2 Samɩɛl 12 - A SƐB-SÕW

A Natan yel'a kʋ̀ a Daviir a dɔwrʋ a Naaŋmɩn na na ƴãw ʋ a

¹ A Sore tɩ tõ n Natan a Daviir zie. Ʋ tɩ cen na tɩ páw ʋ, yel ʋ à ŋá: «Nɩbɛ ayi tɩ be n tẽw kãw pʋɔ, a kãw tɛr a, ɛ́ a kãw ɩ nã́w sob.

² A tɛra sob nɛ tɩ tɛr'ɩ píir nɩ nĩi bɛ dɩ vuo ɩ.

³ A nã́w sob nɛ bɛ tɩ tɛr bom za ɩ, a bɛ ɩ peli-pɔw been kãw ʋ na tɩ da a ɩ. Ʋ tɩ guole ʋ na, ʋ báarɛ a ʋ zie, ʋlɛ nɩ a ʋ bibiir. A bom nɛ ʋ na tɩ dɩrɛ a, ʋlɛ n'ʋ a pele mɩ̀ mɩ́ tɩ dɩ, a ʋ ŋmale pʋɔ n'a a pele tɩ nyúur, a ʋ zie n'a a pele tɩ ganɛ. Ʋ tɩ ɩ na mɛ̃ a ʋ pɔwyaa a.

⁴ Bibir kãw, sãan tɩ wa n a tɛra sob zie. A tɛra sob nɛ bɛ tɩ sàw nyɔw dʋ̃w a ʋ píir bɩɩ a ʋ nĩi pʋɔ, kʋ kʋ̀ a ʋ sãan ɛ. Ɛcɛ, ʋ nɩ̃ɛ na tɩ nyɔw a nã́w sob peli-pɔw kʋ kʋ̀ a sãan na wa a ʋ zie a.»

⁵ A Daviir tɩ nyɛ̃ nɩ nɩ a nɩr ŋa suur, pi kɔkɛɛ, ɛ́ yel a Natan à ŋá: «A Sore na sɩrɩ vʋʋrɛ a zũú, a sob nɛ na ɩ à ŋá a sɛwnɩ nɩ kũu!

⁶ A fɛr'a k'ʋʋ tɩr píir anaar, yáa a peli-pɔw san, ʋ na ɩ à à ŋá, ɛ́ bɛ zɔ nɩbaalʋ a.»

⁷ A Natan tɩ yel'ɩ a Daviir: «Fʋ̃ʋ tɔr za n'ɩ a nɩr ŋa! Nyɛ̃ a ʋlɩ bom nɛ a Sore, a Ɩsɩrayɛl Naaŋmɩn, na yere kʋ̀rɛ fʋ a: “Mãa n'ʋ cir a kãá ƴãw fʋ, fʋ ɩ a Ɩsɩrayɛl nãà. Mãa n'ʋ faa fʋ a Sawul nuru pʋɔ.

⁸ Ɩ̃ ɩ na fʋ so a fʋ nɩ-kpɛ̃ɛ Sawul yir. Ɩ̃ de nɩ a fʋ nɩ-kpɛ̃ɛ pɔwbɛ kʋ̀ b. Ɩ̃ ɩ na fʋ so a Ɩsɩrayɛl nɩ a Zuda nɩbɛ. Alɛ bɛ wa saalɩ a, ɩ̃ na lɛb'a ɩ a lɛ gb'a ayi dɔwlɩ.

⁹ Bʋ̃ʋ n'ʋ so fʋ bɛ bʋɔlɩ mɛ̃ nɩr, ɩ a ʋlɩ bom nɛ na bɛ pɛlɩ a ɩ̃ pʋɔ a? Fʋ kʋ n a Hititɩ dɔɔ Uuri, fʋ ƴãw na a Amɔ̃ tẽw nɩbɛ cɔ̀r ʋ nɩ zɛbr-sɔ-kpɛ̃ɛ kʋ, ɛ́ fʋ de a ʋ pɔw, ʋ ɩ a fʋ pɔw.

¹⁰ A na ɩ à ŋá a, dɩ̃a na ta a, kũu-kpɛ̃w na kʋrɛ nɩ a fʋ yir pʋɔ kʋralɛ, fʋ na bɛ bʋɔlɩ mɛ̃ nɩr, ɛ́ de a Hititɩ dɔɔ Uuri pɔw ʋ ɩ a fʋ pɔw a.

