2 Samɩɛl 1 - A SƐB-SÕW

A Daviir wõ na kɛ́ a Sawul nɩ a Zonatã kpi na

¹ A Sawul tɩ kpi na baarɩ a lɛn daar a Daviir na tɩ zɛb tʋ̃ɔ́ a Amalesitɩ mɩnɛ, ɛ́ wa zɩ̃ a Sɩkɩlagɩ a. Bibie ayi n'a ʋ tɩ maalɩ a Sɩkɩlagɩ.

² A bibie ata sob a, nɩr kãw tɩ yi n a Sawul zɛbr laɩ pʋɔ wa ta. A ʋ bʋ̃-suuri tɩ cɩɛr cɩɛr'a, ɛ́ a ʋ zu ɩ tanɛ ʋ za. Ʋ na tɩ ta a Daviir zie a, ʋ tɩ lo na gbĩ dume ɛ́ gũu tɩ tɔ tẽw.

³ A Daviir tɩ sowr'ʋ na: «Nyɩnɛ n'a fʋ yi waar?» Ʋ sɔw: «A Ɩsɩrayɛl nɩbɛ laɩ pʋɔ n'a ɩ̃ yi zɔrɛ waar.»

⁴ A Daviir tɩ yel ʋ na: «Ŋmɩŋmɩn n'a a yele ɩ? Manɩ ɩ̃ nyɛ̃.» A nɩr nɛ tɩ yel'a: «A Ɩsɩrayɛl nɩbɛ lɩɛb'a zɔ a zɛbr daar. Sojarɩ yaga kpi na. A Sawul nɩ a ʋ bidɛb Zonatã za mɩ̀ kpi na.»

⁵ A Daviir tɩ lɛb'a sowr'ʋ: «Ŋmɩŋmɩn n'a fʋ ɩ bãw k'aa Sawul nɩ a ʋ bidɛb Zonatã kpi na?»

⁶ A pɔ́l tɩ sɔw na: «Ɩ̃ tɩ be n a Gilbowa tãw zu, ɛ́ bɛ bãw ŋmɩŋmɩn za n'a mɩ̀ a ɩ. Ɩ̃ tɩ nyɛ̃ nɩ a Sawul na dĩ a ʋ kafin àr'ɩ a. A dɔ̃ dem zɛbr-torkori nɩ a bɛ wi-zɔmnbɛ tɩ gbʋnɛ ʋ na.

⁷ Ʋ tɩ lɩɛb'a nyɛ̃ m, bʋɔlɩ mɛ̃, ɩ̃ sɔw: “Mãa n'ɩ ŋan!”

⁸ Ʋ sowri mɛ̃: “Ãa nɛ b?” Ɩ̃ sɔw: “Amalesitɩ nɩr nɛ m.”

⁹ Lɛ n'a ʋ yel mɛ̃: “Ɩ̃ zɛlɛ fʋ na, taw ta kʋ m, bʋ̃ʋ n'ʋ vɛ̃, ɩ̃ na saa cãà bãw yã a, a bɛ sàwr mɛ̃ ɩ.”

¹⁰ Lɛ n'a ɩ̃ tɩ taw ta kʋ ʋ, bʋ̃ʋ n'ʋ vɛ̃, ɩ̃ tɩ bãwnɩ a na ʋ na kʋ̃ cãà vʋʋrɛ bɛlɛ wa zɛb tʋ̃ɔ́ ʋ a. Al pùorí, ɩ̃ tɩ vɔw nɩ a nãà-kpawʋɔ a ʋ zũú, ɛ́ yaa a bãw a ʋ kpãkpãw ƴãw, ɛ́ tɛr a wa n a ka k'ɩ̃ɩ wa kʋ̀ b, ɩ̃ sore e.»

¹¹ A Daviir tɩ taw nɩ a ʋ bʋ̃-suuri cɩɛrɩ. A bɛlɩ dem za na tɩ be a ʋ zie a mɩ̀ ɩ a lɛ.

¹² Bɛ tɩ maal'ɩ a Sawul nɩ a ʋ bidɛb Zonatã nɩ a Sore nɩbɛ bɛl za na tɩ kpi a zɛbr zie a kuor, ɛ́ tɛr mʋta-tuo, kõ n tɩ ta n a zaanʋɔra.

¹³ Al pùorí, a Daviir tɩ sowr'ɩ a pɔ́l nɛ na tɩ wa yel a yel a: «Ãa nɛ b?» Ʋ sɔw: «Amalesitɩ nʋʋra kãw bidɛb nɛ m.»

¹⁴ A Daviir tɩ yel ʋ na: «Pʋ̀lá bɛ vʋ̃ɔ fʋ, fʋ na kʋ a Sore nɩ-kabra a ɩ?»

