2 Korɛ̃tɩ 11 - A SƐB-SÕW

A Pol nɩ a nɩ-ton-bɛlɛbɛlɛ mɩnɛ

¹ Bʋ̃ʋ pãa ɩ a! Nyɩ nãá sàw kʋ̀ m ɩ̃ tõ yãya-tome blã! Ʋ̃ʋ nyɩ sàw kʋ̀ m!

² Nyuur na yi Naaŋmɩn zie a ɩrɛ mɛ̃ nɩ a nyɩ ƴãw. Dɛb-been yõ tẽtẽ n'ʋ ɩ̃ ƴãw nɩ nyɩ a yúor, k'ɩ̃ɩ tʋ̃ɔ́ de nyɩ kʋ̀ a Kɩrɩta mɛ̃ pɔwsɩrale na bɛ tɛr dɛwr a.

³ Ɛcɛ, mɛ̃ a lɛ a waab na tɩ bɛlɩ a Awa a, dɛ̃bɩ̃ɛ ɩrɛ mɛ̃ na, a nyɩ tɩɛrʋ nãà wa lɩɛbɛ tɩɛr-faar ɛ́ tawr nyɩ zãánɛ nɩ a Kɩrɩta pùor-tub, ʋl na bɛ bãw a mɩnɛ kãw a.

⁴ Bʋ̃ʋ n'ʋ vɛ̃, nyɩ mɩ́ sàw na de nɩ-sãsaralɛ na hiere yere Yeezu-yũo na bɛ ɩ a ʋl tɩ na hieri yel kʋ̀ nyɩ a ɩ, ɛ́ sàw de yã-yũo nɩ wul-yũo na bɛ ɩ a Vʋʋrʋ Sõw nɩ a Yel-nʋ̃ɔ̀ nyɩ na páw a tɩ zie a dem a ɩ.

⁵ Ɛcɛ, ɩ̃ bɛ tɩɛr kɛ́ a nyɩ nɩ-ton-gãdaar bɛ ŋa zuo mɛ̃ nɩ yel kãw za ƴãw ɛ.

⁶ Sɩza n'a, ɩ̃ tɔ̃w bɛ bãw ƴɛ̀rʋ ɛ, ɛcɛ a yele bãwfʋ lowr a, a bɛ ɩ a lɛ ɩ: bom za ƴãw, yele za pʋɔ, tɩ wul nyɩ na a sãá.

⁷ Ɩ̃ na siwri ɩ̃ tʋɔra manɩ a Naaŋmɩn Yel-nʋ̃ɔ̀ kʋ̀ nyɩ mɔlɛ lɛ k'ɩ̃ɩ zɛw nyɩ a, sãwna n'a bɩɩ?

⁸ Lãw-yie a mɩnɛ n'a ɩ̃ kpow, ɩ̃ sàw na bɛ kaarɛ a ɩ̃ zie k'ɩ̃ɩ tone a nyɩɩm.

⁹ Ɩ̃ɩ na tɩ be a nyɩ zie a wa fɛrɛ mɛ̃ a, nɩr kãw za bɛ hanɩ a ɩ̃ ƴãw ɛ. A yɛbr na tɩ yi a Masedʋan wa a tɩ kʋ̀ m'ɩ a ɩ̃ bʋ̃-bɔbrɩ. A yele za pʋɔ, ɩ̃ bɛ sàw nyɩ hanɩ a ɩ̃ ƴãw ɛ, ɛ́ mɩ̀ bɛ be za na sàw ɛ.

¹⁰ A Kɩrɩta yel-mɩŋa na be a ɩ̃ pʋɔ a ƴãw, ɩ̃ yere nɩ à ŋá: nɩr za kʋ̃ tʋ̃ɔ́ ɩ ɩ̃ bɛ nyʋʋr a yel ŋa ƴãw a Akayi ten pʋɔ ɩ.

¹¹ Ɛ́ bʋ̃ʋ so ɩ̃ ƴɛ̀r à à ŋá? Ɩ̃ na bɛ nɔnɛ nyɩ a n'a bɩɩ? Naaŋmɩn yõ n'ʋ bãw!