¹¹ Bɛr wõ vla à á ŋá ɩ̃ na yere kʋ̀rɛ fʋ a: a fʋ yir nɩbɛ tɛɛ za pʋɔ n'a ɩ̃ na ɩ zu-bio yi ta b. Ɩ̃ na de nɩ a fʋ pɔwbɛ a fʋ mimirí kʋ̀ a fʋ nɩr kãw ʋ gã nɩ bɛ cãamɩlɛ.

¹² Bʋ̃ʋ n'ʋ vɛ̃, fʋ sɔwl'a ɩ, ɛcɛ mãa a, ɩ̃ na ɩ n à à ŋá cãàmɩlɛ, a Ɩsɩrayɛl nɩbɛ za niŋé.”»

¹³ Lɛ n'a a Daviir tɩ yel a Natan: «Ɩ̃ maal'ɩ yel-bier sãw a Sore.» A Natan tɩ sɔw nɩ a Daviir à ŋá: «A Sore mɩ̀ dɩ n a fʋ yel-bier suur kʋ b, fʋ kʋ̃ kpi ɛ.

¹⁴ Ɛcɛ, fʋ na sãw a Sore yaga yaga za a yel ŋa pʋɔ a, a bie fʋ na dɔw a, ʋl na kpi na.»

¹⁵ Al pùorí, a Natan tɩ lɛb'a kul a ʋ yir. A Sore tɩ ɩ n a bie a Uuri pɔw na tɩ dɔw kʋ̀ a Daviir a, ʋ lo bàalʋ.

A Bɛtɩsabe bie kpi na

¹⁶ A Daviir tɩ zɛlɩ nɩ a Sore a bie ƴãw. Ʋ tɩ nyɔw nɩ mʋta-tuo tɛrʋ, ɛ́ a tɩ̃ɩsɔw ʋlɛ wa kpɩɛr a ʋ dĩó a gaa a, tẽsɔw n'a ʋ mɩ́ tɩ gã.

¹⁷ A ʋ yir tõ-tõ-bi-tɩbrɛ tɩ wa n a ʋ zie wa zɛlɛ ʋ k'ʋʋ ír, ɛcɛ ʋ tɩ zawr'a, ɛ́ bɛ lãw nɩ bɛ dɩ bom kãw za ɩ.

¹⁸ A bibie ayopõi sob a, a bie tɩ kpi na. A Daviir tõ-tõ-biir tɩ zɔrɛ nɩ dɛ̃bɩ̃ɛ bɛ na na yel a bie kũu kʋ̀ ʋ a, bɛ tɩ tɩɛrɛ nɩ à ŋá: «A bie na tɩ cãà vʋʋrɛ a, tɩ tɩ ƴɛ̀r'ɩ a ʋ zie ʋ bɛ bɛr wõ tɩ ɛ. Ƴɛrɛŋa a, ŋmɩŋmɩn n'a tɩ na ɩ yel kʋ̀ ʋ k'aa bie kpi na? Ʋ nãà mab'a ɩ ɩb na bɛ vɩɛl a!»

¹⁹ A Daviir tɩ nyɛ̃ na k'aa ʋ tõ-tõ-biir 'hũ'hune nɩ a bɛ cara pʋɔ, ɛ́ bãw k'aa bie kpi na. Lɛ n'a ʋ tɩ sowri bɛ: «A bie kpi na a?» Bɛ sɔw: «Ʋ̃ʋ, ʋ kpi na.»

²⁰ Lɛ n'a a Daviir tɩ ìr a tẽw, so kʋ̃ɔ, zɛ kãá, ɛ́ lɩɛrɩ a bʋ̃-suuri. Al pùorí, ʋ kpɛ a Sore yir pʋɔ tɩ puori a Sore. Ʋ na tɩ lɛb kul a ʋ yir a, ʋ tɩ ƴãw na bɛ kʋ̀ ʋ bʋ̃-dɩrɩ ʋ dɩ.

²¹ A ʋ tõ-tõ-biir tɩ sowr'ʋ na: «Bʋ̃ʋ n'ɩ à à ŋá fʋ na ɩrɛ a? A bie na tɩ cãà vʋʋrɛ a, fʋ tɩ tɛr'ɩ mʋta-tuo, ɛ́ kone a ʋ ƴãw, ɛ́ ƴɛrɛŋa ʋ nɩ̃ɛ wa kpi fʋ ìr dɩrɛ!»