¹⁵ A Daviir tɩ bʋɔl'ɩ a ʋ soja pɔ́l kãw wa yel ʋ à ŋá: «Ŋmɛ ʋ kʋ.» A soja tɩ ŋmɛ n a Amalesitɩ nɩr nɛ kʋ.

¹⁶ A Daviir tɩ yel ʋ na: «Fʋ̃ʋ n'ʋ so a fʋ kũu, bʋ̃ʋ n'ʋ vɛ̃, fʋ̃ʋ n'ʋ ƴãw fʋ mɩŋa a kũu dɔwrʋ yel: “Mãa n'ʋ kʋ a Sore nɩ-kabra.”»

Lãw-mʋɔlɛ a Daviir na kõ a Sawul nɩ a Zonatã ƴãw a

¹⁷ Lɛ n'a a Daviir tɩ kõ lãw-mʋɔlɛ ŋa a Sawul nɩ a ʋ bidɛb Zonatã ƴãw.

¹⁸ Ʋ tɩ yel'a kɛ́ bɛ zanɩ nɩ a Zuda tẽw dem a lãw-mʋɔlɛ ŋa. A «Tam lãw-mʋɔlɛ» n'ʋ, ʋ sɛb'a ƴãw a Nɩ-mɩŋa sɛbɛ pʋɔ.

¹⁹ Ɩsɩrayɛl i, bʋ̃ʋ n'ʋ so a fʋ gãdaar kpi, a fʋ zɛbr nɩ-yée yée gã gã a fʋ tan zu?

²⁰ Nyɩ ta mʋɔlɩ a yel ŋa a Gatɩ tẽw pʋɔ ɩ, nyɩ ta ɩ ʋ yi a Asɩkalon tẽw sɛ́ɛ pʋɔ ɩ. A Filisɩtɛ̃ pɔwbɛ taa cɩlɛ ɩ, a yɔ-ɓile dem bɛ ŋa pɔwyaar taa cɩlɛ ƴawr'ɩ ɛ.

²¹ Gilbowa tan i! A ɓɩɛlʋ nɩ a saa, a ta lɛb lo a nyɩ zu ɛ, nɩr ta lɛb nyɛ̃ tẽsɔw na kpɛ a, a nyɩ sɩɛmɩ́ ɛ. Bʋ̃ʋ n'ʋ vɛ̃, be n'a a gãdaar zɛbr-kur-pãgalɩ nyɛ̃ vĩ, a Sawul zɛbr-kur-pãgala bɛ na kʋ̃ lɛb sɔ kãá towtow a.

²² A dɔ̃ dem kʋb ƴãw a, a dɔ̃ dem na tɛr fãw a zɛb-tʋ̃ɔ́fʋ ƴãw a, a Zonatã tam bɛ tɩ nyɩrɛ ɩ, a Sawul zɛbr-sɔ-kpɛ̃ɛ mɩ́ tɩ tõ n a ʋ tome kʋralɛ.

²³ A Sawul nɩ a Zonatã cãafʋ daar a, bɛ tɩ nɔ̃w nɩ taa yaga za, a bɛ kũu tɔr za pʋɔ a, bɛ bɛ bʋ́r taa ɩ, bɛl na tɩ páwr zuo sɩlɩ a, ɛ́ kpɛ socir zuo gben a.

²⁴ Ɩsɩrayɛl pɔwbɛ ɛ, nyɩ kone a Sawul! Ʋ mɩ́ tɩ su nyɩ nɩ kpar-vɩɛlɩ vɩɛlɩ, a daarʋ na bɛ gbʋ́r a, ʋ mɩ́ tɩ ƴãw nɩ salm-zɩɛ pɩ̃ɛmɛ a nyɩ kpar-wowr.

²⁵ Bʋ̃ʋ n'ʋ so a gãdaar kpi a zɛbr zie, bʋ̃ʋ n'ʋ so a Zonatã kpi gã a tan zu?

²⁶ Zonatã a, kpɩɛrʋ bɛ n'a tɛr mɛ̃ a fʋ ƴãw ɛ, fʋ̃ʋ ɩ̃ yɛb, ɩ̃ bá-tuo o. A fʋ báalʋ a ɩ̃ zie tɩ nʋmɛ na bɛ dɩ vuo ɩ, ʋ tɩ nʋmɛ na zuo pɔwbɛ nɔ̃wfʋ.

²⁷ Bʋ̃ʋ n'ʋ so a gãdaar kpi, bʋ̃ʋ n'ʋ so a soja-yée yée bɛ ŋa kpi?