2 Samɩɛl 22 - A SƐB-SÕW

A Daviir puore nɩ a Naaŋmɩn yãanɩ, ʋ na zɛb tʋ̃ɔ́ a ƴãw

¹ A Daviir tɩ yiel'ɩ yielu ŋa a Sore ƴãw, a ʋlɩ bibir a Sore na tɩ faa ʋ a ʋ dɔ̃ dem nɩ a Sawul nuru pʋɔ a:

² A Sore ɩ n pìir a ɩ̃ zie, a ɩ̃ zɛbr-yir-kpɛ̃w na gù m a, a ɩ̃ faarɛ.

³ A ɩ̃ Naaŋmɩn ɩ n pìir, ɩ̃ na mɩ́ taw lanɩ a yel-faa daar a, Zɛbr-kur-pãgala na mɩ́ piw mɛ̃ a, zɛbr-yir-kpɛ̃w pʋɔ ɩ̃ na mɩ́ nyɛ̃ faafʋ a. Ʋl zie n'a ɩ̃ mɩ́ sɔwlɩ, a po-to-fãw dem bɛ tʋ̃ɔ́ páw mɛ̃ ɩ.

⁴ A Sore, ʋ tɛr danʋ! Mãa wa bʋɔlɛ ʋ wa báarɛ a, ʋ mɩ́ faa mɛ̃ nɩ a ɩ̃ dɔ̃ dem nuru pʋɔ.

⁵ A kũu kʋ̃ɔ-mie tɩ pili na pàw mɛ̃, a kũu tɩ ƴãw mɛ̃ nɩ pʋl-vʋ̃ɔ mɛ̃ man na mɩ́ tuo bom za cen nɩ a.

⁶ A kpɩmɛ tẽw mie tɩ vili vili mɛ̃ na, a kũu bɛrɩ tɩ be n a ɩ̃ nisɔw.

⁷ A ɩ̃ kpɩɛrʋ pʋɔ a, ɩ̃ bʋɔl'ɩ a Sore, ɩ̃ lɔb'ɩ cɛl kʋ̀ a ɩ̃ Naaŋmɩn. Ʋ be n a ʋ yir pʋɔ, ɛ́ wõ a ɩ̃ kɔkɔr, a cɛl ɩ̃ na ŋmɛ a lo n a ʋ tobrí.

⁸ Lɛ n'a a tẽsɔw tɩ gbiwri ɛ́ dam, a salom pɛr tɩ dam'a, a salom nɩ a tẽw tɩ dam'a, a Sore suur na tɩ ìr a ƴãw.

⁹ Zʋ̀ʋ́r tɩ yire nɩ a ʋ nyɔbɔgɛ pʋɔ, ɛ́ vũu dɩrɛ yire a ʋ nʋɔrɩ́, lãwnɩ vũu-bi-cõcole.

¹⁰ Ʋ tɩ taw nɩ a salom yuo ɛ́ siw, ɛ́ zũzuw-sɛbla be a ʋ gbɛ́ɛ pile.

¹¹ Ʋ tɩ zɔm'ɩ seribɛ̃ ƴaw nɩ, ɛ́ be a sɛsɛb pɩgɛ zu laarɛ.

¹² Lige n'a ʋ tɩ pili pàw ʋ tʋɔra, zũzuw-sɛblɛ pʋɔ n'a ʋ tɩ sɔwlɩ, zũzuge na sɔb mɛ̃ kʋ̃ɔ-zulu a.

¹³ Cãà tɩ de ʋ nɩ niwn, ɩrɛ pʋ̀rpʋ̀rpʋ̀r.

¹⁴ A Sore be n a salom zu, ɩ a saa tanɩ, a Naaŋmɩn-na-do-saa-bɛ-pɩɛl-a kɔkɔr tɩ yi n kpɛ̃w kpɛ̃w za.

¹⁵ Ʋ tɩ ɩ na a saa nyɩwrɩ pàw a ziir za, ʋ tɩ tɛ n pime bɛr a ziir za.

¹⁶ Sore e, a fʋ tanʋ nɩ a fʋ suur sɛsɛb, tɩ ɩ na a kʋ̃ɔ-kpɛ̃ɛ pɛr sãá, a tẽsɔw-kɔbr pɛr sãá.

¹⁷ A Sore tɩ be n a salom zu ɛ́ tur a nũu nyɔw mɛ̃, ʋ tɩ yaarɩ mɛ̃ nɩ a kʋ̃ɔnɩ pʋɔ.

