2 Na-mɩnɛ 6 - A SƐB-SÕW

A lɛr-bir na duwre a kʋ̃ɔ zu a

¹ Bibir kãw, a naaŋmɩn-ƴɛ̀r-manbɛ lãw nɩbɛ tɩ yel'ɩ a Elize: «Nyɛ̃, a zie ʋl tɩ na mɩ́ ɓã taa a fʋ zie a, ʋ ɩ n pʋrɩ zuo a tɩ ƴãw.

² Sàw tɩ siw a Zurdɛ̃ nʋɔr, ŋa za mɩ́ tɩ cɛ̀ wɛw, tɩ wa cɔbrɩ nɩ zie mɩ́ ɓã taa.» A Elize yel: «Nyɩ cen.»

³ Ɛcɛ a bɛ kãw tɩ lɛb'a yel: «Sàw páw tɩ cen.» A Elize sɔw: «Ʋ̃ʋ, ɩ̃ waar'a.»

⁴ Lɛ n'a ʋ tɩ páw bɛ siw a Zurdɛ̃ nʋɔr, bɛ tɩ cɩɛr a tɩɩr.

⁵ A bɛ kãw na tɩ cɩɛr a ʋ tɩɛ a, a ʋ lɛr-bir wa kpãa na yi lo a kʋ̃ɔmɩ́, ʋ ŋmɛ cɛl: «'Woi, nɩ-kpɛ̃ɛ ɛ! Lɛr-pɛ̃wna n'ʋ ɩ̃ tɩ pɛ̃w!»

⁶ A Elize tɩ sowr'ʋ na: «Nyɩnɛ n'a a lɛr-bir lo?» A sob wul ʋ a zie. Lɛ n'a a Elize tɩ ka dale lɔb ƴãw a be, a kure ìr duwre a kʋ̃ɔ zu.

⁷ A Elize yel ʋ: «Nyɔw ír.» A sob dɔl a nũu ír'ɩ.

A Elize na nyɔw Siiri tẽw sojarɩ bɛ mɩnɛ a

⁸ A lɛn daar a Siiri tẽw nãà nɩ a Ɩsɩrayɛl nɩbɛ na tɩ tɛr a zɛbr a, ʋ tɩ lãw na ƴɛ̀r'ɩ a ʋ sojarɩ nɩ-bɛrɛ, al pùorí ʋ yel kʋ̀ bɛ a be ʋ na na maalɩ a ʋ laɩ a.

⁹ Ɛcɛ a Elize tɩ tõ na bɛ tɩ yel a Ɩsɩrayɛl tẽw nãà: «Maal ɩrɛ, taa tuur tɔlɛ zie ŋa ɩ. Bʋ̃ʋ n'ʋ vɛ̃, be n'a a Siiri tẽw dem maalɩ a bɛ laɩ.»

¹⁰ Lɛ n'a a Ɩsɩrayɛl tẽw nãà tɩ ƴãw sojarɩ bɛ cen tɩ piwre a zie a Naaŋmɩn nɩr na wul a. A tɩ ɩ n à à ŋá gb'aa yaga: a Elize mɩ́ tɩ ɩ na a Ɩsɩrayɛl nãà bãwnɩ a, gù ʋ tʋɔra.

¹¹ A yel ŋa tɩ dam'ɩ a Siiri tẽw nãà. Ʋ tɩ bʋɔl'ɩ a ʋ sojarɩ nɩ-bɛrɛ ɓã taa, ɛ́ yel bɛ: «Nyɩ kʋ̃ tʋ̃ɔ́ ɩ ɩ̃ bãw a sob nɛ na n'ʋ ɩ a Ɩsɩrayɛl tẽw nãà nɩr a tɩ pʋɔ a ɩ?»

¹² A sojarɩ nɩ-bɛrɛ ƴen sob tɩ sɔw ʋ na: «Nãà a, nɩr za bɛ ka be ɩ! Ɛcɛ a naaŋmɩn-ƴɛ̀r-manɛ Elize, na be a Ɩsɩrayɛl tẽw a, na tʋ̃ɔ́ na yel a ƴɛ̀rʋ fʋ na ƴɛ̀rɛ a fʋ di-gana pʋɔ a, kʋ̀ a ʋ nãà.»

