2 Na-mɩnɛ 3 - A SƐB-SÕW

A Ɩsɩrayɛl tẽw nãà Yoram

¹ A Zuda tẽw nãà, Zozafatɩ, naalʋ-dɩb yome pie nɩ ani sob a, a Akab bidɛb, Yoram, tɩ lɩɛb'ɩ a Ɩsɩrayɛl tẽw nãà, dɩ a naalʋ a Samaari tẽw yome pie nɩ ayi.

^2-3 Ʋ tɩ ɩ n a lɛ na bɛ vɩɛl a, a Sore zie. Ʋ tɩ cɔwr'ɩ a Nevatɩ bidɛb, Zerobowam, na tɩ ƴãw a Ɩsɩrayɛl nɩbɛ maalɩ a yel-bier a. A Yoram tɩ cãà na maalɛ a alɩ yel-bebe nɛ a Zerobowam na tɩ maalɩ a. Ɛcɛ ʋ bɛ tɩ ɩ a ɩ-faar man a ʋ sãà nɩ a ʋ mã ɩ. Bʋ̃ʋ n'ʋ vɛ̃, ʋ tɩ ír'ɩ a kʋsɛ-tela a ʋ sãà na tɩ bin a ŋmɩn Báàl ƴãwfʋ ƴãw a bɛr.

A Yoram ìr'ɩ nɩ a Mowab tẽw zɛbr

⁴ A Mowab tẽw nãà, Mesa, tɩ tɛr'ɩ píir. Yũon za a, a mɩ́ tɩ fɛr'a ʋ ya a san a Ɩsɩrayɛl tẽw nãà na ŋmãa kʋ̀ ʋ a: péli tùr-kʋba (100 000) nɩ píir tùr-kʋba (100 000) lãwnɩ a kɔblʋ.

⁵ Ɛcɛ a nãà Akab na wa kpi a, a Mesa bɛ sàw a ʋ lɩɛrɛ Yoram nɩ-kpɛ̃ɛnʋ a ʋ zu ɛ.

⁶ A Yoram tɩ yi n a Samaari daadaalɛ, k'ʋʋ cen tɩ bɛl a Ɩsɩrayɛl zɛbr-nɩbɛ za kaa.

⁷ Al pùorí ʋ tõ nɩbɛ bɛ tɩ yel a Zuda tẽw nãà Zozafatɩ: «A Mowab tẽw nãà bɛ cãà sàwr a ɩ̃ nɩ-kpɛ̃ɛnʋ a ʋ zu ɛ. Fʋ kʋ̃ wa tɩ cen tɩ zɛb'ɩ a ʋ tẽw ɛ?» A Zuda tẽw nãà tɩ sɔw ʋ na: «Ɩ̃ na wa na, tɩ ɩ n been, mãa nɩ a fʋ̃ʋ. A ɩ̃ nɩbɛ ɩ n a fʋ nɩbɛ, a ɩ̃ wie ɩ a fʋ wie.

⁸ Ɛcɛ nyɩnɛ n'a tɩ na tu?» A Yoram sɔw: «Edɔm tẽw wɛja-kpalɛ sɔr'ʋ tɩ na tu.»

⁹ A Ɩsɩrayɛl tẽw nãà, a Zuda tẽw nãà nɩ a Edɔm tẽw nãà tɩ yi na lo a sɔ́r. Bɛ tɩ cen nɩ bibie ayopõi. Al pùorí a kʋ̃ɔ bɛ tɩ cãà be a sojarɩ ƴãw, nɩ a dʋn na tuo a bome tuur'ɩ a ƴãw ɛ.

¹⁰ Lɛ n'a a Ɩsɩrayɛl tẽw nãà tɩ yel: «'Woi! A na saa zɩ̃ a, a Sore taw tɩ na wa n a ka, a tɩ na-mɩnɛ ata, k'ʋʋ wa de tɩ ƴãw a Mowab tẽw dem nuru pʋɔ!»

