2 Samɩɛl 15 - A SƐB-SÕW

A Abɩsalɔm bɔbr'a k'ʋʋ dɩ a naalʋ

¹ Al pùorí, a Abɩsalɔm tɩ bɔ n zɛbr-torko nɩ wie, nɩ nɩbɛ lɩz'a ayi nɩ pie na mɩ́ de ʋ niwn zɔrɛ a.

² Biɓaar-sɛ̃w, ʋ mɩ́ tɩ ìr'a tɩ àr a tẽ-kpɛ̃ɛ dɩ̃dɔr sɔ́r nʋɔr. Nɩr na tɛr yel mɩ́ wa tɔlɛ cere a nãà zie k'ʋʋ tɩ ƴãw bɛ dɩ a ƴɛ̀rʋ wul a ʋ yel-mɩŋa a, a Abɩsalɔm mɩ́ bʋɔl'ɩ a ʋ sob sowr'ʋ: «Tẽ-buor'a fʋ yi?» A sob mɩ́ tɩ sɔw na: «Ɩsɩrayɛl dɔwlʋ kãw pʋɔ n'a.»

³ A Abɩsalɔm mɩ́ tɩ yel ʋ na: «A yel fʋ na tɛr a, ɩ n yel-vla, ɛ́ a fʋ dem mɩ̀ de, ɛcɛ nyɛ̃, nɩr za kʋ̃ bɛr wõ fʋ a nãà zie ɩ.»

⁴ A Abɩsalɔm mɩ́ tɩ cãà yel ƴãw pʋɔ: «Bʋ̃ʋ pãa ɩ a! Mãa tɩ ɩ ƴɛ̀r-dɩrɛ a tẽw ŋa pʋɔ a, mãa zie n'a a bɛlɩ dem za na tɛr yele na sɛw nɩ ƴɛ̀rʋ-dɩb a, nãá mɩ́ wa, ɩ̃ɩ nãá mɩ́ dɩ n a ƴɛ̀rʋ kʋ̀ bɛ a tu yel-mɩŋa.»

⁵ Ɛ́ a sob nɛ mɩ́ wa tawr tarɛ bɔbr k'ʋʋ gũu tɩ tɔ tẽw a ʋ niŋé a, a Abɩsalɔm mɩ́ tur ʋ nɩ a nũu ɛ́ nyɔw ʋ weri.

⁶ À ŋá n'a a Abɩsalɔm tɩ ɩrɛ a Ɩsɩrayɛl nɩbɛ za zie, bɛlɛ mɩ́ wa cere a nãà zie a ƴɛ̀rʋ-dɩb a. Ɛ́ à à ŋá n'a ʋ tɩ bɛ̀lɛ a Ɩsɩrayɛl nɩbɛ ƴãwn bɛ nɔnɛ ʋ.

⁷ Yome anaar pùorí, a Abɩsalɔm tɩ ìr'ɩ bibir kãw yel a nãà: «Sàw ɩ̃ cen Ebrɔ̃, tɩ ír a nʋɔr ɩ̃ na tɩ kõ a Sore zie a.

⁸ Sɩza n'a, ɩ̃ na tɩ be a Gesuur a Aram tẽw a, ɩ̃ tɩ kõ n nʋɔr a Sore zie kɛ́ ʋlɛ wa lɛb tɛr mɛ̃ wa n a Zerizalɛm a, ɩ̃ɩ na maal'ɩ bagɛ kʋ̀ ʋ.»

⁹ A nãà yel ʋ: «Cere nɩ ƴã-ɓaarʋ.» Lɛ n'a a Abɩsalɔm tɩ lo a sɔ́r cen a Ebrɔ̃.

¹⁰ A be n'a ʋ tɩ be, ɛ́ sɔwlɩ tõ a ʋ nɩbɛ a Ɩsɩrayɛl dɔwlʋ za pʋɔ, kɛ́ bɛ tɩ yel à ŋá: «Nyɩmɛ dɛ wa wone a wɩ́ɛ ʋ pɛblɛ a, nyɩɩm yel k'aa Abɩsalɔm ɩ n nãà a Ebrɔ̃.»

¹¹ A Abɩsalɔm tɩ bʋɔl'ɩ nɩbɛ kɔbr ayi (200), bɛ yi a Zerizalɛm páw ʋ cen. Bɛl bɛ tɩ tɛr tɩɛrʋ kãw ɛ, bɛ bɛ tɩ bãw kɛ́ yel ɩrɛ na ɩ.

¹² A Abɩsalɔm na tɩ maalɛ a bagɛ a, ʋ tɩ tõ na bɛ tɩ tɛr a Daviir yã-wule, Ahitofɛl, a ʋ tẽw Gilo, wa n. À ŋá n'a a Abɩsalɔm nɩbɛ tɩ yãwmɛ dɔwlɛ, ɛ́ a wõ-taa bɛ na tɛr a naalʋ deb ƴãw a lɛb bãw kpɛ.