¹² Ɩ̃ na cãà na ɩrɛ à à ŋá ɩ̃ na ɩrɛ a, k'ɩ̃ɩ ɩ a bɛlɩ dem na pɔrɛ kɛ́ bɛ zɛ̃ tɩ na a, ta cãà tɛr pɔb bom ɛ.

¹³ A nɩbɛ bɛ ŋa a, nɩ-ton-bɛlɛbɛlɛ mɩnɛ nɛbɛ, tõ-tõ-biir na bɛ tɛr yel-mɩŋa, ɛ́ bɛ̀lɩ ɩ Kɩrɩta nɩ-toni a.

¹⁴ À á ŋá za dɛ bɛ ɩ nɔ-ɓãan ɛ: a Sɩtaana tɔr za mɩ́ bɛ̀lɩ na ɩ cãà malkɩ.

¹⁵ Lɛ so, a Sɩtaana tõ-tõ-biir mɩ̀ na bɛ̀lɩ ɩ yel-mɩŋa tõ-tõ-biir a, yel-pʋrɩ n'ʋ a bɛ zie. A bɛ baarʋ na tu n a lɛ a bɛ ɩ-ɩrɩ na ŋmɛ̃ a.

A tuo a Pol na wõ ʋ na ɩ a nɩ-tona a ƴãw

¹⁶ Ɩ̃ lɛb'a yere a yel ŋa: nɩr kãw za taa wa tɩɛr k'ɩ̃ɩ yarɛ na ɩ. Bɩɩ nɩr wa tɩɛrɛ k'ɩ̃ɩ yarɛ na a, nyɩɩm sàw k'ɩ̃ɩ yarɛ na, ɩ̃ mɩ̀ tʋ̃ɔ́ zɛw ɩ̃ tʋɔra blã.

¹⁷ Sɩza n'a, a yele na wa ƴãw mɛ̃ ɩ̃ na zɛwr ɩ̃ tʋɔra a, ɩ̃ bɛ ƴɛ̀rɛ mɛ̃ a lɛ a Sore nãá tɩ bɔbr k'ɩ̃ɩ ƴɛ̀r a ɩ, ɩ̃ ƴɛ̀rɛ na mɛ̃ yãyaar sob a.

¹⁸ Nɩ-yaga na faa pɔrɛ a bɛ nɩsaalʋ yel-vɩɛlɩ ƴãw a, mãa mɩ̀ na pɔrɛ na.

¹⁹ Nyɩɩm na bãw yã a, nyɩ mɩ́ nɔ̃w na sàw de a dãbole.

²⁰ Nyɩ mɩ́ sàw na kɛ́ bɛ ɩrɛ nyɩ mɛ̃ gbãgbaar a, ɛ́ sàw bɛ nɛbr nyɩ, nyɩ mɩ́ sàw na bɛ farɛ a nyɩ bome za ɛ́ pɔrɛ a nyɩ zu, ɓarɛ nɩ nyɩ.

²¹ Vĩ ɩrɛ mɛ̃ nɩ a yelu ƴãw: tɩ wul'a kɛ́ tɩ maal'a ɩ bãbàalbɛ tɩ zuo! Ɩ̃ ƴɛ̀rɛ na mɛ̃ yãyaar sob a, a bom nɛ ƴãw a nɩbɛ na zɛwr bɛ tʋɔra a, mãa mɩ̀ na tʋ̃ɔ́ na zɛw ɩ̃ tʋɔra.

²² Mɛ̃ bɛ taa ɩ Ebre nɩbɛ? A mãa mɩ̀! Bɛ ɩ n Ɩsɩrayɛl bʋʋrɛ yaa? A mãa mɩ̀! Bɛ ɩ n Abraham nɩ-bʋʋrɛ ɛ? A mãa mɩ̀!

