1 Samɩɛl 6 - A SƐB-SÕW

A Filisɩtɛ̃ mɩnɛ lɛb'a bɛr a wõ-taa daga ʋ cen a Ɩsɩrayɛl tẽw

¹ A Sore wõ-taa daga tɩ maal'ɩ cuwr ayopõi a Filisɩtɛ̃ mɩnɛ tẽw.

² A Filisɩtɛ̃ mɩnɛ tɩ bʋɔl'ɩ a bɛ bàwr-maalbɛ nɩ a bɛ bàwr-bʋwrbɛ wa sowri bɛ: «Tɩ ɩ a Sore wõ-taa daga ŋmɩn? Nyɩ wul tɩ a lɛ tɩ na na ɩ lɛb tɩr ʋ bɛr, ʋ lɛb kul a ʋ tẽw a.»

³ Bɛ tɩ sɔw na: «Nyɩmɛ wa bɛrɛ a Ɩsɩrayɛl Naaŋmɩn wõ-taa daga a, nyɩɩm ta bɛr ʋ ʋ lɛb kul zawla ɩ. Nyɩ nɩ̃ɛ ƴãw fãw kʋ̀ ʋ sãwna ír-bɛrʋ bom. Lɛ n'a nyɩ na sanɩ, ɛ́ bãw bʋ̃ʋ n'ʋ so a Naaŋmɩn ŋa tɩ wule nyɩ a ʋ kpɛnʋ bɛ tɛr bɛ́rʋ.»

⁴ A Filisɩtɛ̃ mɩnɛ tɩ sowr'a: «Bʋ̃ʋ n'ʋ tɩ na tɩr?» A bàwr-maalbɛ nɩ a bàwr-bʋwrbɛ sɔw à ŋá: «Mɛ̃ a lɛ a Filisɩtɛ̃ na-mɩnɛ na ɩ na-mɩnɛ anũu a, nyɩ tɩr salm-zɩɛ bome anũu na ŋmɛ̃ mɛ̃ a mãsuwe a, nɩ salm-zɩɛ 'wɔn anũu, bʋ̃ʋ n'ʋ vɛ̃, bʋ̃-faa been n'ʋ páw a nyɩ za, a nyɩɩm nɩ a nyɩ na-mɩnɛ.

⁵ A na ɩ à ŋá a, nyɩ maalɩ bome na ŋmɛ̃ mɛ̃ a nyɩ mãsuwe a, nɩ a 'wɔn na sãw a nyɩ tẽw bɛr a, ɛ́ nyɩ na zɛw nɩ a Ɩsɩrayɛl Naaŋmɩn yúor-vɩɛlʋ-danʋ. A mɩnɛ kãw, ʋ na bɛr'a bɛ cãà wule a ʋ kpɛnʋ a nyɩ zu, a nyɩ ŋmɩmɛ zu nɩ a nyɩ tẽw zu ɛ.

⁶ Nyɩ ta dɩ tuo kpãa tobr mɛ̃ a Faarawɔ̃ nɩ a Eziptɩ tẽw dem a ɩ. Nyɩ bãw nɩ a lɛ a Naaŋmɩn ŋa na ɩ bɛ, ɛ́ gù bɛ tɩ bɛr a Ɩsɩrayɛl nɩbɛ a.

⁷ A na ɩ à ŋá a, nyɩ maalɩ torko paala, de na-nyamɛ ayi na cãà ƴɛnɛ a náli a, ɛ́ bɛ dãw tuo a na-kʋɔrɩ dàa a. Nyɩ na ƴãw nɩ a na-nyamɛ a torko ƴãw, ɛ́ tɛr a náli lɛb tɩ ƴãw a zaw pʋɔ.

⁸ Nyɩ na de nɩ a Sore wõ-taa daga dɔwlɩ a torko zu. Ɛ́ a salm-zɩɛ bome nyɩ na kʋ̀rɛ a Naaŋmɩn a sãwna san-yaafʋ ƴãw a, nyɩ na ƴãw a nɩ dawle pʋɔ bin kɔwlɩ a wõ-taa daga, ɛ́ bɛr a torko ʋ cere,

⁹ ɛ́ nyɩ jɩ́rɛ: a na-nyamɛ wa lo a Ɩsɩrayɛl tẽw sɔ́r, tu a Bɛtɩ-Semɛsɩ lowr a, a na wul'a k'aa Ɩsɩrayɛl Naaŋmɩn sɩrɩ n'ʋ tɩ ƴãw tɩ a dɔwrʋ á ŋá za. Ɛcɛ alɛ bɛ wa tu a sɔ́r ʋl a, tɩ na bãw na kɛ́ ʋlɛ bɛ n'ʋ ƴãw tɩ a kpɩɛrʋ á ŋá ɩ, tab'a a mɩ̀ ta tɩ.»

¹⁰ A Filisɩtɛ̃ mɩnɛ tɩ ɩ n a lɛ bɛ na tɩ wul bɛ a. Bɛ tɩ nyɔw nɩ na-nyamɛ ayi na cãà ƴɛnɛ a náli a, ƴãw a torko ƴãw, ɛ́ diw a náli pàw a zaw pʋɔ.

