1 Timote 3 - A SƐB-SÕW

A Lãw-yie kaarbɛ yele

¹ A ƴɛ̀rʋ ŋa ɩ n sɩza: nɩr wa bɔbr k'ʋʋ tone a Lãw-yir kaafʋ tome a, tõ-vla n'ʋ ʋ bɔbr.

² A lɛ ƴãw a, a fɛr'a kɛ́ a Lãw-yir-kaarɛ ta tɛr sãwna bɛ yere ɩ, ʋ kul pɔw been yõ, ɛ́ mɩ́ nyɔw ʋ tʋɔra a dɩb nɩ a nyub ƴãw, ʋ bãw yã, ɛ́ bãw ʋ tʋɔra maal-tɛrʋ, ʋ nɔnɛ a sãanbɛ tɛrʋ, ɛ́ ɩ nɩr na na tʋ̃ɔ́ wule a nɩbɛ a,

³ ʋ ta ɩ dã-nyúure ɩ, ɛ́ ta ɩ nɔ-haa-bɔbrɛ ɩ. Ʋ ɩ nɩsaal-bàalʋ, ʋ ta ɩ zɛb-ŋmarɛ nɩ libi-nɔ̃wnɛ ɩ.

⁴ Ʋ bãw a ʋ mɩŋa yir kaafʋ, ɛ́ ɩ a ʋ bibiir bɛ ɩ nɔ-sàwrbɛ na ƴãwnɛ ʋ yaga za a.

⁵ Bʋ̃ʋ n'ʋ vɛ̃, nɩr na bɛ bãw a ʋ mɩŋa yir kaafʋ a, ŋmɩŋmɩn za n'a ʋ na tʋ̃ɔ́ kaa Naaŋmɩn Lãw-yir zie?

⁶ Ʋ ta ɩ nɩr na sàw de Naaŋmɩn paalʋ a ɩ, alɛ bɛ ɩ lɛ, ʋ nãà ɩrɛ nɩ pɔ̀lʋ tɩ nyɛ̃ nɩ dɔwrʋ mɛ̃ a Gɛgɛra a.

⁷ Ɛ́ lɛb waar mɩ̀, a fɛr'a kɛ́ a yẽw dem dɩrɛ dãsɩ-vla a ʋ ƴãw, lɛ n'a a nɩbɛ kʋ̃ ɩrɛ ʋ laar ɛ, ʋʋ kʋ̃ kpɛ a Gɛgɛra bɛrɩ pʋɔ ɩ.

A dɩakɩr mɩnɛ yele

⁸ A dɩakɩr mɩnɛ mɩ̀ a, a sɛw na kɛ́ bɛ ɩ nɩbɛ na ƴãwnɛ bɛ tʋɔra a, bɛ ta tɛr ƴɛ̀r-nɛ́ɛ ayi ɛ, ta nɔnɛ dãa ɩ, ɛ́ ta tu tɛra na waar'ɩ vĩ a pùor ɛ.

⁹ Bɛ maal tɛr a naaŋmɩn-sàw-deb yel-sɔwla tɩɛr-vla pʋɔ.

¹⁰ A fɛr'a kɛ́ bɛ mɩ́ de niwn ɩ bɛ kaa, bɛlɛ bɛ wa nyɛ̃ yel-faa kãw za a bɛ zie a, bɛ na tʋ̃ɔ́ na tone a dɩakɩr tome.

¹¹ A bɛl na ɩ a pɔwbɛ a, a mɩ̀ sɛw na kɛ́ bɛ ƴãwnɛ bɛ tʋɔra. Bɛ ta manɛ a nɩbɛ yel-faar ɛ, ɛ́ mɩ́ nyɔw bɛ tʋɔra a dɩb nɩ a nyub ƴãw, ɛ́ tu a yele za vla taa lɛbr pùor ɛ.

¹² A dɩakɩr mɩnɛ, bɛ kul pɔw beƴeni ɛ́ kaarɛ a bɛ bibiir nɩ a bɛ yir zie vla.

¹³ A bɛlɩ dɩakɩrɩ na tone a bɛ tome vla a, bɛ mɩ́ nyɛrɛ nɩ ƴãwfʋ a nɩbɛ za zie, ɛ́ mɩ́ ɓãá ƴãw ƴɛ̀rɛ a sàw-deb na ɩ tɩ lãw nɩ a Kɩrɩta Yeezu a ƴɛ̀rʋ.

A naaŋmɩn-sàw-deb yel-sɔwl-kpɛ̃ɛ

¹⁴ Ɩ̃ sɛbr'ɩ à á ŋá kʋ̀rɛ fʋ, tɩɛrɛ nɩ kɛ́ ka nɩ blã a, ɩ̃ na wa na wa páw fʋ.

¹⁵ Ɛcɛ, mãa wa ɩ mɛ̃ ɩ̃ kɔwrɛ na a, fʋ na bãw nɩ a lɛ a na sɛw kɛ́ fʋ ɩrɛ a Naaŋmɩn yir pʋɔ na ɩ a Naaŋmɩn na vʋʋrɛ a Lãw-yir a, a Lãw-yir ŋa na ɩ a yel-mɩŋa kpul ɛ́ tɩɛ a yel-mɩŋa tɛr a.

¹⁶ Yel-mɩŋa sɩza, bʋnʋ bɛ ka be ɩ, a tɩ naaŋmɩn-sàw-deb yel-sɔwla ɩ n kpɛ̃ɛ. A Kɩrɩta wa na mɛ̃ nɩsaal a, Vʋʋrʋ Sõw wul'a a sãá k'ʋʋ ɩ n nɩ-mɩŋa, malkɩ mɩnɛ nyɛ̃ ʋ na, bɛ hier'a yel a ʋ yele a nɩ-bʋʋr-yoru zie, yaga sàw na de a ʋ yele a tẽ-daa zu, bɛ zɛw ʋ na do n a saa-zu yúor-vɩɛlʋ-danʋ pʋɔ.