2 Na-mɩnɛ 7 - A SƐB-SÕW

¹ A Elize tɩ sɔw na: «Nyɩ za, nyɩ wone a lɛ a Sore na yere a: “Bio, a tɛm ŋa pʋɔ, bɛ na mɩ́ dà n kilo pie nɩ ayi zɔ̃, bɩɩ ɔɔzʋ kilo lɩzɛr'ɩ anaar nɩ salm-pla libi-been yõ, a Samaari dàa pʋɔ.”»

² A Ɩsɩrayɛl tẽw nãà sojarɩ nɩ-kpɛ̃ɛ kãw na mɩ́ bɩɛlɛ ʋ kʋralɛ a, tɩ sowr'ɩ a Elize: «A Sore mɩ̀ saa tɩ ɩ mɛ̃ ʋ puo nɩ vɛɛ a salom zu, bɛr bʋ̃-bie a siw a, a fʋ ƴɛ̀rʋ ŋa na tʋ̃ɔ́ na tu u?» A Elize sɔw: «Fʋ na nyɛ̃ a na nɩ mimir, ɛ́ kʋ̃ dɩ a ɩ.»

A Siiri tẽw sojarɩ zɔ na kɛ̀ bɛr a bɛ laɩ

³ Kɔn anaar kãw tɩ be n a yẽw, pɩɛlɩ a tẽw dɩ̃dɔ-kpɛ̃ɛ. Bɛ tɩ yel'ɩ à ŋá kʋ̀ taa: «Bʋnʋ ƴãw n'a tɩ na zɩ̃ a ka gùre a kũu?

⁴ Tɩmɛ yel kɛ́ tɩ kpɛ a tẽw pʋɔ a, tɩ na kpi n a be, bʋ̃-dɩra za na bɛ ka be a ƴãw. Tɩmɛ zɩ̃ a ka a, tɩ na cãà na kpi. Tɩ nɩ̃ɛ cen a Siiri tẽw dem laɩ pʋɔ, tɩ de tɩ tʋɔra kʋ̀ bɛ. Bɛlɛ wa bɛr tɩ a, a vɩɛl'a, tɩ na vʋʋrɛ na, bɛlɛ wa kʋ tɩ a, a bɛ ɩ yel ɛ, tɩ na kpi na!»

⁵ A na wa man a zaanʋɔra a, bɛ ìr'a kɛ́ bɛ cen a Siiri tẽw sojarɩ laɩ pʋɔ. Bɛ tɩ ta n a laɩ nʋɔr, ɛ́ bɛ nyɛ̃ nɩr za ɩ.

⁶ Bʋ̃ʋ n'ʋ vɛ̃, a Siiri tẽw dem laɩ pʋɔ a, a Sore tɩ ɩ na bɛ wõ zɛbr-nɩbɛ yaga yaga na tɛr wie nɩ zɛbr-torkori a, damnʋ. A Siiri tẽw sojarɩ tɩ yel'a kʋ̀ taa: «A Ɩsɩrayɛl tẽw nãà ya n a Hititɩ mɩnɛ nɩ a Eziptɩ tẽw na-mɩnɛ, kɛ́ bɛ wa zɛb'ɩ tɩ!»

⁷ Lɛ n'a a zie na wa sɔbr a, bɛ zɔ kɛ́ bɛ faa a bɛ nyɔ-vʋʋrʋ. Bɛ tɩ zɔ na kɛ́ bɛr a pɛnɛ-sɛwr, a wie nɩ a bòn, ɛ́ bɛr a laɩ a lɛ.

⁸ A kɔn tɩ cɔlɩ nɩ a laɩ za, tɩ kpɛ pɛn-sɛw kãw pʋɔ. Bɛ tɩ dɩ na kɛ́ nyũ a be. Al pùorí, bɛ wob salm-pla, salm-zɩɛ libie nɩ bʋ̃-suuri cen nɩ tɩ sɔwlɩ, ɛ́ lɛb wa kpɛ pɛn-sɛw ƴen sob pʋɔ, wob a bome na be be a, lɛb cen nɩ tɩ sɔwlɩ.

A kɔ̃ baar'a ɛ́ a Siiri tẽw sojarɩ zɔ

⁹ A kɔn tɩ yel'a kʋ̀ taa: «À à ŋá tɩ na ɩrɛ a, a bɛ vɩɛl ɛ! Yel-vla tɩ na bãw a bibir'ɩ a dɩ̃a. Tɩmɛ bɛ wa yel yel, ɛ́ gù a zie tɩ vɩɛ a, tɩ na nyɛ̃ nɩ dɔwrʋ. Nyɩ ɩ tɩ kpɛ a tẽw pʋɔ tɩ yel a yel a nãà yir.»

