2 Samɩɛl 16 - A SƐB-SÕW

A Sɩva tuor'ɩ a Daviir nɩ bʋ̃-dɩrɩ

¹ A Daviir tɩ zuo nɩ a tãw nyʋɔr bɛr blã, ɛ́ a Mefibosɛtɩ tõ-tõ-bie Sɩva, wa tuor'ʋ, nɩ bòn ayi na ƴãw a kɔwr a. A bòn tɩ tuo nɩ dipɛ̃ kɔbr ayi (200) nɩ divɛ̃ tɩ-wɔ̃-kon cãacule kʋba (100), kãkamɛ kʋba (100), nɩ divɛ̃ nɩ wɔ-gbãw.

² A nãà tɩ sowr'ɩ a Sɩva: «Bʋ̃ʋ n'ʋ fʋ ɩrɛ nɩ à á ŋá za?» A Sɩva sɔw: «A bòn na ɩ n a nãà yir nɩbɛ bʋ̃-zɔmnɩ, a dipɛ̃ nɩ a tɩ-wɔmɛ ɩ a sojarɩ bʋ̃-dɩrɩ, ɛ́ a divɛ̃ ɩ a bɛlɩ dem a wɛja-kpalɛ na bàl bɛr a, bʋ̃-nyúura.»

³ A nãà lɛb yel: «Ɛ́ a fʋ sore Sawul yãw, Mefibosɛtɩ, ʋ ɩ n ŋmɩn?» A Sɩva sɔw: «Ʋ cãà nɩ a Zerizalɛm, bʋ̃ʋ n'ʋ vɛ̃, ʋ tɩɛrɛ na k'aa Ɩsɩrayɛl nɩbɛ na de nɩ a ʋ sãàkʋm naalʋ kʋ̀ ʋ a dɩ̃a.»

⁴ A nãà tɩ yel'ɩ a Sɩva: «Dɩ̃a na ta a, fʋ̃ʋ so a Mefibosɛtɩ bome za.» Lɛ n'a a Sɩva tɩ gũu tɩ tɔ tẽw ɛ́ yel: «Sore ɩ̃ nãà a, fʋ yãanɩ, a fʋ pʋɔ na pɛlɩ a ɩ̃ ƴãw a zũú.»

Simeyi ŋmɩɛr'a ƴãwn a Daviir

⁵ A Daviir na tɩ tarɛ Bahurim tẽw a, nɩr kãw mɩ̀ tɩ yire nɩ a tẽw pʋɔ. A sob nɛ tɩ ɩ n Sawul dɔwlʋ nɩr, ɛ́ dɩ kɛ́ Simeyi na ɩ Geera bidɛb a. Ʋ tɩ ŋmɩɛr'a ƴãwn a Daviir yire nɩ.

⁶ Ʋ tɩ lɔbr'ɩ a Daviir nɩ a ʋ tõ-tõ-bi-bɛrɛ nɩ kʋsɛbɛ, a nɩbɛ za nɩ a sojarɩ na saa tɩ cere a nãà dʋrʋ lowr nɩ a ʋ gʋba lowr a.

⁷ À ŋá n'a a Simeyi tɩ ŋmɩɛr ƴãwn a Daviir yere nɩ: «Cen taw zaa! Cen taw zaa! Fʋ bɛ tɛr pɛr ɛ, nɩ-kʋrɛ ŋa!

⁸ A Sawul yir nɩbɛ za fʋ na kʋ a, al san n'a a Sore ƴãw fʋ yarɛ! Fʋ zu n a Sawul zie dɩ a naalʋ, alɛ so a Sore faa a naalʋ kʋ̀ a fʋ bidɛb Abɩsalɔm. Ƴɛrɛŋa a, fʋ̃ʋ n'ɩ ŋa be kpɩɛrʋ pʋɔ, fʋ na ɩ nɩ-kʋrɛ a ƴãw!»

⁹ Avɩsaɩ, a mã na tɩ dɩ kɛ́ Seruya a, tɩ yel'ɩ a nãà: «Bʋ̃ʋ n'ʋ so a bà-kũu ŋa na ŋmɩɛr ƴãwn a sore ɩ̃ nãà? Bɛr ɩ̃ tɔl cɛ ʋ zu ŋmãa.»

¹⁰ A nãà tɩ yel'ɩ a Avɩsaɩ: «Avɩsaɩ i, bʋ̃ʋ n'ʋ jɩ́rɛ nyɩ, fʋ̃ʋ nɩ a fʋ yɛb Zowab? Alɛ wa ɩ a Sore n'ʋ yel k'ʋʋ ŋmɛ ƴãw mɛ̃, ʋ ŋmɩɛr ƴãwn mɛ̃ a, ãa n'ʋ na tʋ̃ɔ́ yere ʋ?»

