2 Samɩɛl 19 - A SƐB-SÕW

A Daviir kone nɩ a ʋ bidɛb Abɩsalɔm

¹ Lɛ n'a a tɩ dam a nãà yaga za. Ʋ tɩ ìr'a do a dɩ̃dɔr garʋ́ bɔwpɩɛ pʋɔ, tɩ nyɔw kon. Ʋ tɩ kone na yere cere nɩ: «Ɩ̃ bidɛb Abɩsalɔm i, ɩ̃ bidɛb i, ɩ̃ bidɛb i, bʋ̃ʋ n'ʋ pãa ɩ, ɩ̃ bɛ lɩɛrɩ fʋ kpi a! Abɩsalɔm ɩ̃ bidɛb i, ɩ̃ bidɛb i!»

² Bɛ tɩ yel'a kʋ̀ a Zowab, k'aa nãà kone na ɩrɛ nɩ nɩbaalʋ, a ʋ bidɛb Abɩsalɔm ƴãw.

³ A ʋlɩ bibir a, a zɛb-tʋ̃ɔ́fʋ tɩ lɩɛb'ɩ kuor a sojarɩ za zie, bʋ̃ʋ n'ʋ vɛ̃, bɛ mɩ̀ tɩ wõ na bɛ yel k'aa nãà tɛr'ɩ pʋ-sãwna a ʋ bidɛb na kpi a ƴãw.

⁴ A ʋlɩ bibir a, a sojarɩ tɩ mʋɔl'a kpɛ a tẽw pʋɔ, mɛ̃ nɩbɛ na zɔ zɛbr zie, vĩ ɩrɛ bɛ a.

⁵ A nãà ʋl tɩ pàw nɩ pɛn a niwn cãà kone yere nɩ: «Ɩ̃ bidɛb Abɩsalɔm i, Abɩsalɔm ɩ̃ bidɛb i, ɩ̃ bidɛb i!»

⁶ A Zowab tɩ cen na tɩ páw a nãà a bɔwpɩɛ pʋɔ yel ʋ à ŋá: «A dɩ̃a a, fʋ ƴãw nɩ vĩ a fʋ sojarɩ na faa fʋ̃ʋ nɩ a fʋ bidɛbr nɩ a fʋ pɔwyaar, nɩ a fʋ pɔwbɛ nɩ a fʋ pɔw-bili a.

⁷ Fʋ nɔnɛ nɩ a bɛlɩ dem na hɩ̃ɛn fʋ a, ɛ́ hɩ̃ɛn a bɛlɩ dem na nɔnɛ fʋ a. Fʋ wul'a k'aa fʋ sojarɩ nɩ-bɛrɛ nɩ a fʋ tõ-tõ-biir za bɛ ɩ nɩbɛ a fʋ zie ɩ. A dɩ̃a a, ɩ̃ pãa nyɛ̃ a na, tɩ za tɩ kpi, ɛ́ a Abɩsalɔm cãà vʋʋrɛ a, fʋ nãá nyɛ̃ na a sɛw.

⁸ Ƴɛrɛŋa a, ìr cen tɩ ƴɛ̀r'ɩ a fʋ sojarɩ kʋ̀ bɛ kanyir. Fʋ̃ʋ bɛ wa cen a, ɩ̃ pɔ n nɩ a Sore, a bɛ kãw za bɛ lɛb tone a fʋ ton bibir been dɔwlɛ ɩ. A na ɩ n kpɩɛrʋ a fʋ zie zuo a kpɩɛrʋ al za na páw fʋ, a fʋ pɔ̀lʋ daar za, wa tɩ tɔ a dɩ̃a a.»

⁹ Lɛ n'a a nãà tɩ ír cen tɩ zɩ̃ a tẽw dɩ̃dɔr nʋɔr. Bɛ tɩ yel'a kʋ̀ a sojarɩ, bɛ za wa ɓã taa a ʋ zie. A Abɩsalɔm sojarɩ tɩ lɩɛb'a zɔ, ŋa za zɔ kul a ʋ yir.

A Daviir cɔbr'ɩ a Zerizalɛm lɛb-cenu

¹⁰ A Ɩsɩrayɛl dɔwlʋ za pʋɔ a, a nɩbɛ tɩ ŋmɩɛr'ɩ nɔkpɛn. Bɛ tɩ yere na: «A nãà Daviir'ʋ tɩ dãw faa tɩ a tɩ dɔ̃ dem nuru pʋɔ, ʋlɛ n'ʋ tɩ faa tɩ a Filisɩtɛ̃ mɩnɛ nuru pʋɔ, ɛ́ a wa fɛr k'ʋʋ zɔ, ɛ́ bɛr a tẽw, a Abɩsalɔm ƴãw.