¹¹ Bɛ tɩ ɓáw nɩ a Sore wõ-taa daga dɔwlɩ a torko zu, lãwnɩ a dawle na ƴãw a salm-zɩɛ 'wɔn nɩ a bome al na ŋmɛ̃ mɛ̃ a bɛ mãsuwe a.

¹² A na-nyamɛ tɩ de nɩ a Bɛtɩ-Semɛsɩ sɔ́r daadaalɛ, tuur ʋ cere, ɛ́ kone bɛ tɛr bɛ́rʋ ɛ, ɛ́ bɛ bɩ̀ɛrɛ dʋrʋ bɩɩ gʋba ɩ. A Filisɩtɛ̃ mɩnɛ na-mɩnɛ tɩ tu a na tɩ ta a Bɛtɩ-Semɛsɩ tẽw tʋr-bɔw ƴãw.

¹³ A Bɛtɩ-Semɛsɩ tẽw dem tɩ be n a fʋɔla pʋɔ ŋmarɛ a ble. Bɛ tɩ zɛw nɩ zu nyɛ̃ a wõ-taa daga, nʋ̃ɔ̀ kpɛ bɛ.

¹⁴ A torko na tɩ ta a Bɛtɩ-Semɛsɩ tẽw Zozue pu-pʋɔ a, ʋ tɛw na àr a be. Kʋsɛ-kpɛ̃ɛ kãw tɩ gã nɩ a be. Bɛ tɩ ɓar'ɩ a torko dàar, ɛ́ nyɔw a na-nyamɛ kʋ maal'ɩ nyɩw-a-za-bàwr kʋ̀ a Sore.

¹⁵ A levitɩ mɩnɛ tɩ siwr'ɩ a Sore wõ-taa daga nɩ a dawle na tɩ ƴãw a salm-zɩɛ bome bin kɔw a wõ-taa daga a. Bɛ tɩ dɔwl'ɩ a za a kʋsɛ-kpɛ̃ɛ ʋl zu. A Bɛtɩ-Semɛsɩ tẽw dem tɩ maal'ɩ nyɩw-a-za-bàwr nɩ lãw-taa bàwr kʋ̀ a Sore a ʋlɩ bibir nɛ.

¹⁶ A Filisɩtɛ̃ mɩnɛ na-mɩnɛ anũu na tɩ nyɛ̃ à à ŋá a, bɛ tɩ lɛb'a kul a Ekiron a ʋlɩ bibir tɔr za.

¹⁷ Salm-zɩɛ mãsuwe á ŋá n'a a Filisɩtɛ̃ mɩnɛ tɩ kʋ̀ a Sore, a sãwna san-yaafʋ ƴãw: Asɩdɔdɩ tẽw ƴãw, salm-zɩɛ been, Gaza ƴãw, salm-zɩɛ been, Asɩkalon ƴãw, been, Gatɩ ƴãw, been, Ekiron ƴãw, been.

¹⁸ Ɛ́ a salm-zɩɛ 'wɔn a, a tɩ ɩ n a Filisɩtɛ̃ mɩnɛ na-mɩnɛ anũu ten nʋɔr: a tẽ-kpɛ̃ɛ na ŋmãa dacĩ-kpɛ̃w viiri a tɩ tɔ n a tẽli na bɛ ŋmãa dacin viiri a, lãwnɩ a fʋɔla ʋl pʋɔ a kʋsɛ-kpɛ̃ɛ na be a, a kʋsɛ-kpɛ̃ɛ ʋl zu bɛ na tɩ tow a Sore wõ-taa daga dɔwlɩ a. Nɩ dɩ̃a a, a kʋsɩɛr ʋl cãà na be a Bɛtɩ-Semɛsɩ tẽw Zozue pu-pʋɔ.

¹⁹ A Sore tɩ dɔwr'ɩ a Bɛtɩ-Semɛsɩ tẽw dem, bɛ na tɩ jɩ́r a wõ-taa daga a ƴãw. Nɩbɛ tùr-lɩz'a ayi nɩ pie (50 000) zu a, ʋ tɩ ɩ na nɩbɛ lɩz'a ata nɩ pie kpi. Lɛ n'a a nɩbɛ bɛl za na cɛ cãà vʋʋrɛ a tɩ be wahala pʋɔ, a Sore na tɩ dɔwrɩ bɛ a ƴãw.

²⁰ A Bɛtɩ-Semɛsɩ tẽw dem tɩ yel'a: «Ãa n'ʋ na tʋ̃ɔ́ àr a Sore niŋé, a Naaŋmɩn ŋa na ɩ sõw a niŋé?» Nɩ kɛ́: «Ʋlɛ wa yi a tɩ zie ka a, tẽbowle zie n'a ʋ na cen?»

²¹ Bɛ tɩ tõ n nɩbɛ kɛ́ bɛ tɩ yel a Kɩrɩyatɩ-Yeyarim tẽw dem: «A Filisɩtɛ̃ mɩnɛ lɛb'a tɩr a Sore wõ-taa daga. Nyɩ wa de ʋ cen nɩ a nyɩ zie.»