¹⁸ Ʋ tɩ faa mɛ̃ nɩ a ɩ̃ dɔ̃ dem na tɛr fãw a nuru pʋɔ, a ɩ̃ dɔ̃ dem na kpɛmɛ zuo mɛ̃ a.

¹⁹ Bɛ tɩ wa n a ɩ̃ ƴãw, a ɩ̃ baw-bio bibir, ɛcɛ a Sore tɩ wa na wa tɩɛ mɛ̃,

²⁰ ʋ ír mɛ̃ na bɛr k'ɩ̃ cere, ʋ faa mɛ̃ na, ʋ na nɔnɛ mɛ̃ a ƴãw.

²¹ A Sore ɩrɛ nɩ à ŋá a ɩ̃ zie, a ɩ̃ mɩnʋ zũú, ʋ ɩrɛ mɛ̃ nɩ à ŋá, a ɩ̃ nuru tõ-vɩɛlɩ ƴãw.

²² Bʋ̃ʋ n'ʋ vɛ̃, ɩ̃ tu n a Sore sɛ́ɛ, ɩ̃ bɛ ɩ ɩb kãw sãw a ɩ̃ Naaŋmɩn ɛ.

²³ Ɩ̃ tuur'ɩ a lɛ za ʋ na yel a, a lɛ na tu sɔ́r ʋ yel a, ɩ̃ bɛ zawrɩ bɛr ɛ.

²⁴ Ɩ̃ bɛ tɛr sãwna a ʋ zie ɩ, ɛ́ gù ɩ̃ tʋɔra yel-bier za ƴãw.

²⁵ Lɛ n'a a Sore maalɩ mɛ̃ tu n a ɩ̃ mɩnʋ, tu n a ɩ̃ vɩɛlʋ ʋ na nyɛ̃ nɩ mimir a.

²⁶ Sore e, fʋ ŋmɛ̃ n fʋ ŋmɛ̃a, a sob nɛ na bɛ lɛbr pùor a zie, fʋ bɛ tɛr sãwna, nɩr na bɛ tɛr sãwna a zie ɩ.

²⁷ Fʋ vɩɛl'ɩ parpar nɩr na vɩɛl parpar a zie, ɛ́ wul kɛ́ fʋ cɩ n a yã-faa sob zie.

²⁸ Fʋ̃ʋ n'ʋ mɩ́ faa a su-siwri dem, ɛ́ ɩ a pɔ̀lʋ dem su zuru.

²⁹ Sore e, mãa zie a, fʋ ɩ n fɩ̃tɩlɛ, Sore e, fʋ̃ʋ n'ʋ caalɛ a ɩ̃ tɩ̃ɩsɔw lige.

³⁰ Fʋ̃ʋ n'ʋ ɩ̃ mɩ́ lãw nɩ ƴaw gãw a bɔw, a fʋ̃ʋ ɩ̃ Naaŋmɩn zũú n'a ɩ̃ na tʋ̃ɔ́ ƴaw gãw a dacĩ-kpɛ̃ɛ.

³¹ A Naaŋmɩn ɩ n sɔr-wule na vɩɛl ʋ za a, a ʋ ƴɛ̀rʋ bɛ tɛr bʋnʋ ɛ. Bɛlɩ dem za na mɩ́ zɔ kpɛ a ʋ naayir a, ʋ ɩ na mɛ̃ zɛbr-kur-pãgala na mɩ́ piw bɛ a.

³² Ãa n'ʋ ɩ Naaŋmɩn, ʋ bɛ ɩ a Sore? Ãa n'ʋ ɩ pìir a tɩ ƴãw, ʋ bɛ ɩ a tɩ Naaŋmɩn?

³³ A Naaŋmɩn ŋa n'ʋ mɩ́ piw mɛ̃ tɛr'ɩ fãw, ʋ mɩ́ wul mɛ̃ nɩ a sɔr-vla,

³⁴ ʋlɛ n'ʋ mɩ́ ɩ ɩ̃ zɔrɛ fɔ̃w mɛ̃ wala a, ɛ́ ɩ ɩ̃ be ziir na kɛrɩ a zu.

³⁵ Ʋlɛ n'ʋ mɩ́ zanɛ nɩ mɛ̃ a zɛbr, ɛ́ mɩ́ sõw mɛ̃ ɩ̃ dúori tam na kpɛmɛ jɩjɩ a.