²² Ʋ tɩ sɔw bɛ na: «A bie na tɩ cãà vʋʋrɛ a, ɩ̃ tɩ tɛr'ɩ a mʋta-tuo, ɛ́ kone tɩɛrɛ nɩ ɩ̃ pʋɔ à ŋá: “Ãa bãw? Kapaw, a Sore na zɔ n a ɩ̃ nɩbaalʋ, ɛ́ bɛr a bie ʋ vʋʋrɛ.”

²³ Ɛcɛ ƴɛrɛŋa a, ʋ kpi na. Bʋ̃ʋ ƴãw n'a ɩ̃ na cãà tɛr a mʋta-tuo? Ɩ̃ na tʋ̃ɔ́ na ɩ ʋ lɛb vʋʋrɛ bɩɩ? Mãa n'ʋ nãà cen tɩ páw ʋ, ʋl kʋ̃ lɛb wa a ɩ̃ zie ɩ.»

A Salomɔ̃ dɔwfʋ yele

²⁴ A Daviir tɩ mɔwl'ɩ a ʋ pɔw Bɛtɩsabe. Ʋ tɩ gã nɩ ʋ na, ʋ dɔw bidɛb, a Daviir por a yúor kɛ́ Salomɔ̃. A Sore tɩ nɔ̃w ʋ na,

²⁵ ɛ́ tõ a naaŋmɩn-ƴɛ̀r-manɛ Natan k'ʋʋ tɩ yel kʋ̀ a Daviir. Alɛ n'a so ʋ por ʋ kɛ́ Yedidɩa, a pɛr lɛ kɛ́ “Sore nɩ-nɔna.”

A Daviir zɛb'a de a Araba tẽw

²⁶ A sojarɩ nɩ-kpɛ̃ɛ Zowab tɩ zɛb'ɩ nɩ a Amɔ̃ tẽw dem tẽ-kpɛ̃ɛ Araba, zɛb de a zie ʋl a nãà na kpɩɛr a.

²⁷ Ʋ tɩ tõ n nɩbɛ kɛ́ bɛ tɩ yel a Daviir à ŋá: «Ɩ̃ zɛb'ɩ nɩ a Araba tẽw. Mɔ̃ mɩ̀, ɩ̃ zɛb'a faa a kʋ̃ɔnɩ zie.

²⁸ Ƴɛrɛŋa a, ɓã a sojarɩ na cɛ a taa, wa zɛb'ɩ a tẽ-kpɛ̃ɛ, zɛb de ʋ fʋ mɩŋa. Ɩ̃ kʋ̃ tʋ̃ɔ́ de ʋ ɛ, alɛ bɛ ɩ lɛ, mãa n'ʋ na so a yúor.»

²⁹ A Daviir tɩ ɓã n a sojarɩ na cɛ a taa wa n, wa zɛb de nɩ a Araba.

³⁰ Ʋ tɩ vɔw nɩ a nãà-kpawʋɔ na tɩ vɔblɩ a Amɔ̃ tẽw dem nãà zũú a. A nãà-kpawʋɔ tɩ ɩ n salm-zɩɛ kpawʋɔ, ɛ́ a ʋ tɩbrʋ ta kilo lɩzɛr'ɩ pie, ɛ́ kʋsɛ-bi-nyɩla kãw be a ʋ zu, bɛ ír ʋ ƴãw a Daviir nãà-kpawʋɔ zu. A bome bɛ na tɩ zɛb de a, bɛ tɩ dɩ vuo ɩ, bɛ wob cen nɩ.

³¹ A Daviir tɩ diw nɩ a tẽw nɩbɛ cen nɩ tɩ ƴãw bɛ tone tõ-kpɛn: dàar fɔwfʋ, kʋsɛbɛ pɛnʋ, tɩɩr cɛb, birkiri ŋmab. Lɛ n'a ʋ mɩ̀ tɩ ɩ a Amɔ̃ tẽw dem tẽ-bɛrɛ za. Al pùorí, a Daviir nɩ a ʋ zɛbr-nɩbɛ za tɩ lɛb'a kul a Zerizalɛm.