¹¹ Ɛcɛ a Zozafatɩ tɩ sowr'a: «naaŋmɩn-ƴɛ̀r-manɛ bɛ be a ka tɩ na tʋ̃ɔ́ páw ʋ sowri a Sore kaa ɩ?» A Ɩsɩrayɛl tẽw nãà sojarɩ-nɩ-kpɛ̃ɛ kãw tɩ sɔw na: «Safatɩ bidɛb, Elize, be n a ka. A Eli po-tuure kãw, ʋlɛ nɩ a Eli na bɛ tɩ yire taar a n'ʋ.»

¹² A Zozafatɩ tɩ yel'a: «A ʋlɩ bom nɛ a Sore na bɔbr k'ʋʋ yel kʋ̀ tɩ a, a nɩr ŋa na tʋ̃ɔ́ na yel ʋ kʋ̀ tɩ.» Lɛ n'a a Ɩsɩrayɛl tẽw nãà, a Zuda tẽw nɩ a Edɔm tẽw na-mɩnɛ tɩ cen tɩ páw a Elize.

¹³ A Elize tɩ yel'ɩ a Ɩsɩrayɛl tẽw nãà: «Mãa nɩ fʋ̃ʋ mɩ̀ bʋnʋ? Cen tɩ páw a fʋ sãà naaŋmɩn-ƴɛ̀r-manbɛ, bɩɩ a fʋ mã naaŋmɩn-ƴɛ̀r-manbɛ!» A Ɩsɩrayɛl nãà tɩ sɔw na: «A na ɩ n zawlalɛ! Bʋ̃ʋ n'ʋ vɛ̃, a Sore n'ʋ taw tɩ wa n a ka, k'ʋʋ wa ƴãw a tɩ na-mɩnɛ tɩ za ata, a Mowab tẽw dem nuru pʋɔ.»

¹⁴ A Elize tɩ cãà na yel à ŋá: «A Sore na vʋʋrɛ a zũú, a Kpɛnʋ-za-sob ɩ̃ na tone a zũú, alɛ bɛ tɩ ɩ a Zuda tẽw nãà, Zozafatɩ, ɩ̃ na ƴãwnɛ a ƴãw a, ɩ̃ kʋ̃ʋ ŋmɛlɩ kaa fʋ ɛ, ɩ̃ kʋ̃ʋ jɩ́r fʋ kaa mɩ̀ ɛ!

¹⁵ Ƴɛrɛŋa a, nyɩ tɛr bʋ̃-ŋmɩɛrɛ wa kʋ̀ m.» A bʋ̃-ŋmɩɛrɛ na tɩ ŋmɩɛr a, a Sore fãw tɩ wa n a Elize zie,

¹⁶ ʋ yere: «À ŋá n'a a Sore yere: “Nyɩ tuw bɔw-bɛrɛ yaga a fʋɔl-kõw ŋa pʋɔ.

¹⁷ Bʋ̃ʋ n'ʋ vɛ̃, a mãa, a Sore, ɩ̃ yere na k'aa fʋɔla ŋa na paal'ɩ kʋ̃ɔ. Nyɩ kʋ̃ wõ sɛsɛb ʋ fu ɛ, nyɩ kʋ̃ nyɛ̃ saa ɩ, ɛcɛ nyɩ na páw nɩ kʋ̃ɔ nyũ, a nyɩɩm, a nyɩ dʋn nɩ a nyɩ dʋn al na tuo a tuor a.”»

¹⁸ A Elize tɩ cãà na lɛb yel: «Ɛcɛ, a cãà na ɩ pʋrɩ a Sore zie, ʋ na ƴãw nɩ a Mowab tẽw a nyɩ nuru pʋɔ.

¹⁹ Nyɩ na ŋmɛr'ɩ a tẽ-bɛrɛ bɛ na ŋmãa dacine viiri koli a, nɩ a ten al na ɩ tẽ-bɛrɛ a, nyɩ na cɛ̀ n a tɩ-wɔnɩ za bɛr, nyɩ na ƴɛ̀r'ɩ a bul-nɛ́ɛ za pàw, nyɩ na lɔb'ɩ kʋsɛbɛ pàw a póru bɛ na kɔ a, sãw a bɛr.»

