2 Samɩɛl 17 - A SƐB-SÕW

A Husaɩ ŋmɛ n a Ahitofɛl yã ʋ na wul a lɔb

¹ A Ahitofɛl tɩ yel'ɩ a Abɩsalɔm: «Sàw ɩ̃ kaa ír dɛbr tùr-pie nɩ ayi (12 000) ta tu n a Daviir a dɩ̃a tɩ̃ɩsɔw tɔr za.

² Ɩ̃ na tɩ ùr ʋ nɩ a lɛn daar ʋ na bàl ɛ́ a ʋ kanyir baar'a. Ɩ̃ na ƴãw ʋ nɩ dɛ̃bɩ̃ɛ. A ʋ nɩbɛ na zɔ na yaarɩ, ɩ̃ɩ kʋ a ʋl yõ.

³ Bʋ̃ʋ n'ʋ vɛ̃, a sob nɛ kʋb fʋ na bɔbr a, ʋlɛ wa kpi a, a nɩbɛ za na lɛb'a wa a fʋ zie, ɛ́ bɛ za na tɛr'ɩ ƴã-ɓaarʋ.»

⁴ A Abɩsalɔm nɩ a Ɩsɩrayɛl nɩbɛ nɩ-kore za tɩ nyɛ̃ nɩ a yã ŋa ʋ vɩɛl.

⁵ Ɛcɛ a Abɩsalɔm tɩ yel'a: «Nyɩ mɩ̀ bʋɔlɩ a Arkitɩ dɔɔ Husaɩ, tɩ wa wõ a lɛ ʋ na na yel a.»

⁶ A Husaɩ tɩ wa n a Abɩsalɔm zie, ʋ wa yel ʋ à ŋá: «À ŋá n'a a Ahitofɛl ƴɛ̀r. Tɩ ɩ a lɛ ʋ na yel a a? Alɛ bɛ ɩ lɛ, fʋ̃ʋ wul yã-yũo tɩ nyɛ̃.»

⁷ A Husaɩ tɩ sɔw nɩ a Abɩsalɔm: «A Ahitofɛl dɩ̃a yã ŋa ʋl bɛ vɩɛl ɛ.

⁸ Fʋ̃ʋ mɩŋa za bãw nɩ a fʋ sãà nɩ a ʋ nɩbɛ: soja-gãdaar'ɩ bɛ za, ɛ́ nyar mɛ̃ ursɩ nyãw na bɔr a ʋ bile bɛr a wɩ̀ɛ pʋɔ a. Lɛb waar mɩ̀, a fʋ sãà ɩ n zɛbr nɩr, ʋ kʋ̃ sàw lãw gã nɩ a nɩbɛ za ɩ.

⁹ Ʋ na tɔ ka a, ʋ sɔwl'ɩ tãw bɔw kãw pʋɔ, bɩɩ zie kãw. A nɩbɛ wa tĩ kpiir a tɩ pʋɔ a, a yel na yi na kɛ́ bɛ zɛb'a tʋ̃ɔ́ a Abɩsalɔm sojarɩ.

¹⁰ A lɛn daar a, a soja-gãdaar tɛɛ za, a bɛl na kpɛmɛ socir mɛ̃ gbẽw a, a bɛ kanyir na baar'a, bʋ̃ʋ n'ʋ vɛ̃, a Ɩsɩrayɛl nɩbɛ za bãwnɩ a na k'aa fʋ sãà ɩ n gãdaa, ɛ́ tɛr soja-gãdaar.

¹¹ Yã ŋa n'ʋ mãa wule: ɓã a Ɩsɩrayɛl sojarɩ za taa a fʋ zie, a Dan tɩ tɔ a Bɛɛr-Seva, bɛ yãwmɛ mɛ̃ a kʋ̃ɔ-kpɛ̃ɛ nʋɔr biire a, ɛ́ fʋ̃ʋ tɔr za a, lãw nɩ bɛ cen a zɛbr zie.

