2 Samɩɛl 11 - A SƐB-SÕW

A Daviir nɩ a Uuri pɔw, Bɛtɩsabe, yele

¹ A yũon na tɩ lɩɛbɩ a, a lɛn daar a na-mɩnɛ na mɩ́ cen a zɛbr a, a nãà Daviir tɩ tõ n a sojarɩ nɩ-kpɛ̃ɛ, Zowab, k'ʋʋ de a Ɩsɩrayɛl zɛbr-nɩbɛ nɩ a bɛ sojarɩ-nɩ-bɛrɛ niwn, bɛ cen tɩ zɛb'ɩ a Amɔ̃ tẽw dem. Bɛ tɩ kʋ n a Amɔ̃ tẽw dem pàw a ziir za, ɛ́ cɔbrɩ kɛ́ bɛ zɛb de a Araba na ɩ a tẽ-kpɛ̃ɛ a. A Daviir ʋl tɩ be n a Zerizalɛm.

² Zaanʋɔra kãw, a Daviir tɩ ìr'ɩ a ʋ gado zu, cɔlɛ a nãà yir garʋ́. A garʋ be a, ʋ tɩ wɩɛr'a tɩ nyɛ̃ pɔw na suor kʋ̃ɔ a. A pɔw tɩ pɔ̀l'a bɛ dɩ vuo ɩ.

³ A Daviir tɩ tõ n nɩbɛ bɛ tɩ sowri bãw a pɔw ŋa. Bɛ tɩ lɛb'a wa yel ʋ à ŋá: «A Eliyam pɔwyaa Bɛtɩsabe n'ʋ, a Hititɩ dɔɔ Uuri pɔw.»

⁴ Ʋ tɩ tõ na bɛ tɩ bʋɔl'ʋ, ʋ wa a ʋ yir, ʋ wa gã nɩ ʋ, ʋʋ lɛb kul a ʋ sɩr yir. A sɩɛ ʋ na tɩ lo a dɛwr'a ʋ tɩ so bɛr baar'a lɛ.

⁵ A Bɛtɩsabe tɩ tɛr'ɩ pʋɔ. Ʋ tɩ tõ na bɛ tɩ yel a Daviir à ŋá: «Ɩ̃ tɛr'ɩ pʋɔ.»

⁶ Daadaalɛ a Daviir tɩ tõ na bɛ tɩ yel a Zowab à ŋá: «Bɛr a Hititɩ dɔɔ, Uuri, k'ʋ wa a ɩ̃ zie.» Lɛ n'a a Zowab tɩ bɛr a Hititɩ dɔɔ Uuri k'ʋ cen a Daviir zie.

⁷ A Uuri tɩ ta n a nãà Daviir zie, ʋ sowr'ʋ a Zowab, a zɛbr-nɩbɛ nɩ a zɛbr yele.

⁸ Al pùorí, a Daviir tɩ yel'ɩ a Uuri: «Kul a fʋ yir tɩ pɩ̃ɛnɩ blã.» A Uuri tɩ yi n a nãà zie, ʋʋ tɩr bʋ̃-kãw kɛ́ bɛ tɩ kʋ̀ ʋ.

⁹ Ɛcɛ a Uuri tɩ zawr'ɩ a ʋ yir kulu. Ʋ tɩ gã nɩ a nãà yir dɩ̃dɔr nʋɔr, ʋlɛ nɩ a nãà sojarɩ.

¹⁰ Bɛ tɩ wa na wa yel kʋ̀ a Daviir à ŋá: «A Uuri bɛ kul a ʋ yir ɛ.» Lɛ n'a a Daviir tɩ sowr'ʋ: «Sɔ́r bɛ n'ʋ fʋ yi wa ta ɩ? Bʋ̃ʋ n'ʋ so fʋ bɛ kul a fʋ yir?»

¹¹ A Uuri tɩ sɔw ʋ na: «A wõ-taa daga, a Ɩsɩrayɛl nɩ a Zuda zɛbr-nɩbɛ kpɩɛr'ɩ sɛwr pʋɔ. A ɩ̃ nɩ-kpɛ̃ɛ Zowab nɩ a fʋ sojarɩ nɩ-bɛrɛ ganɛ nɩ wɛrʋ pʋɔ, ɛ́ mãa na kul a ɩ̃ yir tɩ dɩ, ɛ́ nyũ, ɛ́ gã nɩ a ɩ̃ pɔw ɩ? Fʋ na vʋʋrɛ a zũú, ɩ pɔ n fʋ na, ɩ̃ bɛ be za na maalɩ a yel ŋa tɔ ɩ.»

¹² A Daviir tɩ lɛb'a yel ʋ: «Cãà be a ka a dɩ̃a, ɛ́ bio ɩ̃ na bɛr fʋ na, fʋ lɛb cen.» Lɛ n'a a Uuri tɩ be a Zerizalɛm, a ʋlɩ bibir nɩ a bio daarɩ́.

