1 Timote 1 - A SƐB-SÕW

A Pol puore nɩ a Timote

¹ A mãa Pol, a Naaŋmɩn tɩ Faarɛ nɩ a Kɩrɩta Yeezu ƴãw tɩ na ƴãw a tɩ tɩɛrʋ a, bɛl na ƴãw ɩ̃ ɩ a Kɩrɩta Yeezu nɩ-tona a,

² mãa n'ʋ sɛbr a fʋ̃ʋ Timote, na sɩrɩ ɩ a ɩ̃ bie a naaŋmɩn-sàw-deb pʋɔ a. A Naaŋmɩn tɩ Sãà nɩ a Kɩrɩta Yeezu tɩ Sore, bɛ kʋ̀ b maalʋ nɩ su-ɓaarʋ nɩ ƴã-ɓaarʋ.

Gù fʋ tʋɔra a wul-wul-bɛlbɛlbɛ ƴãw

³ Mɛ̃ a lɛ ɩ̃ na tɩ yel kʋ̀ b ɛ́ cere a Masedʋan a, kpɩɛr a Efɛɛzɩ tẽw be, tʋ̃ɔ́ mɩ́ yel kʋ̀ a bɛ mɩnɛ kãw, kɛ́ bɛ ta wule wul-yoru a nɩbɛ ɩ,

⁴ kɛ́ bɛ bɛr a suolu á ŋá nɩ a sãàkʋm-kore dɔw-tu-taa na bɛ tɛr tɛwfʋ zie a manʋ. A waar'ɩ nɩ nɔkpɛn tɛwr, ɛ́ bɛ sõwne a Naaŋmɩn pʋ-tɩɛrʋ bãwfʋ na mɩ́ tu a ʋ tub a sàw-deb pʋɔ a ɩ.

⁵ Yel à à ŋá, k'aa nɩbɛ tʋ̃ɔ́ tɛr nɔ̃wfʋ na yi soci-pla parpar pʋɔ a, nɩ tɩɛr-vla nɩ naaŋmɩn-sàw-deb na tori dẽdẽ a pʋɔ.

⁶ Bɛ mɩnɛ na bɛr a sɔ́r ŋa a, a bɛ ƴɛ̀r-foli bɔr'ɩ bɛ na.

⁷ Bɛ mɩ́ yel'a kɛ́ a Naaŋmɩn wulu bãw-bãw-karɩ nɛbɛ, zɩ̃ kɛ́ bɛ bɛ bãw bom nɛ bɛ na yere a ɩ, nɩ bom nɛ ƴɛ̀rʋ bɛ na ƴɛ̀rɛ mɩrɛ nɩ zu a ɩ.

⁸ Tɩ bãwnɩ a na, a Naaŋmɩn wulu vɩɛl'a tɩmɛ wa de ʋ ɩrɛ nɩ mɛ̃ a lɛ ʋ na wul a.

⁹ Tɩ bãw a yel ŋa pɛr vla: nɩ-mɩŋa ƴãw bɛ n'a a Naaŋmɩn wulu be ɩ, bɛ-wonbɛ nɩ nɩ-gaarɩ ƴãw n'a, nɩbɛ na bɛ zɔrɛ Naaŋmɩn a, nɩ yel-bier-maalbɛ, bɛlɩ dem na bɛ ƴãwnɛ Naaŋmɩn nɩ a bʋ̃-son a ƴãw n'a, sãà-kʋrbɛ nɩ mã-kʋrbɛ, nɩ-kʋrbɛ,

¹⁰ pɩ̃ɔ-yel-maalbɛ, dɛb-bɛrɛ na gánɛ nɩ dɛbli a, nɩbɛ na kʋɔrɛ gbãgbaar a, zir-ŋmarbɛ ƴãw n'a, nɩbɛ na mɩ́ pɔ ɛ́ bɛ ír a bɛ pɔɛ a ƴãw n'a, nɩ bom za na bɛ tu a wul-vla a.