¹³ Lɛ n'a a Siiri tẽw nãà tɩ yel: «Nyɩ cen tɩ nyɛ̃ a be ʋ na be a, ɩ̃ ƴãw bɛ cen tɩ nyɔw ʋ.» A Siiri tẽw nãà na tɩ wõ k'aa Elize be n Dotan a,

¹⁴ ʋ tõ n sojarɩ yaga a be, nɩ zɛbr-torkori nɩ wie, bɛ tɩ ta tɩ̃ɩsɔw, ŋmãa jil a tẽw.

¹⁵ A Elize tõ-tõ-bie tɩ ìr'ɩ biɓaar-pip yi, nyɛ̃ a sojarɩ bɛ ŋmãa jil a tẽw, nɩ wie, nɩ zɛbr-torkori. Ʋ tɩ ŋmɛ n cɛl, yel: «'Woi, nɩ-kpɛ̃ɛ ɛ! Ŋmɩŋmɩn n'a tɩ na ɩ?»

¹⁶ A Elize sɔw: «Ta zɔrɛ dɛ̃bɩ̃ɛ ɩ! A nɩbɛ na be a tɩ zie a, bɛ yãwmɛ na zuo a bɛl na be a bɛ zie a.»

¹⁷ Al pùorí, a Elize tɩ puor'ɩ à ŋá: «Sore e, yuo ʋ a mimie, ʋ nyɛrɛ.» A Sore tɩ yuo nɩ a Elize tõ-tõ-bie mimie, ʋ nyɛ̃ kɛ́ wie nɩ zɛbr-torkori na nyɩwrɛ a, tɩ paal'ɩ a tãw, jil koli a Elize.

¹⁸ A Siiri tẽw dem sojarɩ tɩ siwr'ɩ a Elize zie, ʋ lɛb puori a Sore à ŋá: «Sore e, pàw a sojarɩ bɛ ŋa za mimie.» A Sore tɩ pàw nɩ a bɛ mimie, mɛ̃ a lɛ a Elize na tɩ zɛlɩ a.

¹⁹ A lɛ n'a a Elize tɩ yel a sojarɩ: «A sɔ́r bɛ n'ɩ à ŋá ɩ, a tẽ-kpɛ̃ɛ bɛ na wul nyɩ a bɛ n'ʋ ɛ. Nyɩ tuur mɛ̃, ɩ̃ na tɛr nyɩ na cen nɩ a nɩr nɛ nyɩ na bɔbr a zie.» Ɛcɛ a Elize tɩ tɛr bɛ na cen nɩ a Samaari.

²⁰ Bɛ na tɩ kpɛ a tẽw pʋɔ baar'a, a Elize tɩ lɛb'a puori: «Sore e, yuo a nɩbɛ bɛ ŋa mimie bɛ nyɛrɛ.» A Sore tɩ yuo bɛ nɩ a mimie, bɛ nyɛ̃ k'aa Samaari tẽw sɔgɔ n'a bɛ be.

²¹ A Ɩsɩrayɛl tẽw nãà na tɩ nyɛ̃ a sojarɩ bɛ ŋa za a, ʋ sowr'ɩ a Elize: «Ɩ̃ sãà a, ɩ̃ kʋ bɛ bɩɩ?»

²² A Elize sɔw: «Ta kʋ bɛ ɩ! Fʋ nɔ̃w mɩ́ kʋ n a nɩbɛ fʋ na mɩ́ nyɔw a zɛbr zie a bɩɩ? Ɩ k'a nɩbɛ bɛ ŋa dɩ kɛ́ nyũ, ɛ́ fʋ bɛr bɛ, bɛ lɛb kul a bɛ nãà zie.»

²³ A Ɩsɩrayɛl tẽw nãà tɩ cɔbr'ɩ dɩb na ta dɩb a kʋ̀ bɛ. Bɛ na tɩ dɩ kɛ́ nyũ baar'a, ʋ bɛr bɛ na bɛ lɛb kul a bɛ nãà zie. A lɛ n'a a Siiri tẽw dem, na mɩ́ fárɛ a nɩbɛ a, bɛ tɩ cãà waar a Ɩsɩrayɛl tẽw pʋɔ ɩ.

