2 Na-mɩnɛ 14 - A SƐB-SÕW

A Zuda tẽw nãà Amazɩasɩ

¹ A Ɩsɩrayɛl tẽw nãà, Yoakaazɩ bidɛb, Zowasɩ, naalʋ-dɩb yome ayi sob'a a Amazɩasɩ tɩ lɩɛrɩ a ʋ sãà, Zowasɩ, ɩ a Zuda tẽw nãà.

² Ʋ tɩ tɛr'ɩ yome lɩzɛr'ɩ anũu a lɛn daar, ɛ́ dɩ a naalʋ yome lɩzɛr'ɩ piwaɩ, a Zerizalɛm. A mã tɩ yi n a Zerizalɛm, ɛ́ a yúor dɩ kɛ́ Yehoadin.

³ A Amazɩasɩ tɩ ɩ n a lɛ na vɩɛl a, a Sore zie, ɛcɛ a bɛ tɩ ɩ mɛ̃ a ʋ sãàkʋm-kʋra Daviir a ɩ. Ʋ tɩ ɩ na mɛ̃ a lɛ tɔr za a ʋ sãà Zowasɩ na ɩ a.

⁴ Ɛcɛ ʋ tɩ cãà na bɛr a maalʋ-ziir, a nɩbɛ cãà cere tɩ maalɛ a bagɛ, nyɩwr'ɩ a tɩ-suur-zɔ̃-na-nyùur-vla-vla-a.

⁵ A Amazɩasɩ na tɩ zɩɩlɩ a ʋ naalʋ ʋ kpɛmɛ baarɩ a, ʋ ƴãw na bɛ kʋ a sojarɩ nɩ-bɛrɛ bɛl na tɩ kʋ a ʋ sãà, a nãà Zowasɩ a.

⁶ Ɛcɛ ʋ bɛ tɩ ƴãw bɛ kʋ a nɩ-kʋrbɛ bɛ ŋa bidɛbr ɛ, k'ʋʋ tʋ̃ɔ́ tu a lɛ na sɛb a Moyiir wulu sɛbɛ pʋɔ a. Bʋ̃ʋ n'ʋ vɛ̃, a Sore yel'ɩ à ŋá a be: «Bɛ bɛ kʋrɛ a sãà mɩnɛ a bɛ bibiir yel-bebe ƴãw ɛ, bɛ bɛ kʋrɛ a bibiir a bɛ sãà mɩnɛ yel-bebe ƴãw ɛ, nɩsaal za yel-bebe ƴãw n'a bɛ na mɩ́ kʋ ʋ.»

⁷ A Amazɩasɩ mɩ̀ n'ʋ tɩ zɛb tʋ̃ɔ́ Edɔm tẽw nɩbɛ tùr-pie (10 000) a Nyaarʋ fʋɔla pʋɔ. Ʋ tɩ zɛb'a de Sɛla tẽw a zɛbr ŋa pʋɔ, por ʋ Yɔkɩteyɛl, a yúor ŋa n'ʋ ʋ cãà tɛr a dɩ̃a.

⁸ Lɛ n'a a Amazɩasɩ tɩ tõ nɩbɛ a Ɩsɩrayɛl tẽw nãà, Zowasɩ, na ɩ Yoakaazɩ bidɛb nɩ Yehu yãw a, zie. Ʋ tɩ ƴãw na kɛ́ bɛ yel ʋ à ŋá: «Wa, tɩ wa tuori taa zɛb!»

⁹ A Ɩsɩrayɛl tẽw nãà, Zowasɩ, tɩ tõ na bɛ tɩ sɔw a Amazɩasɩ à ŋá: «Bibir kãw, a Libã baa-gʋɔ tɩ tõ na kɛ́ bɛ tɩ yel a Libã sɛɛdɩr tɩɛ: “Kʋ̀ a fʋ pɔwyaa a ɩ̃ bidɛb ʋ kul!” Ɛcɛ a Libã wɛ-dʋn tɩ tɔl a nɛb a baa-gʋɔ kar.»

