1 Timote 5 - A SƐB-SÕW

A Timote tõ-fɛrɩ a kɩrɩta-nɩbɛ bʋʋrɛ bʋʋrɛ zie

¹ Dɛb-nyãw wa sãw a, ta yere ʋ tanɛ nɩ ʋ ɛ, ɛcɛ kpaalɛ ʋ mɛ̃ fʋ sãà n'ʋ a. Ɩrɛ a pɔlbili zie mɛ̃ yɛbr nɛbɛ a,

² a pɔw-bɛrɛ zie mɛ̃ mã mɩnɛ a, a pɔwsɩrali zie mɛ̃ yeepuuli a, nɩ tɩɛr-vɩɛlɩ tɛwr.

³ Ƴãwnɛ a pɔw-kɔbɛ, a bɛl na sɩrɩ bɛ tɛr nɩr a.

⁴ Pɔw-kʋɔr wa tɛr bibiir bɩɩ yan a, bɛlɛ nɛbɛ a fɛrɛ kɛ́ bɛ de niwn tɛr a Naaŋmɩn bɛ na ƴãwnɛ a ɩ-ɩrɩ, a bɛ mɩŋa yir ƴãw, ɛ́ maalɩ a bɛ dɔwrbɛ yáa a san. À ŋá n'a sɩrɩ vɩɛl a Naaŋmɩn zie.

⁵ Ɛ́ a pɔw-kʋɔr ʋl na sɩrɩ ɩ a pɔw-kʋɔr a, a ʋl na cɛ be ʋ yõ tẽtẽ a, ʋ ƴãw nɩ a ʋ tɩɛrʋ za a Naaŋmɩn ƴãw, ɛ́ ƴãw fãw lɔbr nuru puore zɛlɩ nɩ a ʋ sõwfʋ mʋ̃tɔ̃w nɩ tɩ̃ɩsɔw za.

⁶ Ɛcɛ a ʋl na tɩɛrɛ a nʋ̃ɔ̀ wob tɛwr a, ʋlɛ saa cãà vʋʋrɛ a, ʋʋ kpi na.

⁷ A yele á ŋá n'a a fɛr kɛ́ fʋ kpaalɛ bɛ, bɛ ta tɛr sãwna bɛ yere ɩ.

⁸ Nɩr bɛ wa kaarɛ a ʋ nɩbɛ zie a, baa zuo a za a bɛl na kpɩɛr a ʋ yir pʋɔ a, ʋ zawr'ɩ a naaŋmɩn-sàw-deb bɛr, ʋ kpɛ n faa zuo sob nɛ na bɛ tɛr a naaŋmɩn-sàw-deb a.

⁹ Pɔw-kʋɔr na bɛ tɛr yome lɩz'a ata nɩ dɔwlɛ, ɛ́ kul dɛb-been a, a bɛ tɛr sɔ́r kɛ́ bɛ sɛb a ʋ yúor ƴãw a pɔw-kɔbɛ pʋɔ ɩ.

¹⁰ A fɛr'a kɛ́ bɛ bãw ʋ a ʋ ɩ-vɩɛlɩ zũú: ʋ na guoli bibiir a, ʋ na kaa sãanbɛ zie a, ʋ na pɛ́w a kɩrɩta-nɩbɛ gbɛ́ɛ a, ʋ na mɔwlɩ a bɛlɩ dem na be kpɩɛrʋ pʋɔ a, ʋ na ƴãw fãw tu ɩ-vɩɛlɩ za pùor a.

¹¹ Ɛ́ a pɔw-kɔ-pɔ́lɛ́ a, ta ƴãw bɛ a pɔw-kɔbɛ lãw pʋɔ ɩ. Bʋ̃ʋ n'ʋ vɛ̃, a dɛb vʋla na mɩ́ wa taw bɛ zãá nɩ a Kɩrɩta a, bɛ mɩ́ bɔbr'ɩ sɩr lɛb-kulu.

¹² À ŋá n'a bɛ mɩ́ ɩ ƴãw a ƴɛ̀rʋ-maalʋ lo a bɛ zu, bɛ na sãw a bɛ nɔ-dãw-niwn sob bɛ na ƴãw a bɛr a.