¹² Tɩ na páw ʋ nɩ zie nɛ za ʋ na na be a, tɩ na lo n a ʋ zu mɛ̃ ɓɩɛlʋ na lo tẽw a. Ʋlɛ nɩ a ʋ nɩbɛ a, been bɛ cɩ̃ɛnɛ ɩ.

¹³ Bɛlɛ wa zɔ kpɛ tẽw kãw pʋɔ, kɛ́ bɛ sɔwlɩ a, a tɩ sojarɩ za na wa n nɩ míe. Tɩ na vu n a tẽw tɩ ta n a fʋɔla na pɩɛl'a pʋɔ. Lɛ n'a bɛ kʋ̃ lɛb nyɛ̃ kʋsɩɛr kãw a be ɩ.»

¹⁴ A Abɩsalɔm nɩ a Ɩsɩrayɛl nɩbɛ tɩ yel'a: «A Arkitɩ dɔɔ, Husaɩ, yã vɩɛl a zuo a Ahitofɛl dem.» Bʋ̃ʋ n'ʋ vɛ̃, a Sore tɩ yel'a k'ʋʋ ŋmɛ a Ahitofɛl yã-vla lɔb, ɛ́ ɩ kpɩɛrʋ páw a Abɩsalɔm.

A Daviir gãw nɩ a Zurdɛ̃ man

¹⁵ A Husaɩ tɩ yel'ɩ a bàwr-maalbɛ Sadɔkɩ nɩ Abɩataar: «Yã ŋa n'ʋ a Ahitofɛl wul a Abɩsalɔm nɩ a Ɩsɩrayɛl nɩbɛ nɩ-kore, ɛ́ à ŋá n'a mãa yel.

¹⁶ A na ɩ à ŋá a, nyɩ tõ nɩr fɔ̃wlɛ ʋ tɩ yel kʋ̀ a Daviir. Nyɩ ƴãw bɛ yel ʋ à ŋá: “Taa ganɛ a Zurdɛ̃ fʋɔla pʋɔ a dɩ̃a tɩ̃ɩsɔw ɛ. Fɛr fʋ tʋɔra gãw a man, alɛ bɛ ɩ lɛ a, bɛ na kʋ n fʋ̃ʋ nɩ a fʋ nɩbɛ za pàw pɛr.”»

¹⁷ A Zonatã nɩ a Ahimaasɩ tɩ àr'ɩ a Ɛɩn-Orogɛl. Tõ-tõ-bi-pɔwle kãw nãá tɩ cen na tɩ yel yel kʋ̀ bɛ, ɛ̀ bɛ mɩ̀ cen tɩ yel kʋ̀ a nãà Daviir. Bʋ̃ʋ n'ʋ vɛ̃, a bɛ tɩ tɛr kɛ́ bɛ kpɛ a tẽw pʋɔ, nɩr wa mab nyɛ̃ bɛ ɩ.

¹⁸ Ɛcɛ pɔlbile kãw tɩ cãà na nyɛ̃ bɛ, cen tɩ yel kʋ̀ a Abɩsalɔm. A nɩbɛ ayi bɛl bɛ na tɩ tõ a, tɩ cen nɩ fɔ̃w fɔ̃w tɩ ta Bahurim tẽw nɩr kãw yir. Bule tɩ be n a ʋ davʋra pʋɔ, bɛ siw a be sɔwlɩ.

¹⁹ A nɩr nɛ pɔw tɩ de nɩ pɛn-kawsaga kãw yɛ́r pàw a bule nʋɔr, ɛ́ dɩ̀ɛlɩ bʋ̃-bie, bɛ bɛ nyɛ̃ bom za ɩ.

²⁰ A nɩbɛ a Abɩsalɔm na tɩ tõ a tɩ kpɛ n a pɔw nɛ zie sowr'ʋ: «A Ahimaasɩ nɩ a Zonatã ɩ n ŋmɩn?» A pɔw sɔw bɛ: «Bɛ tɔl'a gãw a bàa.» Bɛ tɩ bɔ bɛ na gù, ɛ́ lɛb kul a Zerizalɛm.