¹⁰ A Zowasɩ tɩ yel'a ƴãw pʋɔ: «Fʋ zɛb'a tʋ̃ɔ́ a Edɔm tẽw nɩbɛ ɩrɛ pɔ̀lʋ̀! Tɛr a yúor ŋa fʋ na páw a, zɩ̃ nɩ a fʋ tẽw! Bʋ̃ʋ n'ʋ so fʋ bɔbr kɛ́ fʋ tĩ zɛbr na na ɩ faa a fʋ zie a, zɛbr bɛ na na tʋ̃ɔ́ fʋ̃ʋ nɩ Zuda zɛbr-nɩbɛ za a?»

¹¹ Ɛcɛ a Amazɩasɩ bɛ tɩ bɛr wõ a ʋ ƴɛ̀rʋ ɛ. Lɛ n'a a Ɩsɩrayɛl tẽw nãà, Zowasɩ, tɩ cen a zɛbr ƴãw. A ʋ zɛbr-nɩbɛ nɩ a Amazɩasɩ zɛbr-nɩbɛ tɩ tuor'ɩ taa zɛb Bɛtɩ-Semɛsɩ, a Zuda tẽw.

¹² A Ɩsɩrayɛl tẽw zɛbr-nɩbɛ tɩ zɛb'a tʋ̃ɔ́ a Zuda tẽw zɛbr-nɩbɛ, bɛ zɔ bɛ za kul a bɛ yié.

¹³ A Bɛtɩ-Semɛsɩ be a, a Ɩsɩrayɛl tẽw nãà, Zowasɩ, tɩ nyɔw nɩ a Zuda tẽw nãà, Amazɩasɩ, na ɩ a Zowasɩ bidɛb, ɛ́ ɩ a Akazɩasɩ yãw a, ʋ ɩ gaso-nɩr. Ʋ tɩ yi n a be cen a Zerizalɛm, tɩ tĩ a Efarayim dɩ̃dɔr ƴãw ɛ́ ŋmɛ a dacĩ-kpɛ̃ɛ ŋmɛr bɛr tɩ sãá nɩ a Dacĩ-gõgon dɩ̃dɔr ƴãw, a wogo za ta mɛtɩr kɔbr ayi (200).

¹⁴ Ʋ tɩ de nɩ a salm-zɩɛ, a salm-pla nɩ a bʋ̃-vɩɛlɩ za na be a Ŋmɩn-yir-kpɛ̃ɛ pʋɔ, nɩ a nãà yir na-bome binu zie a. Ʋ mɩ̀ tɩ de nɩ nɩ-tɛwrɩ lɛb cen nɩ a Samaari.

¹⁵ A Zowasɩ yele al na cɛ a, a alɩ bome nɛ ʋ na ɩ a, a ʋ gãda-tome, a zɛbr ʋ na zɛb'ɩ a Zuda tẽw nãà Amazɩasɩ a, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.

¹⁶ Ʋ na wa kpi cen tɩ páw a ʋ sãà mɩnɛ a, bɛ ũù ʋ nɩ a Samaari, a Ɩsɩrayɛl tẽw na-mɩnɛ ũufʋ zie. A ʋ bidɛb Zerobowam n'ʋ tɩ lɩɛr'ʋ dɩ a naalʋ.

¹⁷ A Ɩsɩrayɛl tẽw nãà, Zowasɩ, kũu pùorí a, a Zuda tẽw nãà, Amazɩasɩ, tɩ cãà nɩ be, maalɩ yome pie nɩ anũu.

¹⁸ A Amazɩasɩ yele al na cɛ a, a sɛb'ɩ a «Zuda tẽw na-mɩnɛ ɩ-ɩrɩ sɛbɛ» pʋɔ.

¹⁹ Nɩbɛ tɩ bʋ n taa a ʋ ƴãw a Zerizalɛm, ʋ zɔ cen Lakisɩ. Ɛcɛ bɛ tɩ ƴãw na nɩbɛ diw bɩɛrɩ ʋ, tɩ kʋ ʋ a Lakisɩ be.