¹¹ Ɛcɛ a Abɩsalɔm ŋa tɩ na tɩ cir a kãá ƴãw k'ʋʋ ɩ a tɩ nãà a, ʋ kpi n a zɛbr zie. Ƴɛrɛŋa a, bʋ̃ʋ n'ʋ tɩ gùre kɛ́ tɩ wa ɩ, ɛ́ bãw tɛr a nãà Daviir lɛb wa n?»

¹² A Daviir mɩ̀ tɩ tõ n nɩbɛ bɛ tɩ yel a bàwr-maalbɛ Sadɔkɩ nɩ Abɩataar: «Nyɩ ƴɛ̀r a Zuda nɩ-kore zie sowri bɛ à ŋá: “A nãà bãw nɩ a lɛ a Ɩsɩrayɛl nɩbɛ na tɩɛrɛ a, bʋ̃ʋ n'ʋ so nyɩ na be a pùor a nãà lɛb-tɛr-waa ƴãw a ʋ yir?

¹³ Ɩ̃ yɛbr n'ɩ nyɩ, tɩ ɩ n zɩ̃ɩ-been nɩbɛ. Nyɩ ta ɩ a po-pàwrbɛ a nãà lɛb-tɛr-waa ƴãw ɛ.”

¹⁴ Al pùorí, nyɩ yel a Amasa: “Ɩ̃ nɩr bɛ nɛ b ɛ? A Naaŋmɩn, ʋ dɔwrɩ mɛ̃, ɛ́ lɛb dɔwrɩ ƴãw pʋɔ, mãa bɛ wa ƴãw fʋ lɩɛrɩ a Zowab, ɩ a ɩ̃ sojarɩ nɩ-kpɛ̃ɛ kʋralɛ a!”»

¹⁵ A Daviir tɩ lɩɛb'ɩ a Zuda nɩbɛ za tɩɛrʋ, ʋ ɩ mɛ̃ nɩ-been tɩɛrʋ a. Bɛ tɩ tõ na bɛ tɩ yel a nãà: «Lɛb wa, fʋ̃ʋ nɩ a fʋ tõ-tõ-biir za.»

¹⁶ Lɛ n'a a nãà tɩ lo a lɛb-kulu sɔ́r, siw tɩ ta a Zurdɛ̃ man nʋɔr. A Zuda nɩbɛ tɩ wa n a Gilgal kɛ́ bɛ wa tuori a nãà, sõw ʋ, ʋ gãw a man.

A Daviir jɩɩr'ɩ a Simeyi bɛr, bɛ kʋ ʋ ɛ

¹⁷ Geera bidɛb Simeyi na yi Bahurim, Bɛ̃zamɛ dɔwlʋ pʋɔ a, tɩ lãwnɩ bɛ na paw fɔ̃w siw, k'ʋʋ tɩ tuori a nãà Daviir.

¹⁸ Bɛ̃zamɛ dɔwlʋ pʋɔ nɩbɛ túr (1 000) tɩ bɩɛlɛ ʋ na, lãwnɩ a Sawul yir tõ-tõ-bie Sɩva, nɩ a ʋ bidɛbr pie nɩ anũu, nɩ a ʋ tõ-tõ-biir lɩzɛr. Bɛ tɩ paw nɩ fɔ̃w siw a Zurdɛ̃ kɛ́ bɛ tɩ tuori a nãà,

¹⁹ a lɛn daar a gbor na tuo a nãà yir dem nãà wa gãwnɛ a man a. Ɛ́ a tɩ fɛr'a kɛ́ bɛ tu a lɛ a nãà na na yel a. A nãà na wa gãw a man a, a Geera bidɛb Simeyi tɩ lo na vɔblɩ muru a ʋ pile

²⁰ ɛ́ yel ʋ: «A nãà, ʋ ta dĩ nɩ mɛ̃ a ɩ̃ sãwna ɩ! Ʋ yiiri a sãwna ɩ̃ na sãw ʋ a bɛr, a ʋlɩ bibir ʋ na yire a Zerizalɛm a. Ʋ ta tɛr'ɩ mɛ̃ suur ɛ.

²¹ Ɩ̃ mɩŋa za bãwnɩ a na k'ɩ̃ɩ sãw na, ɛcɛ dɩ̃a a, nyɛ̃, ɩ̃ de nɩ niwn a saa-pɛrɩ́-gʋba-lowr Ɩsɩrayɛl nɩbɛ na cɛ a ƴãw, tuor'ʋ.»

²² Avɩsaɩ, a mã na tɩ dɩ kɛ́ Seruya a, tɩ de nɩ a ƴɛ̀rʋ yel à ŋá: «Alɛ n'a so bɛ kʋ̃ kʋ a Simeyi bɩɩ, ʋl na ŋmɛ ƴãw a Sore nɩ-kabra a!»

