2 Samɩɛl 2 - A SƐB-SÕW

A Zuda tẽw dem kaa na ír a Daviir ʋ ɩ a bɛ nãà

¹ A yele á ŋá pùorí, a Daviir tɩ sowr'ɩ a Sore à ŋá: «Ɩ̃ na tʋ̃ɔ́ na do a Zuda tẽw tẽ-kpɛ̃ɛ kãw pʋɔ bɩɩ?» A Sore sɔw ʋ: «Ʋ̃ʋ, fʋ na tʋ̃ɔ́ na.» A Daviir lɛb sowri: «Tẽ-kpɛ̃ɛ buor sob pʋɔ?» A Sore sɔw: «Ebrɔ̃.»

² A Daviir tɩ do n a be, ʋlɛ nɩ a ʋ pɔwbɛ ayi, a Izireyɛl tẽw Ahinowam nɩ a Karmɛl tẽw Naval pɔw-kʋɔr Avigayil.

³ A Daviir mɩ̀ tɩ ƴãw nɩ a ʋ tu-ta-taabɛ do, ŋa za nɩ ʋ a yir dem, bɛ tɩ zɩ̃ a Ebrɔ̃ tẽ-kpɔwlɩ pʋɔ.

⁴ Lɛ n'a a Zuda nɩbɛ tɩ wa a Ebrɔ̃ be, wa cir a kãá ƴãw a Daviir zũú, ʋ ɩ a Zuda tẽw nãà. Bɛ na tɩ yel kʋ̀ a Daviir kɛ́ a Yavɛsɩ tẽw na be a Galaadɩ a nɩbɛ nɛbɛ ũù a Sawul a,

⁵ ʋ tɩ tõ n nɩbɛ kɛ́ bɛ tɩ yel bɛ à ŋá: «A Sore, ʋ maalɩ nyɩ, nyɩ na ũù a nyɩ sore Sawul a, nɩ nyɩ na wul kɛ́ nyɩ sɩrɩ na tu ʋ a.

⁶ A Sore, ʋ mɩ̀ wul nyɩ a ʋ nɔ̃wfʋ, nɩ a ʋ pùor-bɛ-lɛbrʋ ɩb. A mãa, ɩ̃ mɩ̀ na ɩ n a lɛ a nyɩ zie, nyɩ na ɩ à à ŋá a ƴãw.

⁷ Ƴɛrɛŋa a, nyɩ cãà ƴãw fãw, nyɩ kpɛmɛ nyɩ za. Sɩza n'a, a nyɩ sore Sawul kpi na, ɛcɛ nyɩ bãwnɩ a, a Zuda tẽw dem cir'ɩ a kãá ƴãw a ɩ̃ zũú, ɩ̃ ɩ a bɛ nãà.»

A Ɩsɩbosɛtɩ naalʋ-dɩb

⁸ A Nɛɛr bidɛb, Avɩnɛɛr, na tɩ ɩ a Sawul sojarɩ nɩ-kpɛ̃ɛ a, tɩ tɛr'ɩ a Sawul bidɛb, Ɩsɩbosɛtɩ, cen nɩ Mahanayim.

⁹ A be a, ʋ tɩ zɩɩl'ʋ na ʋ ɩ a nãà, so a Galaadɩ, a Asɛɛr, a Izireyɛl, a Efarayim nɩ a Bɛ̃zamɛ lowr ten, dɩrɛ naalʋ a Ɩsɩrayɛl tẽw za zu.

¹⁰ A Sawul bidɛb, Ɩsɩbosɛtɩ, tɩ tɛr'ɩ yome lɩz'a ayi, a lɛn daar ʋ na tɩ ɩ a Ɩsɩrayɛl nãà a, ɛ́ tɩ dɩ a naalʋ yome ayi. Ɛcɛ a Zuda dɔwlʋ yõ n'ʋ tɩ tu a Daviir.

