2 Korɛ̃tɩ 13 - A SƐB-SÕW

A kpaal-pɛ-baara nɩ a yãan-pɛ-baara

¹ A gb'a ata sob'ɩ à ŋá ɩ̃ na waar a nyɩ zie a. Mɛ̃ a lɛ a Sɛb-sõw na yel a: «Dãsɩɛ dem ayi bɩɩ ata ƴɛ̀rʋ zũú n'a yel za na mɩ́ maalɩ.»

² Ɩ̃ tɩ dãw na yel, ɛ́ lɛb yel a lɛ ɩ̃ na tɩ wa nyɛ̃ nyɩ a gb'a ayi sob a, ɛ́ a dɩ̃a ɩ̃ na bɛ ka a nyɩ sɔgɔ a, ɩ̃ lɛb'a yere kʋ̀rɛ a bɛlɩ dem na tɩ dãw maalɩ a yel-bier a, nɩ a bɛl za na cɛ a: mãa wa lɛb wa a nyɩ zie a, ɩ̃ kʋ̃ ɩrɛ a nyɩ zie nɩ mimi-ɓaar ɛ.

³ Nyɩ na bɔbr kɛ́ nyɩ bãw k'aa Kɩrɩta mɩ́ tu n a ɩ̃ zie ƴɛ̀r'a, nyɩ na bãw na! A nyɩ ƴãw a, ʋ bɛ ɩ bãbàal ɛ, ʋ mɩ́ wul'ɩ a ʋ fãw a sãá a nyɩ sɔgɔ.

⁴ Sɩza n'a, ʋ tɩ ɩ n bãbàal a lɛn daar bɛ na tɩ kpa ʋ a da-gara zu a, ɛcɛ a Naaŋmɩn fãw ɩ na ʋ vʋʋrɛ. Ɛ́ a tɩɩm na lãw nɩ ʋ a, tɩ mɩ̀ ɩ n bãbàalbɛ, ɛcɛ tɩ na wul nyɩ na a sãá, a Naaŋmɩn fãw na ɩ na tɩ lãw nɩ ʋ ɩ nɩ-vʋʋrɩ.

⁵ A nyɩɩm tɛɛ za, nyɩ ɩ nyɩ tʋɔra kaa, nyɩ jɛl nyɩ mɩŋa nyɛ̃, nyɩmɛ wa be a naaŋmɩn-sàw-deb pʋɔ a. Nyɩ nyɛ̃ na bãw kɛ́ a Yeezu Kɩrɩta be n a nyɩ sɔgɔ, lɛ bɛ n'a ɩ? Bɩɩ nyɩ jɛl'ɩ a nyɩ tʋɔra kaa nyɛ̃ nyɩ sãw?

⁶ Ɩ̃ tɩɛr'a kɛ́ nyɩ na nyɛ̃ na bãw kɛ́ tɩ bɛ guu ɛ.

⁷ Tɩ puore na kɛ́ Naaŋmɩn ta sàw nyɩ maalɩ yel-faa kãw za ɩ. Tɩ bɛ bɔbr kɛ́ tɩ ɩ a lɛ wul tɩ na bɛ guu a ɩ, tɩ bɔbr'a kɛ́ tɩ nyɛ̃ nyɩ, nyɩ ɩrɛ a vla, alɛ saa sãá mɛ̃ tɩ guu na a.

⁸ Bʋ̃ʋ n'ʋ vɛ̃, tɩ kʋ̃ tʋ̃ɔ́ ɩ bom za sãw a yel-mɩŋa ɩ, ʋl tɛwr ƴãw n'a tɩ na tʋ̃ɔ́ ɩ bom.

⁹ Tɩ mɩ̀ cɩlɛ na, tɩ na mɩ́ wa ɩ bãbàalbɛ ɛcɛ nyɩ tɛr fãw a. Lɛ so tɩ mɩ́ puore kɛ́ nyɩ vɩɛl bɛ cɛ ɩ.

¹⁰ Alɛ n'a so ɩ̃ zãá nɩ nyɩ ɛ́ sɛbr nyɩ a yel ŋa. Ɩ̃ bɛ bɔbr k'ɩ̃ɩ wa ta mʋ̃ɔ mimir ƴãw nyɩ ɛ, mɛ̃ a lɛ a Sore na kʋ̀ m a fãw a ɩ. A nyɩ maalʋ ƴãw n'a ʋ kʋ̀ m a fãw ŋa, a nyɩ loba ƴãw bɛ n'a ɩ.

¹¹ Ƴɛrɛŋa a, yɛbr i, nyɩ cɩlɛ, nyɩ ƴãw fãw ɩrɛ kɛ́ nyɩ vɩɛl tɩ tɔ, nyɩ kpaalɛ taa, nyɩ lãw taa tɩɛrʋ, nyɩ tɛr a ƴã-ɓaarʋ, ɛ́ a nɔ̃wfʋ nɩ a ƴã-ɓaarʋ Naaŋmɩn na be n a nyɩ zie.

¹² Nyɩ nyɔw taa weri puori taa mɛ̃ yɛbr a. A kɩrɩta-biir za puore nyɩ na.

¹³ A Sore Yeezu Kɩrɩta maalʋ, a Naaŋmɩn nɔ̃wfʋ nɩ a lãw-taa na yi a Vʋʋrʋ Sõw zie a, a be a nyɩ za zie.