2 Na-mɩnɛ 25 - A SƐB-SÕW

¹ Lɛ n'a a Babɩlɔn tẽw nãà, Nabikodonozɔɔr, tɩ wa a Zerizalɛm nɩ a ʋ zɛbr-nɩbɛ za, wa maalɩ a ʋ laɩ a tẽw niŋé. A Babɩlɔn tẽw dem tɩ wɛr'ɩ bɔwrɩ viiri koli a tẽw. A Sedesɩasɩ naalʋ-dɩb yome piwaɩ sob tɩ n'a, a cuwr pie sob bibie pie sob daar.

² Bɛ tɩ piw nɩ a tẽw tɩ ta a ʋ naalʋ-dɩb yome pie nɩ been sob daar.

³ A kɔ̃ tɩ kpɛ n faa a tẽw pʋɔ. A nɩbɛ bɛ tɩ cãà tɛr bʋ̃-dɩrɩ ɛ. A cuwr anaar sob, a bibie piwaɩ sob,

⁴ a Babɩlɔn tẽw dem tɩ ŋmɛ n a tẽw dacĩ-kpɛ̃ɛ puo. A Zuda tẽw sojarɩ tɩ yi n a tɩ̃ɩsɔw zɔ. A Babɩlɔn tẽw dem na saa tɩ jil a Zerizalɛm a, bɛ tɩ tu n a dɩ̃dɔr na be a dacĩ-bɛrɛ ayi na pɩɛlɩ a nãà zaadɛ̃ a cará yi. A Sedesɩasɩ tɩ de nɩ a sɔ́r na cere a Zurdɛ̃ fʋɔlá a.

⁵ Ɛcɛ a Babɩlɔn tẽw dem sojarɩ tɩ ta na tu ʋ, tɩ páw ʋ Zeriko tɩ̃talɩ́. A ʋ zɛbr-nɩbɛ za tɩ zɔ na yaarɩ kɛ́ bɛr ʋ.

⁶ A Babɩlɔn tẽw dem tɩ nyɔw ʋ na, tɛr ʋ cen nɩ a Babɩlɔn tẽw nãà na tɩ be Irivɩla a zie. Be n'a a Babɩlɔn tẽw dem tɩ dɩ n a Sedesɩasɩ a ƴɛ̀rʋ.

⁷ Bɛ tɩ kʋ n a Sedesɩasɩ bidɛbr a ʋ mimirí. Al pùorí a Nabikodonozɔɔr ƴãw bɛ cɔ̀r a Sedesɩasɩ mimie kpol, ɛ́ 'lẽ ʋ nɩ kur-zɩɛ bãzɔlɛ ayi na ɓɛrɩ taa a, cen nɩ a Babɩlɔn.

A Babɩlɔn tẽw dem de nɩ a Zerizalɛm tẽw. A diw-cenu ayi sob

⁸ A Babɩlɔn tẽw nãà, Nabikodonozɔɔr, naalʋ-dɩb yome lɩzɛwaɩ sob, a cuwr anũu sob bibie ayopõi sob, Nebuzaradan tɩ kpɛ n a Zerizalɛm tẽw pʋɔ. A Babɩlɔn tẽw nãà gùrbɛ, nɩ a ʋ sojarɩ nɩ-kpɛ̃ɛ kãw tɩ n'ʋ.

⁹ Ʋ tɩ nyɩw nɩ a Ŋmɩn-yir-kpɛ̃ɛ, a nãà yir nɩ a tẽw yie za bɛr. Ʋ tɩ nyɩw nɩ a nɩ-tɩbrɛ za yie bɛr.

¹⁰ A Babɩlɔn tẽw dem sojarɩ na tɩ bɩɛlɛ a nãà gùrbɛ nɩ-kpɛ̃ɛ a, tɩ da n a dacĩ-bɛrɛ na viiri koli a Zerizalɛm a lɔb.

¹¹ Al pùorí, a Nebuzaradan tɩ diw nɩ a nɩbɛ na tɩ cãà be a tẽw pʋɔ a, cen nɩ a Babɩlɔn: a bɛl na de bɛ tʋɔra kʋ̀ a Babɩlɔn tẽw nãà a, nɩ a nɩbɛ na cɛ a.

