2 Na-mɩnɛ 16 - A SƐB-SÕW

A Zuda tẽw nãà Akaazɩ

¹ A Eremalyahu bidɛb, Peka, naalʋ-dɩb yome pie nɩ ayopõi sob'a a Yotam bidɛb, Akaazɩ, tɩ lɩɛbɩ a Zuda tẽw nãà.

² Ʋ tɩ tɛr'ɩ yome lɩzɛr a lɛn daar, ɛ́ dɩ a naalʋ yome pie nɩ ayʋɔb a Zerizalɛm. Ʋ bɛ tɩ ɩ a lɛ na vɩɛl a Sore, ʋ Naaŋmɩn zie, mɛ̃ a ʋ sãàkʋm-kʋra Daviir a ɩ.

³ Ʋ nɩ̃ɛ na tɩ cɔwrɩ a Ɩsɩrayɛl tẽw na-mɩnɛ ɩb, tɛr tɩ nyɩw a ʋ bidɛb maal'ɩ bàwr. A yel ŋa pʋɔ a, ʋ tɩ cɔwr'ɩ a nɩ-bʋʋr-yoru ɩ-faar na bɛ maal'ɩ wob a, a nɩ-bʋʋrɛ bɛl a Sore na tɩ diw a tẽw pʋɔ, ɛ́ ƴãw a Ɩsɩrayɛl nɩbɛ zɩ̃ a.

⁴ Ʋ tɩ maal'ɩ bagɛ, ɛ́ nyɩw tɩ-suur-zɔ̃-na-nyùur-vla-vla-a, a maalʋ-ziir, a tãli zu nɩ tɩ-zimpiri za pile.

⁵ A Siiri tẽw nãà, Eresin, nɩ a Ɩsɩrayɛl tẽw nãà, Eremalyahu bidɛb, Peka, tɩ wa na wa wa ŋmãa nɩ a Akaazɩ zɛbr, piw ʋ a Zerizalɛm, ɛcɛ bɛ bɛ tɩ tʋ̃ɔ́ zɛb tʋ̃ɔ́ ʋ ɛ.

⁶ A lɛn daar, a Siiri tẽw nãà, Eresin, tɩ ɩ na a Siiri tẽw dem lɛb so a Eilatɩ, ʋʋ diw a Zuda tẽw dem a be. A Edɔm tẽw nɩbɛ tɩ lɛb'a wa wa kpɩɛr a be, bɛ cãà nɩ be nɩ dɩ̃a.

⁷ A Akaazɩ tɩ tõ na bɛ tɩ yel a Asiiri tẽw nãà, Tɩgɩlatɩ-Pilesɛɛr, à ŋá: «Ɩ̃ ɩ n a fʋ tõ-tõ-bie nɩ a fʋ bie. Wa faa mɛ̃ a Siiri tẽw nãà nɩ a Ɩsɩrayɛl tẽw nãà, na ìr a ɩ̃ ƴãw a, nuru pʋɔ.»

⁸ Al pùorí, ʋ de a salm-zɩɛ nɩ a salm-pla na tɩ be a Ŋmɩn-yir-kpɛ̃ɛ pʋɔ a, nɩ a nãà yir na-bome dĩó a, tɩr bɛ tɩ kʋ̀ a Asiiri tẽw nãà.

⁹ A Asiiri tẽw nãà tɩ ɩ n a lɛ a Akaazɩ na zɛlɩ ʋ a. Ʋ tɩ cen na tɩ zɛb'ɩ a Damasɩ tẽw, zɛb de ʋ, ír a ʋ nɩbɛ cen nɩ Kɩ́ɩ̀r, ɛ́ ƴãw bɛ kʋ a Eresin.

¹⁰ A nãà Akaazɩ tɩ cen nɩ a Damasɩ k'ʋʋ tɩ tuori a Asiiri tẽw nãà, Tɩgɩlatɩ-Pilesɛɛr. Ʋ na tɩ nyɛ̃ a Damasɩ bàwr-maal-kuur a, ʋ maal'ɩ a lɛ ʋ na ŋmɛ̃ a, nɩ a ʋ ziir na ɩ lɛ a, tɩr bɛ tɩ kʋ̀ a bàwr-maalɛ Uriya.

