2 Pɩɛr 3 - A SƐB-SÕW

A Sore waa yele

¹ Ɩ̃ bá mɩnɛ ɛ, gb'a ayi za n'ɩ à à ŋá ɩ̃ na sɛb a sɛbɛ kʋ̀ nyɩ a. A yele al za ɩ̃ na lɛb manɛ kʋ̀rɛ nyɩ a sɛbr á ŋá pʋɔ a, ɩ̃ bɔbr'a k'ɩ̃ɩ lɛb sɩ̃w nyɩ tɩɛrʋ, nyɩ tɛr tɩɛr-vɩɛlɩ.

² Nyɩ lɛb tɩɛrɩ a ƴɛ̀rʋ al a naaŋmɩn-ƴɛ̀r-man-son na tɩ dãw ƴɛ̀r a, nɩ a Sore nɩ a Faarɛ nɔ-ƴãwna a nyɩ nɩ-toni na lʋɔrɩ kʋ̀ nyɩ a.

³ Nyɩ páw bãwnɩ a, a bibi-pɛ-baarɩ pʋɔ a, nɩbɛ na ɩrɛ bɛ taabɛ laar a na yi na, vʋʋrɛ mɛ̃ a lɛ bɛl mɩŋa na bɔbr a,

⁴ ɛ́ yere: «Ʋ bɛ yel k'ʋʋ na wa na ɩ? Ʋ wa? A tɩ sãà mɩnɛ na kpi wa tɔ dɩ̃a a, bom za cãà na ŋmɛ̃ a lɛ ʋ na tɩ ŋmɛ̃ a tẽw íru tib daar a.»

⁵ Bɛ bãw na kɛ́ yiiri kɛ́ a koro za a, Naaŋmɩn ƴɛ̀rʋ tɩ ɩ na salom nɩ tẽw yi kʋ̃ɔmɩ́ be, ɛ́ kʋ̃ɔ ɩ a nyɔw taa.

⁶ A kʋ̃ɔ-paalʋ kpɛ̃ɛ daar, kʋ̃ɔ n'a mɩ̀ sãw a dãwdãw tẽ-daa.

⁷ Ɛ́ a dɩ̃a tẽw nɩ a dɩ̃a salom á ŋá a, a Naaŋmɩn ƴɛ̀r-been ŋa cãà na tɛr a cɛlɛ nɩ a vũu a na na dɩ a, ʋ tɛr a na gùre nɩ a ƴɛ̀rʋ-maalʋ bibir nɩ a yel-bier-maalbɛ loba bibir.

⁸ Ɩ̃ bá mɩnɛ ɛ, bʋ̃-been ŋa n'ʋ a fɛr kɛ́ nyɩ taa yiire ɩ: a Sore zie a, bibi-been yõ mɩ́ ɩ na mɛ̃ yome túr (1 000) a, ɛ́ yome túr (1 000) ɩ mɛ̃ bibi-been a.

⁹ A Sore bɛ cɛlɛ a ʋ nʋɔr ʋ na ƴãw a tub ɛ, mɛ̃ bɛ mɩnɛ kãw na yel k'ʋʋ cɛlɛ na a ɩ. Ɛcɛ, a nyɩɩm ƴãw n'a ʋ nyɔw ʋ tʋɔra bɛ páwr ɛ, ɛ́ bɔbr kɛ́ nɩr kãw za taa wa bɔrɛ ɩ, ɛ́ a nɩbɛ za lɩɛbɩ a bɛ ɩb.

¹⁰ A Sore waa bibir na vɩɛ na mɛ̃ nyãnyuge a. A ʋlɩ bibir nɛ a, a salom na dam'a ɩ gɔmɛ tɛwr ɛ́ bɔr. A salom zu bʋ̃-íri na nyɔw nɩ vũu dɩ nyɩl, a tẽw nɩ a bome al za na be a ʋ zu a kʋ̃ cãà ɩ.

¹¹ A bome á ŋá na na sãw à ŋá a, nyɩ bãw lɛ a na fɛr kɛ́ nyɩ ɩrɛ a. A fɛr'a kɛ́ a nyɩ cenu vɩɛl, ɛ́ nyɩ tu a Naaŋmɩn pùor,

¹² nyɩɩm na gùre ɛ́ ƴãw fãw ɩrɛ kɛ́ a Naaŋmɩn bibir ta fɔ̃w a. A bibir ʋl a salom na na dɩ wɛ, ɛ́ a salom zu bʋ̃-íri nyɔw vũu dɩ nyɩl a.

¹³ Mɛ̃ a lɛ a Naaŋmɩn na ƴãw a nʋɔr a, salom-paala nɩ tẽsɔw-paala pʋɔ mɩnʋ na be a, alɛ n'a tɩ gùre.

¹⁴ Alɛ so, ɩ̃ bá mɩnɛ ɛ, nyɩ ƴãw fãw vɩɛl ɛ́ ta tɛr dɛwr a Naaŋmɩn zie ɩ, gùre nɩ a bibir ŋa, ɛ́ ƴã-ɓaarʋ be nyɩɩm nɩ a Naaŋmɩn cara pʋɔ.

¹⁵ Nyɩ bãwnɩ a, a Sore wa nyɔw ʋ tʋɔra kɔwrɩ a, a nyɩ faafʋ n'a, mɛ̃ a lɛ a tɩ yɛb nɩ a tɩ bá Pol na sɛb kʋ̀ nyɩ nɩ a yã-bãwfʋ a Naaŋmɩn na kʋ̀ ʋ a.

¹⁶ Lɛ n'a ʋ mɩ̀ cãà lɛb yere a sɛbr al za pʋɔ ʋ na ƴɛ̀r a yel ŋa ƴɛ̀rʋ a. Ƴɛ̀r-bie be n a sɛbr á ŋá pʋɔ a pɛr bãwfʋ kpɛmɛ. Nɩbɛ na bɛ bãw bom za ɛ́ a tɩɛrʋ bɛ mɩ́ yaa kɛ́ lɩɛbɩ a mɩ́ nyɔw nɩ a ƴɛ̀r-bie á ŋá pɛ́ɛ lɩɛbɩ, ɛ́ lɛ n'a bɛ mɩ̀ ɩrɛ a Sɛb-sõw sɛbr ŋmãa al na cɛ a ƴãw. Bɛl mɩŋa loba ƴãw n'a bɛ mɩ́ ɩrɛ a lɛ.

¹⁷ Nyɩɩm ɩ̃ bá mɩnɛ ɛ, nyɩ bãwnɩ a na baarɩ: nyɩ gù nyɩ tʋɔra ɛ́ ta sàw a nɩ-faar bɛ ŋa tulu wa bɔr'ɩ nyɩ ɛ. Nyɩ na dãw kpɛmɛ àr a, nyɩ ta sàw bɛ dam nyɩ ɛ.

¹⁸ Ɛcɛ nyɩ kɛrɛ a tɩ Sore nɩ a tɩ Faarɛ Yeezu Kɩrɩta maalʋ nɩ a ʋ bãwfʋ pʋɔ. Ʋlɛ so yúor-vɩɛlʋ-danʋ ƴɛrɛŋa nɩ kʋralɛ. Amɛn.