2 Na-mɩnɛ 4 - A SƐB-SÕW

A Elize na sõw pɔw-kʋɔr kãw a

¹ Pɔw kãw, a sɩr na tɩ ɩ naaŋmɩn-ƴɛ̀r-manbɛ lãw nɩr a, tɩ wa n bibir kãw wa zɛlɛ a Elize yãayãa, yere nɩ: «A ɩ̃ sɩr kpi na, ɛ́ fʋ bãwnɩ a na ʋ na tɩ zɔrɛ a Sore a. Ƴɛrɛŋa a, a sob nɛ san tɩ na tɛr a, ʋ wa na k'ʋʋ wa de a ɩ̃ bidɛbr ayi, tɩ ƴãw bɛ ɩ a ʋ gbãgbaar.»

² A Elize tɩ yel ʋ na: «Bʋ̃ʋ n'ʋ ɩ̃ na tʋ̃ɔ́ ɩ a fʋ ƴãw? Yel ɩ̃ nyɛ̃, bʋ̃ʋ n'ʋ fʋ tɛr a yir?» Ʋ sɔw: «Ɩ̃ bɛ tɛr bom za ɩ, kãá-nyũu blã n'a cɛ m a zɛb ƴãw.»

³ A Elize yel ʋ: «Cen a fʋ taabɛ zie tɩ pɛ̃w bʋ̃-zawlɛ, ɛ́ ta pɛ̃w dɩ̃ɛn nɩ ɛ.

⁴ Al pùorí, kpɛ a fʋ yir, fʋ̃ʋ nɩ a fʋ bibiir, ɛ́ pàw a pan, ɛ́ cire a kãá ƴãwn a bome pʋɔ, bom ŋa mɩ́ wa paalɩ a, fʋ̃ʋ taw ʋ bin kõkowrí.»

⁵ A pɔw tɩ bɛr'ɩ a Elize ɛ́ cen. Ʋ na tɩ be a ʋ yir ʋlɛ nɩ a ʋ bibiir a, ʋ pàw nɩ a pan. A bibiir tɩ dier'ɩ a bome kʋ̀rɛ ʋ, ʋ cire a kãá paalɛ.

⁶ A bome na wa paalɩ a, ʋ yel'ɩ a ʋ bie kãw: «Lɛb kʋ̀ m bʋ̃-kãw.» Ɛcɛ a bie tɩ sɔw na: «A bɛ cãà be ɩ.» Lɛ n'a a kãá bɛ tɩ cãà cire ɩ.

⁷ A pɔw tɩ cen na tɩ manɩ a lɛ ʋ na ɩ a kʋ̀ a Elize, ʋ yel ʋ: «Cen tɩ kʋ̀ɔrɩ a kãá á ŋá, ya a san. Fʋ̃ʋ nɩ a fʋ bibiir na baa na dɩrɛ a libi-ŋmãa.»

A Elize nɩ a Sunɛm tẽw pɔw

⁸ Bibir kãw, a Elize tɩ tu na yi Sunɛm tẽw. Pɔw kãw, na tɛr a a, tɩ be n be, bʋɔl'ʋ lãwnɩ fɛrʋ, k'ʋʋ wa a ʋ yir wa dɩ. Lɛ n'a a Elize mɩ́ tɩ cen a ʋ zie kʋralɛ tɩ dɩ, ʋlɛ wa tu yi a be a.

⁹ A pɔw ŋa tɩ yel'ɩ a ʋ sɩr: «Ɩ̃ bãw na k'aa nɩr ŋa, na mɩ́ wa a tɩ zie a kʋralɛ a, sɩrɩ na ɩ Naaŋmɩn nɩr.

¹⁰ Ɩ tɩ ƴãw bɔwpɩle kʋ̀ ʋ a gàrʋ́, ƴãw gado, tabal, bʋ̃-zɩna nɩ fɩ̃tɩlɛ a ʋ ƴãw. Ʋlɛ mɩ́ wa wa a tɩ zie a, ʋ na mɩ́ be n a be.»

¹¹ Bibir kãw, a Elize tɩ wa n a bɛ zie, wa do a bɔwpɩɛ pʋɔ tɩ gã ìr.

