-kpɛ̃ɛ.

²⁴ Nɩbɛ bɛ ŋa nɛbɛ tɩ pʋɔ a «Nɩbɛ lɩzɛr'ɩ pie na ɓã taa a» pʋɔ: Zowab yɛb Asayɛl, Bɛtɩlɛm tẽw Dodo bidɛb Ɛlhanan,

²⁵ Harɔdɩ tẽw Sama nɩ Elika,

²⁶ Palti tẽw Helɛsɩ, Tekowa tẽw Ɩkɛsɩ bidɛb Ɩɩra,

²⁷ Anatɔtɩ tẽw Aviezɛɛr, Husa tẽw Mevunaɩ,

²⁸ Ahowa tẽw Salmon, Netofa tẽw Maraɩ,

²⁹ Netofa tẽw Baana bidɛb Helɛvʋ, Givea tẽw Irivaɩ bidɛb Ɩtaɩ, a Bɛ̃zamɛ tẽw pʋɔ,

³⁰ Pireaton tẽw Benaya, Gaasɩ bà-fʋɔlɩ tẽw Hidaɩ,

³¹ Bɛtɩ-Araba tẽw Avɩ-alvon, Bahurim tẽw Azɩmawɛtɩ,

³² Saalvon tẽw Eliyaba. A Yasɛn bidɛbr: Yehonatan,

³³ Haraar tẽw Sama, Araar tẽw Saraar bidɛb Ahiyam,

³⁴ Ahasɩbaɩ bidɛb Elifelɛtɩ na ɩ Maaka tẽw nɩr kãw yãw a, Gilo tẽw Ahitofɛl bidɛb Eliyam,

³⁵ Karmɛl tẽw Hɛsɩraɩ, Arabʋ tẽw Paaraɩ,

³⁶ Sova tẽw Natan bidɛb Yigeyal, Gadɩ tẽw Bani,

³⁷ Amɔ̃ tẽw dɔɔ Sɛlɛkɩ, Beerɔtɩ tẽw Naraɩ na mɩ́ tɩ tɛr a Zowab, a mã na tɩ dɩ kɛ́ Seruya a, zɛbr bome a,

³⁸ Ɩɩra nɩ Garɛvʋ na yi Yetɛɛr yir a,

³⁹ nɩ a Hititɩ dɔɔ Uuri. Bɛ za tɩ ɓã n taa ɩ nɩbɛ lɩzɛr'ɩ pie nɩ ayopõi.