1 Zã 5 - A SƐB-SÕW

A tɩ sàw-deb zũú, tɩ tʋ̃ɔ́ nɩ a tẽ-daa

¹ Nɩr za na sàw de k'aa Yeezu ɩ n a Kɩrɩta a ɩ n Naaŋmɩn bʋ̃-dɔwra. Ɛ́ sob nɛ za na nɔnɛ a dɔwrɛ a mɩ̀ mɩ́ nɔnɛ nɩ a ʋ bʋ̃-dɔwra.

² À ŋá n'a tɩ mɩ́ bãw kɛ́ tɩ nɔnɛ nɩ a Naaŋmɩn bibiir: a lɛn daar tɩ na mɩ́ nɔnɛ a Naaŋmɩn ɛ́ sàwr a ʋ nɛ-ƴãwnɩ a.

³ À ŋá n'a a Naaŋmɩn nɔ̃wfʋ sɩrɩ ŋmɛ̃: kɛ́ tɩ sàwr a ʋ nɛ-ƴãwnɩ. Ɛ́ a ʋ nɛ-ƴãwnɩ bɛ kpɛmɛ zuo ɩ,

⁴ bʋ̃ʋ n'ʋ vɛ̃, Naaŋmɩn bʋ̃-dɔwra za tʋ̃ɔ́ nɩ a tẽ-daa, ɛ́ a tʋ̃ɔ́fʋ tɩ na tʋ̃ɔ́ a tẽ-daa a n'ɩ a tɩ naaŋmɩn-sàw-deb.

⁵ Ãa n'ʋ tʋ̃ɔ́ a tẽ-daa, a bɛ ɩ a sob nɛ na sàw de k'aa Yeezu ɩ n a Naaŋmɩn Bie a?

A Naaŋmɩn dɩrɛ nɩ a Yeezu Kɩrɩta dãsɩɛ

⁶ A Yeezu Kɩrɩta n'ʋ wa n a ʋ suob kʋ̃ɔ nɩ a ʋ kũu zɩ̃ɩ. A kʋ̃ɔ tɛwr bɛ n'a ʋ wa n ɛ, ʋ wa n nɩ a kʋ̃ɔ nɩ a zɩ̃ɩ. Ɛ́ a Vʋʋrʋ Sõw n'ʋ dɩrɛ a dãsɩɛ kɛ́ sɩza n'a, a Vʋʋrʋ Sõw na ɩ a yel-mɩŋa a ƴãw.

⁷ Dãsɩɛ dem ata nɛbɛ:

⁸ a Vʋʋrʋ Sõw, a kʋ̃ɔ nɩ a zɩ̃ɩ, ɛ́ bɛ za ata lãw nɩ taa dɩrɛ a dãsɩ-been.

⁹ Tɩ mɩ́ sàw nɩ a nɩsaalbɛ dãsɩɛ, ɛcɛ a Naaŋmɩn dãsɩɛ ɩ n kpɛ̃ɛ zuo a nɩsaalbɛ dem. Ɛ́ a dãsɩɛ ŋa n'ʋ ʋ dɩ a ʋ Bie ƴãw.

¹⁰ Sob nɛ na sàw de a Naaŋmɩn Bie a mɩ̀ tɛr'ɩ a dãsɩɛ ŋa a ʋ pʋ̃ɔmɩ. Ɛcɛ sob nɛ na bɛ mɩ́ sàw de a Naaŋmɩn a mɩ́ de ʋ na bʋɔlɛ zir-ŋmarɛ, ʋ na bɛ sàw de a Naaŋmɩn dãsɩɛ ʋ na dɩ a ʋ Bie ƴãw a.

¹¹ A dãsɩɛ ʋl n'ɩ ŋa: Naaŋmɩn kʋ̀ tɩ nɩ a nyɔ-vʋʋrʋ na be kʋralɛ a, ɛ́ a nyɔ-vʋʋrʋ ŋa n'ʋ tɩ páw a ʋ Bie zie.

¹² Sob nɛ na tɛr a Naaŋmɩn Bie a tɛr'ɩ a nyɔ-vʋʋrʋ ŋa, ɛ́ sob nɛ na bɛ tɛr a Naaŋmɩn Bie a bɛ tɛr a nyɔ-vʋʋrʋ ɛ.

A nyɔ-vʋʋrʋ na be kʋralɛ a yele

¹³ Ɩ̃ sɛb nyɩ nɩ à á ŋá za kɛ́ nyɩ bãw kɛ́ nyɩ tɛr'ɩ a nyɔ-vʋʋrʋ na be kʋralɛ a, a nyɩɩm na sàw de a Naaŋmɩn Bie a.

¹⁴ Ɛ́ bom ŋa n'ʋ so tɩ mɩ́ bɛr tɩɛrʋ a Naaŋmɩn niŋé: tɩmɛ wa zɛlɛ bom a tu a ʋ pʋ-tɩɛrʋ a, ʋ mɩ́ bɛr'a wõ a tɩ zɛlʋ.

¹⁵ Ɛ́ tɩ na bãw k'ʋʋ mɩ́ bɛrɛ na wone tɩmɛ wa zɛlɛ bom a ʋ zie a, tɩ bãw na kɛ́ tɩ páw nɩ a bom nɛ tɩ na zɛlɩ a ʋ zie a.

¹⁶ Nɩr wa nyɛ̃ a ʋ yɛb ʋ maalɛ yel-bier na bɛ kʋrɛ a, ʋ puore, ɛ́ Naaŋmɩn na kʋ̀ n nyɔ-vʋʋrʋ a ʋ yɛb, a yel-bier ʋl wa sɩrɩ bɛ kʋrɛ a. Ɛcɛ, yel-bier kãw be n be kʋrɛ. A ʋl ƴãw bɛ n'a ɩ̃ yel kɛ́ nyɩ puore ɩ.

¹⁷ Ɩ-faa za ɩ n yel-bier, ɛcɛ yel-bier za bɛ kʋrɛ ɩ.

¹⁸ Tɩ bãwnɩ a na kɛ́ Naaŋmɩn bʋ̃-dɔwra za bɛ maalɛ yel-bier ɛ, a Naaŋmɩn Bie gù ʋ na, ɛ́ a Faalʋ sob kʋ̃ tʋ̃ɔ́ ɩ ʋ bom ɛ.

¹⁹ Tɩ bãw na kɛ́ Naaŋmɩn so tɩ, ɛ́ a Faalʋ sob so a tẽ-daa za.

²⁰ Tɩ bãw na kɛ́ a Naaŋmɩn Bie wa na wa kʋ̀ tɩ a yã kɛ́ tɩ bãw a Naaŋmɩn-sɩza. Tɩ lãw nɩ nɩ a Naaŋmɩn-sɩza a ʋ Bie Yeezu Kɩrɩta ƴãw. Ʋlɛ n'ɩ a Naaŋmɩn-sɩza nɩ a nyɔ-vʋʋrʋ na be kʋralɛ a.

²¹ Ɩ̃ bibiir i, nyɩ gùre nyɩ tʋɔra a tɩbɛ ƴãw.