2 Korɛ̃tɩ 5 - A SƐB-SÕW

¹ Tɩ bãwnɩ a na, a pɛn-sɛw ʋl pʋɔ tɩ na be kpɩɛr a (a pɛr lɛ k'aa tɩ tẽw zu ka ƴã-gan) ʋlɛ wa sãw a, Naaŋmɩn cɔbrɛ nɩ kpɛb zie bɛrɛ tɩ a tẽ-vla pʋɔ, kpɛb zie na bɛ ɩ nɩsaal nuru bʋ̃-maala, ɛ́ be kʋralɛ a.

² Ɛ́ tɩ kone na bɔbr'ɩ tuotuo kɛ́ tɩ ta a tẽ-vla pʋɔ kpɛb zie, a ɩ mɛ̃ kparʋ tɩ na su dɔwlɩ a tẽw zu ka kpɛb zie zu a.

³ Bʋ̃ʋ n'ʋ vɛ̃, tɩ na su n bom, tɩ kʋ̃ ɩ ƴã-gã-zawla ɩ.

⁴ Sɩza n'a, a tɩɩm na be a pɛn-sɛw ŋa pʋɔ a, tɩ kone na mɛ̃ nɩbɛ na tuo tuor ìre nɩ guur a. Tɩ bɛ bɔbr kɛ́ tɩ yaa a tẽw zu ka kpɛb zie bɛr ɛ, tɩ bɔbr'a kɛ́ tɩ su a tẽ-vla pʋɔ dem dɔwlɩ, k'aa nyɔ-vʋʋrʋ vɔl a ʋlɩ bom nɛ na ɩ bʋ̃-kpiira.

⁵ A sob nɛ na cɔbrɩ tɩ à á ŋá ƴãw a, ʋlɛ n'ɩ a Naaŋmɩn na kʋ̀ tɩ a Vʋʋrʋ Sõw, ʋ ɩ a maalʋ tɩ nãà páw a bãwfʋ a.

⁶ A na ɩ à ŋá a, bʋnʋ kãw za bɛ ka a tɩ zie towtow ɛ, tɩ bãwnɩ a na, lɛn daar za tɩ na kpɩɛr a ƴã-gan ŋa pʋɔ a, tɩ yi na zaa a tɩ kpɛb zie zãá nɩ a Sore.

⁷ Bʋ̃ʋ n'ʋ vɛ̃, naaŋmɩn-sàw-deb'a so tɩ cere, nyɛ́b bɛ n'a so ɩ.

⁸ Bʋnʋ kãw za bɛ ka a tɩ zie ɩ, ɛ́ tɩ nyɛ̃ a sa kɛ́ tɩ yi ɛ́ bɛr a ƴã-gan ŋa, ɛ́ cen tɩ be a Sore zie.

⁹ Ɛcɛ bom nɛ tɩ na bɔbr zuo a za a n'ɩ kɛ́ tɩ pɛlɩ a ʋ pʋɔ, tɩmɛ saa na be a ƴã-gan ŋa pʋɔ bɩɩ yi kɛ́ bɛr ʋ a.

¹⁰ Bʋ̃ʋ n'ʋ vɛ̃, a fɛr'a kɛ́ tɩ za cen a Kɩrɩta ƴɛ̀rʋ-maalʋ zie ʋ tɩ maal'ɩ tɩ a ƴɛ̀rʋ. Lɛn daar'a ŋa za na páw bom nɛ na sɛw taa nɩ ʋ a, a vla bɩɩ a faa, a tu a lɛ ʋ na vʋʋrɩ a tẽw zu a.

A Kɩrɩta ɩ na tɩɩm nɩ a Naaŋmɩn lɛb kpɛ taa

¹¹ A na ɩ à ŋá tɩ bãw ʋlɩ bom nɛ na n'ɩ a zɔrɛ-a-Sore a, tɩ bɔbr'a kɛ́ tɩ ɩ a nɩsaalbɛ za sàw kɛ́ sɩza n'a. Naaŋmɩn bãw tɩ na tɩ tɔ, ɩ̃ɩ tɩɛr kɛ́ nyɩ mɩ̀ bãw mɛ̃ na nɩ a nyɩ pʋɔ tɩ tɔ.