¹¹ Yome ayopõi nɩ cuwr ayʋɔb'a a Daviir tɩ dɩ a naalʋ a Zuda tẽw, a Ebrɔ̃.

A Zuda dɔwlʋ nɩ a Ɩsɩrayɛl dɔwlʋ na zɛbr taa a Gabaɔ̃ a

¹² A Nɛɛr bidɛb, Avɩnɛɛr, nɩ a Sawul bidɛb Ɩsɩbosɛtɩ sojarɩ tɩ yi n a Mahanayim ɛ́ tu Gabaɔ̃ lowr.

¹³ A Zowab, a mã na tɩ dɩ kɛ́ Seruya a, nɩ a Daviir sojarɩ mɩ̀ tɩ yi na lo a sɔ́r. Bɛ tɩ tuor'ɩ taa a Gabaɔ̃ kʋ̃ɔ ƴãwfʋ zie, bɛ ŋa be a gãwn ŋa, ɛ́ bɛ ŋa mɩ̀ be a gãwn ŋa.

¹⁴ A Avɩnɛɛr tɩ yel'ɩ a Zowab: «A tɩ soja-pɔlɛ, bɛ yi zɛb a tɩ niŋé.» A Zowab sɔw: «Ɩ̃ sàw na, bɛ yi zɛb.»

¹⁵ A soja-pɔlɛ tɩ taw na ta, bɛ sɔ́r bɛ: bɛ tɩ ɩ n pie nɩ ayi na ɩ a Bɛ̃zamɛ dɔwlʋ nɩbɛ, ɛ́ ɩ a Sawul bidɛb, Ɩsɩbosɛtɩ, sojarɩ a, ɛ́ mɩ̀ ɩ pie nɩ ayi na ɩ a Daviir sojarɩ a.

¹⁶ Ŋa za mɩ́ tɩ nyɔw nɩ a sob nɛ ʋ na na zɛb'ɩ a, a zu ƴãw, ɛ́ cɔ̀r ʋ a lõbowrí nɩ a ʋ zɛbr-sɔ-kpɛ̃ɛ, bɛ za lãw lo. Bɛ bʋɔlɛ nɩ a Gabaɔ̃ zie ŋa kɛ́ Pie Púo.

¹⁷ A ʋlɩ bibir tɔr za a, a zɛbr tɩ zɛb'ɩ faa faa. A Daviir sojarɩ tɩ zɛb'a tʋ̃ɔ́ a Avɩnɛɛr nɩ a ʋ sojarɩ.

¹⁸ A Seruya bidɛbr ata tɩ be n a be: a Zowab, a Avɩsaɩ nɩ a Asayɛl. A Asayɛl tɩ zɔrɛ na mɛ̃ mɔlʋ a.

¹⁹ A Asayɛl tɩ ta na tu a Avɩnɛɛr, ta tu ʋ, kʋ̃ bɩɛ dʋrʋ, kʋ̃ bɩɛ gʋba ɩ.

²⁰ A Avɩnɛɛr tɩ ŋmɛlɩ na kaa, ɛ́ sowr'ʋ: «Fʋ̃ʋ n'ʋ bɩɩ, Asayɛl i?» Ʋ sɔw: «Ʋ̃ʋ, mãa n'ʋ.»

²¹ A Avɩnɛɛr tɩ yel ʋ na: «Ta tu nɩ-yũo a fʋ dʋrʋ lowr, bɩɩ a fʋ gʋba lowr. Diw nyɔw a soja-pɔlɛ bɛ ŋa kãw, fa a ʋ bome.» Ɛcɛ a Asayɛl bɛ tɩ sàw bɛr a Avɩnɛɛr diwfʋ ɛ.

²² A Avɩnɛɛr tɩ lɛb'a yel ʋ: «Asayɛl i, ta cãà diwr mɛ̃ ɩ! Bʋ̃ʋ n'ʋ so fʋ bɔbr kɛ́ fʋ fɛr mɛ̃ ƴãw ɩ̃ kʋ b? A pùorí a, ɩ̃ na tʋ̃ɔ́ na mɩ́ lɛb jɩ́r a fʋ yɛb Zowab ɩ?»