¹⁰ Bɛ tɩ lɛb'a cen a tẽw pʋɔ tɩ bʋɔlɩ a dɩ̃dɔ-gùrbɛ yel bɛ à ŋá: «Tɩ cen nɩ a Siiri tẽw sojarɩ laɩ pʋɔ, nɩr za bɛ cãà be ɩ, tɩ bɛ wõ nɩsaal kɔkɔr kãw za ɩ. Wie nɩ bòn na 'lẽ a tɛwr'a cɛ, nɩ a pɛnɛ-sɛwr bɛ na zɔ kɛ́ bɛr a.»

¹¹ A dɩ̃dɔ-gùrbɛ tɩ bʋɔl'ɩ nɩr, k'ʋʋ cen tɩ yel a yel a nãà yir.

¹² A nãà tɩ ìr'ɩ tɩ̃ɩsɔw-bɩ̃ɩn, ɛ́ yel a nɩbɛ na be a ʋ zie a: «Ɩ̃ na manɩ nɩ a ʋlɩ bom nɛ, a Siiri tẽw dem na cɔbrɛ a tɩ ƴãw a, kʋ̀ nyɩ. Bɛ bãwnɩ a na kɔ̃ na kʋrɛ tɩ a, alɛ so bɛ yi a bɛ laɩ pʋɔ tɩ sɔwlɩ a mʋ̃ɔ pʋɔ. Bɛ tɩɛr'ɩ bɛ pʋɔ: “A Ɩsɩrayɛl nɩbɛ na yi n a tẽw pʋɔ, tɩ nyɔw bɛ mimie, ɛ́ kpɛ a tẽw pʋɔ.”»

¹³ A sojarɩ nɩ-kpɛ̃ɛ kãw tɩ yel'ɩ a nãà: «Tɩ ír wie anũu, a wie na cãà vʋʋrɛ a pʋɔ — alɛ saa ŋmɛ̃ ŋmɩŋmɩn a, a na kpi na mɛ̃ a tẽw dem za a — tɩ ír a tõ n nɩbɛ bɛ mɩnɛ, ɛ́ tɩ na bãw na.»

¹⁴ A nãà tɩ ƴãw na bɛ cɔbrɩ zɛbr-torkori ayi nɩ a wie, ʋʋ tõ sojarɩ kɛ́ bɛ cen tɩ bɔ a Siiri tẽw sojarɩ, ɛ́ bãw ʋlɩ bom nɛ na n'ʋ ɩrɛ a.

¹⁵ A sojarɩ tɩ bɩɛr'ɩ a Siiri tẽw sojarɩ gbɛ́ɛ, tɩ sãá a Zurdɛ̃ manɩ́, ɛ́ nyɛ̃ a sɔ́r za ʋ pàw bʋ̃-suuri nɩ bome, a Siiri tẽw sojarɩ na tɩ lɔb lɔb bɛr, kɛ́ bɛ tʋ̃ɔ́ zɔ fɔ̃w a. A nɩbɛ bɛ na tõ a tɩ lɛb'a wa manɩ kʋ̀ a nãà.

¹⁶ A Samaari tẽw dem tɩ yi n daadaalɛ cen tɩ za a Siiri tẽw dem laɩ: kɛ̀ kilo pie nɩ ayi zɔ̃, bɩɩ kilo lɩzɛr'ɩ anaar ɔɔzʋ mɩ́ dà salm-pla libi-been, mɛ̃ a lɛ a Sore na tɩ yel a.

¹⁷ A nãà tɩ yel'ɩ a sojarɩ nɩ-kpɛ̃ɛ na mɩ́ bɩɛlɛ ʋ kʋralɛ a, k'ʋʋ cen tɩ piwre a yele na ɩrɛ a tẽw dɩ̃dɔr nʋɔr a. Ɛcɛ a zu-sɛbla tɩ nɛb ʋ na gbem'ɩ a dɩ̃dɔr ʋ kpi, mɛ̃ a lɛ a Naaŋmɩn nɩr Elize na tɩ yel, a lɛn daar a nãà na tɩ wa páw ʋ a.

¹⁸ Bʋ̃ʋ n'ʋ vɛ̃, a Elize tɩ yel'ɩ a nãà: «Bio, a tɛm ŋa pʋɔ, kilo pie nɩ ayi zɔ̃, bɩɩ kilo lɩzɛr'ɩ anaar ɔɔzʋ na mɩ́ dà n salm-pla libi-been, a Samaari dàa pʋɔ.»

¹⁹ A nãà sojarɩ nɩ-kpɛ̃ɛ tɩ sowr'ɩ a lɛn daar: «A Sore mɩ̀ saa tɩ ɩ mɛ̃ ʋ puo nɩ vɛɛ a salom zu, bɛr bʋ̃-bie a siw a, a fʋ ƴɛ̀rʋ ŋa na tʋ̃ɔ́ na tu u?» A Elize tɩ sɔw na: «Fʋ na nyɛ̃ a na nɩ mimir, ɛ́ kʋ̃ dɩ a ɩ.»

²⁰ Alɛ n'ɩ à à ŋá na tɩ ɩ a: a zu-sɛbla tɩ nɛb'ɩ a sojarɩ nɩ-kpɛ̃ɛ gbem'ɩ a dɩ̃dɔr ʋ kpi.