A Daviir yi n a Zerizalɛm zɔ

¹³ Nɩr kãw tɩ wa na wa yel kʋ̀ a Daviir à ŋá: «A Ɩsɩrayɛl nɩbɛ lɩɛb'a tu a Abɩsalɔm.»

¹⁴ A Daviir tɩ yel'ɩ a ʋ tõ-tõ-bi-bɛrɛ za na tɩ be a ʋ zie a Zerizalɛm a: «Nyɩ ɩ tɩ zɔ! Alɛ bɛ ɩ lɛ, a Abɩsalɔm bɛ cɩɛr tɩ been bɛrɛ ɩ. Tɩ pawr, alɛ bɛ ɩ lɛ, ʋ na ta n a ka ƴɛrɛŋa, lo a tɩ zu, kʋ a nɩbɛ za, ƴãw kpɩɛrʋ a tẽw pʋɔ.»

¹⁵ A nãà tõ-tõ-bi-bɛrɛ tɩ sɔw ʋ na: «Bom nɛ za fʋ na na yel a, tɩ tu n a fʋ pùor.»

¹⁶ Lɛ n'a a nãà tɩ yi n gbɛ́ɛ, ʋlɛ nɩ a ʋ yir dem za, ɛcɛ ʋ tɩ bɛr'ɩ pɔw-bili pie kɛ́ bɛ gù a yir.

¹⁷ A nãà nɩ a ʋ nɩbɛ za na tɩ yire a tẽw pʋɔ a, bɛ tɩ tɛw na àr a yir pɛ-baara ƴãw.

¹⁸ A nãà tõ-tõ-biir za tɩ tɔlɛ nɩ a ʋ niŋé: a Keretɩ̃ɛ mɩnɛ za, a Peletɩ̃ɛ mɩnɛ za, nɩ a Gatɩ tẽw sojarɩ kɔbr ayʋɔb (600) na tu a Daviir a. Bɛ za tɩ tɔl'ɩ a nãà niŋé.

¹⁹ A nãà tɩ yel'ɩ a Gatɩ tẽw sojarɩ nɩ-kpɛ̃ɛ Ɩtaɩ: «Bʋ̃ʋ n'ʋ so a fʋ̃ʋ mɩ̀ fʋ mɩ̀ páwr tɩ, lɛb cen a tẽw pʋɔ, tɩ be a na-paala zie, bʋ̃ʋ n'ʋ vɛ̃, sãan nɛ b, mɔ̃ mɩ̀, bɛ diw fʋ nɩ a fʋ tẽw.

²⁰ Daar ŋa n'a fʋ ta a ɩ̃ zie, ɩ̃ɩ na tɛr fʋ cere nɩ, mãa na bɛ bãw be ɩ̃ na cere a? Lɛb, tɛr a fʋ tẽ-bi-taabɛ lɛb cen nɩ a Zerizalɛm. A Sore, ʋ wul fʋ a ʋ su-ɓaarʋ nɩ a ʋ nɔ̃wfʋ.»

²¹ Ɛcɛ a Ɩtaɩ tɩ sɔw ʋ na: «Ɩ̃ pɔ n nɩ a Sore na vʋʋrɛ a, ɛ́ pɔ n a nãà nyɔ-vʋʋrʋ: a be a nãà na na be a, be n'a ɩ̃ mɩ̀ na be, a kũu n'a bɩɩ a nyɔ-vʋʋrʋ n'a a.»

²² A Daviir tɩ yel'ɩ a Ɩtaɩ: «A vɩɛl'a, tɔl cere!» Lɛ n'a a Ɩtaɩ tɩ tɔl, ʋlɛ nɩ a ʋ sojarɩ, nɩ a bɛ yie dem za.

²³ A nɩbɛ za tɩ kone na ŋmɩɛr'ɩ cɛlsɩ, a lɛn daar a sojarɩ na tɩ tɔlɛ a Daviir niŋé a. A nãà tɩ gãw nɩ a Sedrɔ̃ bà-fʋɔla nɩ a ʋ nɩbɛ, lo a wɛja-kpalɛ sɔ́r.

²⁴ A bàwr-maalɛ Sadɔkɩ mɩ̀ tɩ be n be, ʋlɛ nɩ a levitɩ mɩnɛ na tuo a Naaŋmɩn wõ-taa daga a. Bɛ tɩ tow nɩ a wõ-taa daga bin, ɛ́ a bàwr-maalɛ Abɩataar maalɛ bagɛ, ɛ́ gù a nɩbɛ za na tɩ yire a tẽw pʋɔ a, tɩ tɔl bɛ za.