¹¹ A wulu ŋa be n a Yel-nʋ̃ɔ̀ bɛ na kʋ̀ m a pʋɔ. A Yel-nʋ̃ɔ̀ ŋa yi n a yúor-vɩɛlʋ-danʋ Naaŋmɩn zie, ʋl na ɩ a nʋ̃ɔ̀ yib zie a.

A Pol danɛ nɩ a Naaŋmɩn

¹² Barka yaga za n'a ɩ̃ puore a sob ŋa na kʋ̀ m a fãw a, a tɩ Sore Kɩrɩta Yeezu: ʋ bɛr'ɩ tɩɛrʋ a ɩ̃ ƴãw, ɛ́ de m ɩ̃ tone a ʋ tome,

¹³ a mãa na tɩ dãw sãwnɛ a ʋ yúor, dɔwrɛ ʋ ɛ́ tʋʋr ʋ a. Bɛ-bãwfʋ n'a tɩ so à á ŋá za ɩ̃ na tɩ ɩrɛ a, a naaŋmɩn-sàw-deb bɛ tɩ be a ɩ̃ zie ɩ. Ɛcɛ, a Naaŋmɩn zɔ n ɩ̃ nɩbaalʋ.

¹⁴ Sɩza, a tɩ Sore maalʋ siw nɩ a ɩ̃ zu yaga za, lãwnɩ a naaŋmɩn-sàw-deb nɩ a nɔ̃wfʋ na be a Kɩrɩta Yeezu pʋɔ a.

¹⁵ A ƴɛ̀rʋ na bɛ tɛr bʋnʋ towtow, ɛ́ sɛw kɛ́ nɩbɛ za sàw de daadaa a n'ɩ ŋa: a Kɩrɩta Yeezu wa n a tẽ-daa zu k'ʋʋ wa faa a yel-bebe dem, ɛ́ mãa n'ʋ kpɛ faa zuo bɛ za.

¹⁶ Ɛcɛ Naaŋmɩn zɔ n a ɩ̃ nɩbaalʋ, k'aa Kɩrɩta Yeezu tʋ̃ɔ́ de niwn tĩ a ɩ̃ zie, mãa na kpɛ faa zuo a nɩbɛ za a, wul a ʋ su-bɛ-pawra ɩb za a sãá ɩ bãwfʋ a bɛlɩ dem za nãà wa sàw de a Naaŋmɩn, kɛ́ bɛ tʋ̃ɔ́ páw a nyɔ-vʋʋrʋ na be kʋralɛ a.

¹⁷ A yome za Nãà, a Naaŋmɩn-been yõ tẽtẽ na bɛ tɛr kũu daar, ɛ́ nɩr kʋ̃ tʋ̃ɔ́ nyɛ̃ nɩ mimir a, ʋlɛ so ƴãwfʋ nɩ yúor-vɩɛlʋ-danʋ, a yome yome za. Amɛn.

¹⁸ Ɩ̃ bie Timote e, a wulu n'ɩ à ŋà ɩ̃ na kʋ̀rɛ fʋ tu n a naaŋmɩn-ƴɛ̀r-manbɛ ƴɛ̀r-bie bɛ na tɩ dãw ƴɛ̀r a fʋ ƴãw a. A ƴɛ̀r-bie á ŋá a, a ɩ fʋ kpɛmɛ tʋ̃ɔ́ zɛb a zɛb-vla

¹⁹ nɩ naaŋmɩn-sàw-deb nɩ tɩɛr-vla. Bɛ mɩnɛ zawr'ɩ a bɛ tɩɛr-vla ŋa tub, a bɛ naaŋmɩn-sàw-deb tu kʋ̃ɔ.

²⁰ Imene nɩ Alɛsãdɩr pʋɔ nɩ a nɩbɛ bɛ ŋa pʋɔ. Ɩ̃ de bɛ na ƴãw Sɩtaana nuru pʋɔ kɛ́ bɛ zànɩ yã, taa lɛb tʋʋr Naaŋmɩn zʋm ɛ.