1 Timote 6 - A SƐB-SÕW

¹ A bɛlɩ dem za na ɩ gbãgbaar a, a fɛr'a kɛ́ bɛ bãwnɩ a a bɛ nɩ-bɛrɛ na sɛwnɩ ƴãwfʋ yaga za a, a Naaŋmɩn yúor nɩ a wulu ta nyɛ̃ zʋmɛ ɩ.

² A bɛlɩ gbãgbaar nɛ a nɩ-bɛrɛ na sàw de Naaŋmɩn a, bɛ ta yel kɛ́ bɛ na ɩ yɛbr a zũú, ɛ́ bɛ tɛr ƴãwfʋ a bɛ zie ɩ. Bɛ nɩ̃ɛ ƴãw fãw tone vla kʋ̀rɛ bɛ, bɛ na bãw kɛ́ nɩbɛ na sàw de Naaŋmɩn nɩ yɛb-nɔnɩ nɛbɛ bɛ tone kʋ̀rɛ a. À á ŋá n'a a fɛr kɛ́ fʋ wule ɛ́ kpaalɛ.

A wulu na tule a nɩbɛ a, nɩ a na-bʋ̃-sɩza yele

³ Nɩr wa wule wul-yũo a, ʋlɛ bɛ wa tu a tɩ Sore Yeezu Kɩrɩta ƴɛ̀r-bi-vɩɛlɩ nɩ a wulu na tu a tɩ Naaŋmɩn ƴãwfʋ a,

⁴ a ʋ nyʋʋr ɩ na ʋ zɔ̃w. Ʋ bɛ bãw bom za ɩ, nɔkpɛn nɩ ƴɛ̀r-foli bàalʋ nyɔw ʋ na. Alɛ n'a waar'ɩ a nyuur, a taw-taa, a zʋmɛ, a tɩɛr-faar a tɔ sob ƴãw,

⁵ a nɔkpɛn-faa na bɛ tɛr baarʋ daar a yã-faar dem zie na bɛ bãw a yel-mɩŋa, ɛ́ tɩɛr kɛ́ a Naaŋmɩn ƴãwfʋ ɩ n tɔnɛ bɔb zie a.

⁶ Sɩza, a Naaŋmɩn ƴãwfʋ tɛr'ɩ tɔnɛ yaga sob nɛ na sàw tɛr a bom nɛ tɛwr ʋ na tɛr a zie.

⁷ Tɩ bɛ wa n bom za a tẽ-daa zu ɛ, lɛ mɩ̀ n'a, tɩ kʋ̃ tʋ̃ɔ́ de bom a tẽ-daa zu lɛb'ɩ ɛ.

⁸ A na ɩ à ŋá a, tɩmɛ wa tɛr bʋ̃-dɩrɩ nɩ bʋ̃-suuri a, a na sɛw tɩ na.

⁹ Ɛcɛ a bɛlɩ dem na bɔbr kɛ́ bɛ kpɛ naalʋ a, bɛ mɩ́ lo n a bɛ̀lʋ pʋɔ, ɛ́ kpɛ dãbol-yel-bɔbrɩ na bɛ vɩɛl a bɛrɩ pʋɔ, a yel-bɔbrɩ á ŋá na lore a nɩsaalbɛ ɛ́ ɩrɛ bɛ bɔrɛ a.

¹⁰ A faalʋ za nyɩwr sɩrɩ n'ɩ a libi-nɔ̃w. Bɛ mɩnɛ na tu a pùor a, bɛ bɔr a zãá nɩ a naaŋmɩn-sàw-deb ɛ́ ƴãw bɛ tʋɔra kpɩɛrʋ yaga pʋɔ.

A Pol kpaalɛ nɩ a Timote

¹¹ Fʋ̃ʋ a, Naaŋmɩn nɩr i, zɔrɛ dɛrɛ a yele á ŋá. Tu a mɩnʋ pùor, a Naaŋmɩn ƴãwfʋ, a naaŋmɩn-sàw-deb, a nɔ̃wfʋ, a kanyir nɩ a su-baalʋ pùor.

