2 Samɩɛl 18 - A SƐB-SÕW

A Daviir nɩbɛ zɛb'a tʋ̃ɔ́ a Abɩsalɔm nɩbɛ

¹ A Daviir tɩ sɔr'ɩ a nɩbɛ na tɩ be a ʋ zie a, ɛ́ kʋ̀ bɛ niw-dierbɛ, sojarɩ túre nɩ-bɛrɛ nɩ sojarɩ kɔbr nɩ-bɛrɛ.

² A Daviir tɩ põ nɩ a ʋ sojarɩ ziir ata: ƴãw Zowab a mã na dɩ kɛ́ Seruya a de a zi-been dem niwn ɛ́ a Zowab yɛb Avɩsaɩ de a ziir ayi dem niwn. Ɛ́ Ɩtaɩ na yi Gatɩ a de a ziir ata dem niwn. Al pùorí, a nãà tɩ yel'a kʋ̀ a sojarɩ, ʋ na bɔbr k'ʋʋ páw bɛ cen a zɛbr a.

³ Ɛcɛ a sojarɩ tɩ yel'a: «Aɩ! Fʋ kʋ̃ páw tɩ ɛ! Yel-mɩŋa n'a, tɩmɛ wa zɔrɛ a, a dɔ̃ dem kʋ̃ cɛlɛ be ɩ. A tɩ põ-zɛ̃-taa saa kpi a, bɛ kʋ̃ cɛlɛ be ɩ. Ɛcɛ fʋ̃ʋ a, fʋ zɛ̃ n a tɩ sojarɩ tùr-pie (10 000). A na ɩ à ŋá a, alɛ sa kɛ́ fʋ be a tẽw pʋɔ, tʋ̃ɔ́ mɩ́ ɩ a sõwfʋ yi a be ta tɩ.»

⁴ A nãà tɩ yel bɛ na: «Ɩ̃ na ɩ n a lɛ nyɩ na nyɛ̃ a vɩɛl a.» Lɛ n'a a nãà tɩ cen tɩ àr a tẽw dɩ̃dɔr nʋɔr, ɛ́ a sojarɩ yire kɔbr kɔbr nɩ túre túre.

⁵ A nãà tɩ yel'ɩ a Zowab, a Avɩsaɩ nɩ a Ɩtaɩ: «Ɩ̃ zɛlɛ nyɩ na, nyɩ maal ɩrɛ a Abɩsalɔm ƴãw.» A sojarɩ za tɩ wõ n à à ŋá a nãà na yere kʋ̀rɛ a sojarɩ nɩ-bɛrɛ za a Abɩsalɔm ƴãw a.

⁶ A Daviir zɛbr-nɩbɛ tɩ yi na tuori a Abɩsalɔm zɛbr-nɩbɛ a zɛbr ƴãw. Efarayim tuw pʋɔ n'a a zɛbr tɩ zɛb.

⁷ A Daviir sojarɩ tɩ zɛb'a tʋ̃ɔ́ a Abɩsalɔm sojarɩ a be. A nɩbɛ na kpi a bɛ pʋɔ a ʋlɩ bibir nɛ a tɩ ɩ n nɩbɛ tùr-lɩzɛr (20 000).

⁸ A zɛbr tɩ zɛb'a pàw a vuo ʋl za, ɛ́ a nɩbɛ na kpi a tuw pʋɔ a tɩ zuo nɩ a bɛl na kpi a zɛbr zie.

A Zowab kʋ n a Abɩsalɔm

⁹ A Abɩsalɔm na tɩ zɔm mílɛ̀ a, wa tɩ càar'ɩ a Daviir sojarɩ. A mílɛ̀ tɩ zɔ na kpɛ terebɛ̃tɩ tɩ-kpɛ̃ɛ a wuli na lɩr lɩr taa a pile. A Abɩsalɔm zu tɩ kpɛ na hab a terebɛ̃tɩ wuli cara, ʋ zaalɛ, ɛ́ a mílɛ̀ cãà zɔrɛ.

¹⁰ Nɩr kãw tɩ nyɛ̃ ʋ na cen tɩ yel kʋ̀ a Zowab à ŋá: «Ɩ̃ nyɛ̃ nɩ a Abɩsalɔm ʋ yawlɩ terebɛ̃tɩ tɩɛ zu zaalɛ.»