¹³ A Daviir tɩ bʋɔl'ʋ na k'ʋʋ wa bɛ lãw dɩ ɛ́ nyũ. A Daviir tɩ ƴãw na ʋ nyũ tɩ kuoli. Ɛcɛ a zaanʋɔra a, a Uuri tɩ cãà na cen tɩ páw a nãà sojarɩ bɛ gã a nãà yir dɩ̃dɔr nʋɔr, ʋ bɛ tɩ kul a ʋ yir ɛ.

¹⁴ A bio daarɩ́ biɓaara a, a Daviir tɩ sɛb'ɩ sɛb-tʋɔla kʋ̀ a Uuri, k'ʋʋ tɩ kʋ̀ a Zowab.

¹⁵ À ŋá n'a ʋ tɩ sɛb a sɛb-tʋɔla pʋɔ: «Nyɩ ƴãw a Uuri a zɛbr-nɩbɛ na pɩɛrɩ a niŋé, a be a zɛbr na tʋlɛ a, ɛ́ taw yi ɛ́ bɛr ʋ ʋ yõ, a dɔ̃ sob páw ʋ, ʋ kpi.»

A Uuri kpi na

¹⁶ A Zowab na tɩ piwre a tẽ-kpɛ̃ɛ a tɩ ƴãw nɩ a Uuri zie ʋ na bãw k'aa dɔ̃ sob soja-gãdaar be n a be a.

¹⁷ A tẽ-kpɛ̃ɛ nɩbɛ tɩ yi na zɛb'ɩ a Zowab nɩ a ʋ nɩbɛ. Bɛ tɩ kʋ n sojarɩ nɩ sojarɩ nɩ-bɛrɛ a Daviir zɛbr-nɩbɛ pʋɔ. Bɛ mɩ̀ tɩ kʋ n a Hititɩ dɔɔ Uuri.

¹⁸ Lɛ n'a a Zowab tɩ tõ bɛ tɩ manɩ a lɛ a zɛbr ŋa na tɩ ɩ a kʋ̀ a Daviir.

¹⁹ Ʋ tɩ yel'ɩ à ŋá kʋ̀ a sob nɛ ʋ na tɩ tõ a: «Fʋ̃ʋ wa tɩ manɩ a zɛbr yele za kʋ̀ a nãà baar'a,

²⁰ a nãà wa nyɛ̃ suur, ɛ́ yel à ŋá: “Bʋ̃ʋ n'ʋ so nyɩ taw pɩɛlɩ a tẽ-kpɛ̃ɛ, ɛ́ ŋmãa a zɛbr? Nyɩ bɛ bãw kɛ́ nɩbɛ mɩ́ tʋ̃ɔ́ na be a dacin zu tɛbr bɩɩ?

²¹ Ãa n'ʋ tɩ kʋ a Yerubɛsɛtɩ bidɛb, Abimelɛkɩ, a Tevɛsɩ? Pɔw n'ʋ tɩ be a dacin zu, ɛ́ bili kʋsɛ-kpɛ̃ɛ bɛr ʋ siw tɩ lo a ʋ zu ʋ kpi! Bʋ̃ʋ n'ʋ so nyɩ taw pɩɛlɩ a dacin yaga?” Fʋ na yel ʋ na: “A fʋ tõ-tõ-bie Hititɩ dɔɔ, Uuri, mɩ̀ kpi na.”»

²² A nɩr ʋl bɛ na tɩ tõ a, tɩ cen na tɩ manɩ a lɛ a Zowab na tɩ yel kʋ̀ ʋ a, kʋ̀ a Daviir.

²³ À ŋá n'a ʋ tɩ manɩ: «A nɩbɛ bɛ ŋa tɩ kpɛmɛ na zuo tɩ. Bɛ yi na ŋmãa nɩ tɩ a zɛbr a wɩ̀ɛ pʋɔ. Tɩ zɛb'ɩ bɛ na, diw bɛ tɩ ta n a tẽ-kpɛ̃ɛ dɩ̃dɔr nʋɔr.

²⁴ Ɛcɛ, a tã-tɛbrbɛ tɩ be n a dacin zu, ɛ́ tɛ tɩ. A fʋ sojarɩ nɩ-bɛrɛ bɛ mɩnɛ kpi na, a fʋ tõ-tõ-bie Uuri, a Hititɩ dɔɔ, mɩ̀ kpi.»

²⁵ A Daviir tɩ yel'ɩ a sob nɛ bɛ na tõ a: «Lɛb cen tɩ yel à ŋá kʋ̀ a Zowab: “Ta vɛ̃ a fʋ pʋɔ sãw a yel ŋa ƴãw ɛ. A zɛbr zie a, kũuni mɩ́ be n a ziir a za ayi. Lɛb bãw ƴãw fãw zɛb'ɩ a tẽ-kpɛ̃ɛ, sãw ʋ bɛr.”» Ƴɛ̀r à ŋá a Zowab zie lɛb kʋ̀ ʋ fãw.

²⁶ A Bɛtɩsabe na tɩ wõ k'aa ʋ sɩr kpi na a, ʋ ko n a ʋ kuor.

²⁷ Ɛcɛ a kuor yele na wa baar'a, a Daviir tɩ ƴãw na bɛ tɛr ʋ wa n a ʋ yir. Ʋ tɩ kul ʋ na, ʋ dɔw bidɛb kʋ̀ ʋ.