¹² Al pùorí ʋ yel a ʋ tõ-tõ-bie Gehazi: «Bʋɔlɩ a pɔw ŋa na mɩ́ de tɩ a sãanʋ a.» A Gehazi tɩ cen na tɩ bʋɔl'ʋ, ʋ wa àr a dɩ̃dɔr nʋɔr.

¹³ A Elize tɩ ƴãw na a Gehazi yel ʋ: «Fʋ bàl'ɩ fʋ tʋɔra yaga a tɩ ƴãw. Bʋ̃ʋ n'ʋ tɩ na tʋ̃ɔ́ ɩ a fʋ ƴãw? Tɩ́ ƴɛ̀r a fʋ ƴɛ̀rʋ a nãà zie bɩɩ a sojarɩ nɩ-kpɛ̃ɛ zie?» A pɔw sɔw: «Nyɩ ta dɩ tuo ɩ. Ɩ̃ kpɩɛr'ɩ a ɩ̃ nɩbɛ sɔgɔ, ɛ́ bɛ mɩ́ bɔ bom gù ɛ.»

¹⁴ Lɛ n'a a Elize tɩ yel a Gehazi: «Bʋ̃ʋ n'ʋ tɩ pãa na ɩ kʋ̀ ʋ a?» A Gehazi sɔw: «Ʋ bɛ tɛr bidɛb ɛ, ɛ́ a ʋ sɩr kor!»

¹⁵ A Elize yel: «Fʋ̃ʋ bʋɔl'ʋ!» A Gehazi tɩ bʋɔl'ʋ na, ʋ wa ta àr a dɩ̃dɔr nʋɔr.

¹⁶ A Elize tɩ yel ʋ na: «Vɩɛr, à à ŋá tɔ-won, fʋ na ƴãw nɩ dɛble nũú.» Ɛcɛ a pɔw tɩ yel'a: «A kʋ̃ tʋ̃ɔ́ ɩ! Ta bɛlɛ mɛ̃ ɩ, Naaŋmɩn nɩr i.»

¹⁷ Ɛcɛ a vɩɛr daarɩ́ a, a pɔw tɩ tɛr'ɩ pʋɔ dɔw dɛble, a ʋlɩ vuo nɛ pʋɔ, mɛ̃ a lɛ a Elize na tɩ yel kʋ̀ ʋ a.

A Elize ɩ na a Sunɛm tẽw pɔw bidɛb ʋ lɛb vʋʋrɛ

¹⁸ A bie tɩ baa na. Bibir kãw, ʋ tɩ cen na tɩ páw a sãà, a nɩbɛ na dier a bome a zie.

¹⁹ Wa bere, ʋ kone: «Ɩ̃ zu wɛ! Ɩ̃ zu!» A sãà tɩ yel'ɩ a tõ-tõ-bie kãw: «De ʋ fɔ̃w cen nɩ tɩ kʋ̀ a mã!»

²⁰ A tõ-tõ-bie tɩ de nɩ a bie cen nɩ tɩ kʋ̀ a mã. A bie tɩ be n a mã gbɛ́ɛ zu tɩ ta a mʋ̃tɔ̃-tuo, ɛ́ kpi.

²¹ A mã tɩ do n nɩ a bie a Elize bɔwpɩɛ pʋɔ, tɩ gaalɩ ʋ a ʋ gado zu, ɛ́ pàw a pan. Al pùorí, ʋ cen a pu-pʋɔ

²² tɩ bʋɔlɩ a ʋ sɩr yel ʋ: «Tɩr a tõ-tõ-bie kãw nɩ bõw-nyãw kʋ̀ m, ɩ̃ zɔ cen fɔ̃w a Naaŋmɩn nɩr zie ɛ́ lɛb wa.»

²³ A sɩr tɩ sowr'ʋ na: «Bʋnʋ ƴãw n'a fʋ cere a ʋ zie a dɩ̃a? Cuw-paala cuw bibir bɛ n'ʋ ɛ, mɩ̀ bɛ lɛb ɩ pɩ̃ɛnʋ-bibir ɛ.» A pɔw sɔw: «Ta zɔrɛ dɛ̃bɩ̃ɛ ɩ!»