²³ Ɛcɛ a Asayɛl tɩ zawr'a na tu zi-yoru. Lɛ n'a a Avɩnɛɛr tɩ lɩɛbɩ a ʋ kafin pɛr cɔr'ɩ ʋ a púorí, cɔ̀r col. A Asayɛl tɩ lo n a be kpi daadaalɛ. A bɛlɩ dem za na mɩ́ tɩ ta a be a Asayɛl na lo a, mɩ́ tɩ tɛw na àr.

²⁴ Lɛ n'a a Zowab nɩ a Avɩsaɩ tɩ ta tu a Avɩnɛɛr. Bɛ na tɩ tarɛ a Giveyatɩ-Ama, na be a Gia saa-pɛrɩ́, a Gabaɔ̃ wɛja-kpalɛ sɔ́r zu a, a mʋ̃tɔ̃w tɩ kpɩɛr'a.

²⁵ A Bɛ̃zamɛ dɔwlʋ sojarɩ tɩ ɓã n taa a Avɩnɛɛr pùorí, gbõ taa ɩ mɛ̃ nɩ-been a, be tãle kãw zu.

²⁶ A Avɩnɛɛr tɩ gbanɩ na yel a Zowab: «Kʋralɛ n'a tɩ na zɛbr taa kʋrɛ taa bɩɩ? Fʋ bɛ bãw k'aa yel ŋa baarʋ na ɩ n kpɩɛrʋ ɛ? Bʋ̃ʋ n'ʋ fʋ gùre kɛ́ fʋ yel a fʋ sojarɩ kɛ́ bɛ ta cãà diwr a bɛ yɛbr?»

²⁷ A Zowab tɩ sɔw na: «A Naaŋmɩn na vʋʋrɛ a zũú, fʋ̃ʋ bɛ tɩ zɛlɩ a, a ɩ̃ sojarɩ nãà cãà na diw nyɩ tɩ vɩɛ nɩ zie.»

²⁸ A Zowab tɩ ƴãw na bɛ pɛblɩ a wɩ́ɛ. Lɛ n'a a ʋ sojarɩ tɩ bɛr a Ɩsɩrayɛl nɩbɛ diwfʋ, ɛ́ a zɛbr baarɩ.

²⁹ A Avɩnɛɛr nɩ a ʋ nɩbɛ tɩ cen nɩ a Zurdɛ̃ fʋɔla pʋɔ a ʋlɩ tɩ̃ɩsɔw nɛ, al pùorí bɛ gãw a Zurdɛ̃ man, kpɛ tɔl a Bitoron ɛ́ tɩ ta a Mahanayim.

³⁰ A Zowab na tɩ bɛr a Avɩnɛɛr diwfʋ a, ʋ tɩ bʋɔl'ɩ a ʋ nɩbɛ ɓã taa. A Daviir sojarɩ pʋɔ a, nɩbɛ lɩzɛwaɩ nɛbɛ bɛ tɩ ka be ɩ, de nɩ a Asayɛl.

³¹ Ɛcɛ nɩbɛ kɔbr ata dɔwlɩ lɩz'a ata (360) nɛbɛ a Daviir sojarɩ tɩ kʋ a Bɛ̃zamɛ dɔwlʋ pʋɔ, nɩ a Avɩnɛɛr nɩbɛ pʋɔ.

³² Bɛ tɩ ɓáw nɩ a Asayɛl kũu kul'ɩ tɩ ũù a ʋ sãà yaa pʋɔ a Bɛtɩlɛm. A Zowab nɩ a ʋ nɩbɛ tɩ cen nɩ a tɩ̃ɩsɔw ɓil za, ɛ́ a zie wa vɩɛrɛ bɛ ta a Ebrɔ̃.