2 Korɛ̃tɩ 7 - A SƐB-SÕW

¹ Ɩ̃ nɩ-nɔnɩ i, à á ŋá za a Naaŋmɩn na yel k'ʋʋ na ɩ na kʋ̀ tɩ a zũú, nyɩ ɩ a tɩɩm tɛɛ za so a dɛwr za na dɛwr a ƴã-gan nɩ a sɩ́ɛ a, tɩ so a za bɛr, ɛ́ ƴãw fãw ɩ nɩ-son ƴãwnɛ a Naaŋmɩn.

Nʋ̃ɔ̀ ɩrɛ nɩ a Pol a Korɛ̃tɩ tẽw dem na lɩɛbɩ a bɛ ɩb a ƴãw

² Nyɩ tɛr a tɩ tɩɛrʋ a nyɩ socie pʋɔ. Tɩ bɛ sãw nɩr kãw za ɩ, bɛ dɩ nɩr kãw za lɔb ɛ, bɛ nɛb nɩr za ɩ.

³ Ɩ̃ bɛ yere à à ŋá k'ɩ̃ɩ yel kɛ́ nyɩ sãw na ɩ. Bʋ̃ʋ n'ʋ vɛ̃, mɛ̃ a lɛ ɩ̃ na dãw yel a, tɩ nɔnɛ nyɩ na bɛ dɩ vuo ɩ, lãw baa bɩɩ lãw kpi n'a.

⁴ Ɩ̃ bɛr'ɩ tɩɛrʋ yaga za a nyɩ ƴãw, ɛ́ nyʋʋr yaga za a nyɩ ƴãw. A tɩ kpɩɛrʋ za pʋɔ a, ɩ̃ nyɛ̃ nɩ mɔwlʋ yaga ɛ́ nʋ̃ɔ̀ kpɛ m bɛ dɩ vuo ɩ.

⁵ Tɩ na tɩ ta a Masedʋan a, tɩ bɛ nyɛ̃ pɩ̃ɛnʋ towtow ɛ, kpɩɛrʋ bʋʋrɛ za n'a tɩ nɩ̃ɛ nyɛ̃ a ziir za: zɛbr tɩ n'a a yẽw, ɛ́ a tɩ pʋ̃ɔmɩ a ɩ dɛ̃bɩ̃ɛ.

⁶ Ɛcɛ Naaŋmɩn na mɔwlɛ a bɛlɩ dem na mɩ́ siwre bɛ tʋɔra a, ʋ mɔwlɩ tɩ nɩ a Títɩ̀ waa pʋɔ.

⁷ Ɛcɛ a ʋ waa pʋɔ tɛwr bɛ n'a tɩ nyɛ̃ a mɔwlʋ ɛ, tɩ mɩ̀ nyɛ̃ nɩ mɔwlʋ, a mɔwlʋ a Títɩ̀ mɩŋa na páw a nyɩ zie a pʋɔ. Ʋ manɩ na kʋ̀ m kɛ́ nyɩ bɔbr'ɩ tuotuo kɛ́ nyɩ nãá lɛb nyɛ̃ m, ɛ́ manɩ a nyɩ pʋ-sãwna lãwnɩ a lɛ nyɩ na tʋlɛ a ɩ̃ ƴãw a. Alɛ n'a so nʋ̃ɔ̀ lɛb bãw kpɩɛr mɛ̃ yaga za.

⁸ A sɛb-tʋɔla ɩ̃ na sɛb nyɩ a wa ƴãw nyɩ pʋ-sãwna a, ɩ̃ bɛ yere k'ɩ̃ɩ nãá bãw kɛ́ lɛ ɩ. Ɩ̃ na wa nyɛ̃ ʋ ƴãw nyɩ pʋ-sãwna blãlɛ tɛwr ƴãw a, ɩ̃ yel'a kɛ́ mãa tɩ bãw kɛ́ lɛ.