¹¹ A Daviir tɩ lɛb'a yel a Avɩsaɩ nɩ a ʋ tõ-tõ-bi-bɛrɛ za zie: «A ɩ̃ bidɛb, mãa mɩŋa bʋ̃-dɔwra, bɔbr'ɩ a ɩ̃ kʋb, ɛ́ bɛ nãà yere a Bɛ̃zamɛ dɔwlʋ nɩr ŋa a. Nyɩ bɛr ʋ zoom ʋ ŋmɩɛr ƴãwn mɛ̃, a Sore wa n'ʋ kʋ̀ ʋ a sɔ́r a.

¹² Kapaw a Sore na nyɛ̃ nɩ a ɩ̃ kpɩɛrʋ. Lɛ n'a ʋ na ɩ a ʋ ŋmɛ-ƴãw lɩɛbɩ maalʋ.»

¹³ A Daviir nɩ a ʋ nɩbɛ tɩ cãà na lo a bɛ sɔ́r cere, ɛ́ a Simeyi lanɛ a tãw cere pɩɛlɛ a Daviir, cãà ŋmɩɛr ƴãwn, lɔbr'ɩ ʋ kʋsɛbɛ nɩ tanɛ.

¹⁴ A nãà nɩ a ʋ nɩbɛ wa tɩ nanɩ na ta a Zurdɛ̃ nʋɔr. Bɛ tɩ bàl'ɩ bɛ za, zɩ̃ pɩ̃ɛnɩ a be.

Husaɩ cen na tɩ páw a Abɩsalɔm

¹⁵ A Abɩsalɔm nɩ Ɩsɩrayɛl nɩbɛ na bɛ dɩ vuo a tɩ kpɛ n a Zerizalɛm. A Ahitofɛl tɩ be n a ʋ zie.

¹⁶ A Daviir yã-wule, Husaɩ, na ɩ Arkitɩ a, tɩ ta n a Abɩsalɔm zie, ŋmɛ cɛl yel: «Kuryii, a nãà, ʋ vʋʋrɛ! Kuryii, a nãà, ʋ vʋʋrɛ!»

¹⁷ A Abɩsalɔm tɩ sowr'ʋ na: «A fʋ pùor-bɛ-lɛbrʋ n'ɩ à à ŋá, a fʋ bá Daviir zie e? Bʋ̃ʋ n'ʋ so fʋ bɛ páw ʋ cen?»

¹⁸ A Husaɩ tɩ sɔw na: «Mãa n'ʋ bɛ bɔbr ɛ, a sob nɛ a Sore nɩ a Ɩsɩrayɛl nɩbɛ na kaa ír, ʋ ɩ a nãà a, ʋlɛ n'ʋ ɩ̃ na tu, lɛ so ɩ̃ na be a fʋ zie.

¹⁹ Lɛb waar, ãa n'ʋ ɩ̃ na tone? A ʋ bidɛb bɛ n'ʋ ɛ? A lɛ ɩ̃ na tõ a fʋ sãà tome a, lɛ tɔr za n'a ɩ̃ na tone fʋ, dɩ̃a na ta a.»

A Abɩsalɔm gã nɩ nɩ a Daviir pɔw-bili

²⁰ A Abɩsalɔm tɩ yel'ɩ a Ahitofɛl: «Nyɩ wõ taa a nyɩ cara pʋɔ, nyɛ̃ a lɛ a na fɛr kɛ́ tɩ ɩ a.»

²¹ A Ahitofɛl tɩ sɔw nɩ a Abɩsalɔm daadaalɛ: «Cen tɩ gã nɩ a fʋ sãà pɔw-bili ʋ na bɛr kɛ́ bɛ gù a yir a. Lɛ n'a a Ɩsɩrayɛl nɩbɛ za na bãw kɛ́ fʋ ɩ n a ɩb a fʋ sãà kʋ̃ lɛb de a fʋ yele ɩ. A lɛ pʋɔ a, a fʋ nɩbɛ kanyir na lɛb'a dɔwlɩ.»

²² Lɛ n'a bɛ tɩ maalɩ pɛn-sɛw a nãà yir garʋ́ a Abɩsalɔm ƴãw, ʋ kpɛ gã nɩ a ʋ sãà pɔw-bili, a Ɩsɩrayɛl nɩbɛ za mimirí.

²³ A lɛn daar a, a yã za a Ahitofɛl na tɩ mɩ́ wul a, a mɩ́ tɩ ɩ na mɛ̃ Naaŋmɩn tɔr za n'ʋ ƴɛ̀rɛ a. A Daviir nɩ a Abɩsalɔm tɩ tuur'ɩ a yã za ʋ na wule bɛ a.