²⁵ Lɛ n'a a nãà tɩ yel a Sadɔkɩ: «De a Naaŋmɩn wõ-taa daga lɛb kpɛ n a tẽw pʋɔ. A Sore wa bɔbr a ɩ̃ vla a, ʋ na ɩ na ɩ̃ lɛb wa, ʋ na ɩ na ɩ̃ lɛb nyɛ̃ a wõ-taa daga nɩ a ʋ zi-sõw.

²⁶ Ɛcɛ ʋlɛ wa yel k'ʋʋ bɛ bɔbr mɛ̃ a, ʋ̃ʋ́ ɩ m lɛ za ʋ na bɔbr a.»

²⁷ A nãà tɩ lɛb'a yel a Sadɔkɩ: «Nyɛ̃, lɛb kpɛ a tẽw pʋɔ nɩ ƴã-ɓaarʋ, fʋ̃ʋ nɩ a fʋ bidɛb Ahimaasɩ, nɩ a Abɩataar nɩ a ʋ bidɛb Zonatã.

²⁸ Mãa a, ɩ̃ na nɩɩnɛ nɩ a wɛja-kpalɛ na pɩɛlɩ a Zurdɛ̃ gãwfʋ ziir a vuo pʋɔ, ɛ́ gù nyɩ wa tɩ yel bom kʋ̀ m.»

²⁹ Lɛ n'a a Sadɔkɩ nɩ a Abɩataar tɩ de a Naaŋmɩn wõ-taa daga lɛb wa n a Zerizalɛm, ɛ́ wa be a be.

A Daviir tõ n Husaɩ k'ʋʋ tɩ piwre a Abɩsalɔm

³⁰ A Daviir tɩ kone na dúor'ɩ a Olivʋ tɩɩr tãw. Ʋ tɩ pàw nɩ a ʋ zu, ɛ́ cere nɩ gbɛ-zawlɛ. A bɛlɩ dem za na tɩ lãw nɩ ʋ dúor a mɩ̀ tɩ pàw nɩ a bɛ zuru ɛ́ kone.

³¹ Nɩr kãw tɩ yel'a kʋ̀ a Daviir, k'aa Ahitofɛl pʋɔ nɩ a nɩbɛ na bʋ-taa a pʋɔ, a Abɩsalɔm zie. Lɛ n'a a Daviir tɩ yel: «Sore e, ɩ̃ zɛlɛ fʋ na, ɩ a yã a Ahitofɛl na wule a, ɩ dãbolu!»

³² A Daviir tɩ tarɛ nɩ a tãw nyʋɔrɩ́, a be bɛ na mɩ́ gũu tɩ tɔ tẽw a Naaŋmɩn niŋé a, wa bere a Arkitɩ dɔɔ Husaɩ, na ɩ a ʋ yã-wule a, tuore ʋ, su kpar-cɩɛrɛ, ɛ́ a zu ɩ tanɛ tɛwr.

³³ A Daviir tɩ yel ʋ na: «Ta páw mɛ̃ ɩ, ɩ̃ kʋ̃ tʋ̃ɔ́ fʋ tɛr ɛ.

³⁴ Nɩ̃ɛ lɛb cen a tẽw pʋɔ, tɩ yel a Abɩsalɔm à ŋá: “Nãà a, ɩ̃ na tone fʋ na. Ɩ̃ tɩ dãw na tõ a fʋ sãà tome, dɩ̃a na ta a, a fʋ̃ʋ mɩŋa tome n'a ɩ̃ bɔbr k'ɩ̃ɩ tone.” Lɛ n'a fʋ na tʋ̃ɔ́ mɩ́ ŋmɛ a yã a Ahitofɛl na wule a lɔb, a ɩ sõwfʋ a ɩ̃ zie.

³⁵ Ɛ́ lɛb waar, a bàwr-maalbɛ Sadɔkɩ nɩ Abɩataar na be n be sõwne fʋ. Bom za fʋ na na mɩ́ wõ a nãà yir pʋɔ a, fʋ na mɩ́ yel a kʋ̀ bɛ.

³⁶ A Sadɔkɩ bidɛb, Ahimaasɩ, nɩ a Abɩataar bidɛb, Zonatã, be n a be. Nyɩ na mɩ́ tõ bɛ na bɛ wa manɩ bom za nyɩ na wõ a nãà yir pʋɔ a kʋ̀ m.»

³⁷ A Daviir yã-wule Husaɩ tɩ kpɛ n a Zerizalɛm, a lɛn daar a Abɩsalɔm tɔr za mɩ̀ na tɩ tarɛ a tẽw pʋɔ a.