²⁰ A bio daarɩ́, a tɛm ʋl bɛ na mɩ́ maalɩ a biɓaara bàwr a, kʋ̃ɔ tɩ yi n a Edɔm tẽw siwr, ɛ́ paalɩ pàw a tẽsɔw.

²¹ A Mowab tẽw dem za tɩ wõ na k'aa na-mɩnɛ ata bɛ ŋa wa na kɛ́ bɛ wa zɛb'ɩ a tẽw. Bɛ tɩ bʋɔl'ɩ a bɛlɩ dem za na ta a zɛbr cenu a, tɩ ƴãw bɛ a tẽw tʋr-bɔw ƴãw.

²² A Mowab tẽw dem sojarɩ na tɩ ìr a biɓaara a, a mʋ̃tɔ̃w tɩ nyɩwrɛ nɩ a kʋ̃ɔ zu. Bɛ tɩ nyɛ̃ nɩ a kʋ̃ɔ, a wɩɛr tɩ sãá, mʋ̃ɔ̀ mɛ̃ zɩ̃ɩ a.

²³ Bɛ tɩ yere na: «Zɩ̃ɩ n'a! A bɛ tɛr à ŋá ɩ, a na-mɩnɛ nɩ a bɛ zɛbr-nɩbɛ zɛb'ɩ taa, kʋ taa. Mowab tẽw dem i, nyɩ ìr, tɩ cen tɩ za a bɛ bome!»

²⁴ Ɛcɛ bɛ na tɩ ta pɩɛlɩ a Ɩsɩrayɛl nɩbɛ laɩ a, a Ɩsɩrayɛl sojarɩ tɩ yi na zɛb tʋ̃ɔ́ bɛ. Lɛ n'a a Mowab tẽw dem tɩ lɩɛbɩ zɔ. A Ɩsɩrayɛl nɩbɛ tɩ diw bɛ na tɩ kpɛ n a bɛ tẽw pʋɔ, zɛb tʋ̃ɔ́ bɛ pẽlẽpẽlẽ.

²⁵ Bɛ tɩ ŋmɛr'ɩ a tẽ-bɛrɛ bɛr, ŋa za tɩ lɔb'ɩ kʋsɩɛr ƴãw a póru bɛ na kɔ a pʋɔ, a tɩ ɩ kʋsɛbɛ tɛwr, bɛ tɩ ƴɛ̀r'ɩ a bul-nɛ́ɛ za pàw, ɛ́ cɛ̀ a tɩ-wɔnɩ za bɛr. Kɩɩr-Hɛrɛsɩ tẽw yõ n'ʋ wa tɩ baa cɛ, cãà àr. Ɛcɛ a sojarɩ bɛl na tɛr a kpalɩ a tɩ wa na mɩ̀ wa ŋmãa jil ʋ, zɛbr'ɩ ʋ.

²⁶ A Mowab tẽw nãà na tɩ nyɛ̃ a zɛbr a gãw a ʋ fãw a, ʋ de nɩ sojarɩ kɔbr ayopõi (700), na tɛr zɛbr-sɔ-bɛrɛ a, k'ʋʋ puo nɩ pɔ̀l yi a Siiri tẽw nãà lowr. Ɛcɛ a bɛ tɩ tʋ̃ɔ́ ɩ.

²⁷ Lɛ n'a ʋ tɩ ƴãw a ʋ bidɛb-kpɛ̃ɛ na na lɩɛr'ʋ ɩ a nãà a, ʋ wa, ʋ wa maal'ɩ ʋ nyɩw-a-za-bàwr a tẽw dacĩ-kpɛ̃ɛ zu. Dɛ̃bɩ̃ɛ tɩ kpɛ n a Ɩsɩrayɛl nɩbɛ yaga tɩ zuo, bɛ ìr kɛ́ bɛr bɛ, ɛ́ lɛb kul a bɛ tẽw.