²⁰ Al pùorí bɛ ƴãw ʋ zɛbr-torko zu, wie taw wa n a Zerizalɛm, bɛ wa ũù ʋ a ʋ sãàkʋm-kore ũufʋ zie a «Daviir Tẽ-kpɛ̃ɛ» pʋɔ.

²¹ A Amazɩasɩ bidɛb, Azarɩasɩ, tɩ tɛr'ɩ yome pie nɩ ayʋɔb, a lɛn daar a Zuda nɩbɛ za na tɩ de ʋ k'ʋʋ ɩ a nãà lɩɛrɩ a ʋ sãà a.

²² Ʋlɛ n'ʋ tɩ lɛb zɛb de a Eilatɩ tẽw, ɛ́ lɛb mɛ ʋ, a Amazɩasɩ na tɩ kpi lɛb cen tɩ páw a ʋ sãà mɩnɛ baarɩ a.

A Ɩsɩrayɛl tẽw nãà Zerobowam ayi sob

²³ A Zuda tẽw nãà, Zowasɩ, bidɛb, Amazɩasɩ, naalʋ-dɩb yome pie nɩ anũu sob daar'a a Zowasɩ bidɛb, Zerobowam, tɩ dɩ a naalʋ a Ɩsɩrayɛl tẽw, a Samaari. Ʋ tɩ dɩ n a naalʋ yome lɩz'a ayi nɩ been.

²⁴ Ʋ tɩ ɩ n a lɛ na bɛ vɩɛl a, a Sore zie. Ʋ bɛ tɩ bɛr a Nevatɩ bidɛb, Zerobowam, yel-bebe maalʋ ɛ, a Zerobowam na tɩ ƴãw a Ɩsɩrayɛl nɩbɛ maalɩ a yel-bier a.

²⁵ Ʋ tɩ lɛb'a zɛb de a ziir al za a Ɩsɩrayɛl na tɩ dãw so a, a Lebo-Hamatɩ, na be a saa-pɛrɩ́-gʋba-lowr a, tɩ tɔ a kʋ̃ɔ-kpɛ̃ɛ-kũu na be a saa-pɛrɩ́-dʋrʋ-lowr a. À ŋá n'a a tu mɛ̃ a lɛ a Sore, a Ɩsɩrayɛl Naaŋmɩn, na tɩ ƴãw a ʋ ƴɛ̀r-manɛ, Amitaɩ bidɛb, Zonasɩ, na yi Gatɩ-Hefɛɛr a, ʋ yel a.

²⁶ Bʋ̃ʋ n'ʋ vɛ̃, a Sore tɩ nyɛ̃ nɩ a to-lawlaw a naalʋ-tẽw ŋa na wone a: gbãgbaa bɩɩ nɩr na so ʋ tʋɔra a, nɩr za sɩrɩ bɛ tɩ ka be na sõw a Ɩsɩrayɛl ɛ.

²⁷ Ɛcɛ a Sore bɛ tɩ yel k'ʋʋ na kʋ n a ʋ nɩ-bʋʋrɛ pàw pɛr ɛ, alɛ n'a so ʋ ƴãw a Zowasɩ bidɛb, Zerobowam, faa ʋ.

²⁸ A Zerobowam yele al na cɛ a, a alɩ bome nɛ za ʋ na ɩ a, a ʋ gãda-tome, a zɛbr ʋ na zɛb a, a lɛ ʋ na ɩ a Ɩsɩrayɛl lɛb so a Damasɩ nɩ a Hamatɩ, a Daviir naalʋ-tẽw na tɩ dãw so a, a sɛb'ɩ a «Ɩsɩrayɛl tẽw na-mɩnɛ ɩ-ɩrɩ sɛbɛ» pʋɔ.

²⁹ A Zerobowam na wa kpi cen tɩ páw a ʋ sãà mɩnɛ a, bɛ ũù ʋ nɩ a Samaari, a Ɩsɩrayɛl tẽw na-mɩnɛ ũufʋ zie. A ʋ bidɛb Zakari n'ʋ tɩ lɩɛrɩ ʋ dɩ a naalʋ.