¹² Tɩ bɛ lɛb maal tĩ wule nyɩ tɩ na ɩ nɩ-vɩɛlɩ a ɩ, tɩ bɔbr'a kɛ́ tɩ ɩ nyɩ nyʋʋr a tɩ ƴãw, kɛ́ nyɩ tʋ̃ɔ́ mɩ́ tɛr sɔwfʋ sɔw kʋ̀ a bɛlɩ dem na nyʋʋr ɩ-ɩrɩ na sãá a ƴãw, ɛ́ bɛ nyʋʋr a socir pʋɔ ɩ-ɩrɩ ƴãw a ɩ.

¹³ Tɩmɛ wa ɩ dãbol-ɩb a, Naaŋmɩn ƴãw n'a tɩ ɩ a dãbol-ɩb, ɛcɛ tɩmɛ wa ɩ yã-bãw-ɩb a, nyɩɩm ƴãw n'a.

¹⁴ Bʋ̃ʋ n'ʋ vɛ̃, a Kɩrɩta nɔ̃wfʋ fɩɩrɩ tɩ na tɛr, tɩɩm na bãw kɛ́ nɩ-been yõ kpi n a nɩbɛ za ƴãw a, ɛ́ k'aa na ɩ lɛ a, bɛ za lãw nɩ ʋ na kpi a.

¹⁵ Ʋʋ kpi n a bɛ za ƴãw, k'aa nɩ-vʋʋrɩ ta cãà vʋʋrɛ bɛl mɩŋa ƴãw ɛ, ɛ́ vʋʋrɛ a ʋlɩ sob nɛ ƴãw na kpi ɛ́ lɛb yi a bɛ ƴãw a.

¹⁶ Lɛ n'a so tɩ bɛ cãà bãw nɩr za nɩsaalʋ bãwfʋ tɛwr ɛ. Tɩmɛ saa tɩ dãw bãw a Kɩrɩta nɩsaalʋ bãwfʋ a, ƴɛrɛŋa a, tɩ bɛ cãà bãw ʋ a lɛ ɩ.

¹⁷ Lɛ so nɩr wa lãw nɩ a Kɩrɩta a, ʋ lɩɛb'ɩ nɩ-paala. Bʋ̃-kʋra tɔl'a, ɛ́ bʋ̃-paala n'ʋ be be.

¹⁸ Naaŋmɩn zie n'a a za yi, ʋl na ɩ tɩɩm nɩ ʋl lɛb kpɛ taa a Kɩrɩta ƴãw, ʋʋ de ʋlɛ nɩ a nɩbɛ lɛb-kpɛ-taa tõ-nʋɔr kʋ̀ tɩ a.

¹⁹ Bʋ̃ʋ n'ʋ vɛ̃, a Kɩrɩta zũú, a Naaŋmɩn n'ʋ tone kɛ́ ʋlɛ nɩ a nɩsaalbɛ za lɛb kpɛ taa, lɛ so ʋ mɩ́ tɩ de a bɛ sãwna bɛr a baarɩ, ɛ́ ƴãw a lɛb-kpɛ-taa ƴɛ̀r-bie a tɩ nʋɔrɩ́.

²⁰ A na ɩ à ŋá a, a Kɩrɩta n'ʋ tõ n tɩ a tõ-nʋɔr ŋa a nyɩ zie, ɛ́ a ɩ mɛ̃ a Naaŋmɩn mɩŋa n'ʋ yere kʋ̀rɛ nyɩ nɩ a tɩ nʋɔr a: tɩ zɛlɛ nyɩ nɩ yãayãa, a Kɩrɩta yúor ƴãw, nyɩ sàw kɛ̀ nyɩɩm nɩ a Naaŋmɩn lɛb kpɛ taa.

²¹ A Kɩrɩta bɛ tɩ tɛr yel-bier ɛ, ɛ́ a Naaŋmɩn tuo ʋ a tɩ yel-bier, kɛ́ tɩ tʋ̃ɔ́ lãw nɩ ʋ lɩɛbɩ nɩ-mɩn a Naaŋmɩn niŋé.