¹¹ A Uriya tɩ mɛ n bàwr-maal-kuur-paala, tu n a lɛ tɔr za a Akaazɩ na tɩ manɩ wul tɩr a. Ʋ tɩ mɛ ʋ na baarɩ, ɛ́ a Akaazɩ bɛ yi a Damasɩ wa sɛr ɛ.

¹² A nãà na tɩ yi a Damasɩ wa ta a, ʋ nyɛ̃ nɩ a bàwr-maal-kuur, taw ta ʋ,

¹³ ɛ́ maalɩ nyɩw-a-za-bàwr a be ʋl mɩŋa, lãwnɩ zɔ̃ nɩ divɛ̃ de-kʋ̀b. Ʋ mɩ̀ tɩ cir'ɩ a ƴã-ɓaarʋ bagɛ zɩ̃ɩ ƴãw a bàwr-maal-kuur zu.

¹⁴ Al pùorí, ʋ tɩ ƴãw na bɛ ɓáw a kur-zɩɛ bàwr-maal-kuur na be a Sore niŋé a, bin zi-yoru. A bàwr-maal-kuur ŋa tɩ pɩɛl'ɩ a Ŋmɩn-yir-kpɛ̃ɛ dɩ̃dɔr, ɛ́ be a bàwr-maal-kuur-paala nɩ a Ŋmɩn-yir-kpɛ̃ɛ cara pʋɔ. Ʋ tɩ ƴãw na bɛ bin ʋ a bàwr-maal-kuur-paala pùorí, a saa-pɛrɩ́-gʋba-lowr.

¹⁵ Al pùorí, a nãà Akaazɩ tɩ yel'ɩ a bàwr-maalɛ Uriya à ŋá: «Dɩ̃a na ta a, a bàwr-maal-kuur-kpɛ̃ɛ zu n'a fʋ na mɩ́ nyɩw a biɓaara nyɩw-a-za-bàwr bome, a zaanʋɔra zɔ̃ de-kʋ̀b, a nãà nyɩw-a-za-bagɛ bome, lãwnɩ a zɔ̃ de-kʋ̀b, a nɩbɛ nyɩw-a-za-bagɛ bome lãwnɩ a zɔ̃ nɩ a divɛ̃ de-kʋ̀b. Fʋ mɩ̀ na mɩ́ cir'ɩ a dʋn bɛ na maal'ɩ a bàwr a zɩ̃ɩ ƴãw a ʋ zu. A kur-zɩɛ bàwr-maal-kuur ʋl ƴãw a, ɩ̃ na kaa nɩ ʋ zie.»

¹⁶ A bàwr-maalɛ Uriya tɩ ɩ n a lɛ za a Akaazɩ na yel a.

¹⁷ A nãà Akaazɩ tɩ cãà na ƴãw bɛ ŋma ír a Ŋmɩn-yir-kpɛ̃ɛ torkori kur-zɩɛ kur-pãgalɩ, ɛ́ dɔw a sɩn na tɩ be a torkori á ŋá zu a. Ʋ tɩ dɔw nɩ a sɩ̃w-kpɛ̃ɛ vilovilo, na tɩ be a kur-zɩɛ nadɛɛ pie nɩ ayi zu a, bin a tẽsɔw bɛ na ƴãw kʋsɛbɛ pã a zu daadaa.

¹⁸ A Asiiri tẽw nãà ƴãw na ʋ tɩ ŋmɛr a “Pɩ̃ɛnʋ-bibir Dĩo”, bɛ na tɩ ŋmãa a Ŋmɩn-yir-kpɛ̃ɛ pʋɔ a bɛr, nɩ a “Nãà Tu-kpɛb zie” na tɩ be a yẽw a.

¹⁹ A Akaazɩ yele al na cɛ a, a alɩ bome nɛ ʋ na ɩ a, a sɛb'ɩ a «Zuda tẽw na-mɩnɛ ɩ-ɩrɩ sɛbɛ» pʋɔ.

²⁰ Ʋ na wa kpi cen tɩ páw a ʋ sãà mɩnɛ a, bɛ ũù ʋ nɩ a ʋ sãàkʋm-kore ũufʋ zie, a «Daviir Tẽ-kpɛ̃ɛ» pʋɔ. A ʋ bidɛb Ezekɩasɩ n'ʋ tɩ lɩɛrɩ ʋ dɩ a naalʋ.