³⁶ Sore e, fʋ mɩ́ piw mɛ̃ na tɛr, mɛ̃ zɛbr-kur-pãgala a, ɛ́ faa mɛ̃, fʋ mɩ́ sàw nɩ a ɩ̃ bʋɔlʋ, ɛ́ ɩ k'ɩ̃ kpɛmɛ.

³⁷ Fʋ̃ʋ n'ʋ mɩ́ ɩ ɩ̃ dɔl gbɛ́r, ɛ́ a ɩ̃ gbɛnakɔɛ bɛ vir ɛ.

³⁸ Ɩ̃ diwr'ɩ a ɩ̃ dɔ̃ dem, ɩ̃ kʋ bɛ na pàw pɛr, ɛ́ ɩ̃ bɛ lɛbr pùor, mãa bɛ wa kʋ bɛ baarɩ a ɩ.

³⁹ Ɩ̃ gɔr gɔr bɛ na, ɩ̃ kʋ bɛ na, bɛ kʋ̃ lɛb tʋ̃ɔ́ ìr ɛ, bɛ gã nɩ tẽw, ɩ̃ dĩ nɩ bɛ nɩ gbɛ́ɛ.

⁴⁰ Fʋ kʋ̀ m'ɩ fãw a zɛbr ƴãw, a bɛlɩ dem na ìr a ɩ̃ ƴãw a, fʋ ɩ na ɩ̃ tʋ̃ɔ́ bɛ.

⁴¹ Fʋ ɩ na a ɩ̃ dɔ̃ dem lɩɛb zɔ a ɩ̃ niŋé, ɛ́ ɩ ɩ̃ tʋ̃ɔ́ a bɛlɩ dem na hɩ̃ɛn mɛ̃ a pẽlẽpẽlẽ.

⁴² Bɛ cɩɩrɛ na, ɛ́ faarɛ bɛ ka be ɩ, a Sore n'ʋ bɛ cɩɩrɛ bʋɔlɛ, ʋʋ bɛ sɔwr ɛ.

⁴³ Ɩ̃ nɛb bɛ na ŋmɛr ŋmɛr, ɩ̃ ɩ na bɛ lɩɛbɩ uuru, ɩ̃ nɛb nɛb bɛ na, mɛ̃ sɛ́ɛ zu mɛ̃mɛrɛ a.

⁴⁴ Fʋ faa mɛ̃ nɩ a ɩ̃ nɩbɛ na ìr zɛbr'ɩ mɛ̃ a nuru pʋɔ, fʋ ɩ na k'ɩ̃ de a nɩ-bʋʋr-yoru niwn. Nɩbɛ ɩ̃ na bɛ bãw a tone nɩ a ɩ̃ tome,

⁴⁵ zawlbɛ waar'a wa ƴɛ̀rɛ nɔ-kãá a ɩ̃ zie, mãa wa ƴɛ̀rɛ lɛ pɛ a, bɛ mɩ́ sàw nɩ a ɩ̃ nʋɔr.

⁴⁶ A bɛ fãw báarɛ na, bɛ màwr'a wa yire nɩ a bɛ sɔwlʋ ziir.

⁴⁷ A Sore vʋʋrɛ na! A sob nɛ na ɩ a ɩ̃ pìir a, tɛr'ɩ puoru! A Naaŋmɩn ɩ n kpɛ̃ɛ, ʋlɛ n'ɩ a ɩ̃ pìir nɩ a ɩ̃ faarɛ!

⁴⁸ A Naaŋmɩn ŋa n'ʋ mɩ́ ɩ k'ɩ̃ yáa a san, ɛ́ mɩ́ dĩ nɩbɛ bin a ɩ̃ pile.

⁴⁹ Sore e, fʋ mɩ́ faa mɛ̃ nɩ a ɩ̃ dɔ̃ dem nurú, fʋ mɩ́ ɩ na ɩ̃ tʋ̃ɔ́ a ɩ̃ fɛr-fɛrbɛ, fʋ mɩ́ faa mɛ̃ nɩ a po-to-fãw dem nuru pʋɔ.

⁵⁰ Lɛ so ɩ̃ danɛ fʋ a nɩ-bʋʋrɛ sɔgɔ, Sore e, ɛ́ yiele íre nɩ a fʋ yúor.

⁵¹ A Sore mɩ́ ɩ na a ʋ nãà zɛb tʋ̃ɔ́, zɛb-bɛrɛ pʋɔ, ʋ maalɛ nɩ a ʋ nɩ-kabra vla, a Daviir nɩ a ʋ bʋʋrɛ, kʋrakʋralɛ.