¹¹ A Zowab yel ʋ: «Bʋnʋ yaa? Fʋ nyɛ̃ ʋ na yaa? Bʋ̃ʋ n'ʋ so fʋ bɛ ŋmɛ ʋ kʋ bin a be? Ɩ̃ɩ nãá kʋ̀ b'ɩ salm-zɩɛ libie pie nɩ kpàwr!»

¹² A nɩr nɛ tɩ yel'ɩ a Zowab: «Fʋ̃ʋ saa tɩ ƴãw mɛ̃ salm-zɩɛ libie túr (1 000) a nũú a, ɩ̃ bɛ zɛwr nũu tʋɔr'ɩ a nãà bidɛb ɛ. Tɩ za tobe pʋɔ n'a a nãà yel à ŋá kʋ̀ a fʋ̃ʋ, a Avɩsaɩ nɩ a Ɩtaɩ: “Nyɩ gù vla, nɩr taa tʋɔr a Abɩsalɔm ɛ.”

¹³ Mãa tɩ kʋ ʋ, ɛ́ yel k'ɩ̃ɩ bɛ wõ yel a, a nãà nãá cãà na bãwnɩ a, —ʋ bãw nɩ bom za—, ɛ́ a fʋ̃ʋ tɔr za a, fʋ kʋ̃ʋ sàw ƴɛ̀r faa mɛ̃ ɩ.»

¹⁴ A Zowab tɩ yel'a: «Ɩ̃ bɛ àrɛ a fʋ zie ka zawlalɛ ɩ!» Ʋ tɩ de nɩ dà-nɔ-cɩlsɩ ata tɩ cɔ̀r a kpɛ a Abɩsalɔm na tɩ cãà yawlɩ a tɩɛ zu bɛ kpi sɛr a socirí.

¹⁵ Al pùorí, pɔ́lɛ́ pie na mɩ́ tɩ tɛr a Zowab zɛbr bome a, tɩ viir'a koli a Abɩsalɔm, ɛ́ baa kʋ ʋ.

¹⁶ Lɛ n'a a Zowab tɩ ƴãw bɛ pɛblɩ wɩ́ɛ, kɛ́ bɛ bɛr a zɛbr. A Daviir sojarɩ tɩ bɛr'ɩ a Abɩsalɔm zɛbr-nɩbɛ diwfʋ.

¹⁷ Bɛ tɩ de nɩ a Abɩsalɔm kũu lɔb ƴãw bɔw-kpɛ̃ɛ kãw pʋɔ a tuw pʋɔ, ɛ́ wob kʋsɛbɛ gbõ gbõ pàw. A Abɩsalɔm sojarɩ tɩ zɔ na, ŋa za mɩ́ tɩ lɛb kul a ʋ yir.

¹⁸ A Abɩsalɔm na tɩ cãà vʋʋrɛ a, ʋ tɩ ƴãw na bɛ ɓáw kʋsɛ-kpɛ̃ɛ teli, a Nãà fʋɔla pʋɔ. Bʋ̃ʋ n'ʋ vɛ̃, ʋ tɩ tɩɛr'ɩ ʋ pʋɔ à ŋá: «Ɩ̃ bɛ tɛr bidɛb, ʋ na ɩ a ɩ̃ yúor cãà pore ɩ.» Alɛ so ʋ tɩ kʋ̀ a kʋsɩɛr ŋa a ʋ yúor. Wa tɩ tɔ dɩ̃a, bɛ cãà na bʋɔlɛ ʋ kɛ́ Abɩsalɔm kʋsɩɛr.

A Daviir wõ n a Abɩsalɔm kũu

¹⁹ A Sadɔkɩ bidɛb, Ahimaasɩ, tɩ yel'ɩ a Zowab à ŋá: «Sàw ɩ̃ zɔ cen tɩ yel kʋ̀ a nãà, k'aa Sore kpɛ ʋ na, faa ʋ a ʋ dɔ̃ dem nuru pʋɔ.»

²⁰ A Zowab sɔw ʋ: «Ʋ̃ʋ'hʋ̃! Fʋ kʋ̃ ɩ yel-vla yere a dɩ̃a ɩ. Fʋ na cen nɩ bibir kãw tɩ yel yel-yoru, ɛcɛ a dɩ̃a a, ta cen ɛ, bʋ̃ʋ n'ʋ vɛ̃, a nãà bidɛb na n'ʋ kpi a ƴãw.»

²¹ Al pùorí, a Zowab tɩ yel'ɩ Etiopi tẽw nɩr kãw: «Cen tɩ manɩ bom nɛ fʋ na nyɛ̃ a, kʋ̀ a nãà!» Ʋ tɩ gũu na tɩ tɔ tẽw a Zowab niŋé, ɛ́ ìr zɔrɛ cere.