A kɔ̃ na lo a Samaari tẽw a

²⁴ Vuo kãw pʋɔ, a Siiri tẽw nãà, Bɛn-Hadadɩ, tɩ ɓã n a ʋ zɛbr-nɩbɛ za taa, cen tɩ piw nɩ a Samaari tẽw.

²⁵ Kɔ̃-kpɛ̃ɛ tɩ lo n a tẽw: bɛ tɩ piw nɩ a tẽw, kɛ̀ bõw zu tɛwr mɩ́ tɩ dà salm-pla libie lɩz'a anaar, ɛ́ bɛ̃w-bʋʋrɛ kãw bɛ na bʋɔlɛ pʋa-sɩsɩ a, a kilo ŋmãa dàarʋ ɩ salm-pla libie anũu.

²⁶ Bibir kãw a Ɩsɩrayɛl tẽw nãà na tɩ lʋɔrɛ a tẽ-kpɛ̃ɛ dacin a, pɔw kãw tɩ cɩɩr'a yel ʋ: «Nãà a, faa mɛ̃ wɛ!»

²⁷ Ɛcɛ a nãà tɩ sɔw ʋ na: «A Sore bɛ wa faarɛ fʋ a, bʋ̃ʋ n'ʋ mãa na tʋ̃ɔ́ faa nɩ fʋ? Ble nɩ divɛ̃ bɛ cãà be ɩ.»

²⁸ A nãà tɩ cãà na lɛb yel ʋ: «Bʋ̃ʋ n'ʋ fʋ bɔbr?» Ʋ sɔw: «Fʋ nyɛ̃ nɩ a pɔw ŋa a, ʋ daar kãw yel mɛ̃ na: “Tɩr a fʋ bidɛb tɩ 'wɔb a dɩ̃a, ɛ́ bio tɩ 'wɔb a ɩ̃ dem.”

²⁹ Lɛ n'a tɩ daar dʋw a ɩ̃ bidɛb 'wɔb. Ɩ̃ tɩ yel ʋ nɩ a bio daarɩ́: “Tɩr a fʋ bidɛb tɩ 'wɔb.” Ɛcɛ ʋ tɩ sɔwl'ʋ na.»

³⁰ A nãà na tɩ wõ a pɔw ŋa ƴɛ̀rʋ a, ʋ taw nɩ a ʋ kparɩ cɩɛrɩ. Ʋʋ na tɩ lʋɔrɛ a dacin a, a nɩbɛ tɩ nyɛ̃ na ʋ na su vʋɔra kparʋ, ɛ́ su a ʋ kparɩ pàw a.

³¹ Lɛ n'a a nãà tɩ yel: «A Naaŋmɩn, ʋ́ dɔwrɩ mɛ̃ ɛ́ lɛb maal dɔwrɩ, mãa bɛ wa ŋmãa a Safatɩ bidɛb, Elize, zu a zaanʋɔra ŋa a.»

A Elize yel'ɩ a kɔ̃ na na baar'a

³² A Elize nɩ a tẽw nɩ-kore tɩ ɓã n taa a ʋ yir. A nãà tɩ tõ n nɩr a ʋ zie. Ɛcɛ a nɩr ŋa, bɛ na tõ a bɛ tɩ ta sɛr ɛ, ɛ́ a Elize yel a nɩ-kore: «Nyɩ nyɛ̃ a na a, a nɩ-kʋrɛ ŋa tõ n nɩr k'ʋʋ wa ŋmãa mɛ̃ a zu. Nyɩ cɛlɛ be: a nɩr ŋa wa ta a, nyɩɩm pàw a pan, ɛ́ ta sàw ʋ kpɛ ɩ. Ɛcɛ mɔ̃ mɩ̀, a ʋ nɩ-kpɛ̃ɛ bɛ n'ʋ cere tuur ʋ tɩ wone ɩ?»

³³ A Elize tɩ cãà na ƴɛ̀rɛ, ɛ́ a nãà wa ta yel: «A Sore zie n'a a tɩ kpɩɛrʋ á ŋá za yi! Bʋ̃ʋ n'ʋ ɩ̃ na tʋ̃ɔ́ lɛb cãà gùre a ʋ zie?»