1 Samɩɛl 7 - A SƐB-SÕW

¹ Lɛ n'a a Kɩrɩyatɩ-Yeyarim tẽw dem tɩ wa de a Sore wõ-taa daga. Bɛ tɩ cen nɩ ʋ nɩ Abinadab yir na be a tãw zu a, tɩ ka nũu ƴãw a ʋ bidɛb Eleazaar, k'ʋʋ gùre a Sore wõ-taa daga.

A Samɩɛl ɩ n a Ɩsɩrayɛl nɩbɛ ƴɛ̀r-dɩrɛ ɛ́ puori bɛ zɛb tʋ̃ɔ́ a Filisɩtɛ̃ mɩnɛ

² A Sore wõ-taa daga bɛ na tɩ bin a Kɩrɩyatɩ-Yeyarim a, a tɩ kɔwr'a, tarɛ yome lɩzɛr, ɛ́ a Ɩsɩrayɛl nɩbɛ za wa ìr bɔbr tuotuo kɛ́ bɛ lɛb taw pɩɛlɩ a Sore.

³ Lɛ n'a a Samɩɛl tɩ yel a Ɩsɩrayɛl nɩbɛ za: «Alɛ wa ɩ a nyɩ pʋɔ za n'ʋ nyɩ lɛb waar'ɩ a Sore zie a, nyɩɩm bɛr a ŋmɩn-yoru puoru nɩ a Asɩtarte mɩnɛ puoru. Nyɩ lɩɛbɩ a nyɩ socir za tu n a Sore, nyɩ puore a ʋl yõ, ʋʋ na faa nyɩ nɩ a Filisɩtɛ̃ mɩnɛ nuru pʋɔ.»

⁴ Lɛ n'a a Ɩsɩrayɛl nɩbɛ tɩ lɔb a Báàl mɩnɛ nɩ a Asɩtarte mɩnɛ bɛr, ɛ́ tone a Sore yõ tẽtẽ tome.

⁵ Al pùorí, a Samɩɛl tɩ yel'a: «Nyɩ bʋɔlɩ a Ɩsɩrayɛl nɩbɛ za ɓã taa a Misɩpa. Ɩ̃ na puor'ɩ a Sore a nyɩ ƴãw a be.»

⁶ A Ɩsɩrayɛl nɩbɛ tɩ ɓã n taa a Misɩpa. Bɛ tɩ 'wɔ̃w nɩ kʋ̃ɔ cir bɛr a tẽw a Sore niŋé. A ʋlɩ bibir a, bɛ tɩ tɛr'ɩ mʋta-tuo a be ɛ́ yel à ŋá: «Tɩ maal'ɩ yel-bier sãw a Sore.» A Misɩpa be n'a a Samɩɛl tɩ ɩ a Ɩsɩrayɛl nɩbɛ ƴɛ̀r-dɩrɛ.

⁷ A Filisɩtɛ̃ mɩnɛ tɩ wõ na k'aa Ɩsɩrayɛl nɩbɛ ɓã n taa a Misɩpa. Lɛ n'a a Filisɩtɛ̃ mɩnɛ nɩ-bɛrɛ tɩ ìr kɛ́ bɛ cen tɩ zɛb'ɩ bɛ. A Ɩsɩrayɛl nɩbɛ tɩ wõ a na, ɛ̀ dɛ̃bɩ̃ɛ nyɔw bɛ a Filisɩtɛ̃ mɩnɛ ƴãw.

⁸ Bɛ tɩ yel'ɩ a Samɩɛl: «Ta ɩ gbili ɛ! Ta jɛ tɩ bɛr ɛ! Kone cɔwr a Sore tɩ Naaŋmɩn, k'ʋʋ faa tɩ a Filisɩtɛ̃ mɩnɛ nuru pʋɔ.»

⁹ A Samɩɛl tɩ nyɔw nɩ peli-pɔl maal'ɩ nyɩw-a-za-bàwr ʋ za kʋ̀ a Sore. A Samɩɛl tɩ kõ na cɔw a Sore a Ɩsɩrayɛl nɩbɛ ƴãw, a Sore sàw de a ʋ puoru.

¹⁰ Zɩ̃ k'aa Samɩɛl na tɩ maalɛ a nyɩw-a-za-bàwr a, a Filisɩtɛ̃ mɩnɛ tɩ taw na ta kɛ́ bɛ zɛb'ɩ a Ɩsɩrayɛl nɩbɛ. Ɛcɛ a ʋlɩ bibir a, a Sore tɩ ɩ na saa tanɛ a Filisɩtɛ̃ mɩnɛ kpɛ̃w kpɛ̃w za, dɛ̃bɩ̃ɛ nyɔw bɛ, a Ɩsɩrayɛl nɩbɛ zɛb tʋ̃ɔ́ bɛ.

¹¹ A Ɩsɩrayɛl nɩbɛ tɩ yi n a Misɩpa diw pɔb a Filisɩtɛ̃ mɩnɛ tɩ sãá nɩ Bɛtɩ-Kaar pile.

¹² A Samɩɛl tɩ yel'a: «A Sore sõw tɩ na wa ta n a ka». Lɛ n'a ʋ tɩ de kʋsɩɛr teli a Misɩpa nɩ a Nyɩ́ɩm cara pʋɔ, ɛ́ por ʋ kɛ́ “Evɛn-Ezɛɛr”, a pɛr lɛ kɛ́ “Sõwfʋ-Kʋsɩɛr”.

¹³ A zɛb-tʋ̃ɔ́fʋ ŋa tɩ siwr'ɩ a Filisɩtɛ̃ mɩnɛ, bɛ́ bɛ mɩ́ lɛb tɩ sàw nɛbr gbɛ́r a Ɩsɩrayɛl tẽw pʋɔ ɩ. A Samɩɛl cãafʋ daar za a, a Sore tɩ wul'ɩ a ʋ kpɛnʋ a Filisɩtɛ̃ mɩnɛ.

¹⁴ A Ɩsɩrayɛl nɩbɛ tɩ lɛb'a de a ten al a Filisɩtɛ̃ mɩnɛ na tɩ faa a bɛ zie a, a na tĩ a Ekiron tɩ sãá nɩ a Gatɩ a. A Ɩsɩrayɛl nɩbɛ mɩ̀ tɩ faa nɩ a Filisɩtɛ̃ mɩnɛ tẽw a bɛ zie. Ƴã-ɓaarʋ tɩ be n a Ɩsɩrayɛl nɩbɛ nɩ Amoritɩ mɩnɛ cara pʋɔ.

¹⁵ A Samɩɛl tɩ ɩ n a Ɩsɩrayɛl nɩbɛ ƴɛ̀r-dɩrɛ tɩ ta n a ʋ kũu daar.

¹⁶ Yome za, ʋ mɩ́ tɩ cɔlɩ nɩ a Betɛl, a Gilgal nɩ a Misɩpa, dɩ a ƴɛ̀rʋ a ziir á ŋá za pʋɔ.

¹⁷ Al pùorí, ʋ mɩ́ tɩ lɛb'a wa a Arama, be na n'a a ʋ yir tɩ be a ƴãw. Be n'a ʋ tɩ dɩrɛ a ƴɛ̀rʋ kʋ̀rɛ a Ɩsɩrayɛl nɩbɛ, ɛ́ be n'a ʋ tɩ mɛ bàwr-maal-kuur a Sore ƴãw.