²⁴ Ʋ tɩ ƴãw nɩ a bõw-nyãw a kɔw, ɛ́ yel a tõ-tõ-bie: «Cen tɩ cen! Tawr a bõw-nyãw. Taa tɛwr àrɛ zie, mãa bɛ wa yel kɛ́ fʋ tɛw àr a ɩ.»

²⁵ Lɛ n'a ʋ tɩ cen a Elize zie, a Karmɛl tãw zu. Ʋ tɩ cãà na zãá, ɛ́ a Elize nyɛ̃ ʋ, yel a ʋ tõ-tõ-bie Gehazi: «Nyɛ̃, a Sunɛm tẽw pɔw n'ʋ!

²⁶ Zɔ tuori ʋ, tɩ sowr'ʋ: “Fʋ kpɛmɛ na a! A fʋ sɩr kpɛmɛ na a? A fʋ bie kpɛmɛ na a?”» A pɔw tɩ sɔw na: «Bom bɛ ka be ɩ.»

²⁷ Ɛcɛ, ʋ na wa ta a Elize zie, a tãw zu a, ʋ lo na nyɔw a ʋ gbɛ́ɛ. A Gehazi tɩ taw na ta, k'ʋʋ nyɔw ʋ bɛr, ɛcɛ a Elize tɩ yel ʋ na: «Bɛr ʋ, ʋ tɛr'ɩ pʋ-sãwna ɩ̃ na bɛ bãw a pɛr a, bʋ̃ʋ n'ʋ vɛ̃, a Sore bɛ ɩ ɩ̃ bãw ɛ.»

²⁸ Lɛ n'a a pɔw tɩ yel: «Mãa n'ʋ tɩ zɛlɩ bidɛb a fʋ zie e? Aɩ! Ɩ̃ mɔ̃ mɩ̀ tɩ yel fʋ na: “Ta bɛlɩ mɛ̃ ɩ.”»

²⁹ A Elize tɩ yel'ɩ a Gehazi: «Cɔbrɩ fʋ tʋɔra a sɔ́r loba ƴãw. De a ɩ̃ naaŋmɩn-ƴɛ̀r-manɛ dabɔl cen nɩ a Sunɛm. Fʋ̃ʋ wa tuori nɩr a, fʋ̃ʋ ta tɛw àr puor'ʋ ɛ, nɩr mɩ̀ wa puore fʋ a, fʋ̃ʋ ta sɔw ɛ. Fʋ na tɩ dɔwl'ɩ a ɩ̃ dabɔl a dɛble niwn zu.»

³⁰ Ɛcɛ a bie mã tɩ yel'ɩ a Elize: «A Sore na vʋʋrɛ a zũú, nɩ fʋ mɩ̀ na vʋʋrɛ a zũú, ɩ̃ bɛ bɛrɛ fʋ kɛ́ cere ɩ!» Lɛ n'a a Elize tɩ ìr tu ʋ.

³¹ A Gehazi tɩ de nɩ niwn ta a bɛ ƴãw. Ʋ tɩ dɔwl'ɩ a Elize dabɔl a bie niwn zu, ɛcɛ bom za bɛ tɩ ɩ ɛ: bɛ bɛ tɩ wõ kɔkɔr ɛ, damnʋ bɛ tɩ dam ɛ. Lɛ n'a a Gehazi tɩ lɛb tuori a Elize wa, wa yel: «A bie bɛ ìr ɛ.»

³² A Elize na tɩ ta a yir a, ʋ nyɛ̃ nɩ a bi-kũu ʋ gã a ʋ gado zu.

³³ A Elize tɩ kpɛ na, nyɔw a pan pàw, ɛ́ puore a Sore.

³⁴ Al pùorí, ʋ gùri pàw a bie, a ʋ nʋɔr tuwli a bie nʋɔr ƴãw, a ʋ mimie tɔ a bie mimie, a ʋ nuru dɔwlɩ a bie nuru zu. Ʋ na tɩ gbĩ gùri pàw ʋ à à ŋá a, a bie ƴã-gan tɩ lɛb'a tʋl.

³⁵ A Elize tɩ ìr'a, mɩ́ cen a dĩo lõbowr ŋa tɩ tɔ, ɛ́ lɛb cen lõbowr ŋa. Al pùorí ʋ lɛb wa gùri pàw a bie. Bɛ wa bere na a bie cɩ̀r gb'a ayopõi, ɛ́ yuo a mimie.