²³ A Daviir tɩ yel'ɩ a Avɩsaɩ nɩ a ʋ yɛb Zowab: «Mãa nɩ nyɩɩm mɩ̀ bʋnʋ Seruya bidɛbr i? Bʋ̃ʋ n'ʋ so a ƴɛrɛŋa nyɩ bɛ sàwr a lɛ ɩ̃ na tɩɛrɛ a? Ɩ̃ bɛ bɔbr kɛ́ bɛ kʋ nɩr a Ɩsɩrayɛl nɩbɛ pʋɔ a dɩ̃a ɩ. Bʋnʋ bɛ ka be ɩ, ɩ̃ sɩrɩ na ɩ a Ɩsɩrayɛl nãà a dɩ̃a.»

²⁴ Ɛ́ a nãà tɩ yel'ɩ a Simeyi: «Ɩ̃ pɔ na, fʋ kʋ̃ kpi ɛ.»

A Daviir nɩ a Mefibosɛtɩ lɛb'a kpɛ taa

²⁵ A Sawul yãw, Mefibosɛtɩ, mɩ̀ tɩ tuor'ɩ a nãà. A ʋlɩ bibir a nãà na yi a Zerizalɛm, wa tɩ tɔ a ʋlɩ bibir ʋ na tɩ lɛb waar'ɩ ƴã-ɓaarʋ a, a Mefibosɛtɩ bɛ tɩ põ a ʋ tɩɛm, bɛ pɛ́w a ʋ gbɛ́ɛ nɩ a ʋ bʋ̃-suuri ɛ.

²⁶ Ʋ na tɩ ta a Zerizalɛm tuori a nãà a, a nãà sowr'ʋ na: «Mefibosɛtɩ i, bʋ̃ʋ n'ʋ so fʋ bɛ páw mɛ̃ cen?»

²⁷ Ʋ sɔw: «Nãà ɩ̃ sore e, a ɩ̃ tõ-tõ-bie n'ʋ tuli mɛ̃. Ɩ̃ tɩ tɩɛr'ɩ ɩ̃ pʋɔ à ŋá: “Ɩ̃ na bɛ tʋ́ɔr cere a, ɩ̃ na ƴãw na bɛ ƴãw a ɩ̃ bõw a kɔw, ɩ̃ zɔm bɩɛl'ɩ a nãà.”

²⁸ Ɛ́ a ɩ̃ tõ-tõ-bie wa ŋma ziri kʋ̀ b a ɩ̃ ƴãw. Ɛcɛ fʋ̃ʋ a, fʋ ɩ na mɛ̃ Naaŋmɩn malkɩ a, ɩ lɛ za na pɛlɩ a fʋ pʋɔ a.

²⁹ Yel-mɩŋa n'a, a nãà ɩ̃ sore zie a, a ɩ̃ sãàkʋm Sawul yir za pʋɔ a nɩbɛ na tɩ sɛwnɩ kũu a nɛbɛ tɩ be be, ɛcɛ nɩ à à ŋá za a, fʋ de m'a ɩ̃ pʋɔ a bɛlɩ dem na lãwnɩ fʋ dɩrɛ a pʋɔ. Lɛ so, ɩ̃ bɛ tɛr sɔ́r kãw za na lɛb zɛlɩ maalʋ a fʋ zie ɩ.»

³⁰ A nãà tɩ yel'a: «Bʋ̃ʋ cãà so ƴɛ̀r-yaga? Ɩ̃ yel'a: “Fʋ̃ʋ nɩ a Sɩva a, nyɩ na põ nɩ a Sawul tẽsɔwr.”»

³¹ A Mefibosɛtɩ tɩ yel'a: «A Sɩva na tʋ̃ɔ́ na de a za. Bom nɛ na fɛrɛ a n'ɩ a nãà na lɛb wa nɩ ƴã-ɓaarʋ a.»

A Daviir nɩ a Barzilaɩ

³² A Barzilaɩ na yi Galaadɩ tẽw Orogelim a mɩ̀ tɩ siw nɩ a Zurdɛ̃. Ʋ tɩ páw nɩ a nãà gãw a Zurdɛ̃, ɛ́ tɩ bɛr ʋ a be.

³³ A Barzilaɩ tɩ kor'ɩ yaga za, ʋ tɩ tɛr'ɩ yome lɩz'a anaar. Ʋ tɩ kpɛ n naalʋ yaga, lɛ so ʋ tʋ̃ɔ́ kaa a nãà zie, a lɛn daar ʋ na tɩ be a Mahanayim a.

³⁴ A nãà tɩ yel ʋ na: «Barzilaɩ i, páw mɛ̃ tɩ cen a Zerizalɛm, ɩ̃ɩ na kaarɛ nɩ fʋ zie a be.»