²³ Bɛ ɩ n Kɩrɩta tõ-tõ-biir yaa? A ka a, ɩ̃ na ƴɛ̀r'ɩ yãya-ƴɛ̀rʋ: ɩ̃ ɩ ʋ na zuo bɛ. A bàlʋ pʋɔ n'a o, ɩ̃ zuo bɛ na, a gaso pʋɔ kpɛb ƴãw n'a o, ɩ̃ gãw bɛ na, a ŋmɩɛrʋ lowr wa n'a a, bɛ ŋmɛ mɛ̃ na zuo bɛ. Gb'a a ŋmɩn za, ɩ̃ tɩ cɛ nɩ blã nãá kpi.

²⁴ Gb'a anũu n'a a Zifʋ mɩnɛ ƴãw mɛ̃ a fʋba nɛ́ɛ lɩz'a ayi for bir,

²⁵ gb'a ata n'a a Ʋrɔm tẽw nɩbɛ fɔb mɛ̃, gb'a-been n'a a nɩbɛ lɔb'ɩ mɛ̃ kʋsɛbɛ, gb'a ata n'a a ɩ̃ gbor tu kʋ̃ɔ, ɛ́ gb'a been ɩ̃ gã a kʋ̃ɔ-kpɛ̃ɛ pʋɔ bibi-ɓil nɩ tɩ̃ɩsɔw-ɓil.

²⁶ Gb'aa yaga za, gbɛ́ɛ n'a ɩ̃ cen nɩ a ta-ten, a bàrʋ kʋ̃ɔ-paalʋ nɩ a nyãnyu-nɩ-kʋrbɛ ƴãwnɛ mɛ̃ kũu dɛ̃bɩ̃ɛ, lãwnɩ a ɩ̃ yɛbr na ɩ a ɩ̃ bʋʋrɛ nɩbɛ a, nɩ a zawlɛ bɛl na bɛ ɩ a ɩ̃ bʋʋrɛ nɩbɛ a, a tẽw pʋɔ bɩɩ a wɛ-kar pʋɔ, a kʋ̃ɔ-kpɛ̃ɛ zu bɩɩ a yɛb-bɛlɛbɛlɛ mɩnɛ sɔgɔ.

²⁷ Tõ-kpɛn ƴãw mɛ̃ nɩ bàlʋ nɩ hanʋ. Gb'a à ŋá za, ɩ̃ bɛ ũù mimir ɛ. Kɔ̃ nɩ kʋ̃ɔ-nyúur kpɛ m'a. Gb'a a ŋmɩn za, ɩ̃ tɛr'ɩ mʋta-tuo. Ƴawr kpɛ m'a, ɩ̃ bɛ tɩ tɛr bʋ̃-suuri ɛ.

²⁸ Ɩ̃ bɛ ƴɛ̀rɛ a al za na cɛ a ƴɛ̀rʋ ɛ, a yel ʋl na ƴãwnɛ mɛ̃ a tɩɛrʋ bibie za a: a Lãw-yie za kaafʋ tɩɛrʋ.

²⁹ Ãa n'ʋ ɩ bãbàal, ɩ̃ɩ bɛ lãw nɩ ʋ ɩ a bãbàal? Ãa n'ʋ lɛb pùor a sàw-deb pʋɔ, ɛ́ a bɛ dɩrɛ mɛ̃ mɛ̃ vũu a?

³⁰ Alɛ wa fɛr k'ɩ̃ɩ zɛwr ɩ̃ tʋɔra a, a ɩ̃ bãbàalʋ ƴãw n'a ɩ̃ na zɛwr ɩ̃ tʋɔra.

³¹ A Naaŋmɩn tɩ Sore Yeezu Sãà, na tɛr ƴãwfʋ yome yome za a, bãwnɩ a na k'ɩ̃ɩ bɛ ŋmarɛ ziri ɛ.

³² A Damasɩ ɩ̃ na tɩ be a, a na-kpɛ̃ɛ-lɩɛrɛ ʋl na lɩɛrɩ a nãà Aretasɩ a, tɩ ƴãw na bɛ gù a tẽw kɛ́ bɛ nyɔw mɛ̃.

³³ Ɛcɛ zãkpa pʋɔ n'a bɛ tɩ ƴãw mɛ̃ tur bɛr tokoro vʋɔrɩ́, ɩ̃ lanɩ a dacin siw zɔ cɩ̃ɛ, ʋ bɛ páw mɛ̃ ɩ.