¹³ Ɛ́ lɛb waar mɩ̀, bɛ na bɛ tɛr yel-ɩra a, bɛ mɩ́ zɔrɛ na cɔlɛ a nɩbɛ yie. A bɛ kaar mɛ̃ yel-ɩra yõ n'a bɛ bɛ tɛr ɛ, bɛ nɔnɛ nɩ ƴɛ̀rʋ ƴãw pʋɔ, nɩ yele na bɛ jɩ́rɛ bɛ a, ɛ́ bʋ̀nɛ ƴɛ̀rɛ sãsaralɛ.

¹⁴ A na ɩ à ŋá a, ɩ̃ bɔbr'a kɛ́ a pɔw-kɔ-pɔ́lɛ́ mɩ́ lɛb kul sɩrbɛ dɔw bibiir, kɛ́ bɛ kaarɛ a bɛ yir zie, a tɩ dɔ̃ dem ta tʋ̃ɔ́ nyɛ̃ yel-faa kãw za yel ɛ.

¹⁵ Bʋ̃ʋ n'ʋ vɛ̃, bɛ mɩnɛ be n be tu a Sɩtaana bɔr baarɩ.

¹⁶ Pɔw na sàw de Naaŋmɩn a wa tɛr pɔw-kɔbɛ a ʋ nɩbɛ pʋɔ a, ʋ sõwne bɛ, a Lãw-yir ta so a bɛ kaafʋ ɛ, lɛ n'a a Lãw-yir na tʋ̃ɔ́ sõwne a bɛl na sɩrɩ ɩ a pɔw-kɔbɛ a.

¹⁷ A nɩ-kore na tone a nɩ-kpɛ̃ɛnʋ tome vla a sɛwnɩ nɩ ƴãwfʋ gb'a ayi, baa zuo a za a bɛl na hanɛ a Naaŋmɩn ƴɛ̀rʋ ƴãw nɩ a wulu ƴãw a.

¹⁸ A Sɛb-sõw yel'a: «A náab na vàrɛ a fʋ ble a, fʋ kʋ̃ 'lẽ a ʋ nʋɔr pàw ɛ», nɩ kɛ́: «A tõ-tõ-bie sɛwnɩ nɩ a ʋ sã-ya.»

¹⁹ Nɩbɛ ayi bɩɩ ata bɛ wa dɩ nɩ-kʋra sãwna dãsɩɛ a, fʋ̃ʋ taa sàwr dier kɛ́ sɩza n'a ɩ.

²⁰ Mɩ́ yel a sãwna dem sãwna a nɩbɛ za niŋé, kɛ́ a bɛl na cɛ a tʋ̃ɔ́ zɔrɛ dɛ̃bɩ̃ɛ.

²¹ Ɩ̃ zɛlɛ fʋ nɩ yãayãa a Naaŋmɩn nɩ a Kɩrɩta Yeezu niŋé, lãwnɩ a malkɩ mɩnɛ a Naaŋmɩn na kaa ír a niŋé, tuur a nɛ́ɛ á ŋá za, ɛ́ ta owre a tub pʋɔ, maalɛ bɛ mɩnɛ ɛ́ sãwnɛ bɛ mɩnɛ a fʋ ɩ-ɩrɩ pʋɔ ɩ.

²² Ta zɛ̃zɛ̃ ír nuru dɔwlɩ nɩr kãw za zu kʋ̀ ʋ tõ-nʋɔr kãw a Lãw-yir pʋɔ ɩ, ta pʋɔ fʋ tɔ yel-bebe pʋɔ ɩ. Ɛ́ a fʋ̃ʋ mɩŋa a, ƴãw fãw tɛr a fʋ vɩɛlʋ.

²³ Ta cãà nyúur kʋ̃ɔ tɛwr ɛ. Mɩ́ nyũ divɛ̃ blã, a fʋ pʋ-'wɔbɛ nɩ fʋ na bɛ mɩ́ yaa kɛ́ lo bàalʋ a ƴãw.

²⁴ Nɩbɛ bɛ mɩnɛ be n be a bɛ yel-bebe mɩ́ sãá cãàmɩ́, ɛ́ bɛ bɛ maal'ɩ bɛ a ƴɛ̀rʋ sɛr ɛ. Ɛ́ bɛ mɩnɛ a, a ƴɛ̀rʋ maalʋ pùorí n'a a bɛ yel-bebe mɩ́ sãá cãàmɩ́.

²⁵ Lɛ mɩ̀ n'a, a ɩ-vɩɛlɩ mɩ́ sãá nɩ cãàmɩ́, ɛ́ a al na saa bɛ mɩ́ sãá sɛr a kʋ̃ tʋ̃ɔ́ sɔwlɩ gã ɩ.