³⁶ A Elize tɩ bʋɔl'ɩ a Gehazi daadaalɛ, wa yel ʋ: «Cen tɩ bʋɔlɩ a bie mã.» A Gehazi tɩ siw na tɩ bʋɔl'ʋ. Ʋ na wa ta a, a Elize yel ʋ na: «De a fʋ bie.»

³⁷ A pɔw tɩ taw na ta, lo gbĩ dume a Elize pile, gũu tɩ tɔ tẽw, al pùorí ʋ ɓáw a ʋ bie yi n.

A zɛ-kʋ̃ɔ na bɛ tɛr dɩb a

³⁸ A Elize tɩ lɛb'a wa a Gilgal. Kɔ̃ tɩ lo n a tẽw pʋɔ a lɛn daar. A naaŋmɩn-ƴɛ̀r-manbɛ lãw nɩbɛ na tɩ ɓã taa a ʋ zie a, ʋ yel'ɩ a ʋ tõ-tõ-bie: «Dʋwlɩ a ziduwli-kpɛ̃ɛ maal'ɩ zɛ-kʋ̃ɔ kʋ̀ tɩ.»

³⁹ Lɛ n'a a bɛ kãw tɩ yi a wɩ̀ɛ pʋɔ k'ʋʋ tɩ bɔ a zɛ-vaar. Ʋ tɩ nyɛ̃ nɩ bom na ɩ mɛ̃ mʋ̃ɔ pʋɔ divɛ̃ tɩɛ a, ʋ pɔr a wɔmɛ na ɩ mɛ̃ yɔwli a, paalɩ a ʋ kparʋ zʋbr. Ʋ na wa ta a yir a, ʋ ŋma a na ƴãw a ziduwle pʋɔ. Nɩr za bɛ tɩ bãw bʋ̃ʋ n'a ɩ.

⁴⁰ Bɛ na wa ɩ a zɛ-kʋ̃ɔ kʋ̀ a nɩbɛ a, bɛ lɛm'a kaa, ɛ́ ŋmɩɛr cɛlsɩ yere nɩ: «Naaŋmɩn nɩr i, bɛ ƴãw nɩ tɩ̃ɩ a zɛ-kʋ̃ɔ pʋɔ!» Bɛ bɛ tɩ tʋ̃ɔ́ a dɩ ɛ.

⁴¹ A Elize tɩ yel'a: «Nyɩ wa n zɔ̃.» Ʋ tɩ ɩ n a zɔ̃ ƴãw a ziduwle pʋɔ, ɛ́ yel a ʋ tõ-tõ-bie: «Pãa ɩ a zɛ-kʋ̃ɔ kʋ̀ a nɩbɛ bɛ dɩ!» Zɩ̃ k'aa zɛ-kʋ̃ɔ tɩ lɛb'a tɛr dɩb.

A Elize guoli nɩ nɩbɛ kʋba

⁴² Bibir kãw, nɩr kãw tɩ yi n Baal-Salisa wa. Ʋ tɩ wa n nɩ bʋ̃-dan dipɛ̃ k'ʋʋ wa kʋ̀ a Naaŋmɩn nɩr, ɔɔzʋ dipɛ̃ lɩzɛr nɩ ble paala bie nɩ vʋɔra. A Elize tɩ yel'ɩ a ʋ tõ-tõ-bie: «De a kʋ̀ a nɩbɛ bɛ ŋa za bɛ 'wɔb.»

⁴³ Ɛcɛ a tõ-tõ-bie tɩ sɔw na: «Ŋmɩŋmɩn n'a ɩ̃ na tʋ̃ɔ́ kʋ̀ à à ŋá nɩbɛ kʋba (100) za?» A Elize tɩ sɔw na: «Põ a kʋ̀ bɛ za. Bʋ̃ʋ n'ʋ vɛ̃, à ŋá n'a a Sore yere: “Ŋa za na mɩ́ dɩ na tɩw, ɛ́ a cãà guu.”»

⁴⁴ A tõ-tõ-bie tɩ põ a nɩ a nɩbɛ bɛ dɩ, ɛ́ a cãà guu, mɛ̃ a lɛ a Sore na tɩ yel a.