⁹ Ɛcɛ ƴɛrɛŋa a, ɩ̃ cɩlɛ na, ɛ́ a bɛ kaar mɛ̃ a nyɩ pʋ-sãwna ƴãw n'a ɩ̃ cɩlɛ ɩ, ɩ̃ cɩlɛ na a pʋ-sãwna ŋa na ɩ nyɩ lɩɛbɩ a nyɩ ɩb a ƴãw. Bʋ̃ʋ n'ʋ vɛ̃, a pʋ-sãwna ŋa tu n a lɛ a Naaŋmɩn na bɔbr a. Lɛ so, tɩ bɛ sãw nyɩ bom za ƴãw ɛ.

¹⁰ A pʋ-sãwna na tu a Naaŋmɩn pʋ-tɩɛrʋ a waar'ɩ nɩ ɩb-lɩɛbʋ na tɩrɛ faafʋ a, ɛ́ nãá-bãw-kɛ́-lɛ kãw za bɛ ka ʋ pʋɔ ɩ. Ɛcɛ a pʋ-sãwna na tu a tẽ-daa ŋa a waar'ɩ nɩ kũu.

¹¹ Nyɩ nyɛ̃ bom nɛ a pʋ-sãwna na tu a Naaŋmɩn a na ƴãw nyɩ ɩ a: ʋ ƴãw na nyɩ tʋlɛ, ɛ́ zɛlɛ a nyɩ sãwna suur. Bʋ̃ʋ suur nɩ bʋ̃ʋ dɛ̃bɩ̃ɛ n'a ʋ bɛ ƴãw nyɩ! Ʋ ƴãw na nyɩ bɔbr kɛ́ nyɩ nãá lɛb nyɛ̃ m, nyɩ tʋlɛ a yel-fa-maalɛ kpãàfʋ ƴãw. Nyɩ ɩ n bom za wul kɛ́ nyɩ bɛ tɛr sãwna a yel ŋa pʋɔ ɩ.

¹² A na ɩ à ŋá a, a sɛb-tʋɔla ɩ̃ na sɛb nyɩ a bɛ ɩ a yel-fa-maalɛ ƴãw ɛ, bɛ lɛb ɩ a ʋlɩ sob nɛ ʋ na sãw a ƴãw ɛ. Ɩ̃ tɩ bɔbr'a, a Naaŋmɩn niŋé, kɛ́ nyɩ nyɛ̃ a lɛ nyɩ na sɩrɩ tʋlɛ a tɩ ƴãw a.

¹³ Alɛ n'a so tɩ nyɛ̃ a mɔwlʋ. Mɔwlʋ tɛwr bɛ n'a tɩ nyɛ̃ ɩ. A Títɩ̀ nʋ̃ɔ̀ ɩ na nʋ̃ɔ̀ kpɛ tɩ tɩ dɔwlɩ. Sɩza n'a, a nyɩ za ɩb ɩ na ʋ bɛr tɩɛrʋ.

¹⁴ Bʋ̃ʋ n'ʋ vɛ̃, vĩ bɛ ɩrɛ mɛ̃ ɩ̃ na nyʋʋr a nyɩ ƴãw a ʋ zie a ɩ. Ɛcɛ mɛ̃ a lɛ tɩ na mɩ́ yel a yel-mɩŋa kʋralɛ a, lɛ n'a a nyʋʋr tɩ na nyʋʋr a nyɩ ƴãw a Títɩ̀ zie a, wa ɩ sɩza.

¹⁵ A nɔ̃wfʋ ʋ na nɔ̃w nyɩ a mɩ́ lɛb'a ɩ kpɛ̃ɛ dɔwlɩ, ʋ na mɩ́ lɛb tɩɛrɩ a lɛ nyɩ za na sàw a ʋ nʋɔr nɩ a lɛ nyɩ na tuori nyɔw ʋ nɩ ƴãwfʋ lãwnɩ zɔba a.

¹⁶ Ɩ̃ cɩlɛ na ɩ̃ na na tʋ̃ɔ́ bɛr tɩɛrʋ a nyɩ ƴãw a yele za pʋɔ a.