²² A Sadɔkɩ bidɛb, Ahimaasɩ, tɩ lɛb'a yel a Zowab: «Bom nɛ wa ɩrɛ a, ʋ ɩ! Ɛcɛ bɛr mɛ̃ ɩ̃ mɩ̀ zɔ tu a Etiopi tẽw nɩr ŋa» A Zowab yel ʋ: «Yel-vla na tɛr sã-ya a bɛ n'ʋ ɛ, ɩ̃ bie e, bʋ̃ʋ n'ʋ so fʋ pãa mɩ̀ na cen?»

²³ A Ahimaasɩ lɛb yel: «Bom nɛ wa ɩrɛ a, ʋ ɩ, ɩ̃ na cen na!» A Zowab yel ʋ: «Cere.» A Ahimaasɩ tɩ de nɩ a Zurdɛ̃ tɩ̃tal sɔ́r zɔ tɩ zuo a Etiopi tẽw nɩr bɛr.

²⁴ A Daviir tɩ zɩ̃ n a tẽw dɩ̃dɛɛ ayi cará. A zi-piwre tɩ do n a dɩ̃dɔr garʋ́ a dacin zu za tɩ piwre a zie. Ʋ wa nyɛ̃ nɩ nɩr na zɔrɛ ʋ yõ a.

²⁵ A zi-piwre tɩ ŋmɛ n cɛl, yel kʋ̀ a nãà. A nãà tɩ yel'a: «Ʋlɛ wa ɩ ʋ yõ a, yel-vla n'ʋ ʋ tɛr na yel.» A nɩr ʋl na tɩ pɩɛlɛ a,

²⁶ a zi-piwre tɩ nyɛ̃ nɩ a kãw mɩ̀ na zɔrɛ waar a. Ʋ tɩ cɩɩr'a yel kʋ̀ a dɩ̃dɔ-gùre: «Nyɛ̃ nɩr, ʋ mɩ̀ lɛb zɔrɛ ʋ yõ waar.» A nãà yel: «Yel-vla n'ʋ à ŋà mɩ̀ tɛr.»

²⁷ A zi-piwre lɛb yel: «Ɩ̃ nyɛ̃ nɩ a dãw-niwn sob zɔba bãw, ʋ zɔrɛ na mɛ̃ Sadɔkɩ bidɛb Ahimaasɩ a.» A nãà sɔw: «Nɩ-vla n'ʋ. Yel-vla na n'ʋ ʋ waar'ɩ.»

²⁸ A Ahimaasɩ tɩ ta na cɩɩrɩ yel a nãà: «A yele za ɩ n vla!» Ʋ tɩ gũu na tɩ tɔ tẽw, ɛ́ yel ƴãw pʋɔ: «A Sore fʋ Naaŋmɩn tɛr'ɩ puoru, ʋ ƴãw nɩ a bɛlɩ dem na ìr a fʋ ƴãw a, a fʋ nuru pʋɔ.»

²⁹ A nãà tɩ sowr'a: «Ɛ́ a Abɩsalɔm, ʋ kpɛmɛ na a?» A Ahimaasɩ sɔw: «A lɛ a Zowab na tɩ tone mãa nɩ a tõ-tõ-bie ŋa sob a, damnʋ tɩ damnɛ nɩ yaga za, ɛcɛ ɩ̃ bɛ tɩ bãw bʋ̃ʋ n'ʋ ɩrɛ ɩ.»

³⁰ A nãà tɩ yel'a: «Taw vɩrɩ àr ka!» A Ahimaasɩ tɩ taw na vɩrɩ a nãà niŋé, àr yɩ̃ɛlɛ.

³¹ Lɛ n'a a Etiopi tẽw nɩr ʋl tɩ ta yel a nãà: «Yel-vla n'ɩ ŋan a nãà ɩ̃ sore ƴãw: a dɩ̃a a, a Sore faa fʋ nɩ a fʋ dɔ̃ dem za nuru pʋɔ, kpɛ b!»

³² A nãà tɩ sowr'ʋ na: «A Abɩsalɔm kpɛmɛ na a?» Ʋ sɔw: «Nãà a, a ɩ̃ sore dɔ̃ dem nɩ a bɛlɩ dem za na bɔbr a fʋ faa a, a ŋmɛ̃ bɛ mɛ̃ a pɔlbile ŋa a.»