¹² Zɛbr a naaŋmɩn-sàw-deb zɛb-vla. Ƴãw fãw páw a nyɔ-vʋʋrʋ na be kʋralɛ a, a ʋ páwfʋ ƴãw n'a a Naaŋmɩn bʋɔlɩ fʋ, a lɛn daar fʋ na hieri a fʋ naaŋmɩn-sàw-deb vla, yel-mɩn dem yaga niŋé a.

¹³ Ɩ̃ zɛlɛ fʋ nɩ a Naaŋmɩn niŋé, ʋl na kʋ̀rɛ nyɔ-vʋʋrʋ a bome za a, nɩ a Kɩrɩta Yeezu niŋé, ʋl na dɩ a dãsɩ-vla a Pɔ̃sɩ-Pɩlatɩ niŋé, a naaŋmɩn-sàw-deb ʋ na hieri a pʋɔ a, ɩ̃ zɛlɛ fʋ na:

¹⁴ tɛr a Naaŋmɩn nɔ-ƴãwna vla, ʋ taa sãwnɛ ɩ, a ta lɛb tɛr nɩr ƴɛ̀rʋ ɛ, ɛ́ gù a lɛn daar a tɩ Sore Yeezu Kɩrɩta na na lɛb wa a.

¹⁵ A ʋlɩ sob na na wul a Kɩrɩta a daar nãà wa ta a, ʋlɛ n'ɩ a Na-kpɛ̃ɛ been na ɩ zu-nʋ̃ɔ̀ sob a, a na-mɩnɛ za Nãà nɩ a sorbɛ za Sore,

¹⁶ a ʋl yõ na bɛ tɛr kũu daar a, ɛ́ kpɩɛr cãà na bɛ tɛr tab a pʋɔ a, ʋl nɩsaal kãw za na bɛ nyɛ̃ ɛ́ kʋ̃ tʋ̃ɔ́ nyɛ̃ a. Ʋlɛ so ƴãwfʋ nɩ kpɛnʋ kʋralɛ. Amɛn.

¹⁷ Yel kʋ̀ a tẽw ŋa zu tɛra dem kɛ́ bɛ ta zɛwr bɛ tʋɔra ɩ, kɛ́ bɛ ta ƴãw a bɛ tɩɛrʋ a na-bome á ŋá na na tɔl a ƴãw ɛ, kɛ́ bɛ ƴãw a bɛ tɩɛrʋ a Naaŋmɩn ƴãw, ʋl na kʋ̀rɛ tɩ bʋ̃-vɩɛlɩ za bɛ dɩ vuo kɛ́ tɩ wone nɩ nʋ̃ɔ̀ a.

¹⁸ Yel kʋ̀ bɛ kɛ́ bɛ maalɛ a vla, ɛ́ kpɛ ɩ-vɩɛlɩ naalʋ, kɛ́ bɛ sàw tɩrɛ yaga ɛ́ pone a bɛ bome kʋ̀rɛ a bɛ taabɛ.

¹⁹ Lɛ n'a bɛ na páw na-bʋ̃-vɩɛlɩ na kʋ̃ sãw a gbõ taa, a bɛl mɩŋa ƴãw a nɩdaar ƴãw, kɛ́ bɛ wa tʋ̃ɔ́ páw a nyɔ-vʋʋrʋ tɔr za.

²⁰ Fʋ̃ʋ Timote e, maal tɛr a bom bɛ na kʋ̀ b a, gùr pùor cɔw a ƴɛ̀r-zawlɛ na bɛ tu naaŋmɩn-sàw-deb a, mɩ̀ gùr pùor cɔw a nɔkpɛn, a bɛlɩ dem na yel kɛ́ bɛ bãw na a na mɩ́ ŋmɩɛr a.

²¹ Bɛ mɩnɛ na tu a bãwfʋ ŋa tɔ pùor a, bɛ bɔr'a zãá nɩ a naaŋmɩn-sàw-deb. A Naaŋmɩn maalʋ, ʋ be a nyɩ zie!