2 Korɛ̃tɩ 9 - A SƐB-SÕW

A cɩɛrʋ a kɩrɩta-nɩbɛ sõwfʋ ƴãw

¹ A sõwfʋ nyɩ na tɛr a Zude tẽw kɩrɩta-nɩbɛ ƴãw a, a bɛ tɛr k'ɩ̃ɩ sɛb nyɩ ɛ.

² Ɩ̃ bãw nɩ a nyɩ tɩɛr-vɩɛlɩ a yel ŋa ƴãw, ɛ́ nyʋʋr a nyɩ ƴãw a Masedʋan tẽw dem zie yere nɩ: «A Akayi kɩrɩta-nɩbɛ cɔbr'ɩ a sõwfʋ baarɩ dɩyã za.» Ɛ́ a tʋlʋ nyɩ na tʋlɛ a tome ƴãw a, a zaw nɩ a Lãw-yie yaga zie tɩɛrʋ a mɩ̀ ƴãw fãw.

³ Ɩ̃ tone nɩ yɛbr a nyɩ zie, k'aa nyʋʋr ɩ̃ na nyʋʋr a nyɩ ƴãw a yel ŋa ƴãw a, ta ɩ zawla ɩ, ɛ́ nyɩ sɩrɩ cɔbrɩ baarɩ gù, mɛ̃ a lɛ ɩ̃ na dãw yel a.

⁴ Alɛ bɛ ɩ lɛ, a Masedʋan tẽw nɩbɛ wa páw mɛ̃ wa, wa nyɛ̃ nyɩ bɛ cɔbrɩ baarɩ a, a tɩɛrʋ tɩ na ƴãw a nyɩ ƴãw bɛ bʋ́nɛ a, nãà ɩ tɩ nɩ vĩ bɛ dɩ vuo ɩ, ɩ̃ɩ bɛ sàw yere k'aa tɩ vĩ ŋa na ɩ n a nyɩ vĩ ɛ.

⁵ Alɛ so ɩ̃ nyɛ̃ k'aa fɛr'a, k'ɩ̃ɩ zɛlɩ yɛbr bɛ de tɩ niwn a nyɩ zie wa cɔbrɩ a nyɩ sõwfʋ bʋ̃-tɩrɩ, nyɩ na yel kɛ́ nyɩ na tɩr a a. Mãa wa ta a, a na cɔbr'a baarɩ, lɛ n'a a na wul kɛ́ nyɩ tɩrɛ na nɩ pʋ-pla, kɛ́ nyɩ bɛ kpɛ mimir a tɩrʋ ƴãw ɛ.

⁶ Nyɩ lɛb tɩɛrɩ a yel ŋa: Sob nɛ na bʋ̀r zaa pʋrɩ a, zaa pʋrɩlɛ n'a ʋ na cɛ, ɛ́ sob nɛ na bʋ̀r yaga a, yaga n'a ʋ na cɛ.

⁷ A na ɩ à ŋá a, ŋa za mɩ́ tɩr mɛ̃ a lɛ ʋ na tɩɛr k'ʋʋ na tɩr a a, ʋ ta tɩrɛ nɩ pʋ-sãwna ɩ, ɛ́ a mɩ̀ ta ɩ fɛrʋ ɛ, bʋ̃ʋ n'ʋ vɛ̃, Naaŋmɩn nɔnɛ nɩ a sob nɛ na mɩ́ tɩr a bom nɩ pʋ-pla a.

⁸ Naaŋmɩn tɛr'ɩ fãw na tʋ̃ɔ́ paalɩ nyɩ nɩ maalʋ bʋʋrɛ bʋʋrɛ za, nyɩ mɩ́ tɛr bom za na sɛw a kʋralɛ, ɛ́ tɛr a dɔwlɩ yel-vla za maalʋ ƴãw.

⁹ Mɛ̃ a lɛ a Sɛb-sõw na yel a: «Ʋ põ nɩ a ʋ bome, ʋ de a na kʋ̀ nan dem a ʋ mɩnʋ be n kʋralɛ.»

¹⁰ A Naaŋmɩn na kʋ̀rɛ a bʋ̃-bʋʋrɛ a bʋ̀r-bʋ̀rɛ, ɛ́ kʋ̀rɛ ʋ a bʋ̃-dɩrɩ na guole ʋ a, ʋ mɩ̀ na kʋ̀ nyɩ nɩ a bʋ̃-bʋʋrɛ, ʋ na ɩ na a yɛ̀r, ɛ́ ɩ a nyɩ yel-mɩnʋ ɩ-vɩɛlɩ wɔmɛ yãwmɛ.

¹¹ Ʋ na ɩ na nyɩ kpɛ naalʋ a man kʋralɛ, kɛ̀ nyɩ tʋ̃ɔ́ tɩrɛ taa bɛrɛ ɩ, lɛ n'a nɩ-yaga na puore a Naaŋmɩn yãanɩ a bome tɩ na tɩr kʋ̀ bɛ a nyɩ yúor ƴãw a.

¹² Bʋ̃ʋ n'ʋ vɛ̃, a cɩɛrʋ ton ŋa a, a kɩrɩta-nɩbɛ yel-fɛrɩ tɛwr sõwfʋ ƴãw bɛ n'a ɩ, a fɛr'a k'aa ɩ nɩ-yaga puore a Naaŋmɩn barka.

¹³ Nɩ-yaga na na nyɛ̃ a nyɩ ton ŋa vɩɛl sɛw à ŋá a, bɛ na íre nɩ a Naaŋmɩn yúor-vɩɛlʋ-danʋ, nyɩ na sàw a nʋɔr a ƴãw. A nyɩ nʋɔr-sàwfʋ ŋa wul'a kɛ́ nyɩ de nɩ a Kɩrɩta Yel-nʋ̃ɔ̀. Bɛ mɩ̀ na íre nɩ a Naaŋmɩn yúor-vɩɛlʋ-danʋ, nyɩ na sàw de a nyɩ bʋ̃-tɛrɩ tɩr bɛ põ kʋ̀ bɛ, lãwnɩ a ŋmaarɛ bɛl za na cɛ a.

¹⁴ Bɛ na ɩ na a sãá, a puoru bɛ na puore kʋ̀rɛ nyɩ a pʋɔ, kɛ́ bɛ nɔnɛ nyɩ na, a maalʋ na bɛ dɩ vuo a Naaŋmɩn na kʋ̀ nyɩ a zũú.

¹⁵ Naaŋmɩn so puoru, a maalʋ na bɛ tɛr manʋ ʋ na tɩrɛ a ƴãw!