¹² Ɛcɛ ʋ tɩ bɛr'ɩ a tẽw pʋɔ nan dem bɛ mɩnɛ, kɛ́ bɛ kʋɔr a divɛ̃ tɩɩr póru nɩ a póru.

¹³ A Babɩlɔn tẽw dem tɩ ŋmɛr'ɩ a kur-zɩɛ kpule na be a Ŋmɩn-yir-kpɛ̃ɛ dɩ̃dɔr nʋɔr a bɛr, de nɩ a kur-zɩɛ torkori nɩ a kur-zɩɛ sɩ̃w-kpɛ̃ɛ-vilovilo na be a davʋra pʋɔ a. Bɛ tɩ tuo nɩ a kur-zɩɛ á ŋá za cen nɩ a Babɩlɔn.

¹⁴ Bɛ mɩ̀ tɩ de nɩ a kur-zɩɛ bome za bɛ na tɩ maalɩ a Ŋmɩn-yir-kpɛ̃ɛ tome tob ƴãw a: a tãpɛlʋ laar, a pɛ́lɛ̀, a fɩ̃tɩlɩ-bʋ̃-kpiiri nɩ a lali.

¹⁵ A nãà gùrbɛ nɩ-kpɛ̃ɛ mɩ̀ tɩ cãà na de a salm-zɩɛ nɩ a salm-pla bʋ̃-maalɩ, mɛ̃ a sɩlbarɩ nɩ a zɩ̃ɩ lali a.

¹⁶ A kur-zɩɛ bome a nãà Salomɔ̃ na tɩ ƴãw bɛ maalɩ a Sore Ŋmɩn-yir-kpɛ̃ɛ ƴãw a: a kpule ayi, a sɩ̃w-kpɛ̃ɛ-vilovilo nɩ a torkori, a bɛ tɩ tɛr bɛ na manɩ a kur-zɩɛ tɩbrʋ ɛ.

¹⁷ Mɛ̃ à ŋá a, a kpule kɛrʋ tɩ ɩ n mɛtɩr piwaɩ. Kpul za mɩ́ tɩ tɛr'ɩ zu, a kɛrʋ na ɩ mɛtɩr been nɩ ŋmãa a, ɛ́ kur-zɩɛ bom na ɩ mɛ̃ mɩ̃ɛ a, nɩ girenadɩ tɩɛ wɔmɛ viiri koli ʋ. A kpule a za ayi nɩ a pɩ̃ɛmɛ tɩ ŋmɛ̃ n taa.

¹⁸ A nãà gùrbɛ nɩ-kpɛ̃ɛ tɩ ƴãw na bɛ nyɔw a bàwr-maal-kara Seraya, a ʋ tuure Sefanɩahu nɩ a bàwr-maalbɛ ata na gùre a Ŋmɩn-yir-kpɛ̃ɛ dɩ̃dɔr a.

¹⁹ Ʋ mɩ̀ tɩ ƴãw na bɛ nyɔw a tõ-tõ-bi-kpɛ̃ɛ kãw na so a sojarɩ kaafʋ a, a nãà yir tõ-tõ-biir anũu, a sɛ-sɛbrɛ na so a sojarɩ íru a —a zɛbr-nɩbɛ nɩ-kpɛ̃ɛ kãw tɩ n'ʋ — nɩ a Zuda tẽw tẽ-biir lɩz'a ata. A nɩbɛ bɛ ŋa za tɩ be n a Zerizalɛm a lɛn daar.

²⁰ A Nebuzaradan tɩ tɛr bɛ na cen nɩ a Babɩlɔn tẽw nãà zie, a Irivɩla.

²¹ A Babɩlɔn tẽw nãà tɩ ƴãw na bɛ kʋ bɛ a be, a Hamatɩ tẽw. À à ŋá n'a bɛ tɩ diw a Zuda tẽw nɩbɛ cen nɩ, zãá nɩ a bɛ tẽw.