³⁵ Ɛcɛ a Barzilaɩ tɩ sɔw nɩ a nãà: «Yome a ŋmɩn n'a pãa cɛ m, ɩ̃ na páw a nãà tɩ do a Zerizalɛm?

³⁶ Yome lɩz'a anaar'a ɩ̃ tɛr a dɩ̃a. Ɩ̃ na tʋ̃ɔ́ na lɛb bãw bʋ̃-vla nɩ bʋ̃-faa a? Ɩ̃ na tʋ̃ɔ́ na lɛb wõ a bʋ̃-dɩra nɩ a bʋ̃-nyúura nʋ̃ɔ̀ ɔ? Ɩ̃ na tʋ̃ɔ́ na lɛb wõ a yiel-yielbɛ na ɩ dɛbr nɩ pɔwbɛ a kɔkɛɛ ɛ? Bʋ̃ʋ n'ʋ so fʋ na dɩ tuo wone tuo a ɩ̃ ƴãw?

³⁷ A Zurdɛ̃ tɛwr'ʋ ɩ̃ na tʋ̃ɔ́ lãwnɩ fʋ gãw. Ɩ̃ mɔ̃ mɩ̀ bɛ sɛwnɩ a maalʋ ŋa tɔ ɩ!

³⁸ Sàw bɛr mɛ̃, ɩ̃ lɛb kul a ɩ̃ tẽw: ɩ̃ na tɩ kpi n a be pɩɛlɩ a ɩ̃ sãà nɩ a ɩ̃ mã yaa. Ɛcɛ a ɩ̃ bidɛb Kimham n'ɩ ŋan, ʋl na páw fʋ na cen, fʋ tɩ ɩ a ʋ zie a lɛ za na pɛlɩ a fʋ pʋɔ a.»

³⁹ A nãà tɩ sɔw na: «A vɩɛl'a! A Kimham, ʋ páw mɛ̃ tɩ cen, ɩ̃ɩ na tɩ ɩ n a ʋ zie, bom nɛ za fʋ na bɔbr a. Ɛ́ bom nɛ za fʋ na na zɛlɩ a ɩ̃ zie a, ɩ̃ na ɩ ʋ na kʋ̀ b.»

⁴⁰ A nãà na tɩ gãw a Zurdɛ̃ baar'a, a nɩbɛ za mɩ̀ tɩ gãw na. A Daviir tɩ nyɔw nɩ a Barzilaɩ weri, ɛ́ ƴɛ̀r nɔ-vla kʋ̀ ʋ. Al pùorí, a Barzilaɩ tɩ lɛb'a kul a ʋ yir.

⁴¹ A nãà tɩ cen nɩ Gilgal, ɛ́ a Kimham tɩ páw ʋ cen. A Zuda tẽw nɩbɛ za, nɩ a saa-pɛrɩ́-gʋba-lowr Ɩsɩrayɛl nɩbɛ põ-zɛ̃-taa, tɩ bɩɛl'ɩ a nãà.

A Ɩsɩrayɛl nɩbɛ nɩ a Zuda nɩbɛ zɛbr'ɩ taa

⁴² A saa-pɛrɩ́-gʋba-lowr Ɩsɩrayɛl nɩbɛ za tɩ taw na pɩɛlɩ a nãà sowr'ʋ: «A fʋ sojarɩ za tɩ bɩɛlɛ fʋ na, ɛ́ bʋ̃ʋ n'ʋ so a tɩ yɛbr Zuda tẽw nɩbɛ faa fʋ̃ʋ nɩ a fʋ yir dem, ƴãw nyɩ gãw a Zurdɛ̃?»

⁴³ A Zuda tẽw nɩbɛ tɩ sɔw nɩ a saa-pɛrɩ́-gʋba-lowr Ɩsɩrayɛl tẽw nɩbɛ yel: «Tɩ na ɩ a nãà nɩbɛ zuo nyɩ a n'a so. Bʋ̃ʋ n'ʋ so nyɩ na nyɛ̃ a suur? Tɩ dɩ n a nãà bom kãw bɩɩ? A nãà kʋ̀ tɩ nɩ bome bɩɩ?»

⁴⁴ A Ɩsɩrayɛl nɩbɛ tɩ sɔw nɩ a Zuda nɩbɛ: «Tɩ so nɩ a nãà zuo nyɩ gb'aa pie, tɩ so nɩ a Daviir tɔr za zuo nyɩ! Bʋ̃ʋ n'ʋ so nyɩ fʋ̀ɔrɛ tɩ? Tɩmɛ nɛbɛ de niwn ƴɛ̀r a tɩ nãà lɛb-waa ƴɛ̀rʋ!» Ɛcɛ a Zuda nɩbɛ tɩ ƴɛ̀rɛ nɩ nɩ gãdaalʋ zuo a Ɩsɩrayɛl nɩbɛ.