²¹ Bɛ na wa cen baar'a, a Ahimaasɩ nɩ a Zonatã tɩ yi n a bule pʋɔ, cen tɩ yel kʋ̀ a nãà Daviir. Bɛ tɩ yel ʋ na: «Nyɩ lo a sɔ́r! Nyɩ gãw a man fɔ̃w, bʋ̃ʋ n'ʋ vɛ̃, a yã ŋa n'ʋ a Ahitofɛl wul a nyɩ ƴãw.»

²² Daadaalɛ, a Daviir nɩ a ʋ nɩbɛ tɩ ìr'a lo a sɔ́r gãw a Zurdɛ̃. A zie na wa vɩɛrɛ a, bɛ za tɩ gãw nɩ a Zurdɛ̃, been bɛ tɩ cɛ ɩ.

²³ A Ahitofɛl na wa nyɛ̃ bɛ bɛ tu a ʋ yã ʋ na wul a, ʋ tɩ ƴãw nɩ a ʋ bõw a kɔw, yi lo n a sɔ́r kul'ɩ a ʋ tẽw. Ʋ tɩ tɩr'ɩ nɛ́ɛ kʋ̀ a ʋ yir, ɛ́ cen tɩ yawlɩ ʋ tʋɔra kpi. Bɛ tɩ de ʋ na tɩ ũù a ʋ sãà yaa pʋɔ.

A Daviir ta n Mahanayim

²⁴ A Daviir tɩ ta n Mahanayim a lɛn daar a Abɩsalɔm nɩ a Ɩsɩrayɛl sojarɩ na gãwnɛ a Zurdɛ̃ a.

²⁵ A Abɩsalɔm tɩ de nɩ Amasa ʋ ɩ a sojarɩ nɩ-kpɛ̃ɛ lɩɛrɩ a Zowab. A Amasa tɩ ɩ n Ɩsɩrayɛl nɩr kãw na dɩ kɛ́ Yɩtɩra a bidɛb. A Yɩtɩra tɩ kul'ɩ Avigal na ɩ Nahasɩ pɔwyaa, ɛ́ ɩ a Zowab mã Seruya yɛb a.

²⁶ A Abɩsalɔm nɩ a Ɩsɩrayɛl nɩbɛ tɩ maal'ɩ a bɛ laɩ Galaadɩ tẽw.

²⁷ A lɛn daar a Daviir na tɩ ta a Mahanayim a, Nahasɩ bidɛb, Sovɩ, na yi Araba, a Amɔ̃ tẽw dem tẽ-kpɛ̃ɛ pʋɔ a, tɩ wa na wa páw ʋ. Ʋlɛ nɩ Amiyɛl bidɛb Makɩɩr na yi Lodevaar a, nɩ Barzilaɩ na yi Orogelim, Galaadɩ tẽw a.

^28-29 A nɩbɛ bɛ ŋa tɩ wa n nɩ bʋ̃-ganɩ, píir kɔblʋ pɛnɛ, labɛ, lãwnɩ bʋ̃-dɩrɩ wa kʋ̀ a Daviir nɩ a ʋ taabɛ: ble, ɔɔzʋ, zɔ̃, bʋ̃-bie na sɛ̃ a, bɛ̃w-bʋʋrɛ kãw bɛ na bʋɔlɛ fɛɛvʋ nɩ lãtɩɩ a, sɩwr, kãá, náab nɩ pɛrʋ bʋ̀r-kãá. Bɛ tɩ sɩrɩ na tɩɛrɩ à ŋá: «A kɔ̃, a bàlʋ nɩ a kʋ̃ɔ-nyúur fɛr'ɩ a nɩbɛ bɛ ŋa a wɛja-kpalɛ pʋɔ.»