A Zuda tẽw na-kpɛ̃ɛ-lɩɛrɛ Gedalɩasɩ

²² A Babɩlɔn tẽw nãà, Nabikodonozɔɔr, tɩ bɛr'ɩ a nɩbɛ ŋmãa a Zuda tẽw pʋɔ, ɛ́ kaa ír Ahikam bidɛb Gedalɩasɩ, mɩ̀ na ɩ Safan yãw a, ƴãw k'ʋʋ kaarɛ a bɛ zie.

²³ A Zuda tẽw sojarɩ nɩ-bɛrɛ nɩ a sojarɩ bɛl, na bɛ tɩ de bɛ tʋɔra kʋ̀ a Babɩlɔn tẽw dem a, na tɩ wõ a yel ŋa a, bɛ cen nɩ a Misɩpa tɩ páw a Gedalɩasɩ. A sojarɩ nɩ-bɛrɛ tɩ n'ɩ Netanɩa bidɛb, Yisɩmayɛl, Karea bidɛb, Yohanan, Tanhumɛtɩ na yi Netofa a bidɛb, Seraya, nɩ Maaka bidɛb, Yaazaniyahu.

²⁴ A Gedalɩasɩ tɩ pɔ n a sojarɩ nɩ-bɛrɛ nɩ a bɛ nɩbɛ zie yel bɛ à ŋá: «Nyɩ ta zɔrɛ a Babɩlɔn tẽw dem ɛ. Nyɩ zɩ̃ a tẽw pʋɔ, ɛ́ sàw a Babɩlɔn tẽw nãà nɩ-kpɛ̃ɛnʋ, ɛ́ a na vɩɛl'ɩ a nyɩ zie.»

²⁵ Ɛcɛ a ʋlɩ yũon nɛ, a cuwr ayopõi sob a, Netanɩa bidɛb, Yisɩmayɛl, na ɩ Elisama yãw, ɛ́ yi a Zuda tẽw nãà yir a, tɩ tɛr'ɩ nɩbɛ pie wa n a Misɩpa wa kʋ n a Gedalɩasɩ nɩ a Zuda tẽw dem nɩ a Babɩlɔn tẽw dem na tɩ be a ʋ zie a Misɩpa a.

²⁶ Lɛ n'a a nɩbɛ za, a pʋrmɛ tɩ lãwnɩ a bɛrɛ, nɩ a sojarɩ nɩ-bɛrɛ tɩ ír zɔ cen Eziptɩ, bɛ na tɩ zɔrɛ a Babɩlɔn tẽw dem dɛ̃bɩ̃ɛ a ƴãw.

A Babɩlɔn tẽw nãà ír'ɩ a Yoyakin bɛr a gaso pʋɔ

²⁷ A Zuda tẽw nãà, Yoyakin, bɛ na tɩ ír cen nɩ a maalɩ yome lɩzɛr'ɩ pie nɩ ayopõi a n'a, a Ewil-Merodakɩ tɩ lɩɛbɩ a Babɩlɔn tẽw nãà. A ʋlɩ yũon nɛ cuwr pie nɩ ayi sob, bibie lɩzɛr'ɩ ayopõi sob'a ʋ tɩ ɩ pʋ-pɩɛlʋ ɩb a Yoyakin zie, ɩ k'ʋ yi a gaso pʋɔ.

²⁸ Ʋ tɩ ƴɛ̀r'ɩ a ʋ zie nɩ nɔ̃wfʋ, ɛ́ ɩ ʋ ɩ kpɛ̃ɛ gãw a na-mɩnɛ bɛl na tɩ lãwnɩ a Yoyakin be a Babɩlɔn a.

²⁹ A Yoyakin tɩ tɛr'ɩ sɔ́r yaa a ʋ gaso bʋ̃-suuri bɛr, ɛ́ ʋlɛ nɩ a Babɩlɔn tẽw nãà lãw dɩrɛ bibie za.

³⁰ À à ŋá n'a a Babɩlɔn tẽw nãà tɩ kaarɛ a Yoyakin zie bibi-vɩɛrɩ za, tɩ ta a ʋ kũu daar.